11
(Luk 7:18-35)
Houg: su" wigi nya: cangzoo: daxe: eig yug ri dang: bain pyeing: to" thang: ri voogung joem moo cang jhau" byid: wa shid re" mungdang: kho" kyoo" wa shid re" hau jo yoomo thu' lo.
Khristu koid da" moozoo" ri Yohan gi thung: khoug: mo shau" gyoo: lang" nya: cangzoo: yi ri nhang: kaid lho: ?Aseing gi gyoo" loo wa Meshia nghoid deing la". Houg: su" anghoid lang" gi goo" yug ri lang" nyid shi" wa la"? ga: myed kaid.
Yesu gi ?Nanu" myang yu" da" khyoo: shoug" gyo: yu" bye da" khyoo: dangain" ri Yohan ri lo" tid kyoo" ge. Myojed mo, ri myo doem myang nhang: ago"- khyid: agi loo: mo, gi khyoo: doem yo" so" lo" boem- manggam: noo mo, we' ge lo" boem. Noojed mo, we' dang: shau" gyo: lo boem bye:. Shid: jo, mo, we' doem dei to' lo ago"- asho" ajhen: mo, we' gauyi mungdang: ri shau" gyo: boem ago". Ngoo moo myidvhang: khyoo: aboo mo, gi ngi: lhoo' wa? ga: tid kyo" kaid.
Houg: bang: loo" khare" thang: ri Yesu gi Yohan da" khyoo: ri vhu" zhug lho: wigi mungbyu yi ri ?Nanu" gi ce: noem ri yu" wa ein: wigi kyoem khoug: moo yhi: go" lid hau lhei, nyid da" jam deung" ri yu" wa ein: yhi: go" lha". Houg: su" anghoid lang" gi ce: noem ri yu" wa ein: yhi: go"- yhui yhui wim da" byimi void ci: su ri yu" wa ein: yhi: go" lha". Yhui, yhui wim da" byimi void to" su: gi khokham" yhoem: moo dalhoung nyid. Houg: su" anghoid lang" gi ci: yu" yhi: go" Lapi: phoo ri yu" wa ein: yhi: go" la". Gyeing" nghoid rigi Lapi: phoo da" tho' moo je gyi: su: ri nanu" shau" myang bye: ein: ngoo tid. 10 Jhoem: mungdang: moo bo zigi Yu" ge' nang yhi: wa da" khyoo: ri yo" soin' koid da" nga" lagyoo: ri re" da" shid moo ngoo nhang: kaid- ga: da" dang: khoin" gi Yohan ri tid nau zi nghoid. 11 Ngoo jhug" jhug tid da" zigi ?Xangsu: mhoomyid: moo babtisma sara: Yohan tho' je gyi: da" zigi dayug we' abo yu" shi" nghoid loug mougkhung: mungdain: moo nge thang yug gi Yohan tho' je gyi: su: nghoid. 12 Babtisma sara: Yohan da" bidnyid mo wigi akhid" nyid" ju" sho' Mougkhung: mungdain: gi agyoo: atho' jhen" vang mo, yo' zain: go" nyid yoomo yo" ri" mo, za: hau mungdain: ri yo" yu sho' yoem: kaid ago". 13 Khasu" wim gari Yohan da" ayo, ju" sho' Lapi: yi dangain" mo, da" tarha" moo Mangso da" Mungdain: khyoo ri tid too" bye:. 14 Nanu" gi nyangnu" da" Mungdang: ri tam" gyo: nghoid rigi Yohan gi ju" ri" wa ga: tid to" da" Elia nghoid bye:. 15 Shoug" gyo: ja: nookhyab' dab mo hang" we' shau" gyoo: goo" baja.
16 ?Akhid" nyid" He: da" byumyu" ri ngoo ce: ja: dangtu' khyo" tid kyo" yu" shi" wa lha". Kid" vang" moo zhoung: yoin" to" da" zooshang: bang: gi nyang: cang" nyang: nyhoo: go" zoo" re. 17 ?Nanu" da" shid re" lo, xo' pui" khalhang' ri khayhi' moid nghoid loug we' nanu" ago" boem nghoid da. Ngoonu" gi kougshu: ngau nyid nghoid loug we' Nanu" abo ngoug abo kougshu: nghoid ago"? ga: tid nyid da" zooshang: bang: yo" dadu nyid boem da. 18 Khasu" wim gari Yohan gi azo: ashug loo re" ri nyangnu" gi ?he: yug gi yu vang su: nghoid nhung:? ga: tid boem ago". 19 Byu da" nya: zoo: gi zo: shug lho: re" ri we ?Yu" ge he: yug gi zo: myo, no su: zabyid shug lid: su: nghoid. Kheung" khyu: zoo: mo, yo' yooboo yoo" mo, da" bidnoem phoo nghoid? ga: doem tid ago". Nghoid sho' loug Mangso da" phajhi"- deingmain" khyoo: rigi Hau: phajhi" zei: thu' lo da:- nya: ashi" yo' sagsi toin" shid nyid? ga: tid.
(Luk 10:13-15)
20 Yesu hau: uri mau" pho" yoem: myoo" sho' toin" shid bye: da" voogung bang: gi nyang nya: yoo boo mo nheigloem: athid lo boem yoomo hau: da" voogung joem ri hid: su" ga: gyi koid da. 21 ?O" Kurazin we"- nang gi joem loo" wa O" Besaida we" nang joem: loo" wa. Khasu" wim ga ri re" eig yug ri toin" shid da" moozoo" zeing, joem ri Turu yo" Sidon eig voo moo toin" shid nghoid rigi jidmoo" byi: ri gang" ci: lho: nheigloem: bain thid zi gye" myang wim bye:. 22 Houg: yoomo nanu" ri ngoo tid zi gi hau: Mangso da" dang: khoo' bidnyid moo Turu yo" Sidon kham: wa da" dam gi nanu" kham: wa dam tho' moo je soem" wa zi nghoid. 23 Kapernaum we"- nang we moug: moo thug sho tu: to zi shau" wa la". Houg: su" anghoid lang" moovoo moug ju" sho' khyo kaid zi nang shau" wa nghoid. Khasu" wim gari nang ri toin" shid da" moozoo" zeing, gi Sodom moo koid: nghoid rigi Hau: voo gi akhid" nyid" ju" sho' dageing: jo, wa zi nghoid. 24 Houg: yoomo nanu" ri ngoo tid da" zigi tarha" dang: kho da" bidnyid moo Sodom voo kham: zoo: wa dam gi nang kham: zoo: wa dam tho' moo daje soem" wa zi nghoid.?
(Luk 10:21-22)
25 Houg: lang" Yesu gi ?Mougkhung: yo' myidjang ri vhoeb da" Aseing we"- Phajhi" juyhi yo" nheigloem: yeig mo, jhang mo he: da" khyoo: ri nang yhoem" nghoeb to" lho: ci: asi mo, ri phang shug yoomo ngoo nang ri jeju" boin. 26 Nghoid bye: nga" phoo we"- Nang vho: da" khyoo: gi hid: su" nghoid nyid.
27 ?Nga" phoo gi zi yoo jo, moojo, ngoo ri ab, byid: pyam bye:. Pho tho' moo gootu: hau: nya: zoo: ri hang" we asi. Hau: nya: zoo: tho' moo gootu: Hau: nya: phoo ri hang" asi.
28 ?Yoolid: voin myung: dau nyid mo, dangain" bang: we"- Nga" jhang khyoo loo ge. Ngoo nanu" ri doug noo: nhang: wa. 29 Nga" da" kyoug: ri voin ge'. Nga" jhang mo jhau" yu ge. Khasu" wim gari ngoo gi nu" nham' su: yo' nheigloem: nyhoem: su: nghoid. Houg: su" lang" nanu" doug, shau" noo: wa zi nghoid. 30 Khasu" wim gari nga" kyoug: gi voin yo' nga" da" yoovoin we soem" zi nghoid? ga: tid.