18
(Mar 9:33-37: Luk 9:46-48)
1 Houg: lang" cangzoo: yigi Aseing Yesu jhang moo ju" re" lho: ?Mougkhung: Mungdain: moo je gyi: thang su: kha yug nghoid wa lha"? ga: wigi zheung: myid: boem.
2 Yesu gi zooshang: dayug ri khe: yu lho: wigi nya: cangzoo: yi da" shidkhoin" moo yab jo, nhang: lho: tid da" zigi
3 ?Ngoo nanu" ri gyeing" gyeing" tid ba. Nanu" gi nheigloem: thid' pyam lho: zooshang: yi yhang ti" abue" lo rigi Mougkhung: Mungdain: moo yo" vang loo" goo" wa zi anghoid.
4 He: zooshang: yhangti"- nya: nheigloem: nyhoem: khyo su: gi Mougkhung: Mungdain: moo je gyi: thang su: nghoid wa.
5 Nga" myeing yoomo hid yhang: te" da" zooshang: dayug yug ri lhoem: kham: yu su: gi ngoo ri lhoem: kham: yu su: nghoid bye:.
(Mar 9:42-48 Luk 17:1-2)
6 ?Ngoo ri loem" jeing" nyid da" ngi, su: dayug yug ri loem" jeing" nheigloem: byo loo" nhang: su gi nya: leingzeing: moo lug lheung: je gyi: gyab' tei" tab' lho: no, thang panglai: thoem" thi" moo khyo pyam wa zigi nya: shid re" je ge nyid.
7 Mougmyid moo loem" jeing" khyoo: ri lhu: phyo da" thei' leung jang: joyoo mo mougmyid gi joem: lo" nyid bye:. Nheigloem: thei leung jang: gi gyeing" nyang: jo,- nghoid loug thei leung jang: koid thu' su: gi gyeing" nyang: joem: loo" wa zi nghoid.
8 ?Re" da" khyid: nghoid loug- lo, nghoid loug re" da" loem" jeing" nheigloem: ri lhu: phyo' nghoid rigi Hau: khyid: yo" lo, ri kho" pyam we. Khyid: lo, joeb joeb yo' apyaid ato: da" myithoem" moo davang loo" wa tho' rigi gungdu: ajoeb byeung" lo: zi apyaid ato: kangso yo" yu zigi je ge nyid.
9 Re" da" myojid" gi re" da" loem" jeing" khyoo: ri yu" shoid nhang: nghoid rigi hau: myojid" ri thoid pyam we'. Moovoo moug: myithoem" moo myojid" joeb ziyo' vang loo" wa tho' mo- myo, dajid" byo, ziyo' apyaid atoo: kangso dei jang" khyoo: vang loo" wa zigi je ge nyid.
(Luk 15:3-7)
10 ?Nanu" gi ngi, su: khayug ri we' byu ngi yoo ayu" wa shid re" lhid nyid ge. Nanu" ri ngoo tid da" zigi hau: zooshang: me" da" moug: lagyoo: yi gi Mougkhung: Aseing nga" pho da" myonhoo: ri khanham we' dayu" nyid boem ago".
11 (Byu da" nya: zoo: gi byug loo" mo, ri khyoid yu wa shid re" ju" re" zi nghoid.) ?He: Jhoem: dang: gi Loem ge" da" lo, mo lhid" to" da" jhoem: mungdang: xoug" moo gi aboo.?
12 ?Nanu" gi khasu" ein: soin: nyid go" byu dayug gi nyang: moo yo" da" yang dashoo: mo dadu: byug lo" ri goug: xe: goug: du: ri bouggung tho' mo yang kaid jangmoo- nyhid: too" kho lho: byug lo" da" yang ri ashoo: loo za: nyid wa la".
13 Byoug lo" da" yang ri shau" sho: lho: ri abyug da" yang goug: xe: goug: du: yoomo gau yi nge' pyo: da" tho' moo byug lo" da" yang dadu: ri shau" shoo: yoomo je gau yi ngei' pyoo: wa ein: wigi ngoo nanu" ri gyeing" gyeing" tid kyo".
14 Houg: yo' dakhyoo" ti" Mougkhung: tho' mo nanu" da" nya: phoo we' he: ngi, su: dayug we byug lam" loo" wa zi avhoo: ga: tid.
15 ?Re" mang: re" nhung" nang ri shoid nghoid rigi nyang: shoid zi ri si wa da" shid re" nya: jhang khyoo yhi: we. Nghoid loug we' re" eig yug za: shau" doem goo" ge' re" dang: ri tam gyo: nghoid rigi hau: mangnhung" phoo ri nang yo" khyoid yu bye:.
16 Nghoid loug nyang: gi re" da" dang: ri atam" gyo: nghoid rigi nyang: yo' dage" sagsi eig yug soem" yug sho: shu" lho: nyang: jhang khyoo yhi: ge. Houg: lang" jhoem: dang: moo bo ziyo' dakhyoo" ti" nang yooboo foin: da" khyoo: ri eig soem" yug sagsi bui" baja.
17 Gyeing: nyang: houg: bang: da" dang: ri we' nyang: atam" gyo: nghoid rigi hau: khyoo: bain sho' hpung moo yhe: tid kyoo" we. Lo" thang moo hpung: mo mo, da" dang: ri we' atam" gyo: nghoid rigi hau: yug ri Mangsoo ano' su: yo' tungbau byu khyo" soin: pyam ge.
18 ?Nanu" dangain" mo ri ngoo gyeing" gyeing" tid da" zigi mougmyid tho' moo nanu" toung: too" mootoo" gi mougkhung: tho' moo we' toung: too" lang" wa. Myidjang: tho' moo nanu" akhang" byid: moobyid: gi mougkhung: tho' moo we' akhang" byid: lang" wa zi nghoid.
19 ?Hau: tho' moo gootu: ngoo nanu" ri gyeing" gyeing" tid da" zi gi mougmyid tho' moo byu eig yug soem" yug veing" go" wigi akyu" mho' nghoid rigi mougkhung: tho' mo nga" phoo gi nanu" mho' da" zi dangain" ri byid: wim bye:.
20 Khasu" wim gari byu eig soem" yug gi Nga" da" myeing ri nghe: khau: lho: zoeb foem: nghoid rigi houg: bang: yo" ngoo dage" nyid wa zi nghoid.?
21 Hau: thang: ri Petru gi Yesu jhang moo yhe: lho: ?Aseing we" nga" mangnhung" gi ngoo ri shoid nghoid ri kha myhoo lheung: koo: ngoo nyang: ri yooboo khyoid byid: wa lha". Nyhed lheung: ju" sho' khyoid byid: ca" la"? ga: myid: yu.
22 Aseing Yesu gi ?Nyhed' lheung: za: anghoid. Nang nyhed, xi: xi: nyhed' lheung: ju" sho' yooboo ri khyoid goo" ca"? ga: wigi tid.
23 ?Houg: su" nghoid yoomo mougkhung: mungdain: gi hid: su" nghoid. Shidphyang" ri khokham dayug gi nya: deizoo: yi da" lhid" xoem"
24 pug ri sho' yu" wa shid re" myid to". Hau: lhid" xoem" pug sho' go" yu" uri ngei van, myoo" sho jhen: dab su: dayug ri khi: nhang.
25 Hau: yug gi jhen: houg: yo" xab' wa akhyoo" aboo loo: yoomo khokham Phoo gi hau: yug yo" dage" nya: myi: nya: zoo: yhoem: zi yookhoid dangain" oung" pyam lho: jhen: xab' wa amyeung" khyo' kaid.
26 Houg: lang: hau: yug gi khokham da" shidkhoin" moo goeb pid lho: ?ngoo ri zheung: kham: byid: shi" we' jhen: gi yo" sho' xab' zi nghoid? ga: toung" bain.
27 Khokham" gi nyang: ri nheig yu" khyeig yoomo nya: jhen: joem dangain" ri lhid" xoem" pug mo kho" pyam byid: lho: lhoid pyoid kaid bye:.
28 ?Nghoid loug hau: yug gi houg: mo thu' lo" da" uri nyang: ri ngei jhen: dashoo: dab da" nya: byencang" dage" moo" zoem" voin su: yo" thoung" shau" goo" lang" hau: jhen: dab su: da" leingzeing: moo gya, zeing ci: lho: wigi nang ngoo ri byid: ca" da" jhen: myab xab' we' ga: nhain.
29 Nya: byencang" phoo gi poid thug thoug lho: ?ngoo ri zheung: kham: byid: shi" we' jhen: yoo" sho xab' zi nghoid? ga: mho' tid.
30 Nghoid loug we' jhen: seing: gi atam" gyoo: loo za: hau: jhen dab su: ri jhen: ayo" xab' pyam pyam gi thung: tei" lhung to".
31 He: khyoo: ri gootu: da" moo" zoem zei byencang" yi myang lang" nheig soo" soo" yu" yoo: yoomo nyangnu" da" khokham jhang yhe: wigi bue" lo da" khyoo: dangain" ri kau: to" ago".
32 Houg: lang" khokham gi hau: da" moo" voin su: ri khe: yu lho: he: da" deizoo: gang:- Nang ngoo ri mho' sang: da" uri nang xab' ca" da" jhen: dangain" ri ngoo kho" pyam byid: bye: anghoid la".
33 Nang ri ngoo nheigkhyeig yhangti"- nang we re" da" byencang" ri nheig ge khyeig anghoid rhe" ga: tid.
34 khokham gi nheig gye" yu" yo: wigi hau: da" deizoo: ri we' jhen: abain xab' xab' gi thung: moo lhung to".?
35 Houg: su" nghoid yoomo nanu" gi mangnhung" nyang: cang" dayug da" yooboo ri dayug- re" da" nheigloem: ung: khoug: mo, gyeing" gyeing" khyoid pyam byid: go" nghoid rigi Mougkhung: tho' mo Nga" phoo we' nanu" da" yooboo ri gyeing" gyeing" khyoid pyam byid: wa zi nghoid ga: wigi jhoug" byid.