10
(Mar 3:13-19: Luk 6:12-16)
Aseing Yesu gi cangzoo: daxe: eig yug ri bain khe: yu lho: wigi yu ri khaid thu' pyam wa zi we' amyeung" akhang" yo" ga: aja: ja: ri ge loo" nhang: wa shid re" we' yoem: vhoo" amyeung" ri byid. cangzoo: daxe: eig yug mo, da" myeing gi shid phyang" Petru ga: tid da" Simun yo' nya: nhung" Andre- Zebedi da" nya: zoo: Yaku yo" nya: nhung" Yohan. Philimon yo" Batholume- Thoma yo" kheung" khyu: zoo: su: Mathe- Alphe da" nya: zoo: Yaku yo" Thade. Kanan byu Simun yo" Aseing ri ab pyam wa da" Yuda Iskarud nghoid.
(Mar 6:7-13: Luk 6:12-16)
Hau: daxe: eig yug: da" cangzoo: yi ri Aseing Yesu nhang: kaid lho: Nanu" gootu: byumyu" yi nyid da" jangmoo ayhi: goo"- Samari voogung joem moo we' avang goo". Israela byumyu"- byug shang lo" da" yang joem nyid da" jangmoo shi" yhi: ge. Nanu" yhe: lho: ?mougkhung: mungdain: tam: too" wa zi jhang loo bye:? ein: da" lu dang: ri kho" kyoo" ge. No nyid mo, ri ze gi byid: ge. Shid: jo, bye: mo ri doem dei to' loo nhang: ge. Manggam: dab mo, ri gyeungshang: loo" nhang: ge. Yu deizoo: joem ri we' khaid thu' pyam byid: ge'. Nanu" gi ce: phoug" agyoo" loo:- Jeju" ri yo" kham: yu bye: yoomo aphoug" ayu loo: gam byid: ge. Nanu" da" thung: nghui" moo ngei sheing:- gyid: joem: ri akaid to" goo". 10 Gyung: khyoo: shid re" thung: i"- byi: eig khyab- khyidbaid- lham: dung: ri aci: goo". Khasu" wim gari moo" zei: su: gi nya: aphoug" kham: zoo: moin: nyid.
11 ?Kha: voo kha: thoem" moo vang loo nghoid loug- hau: voo mo moin: yi" mo, ri sho: yu" ge. Hau: voo mo athu' loo" loo" gi hau: yhoem: moo za: danyid nyid ge. 12 Yhoem: moo vang lo" ri houg: bang: yo" being" si goo" ge'. Main kaid byid: da" dang: ri tid ge. 13 Hau: yhoem: bang: moin: yi" nghoid rigi nanu" mainkaid byid: da" dang: zung" loo" baja"- amoin: yi" nghoid rigi nanu" tid da" mainkaid dang:- nanu" nya: jhang moo tau" loo baja. 14 Hang" nghoid loug nanu" ri alhoem: yu- nanu" da" dang: atam" gyo: nghoid rigi nanu" da" khoo: voo: moo dab da" myidzhoo" phei" ri ko: khyo' too" khoo ge. 15 Ngoo jhug" jhug tid ba- tarha" dang: kho' da" bidnyid ri Sodom yo" Gomora voogung tho' moo je kham: zoo: yau: goo" wa.
(Mar 13:9-13: Luk 12:12-17)
16 ?Zeigni phung: moo nhang: kaid da" yang joem yhangti"- nanu" ri ngoo nhang: kaid. Houg: yoomo nanu" gi lhangmyu yhangti" nheig boo ung: gyeing: lho: pheing" kyoug" yhangti" nu" nham nyid ge. 17 Byu yi ri lhid ge'. Khasu" wim gari tarha" agyi yi da" lo, moo ab pyam boem wigi nyangnu" da" tarha" jung moo nanu" ri shen" yhen: baid said koid: boem wa. 18 Nyangnu" da" shid moo we' tarha" tungbau byu yi da" shid moo we' sagsi bui" wa shid re" nanu" gi ngoo yoomo zoug: khokham yi da" shidkhoin" moo she: vang lo" zi shau" goo" wa. 19 Nanu" ri ab pyam wa da" uri khasu" tid wa zi gi gung ayoug, goo"- Khasu" phoug tu" wa da" dang: gi nanu" ri tid poin" loo wa. 20 Khasu" wim gari nanu" vho: khyo" tid wa zi anghoid. Nanu" nya: pho da" Venyi: gi nanu" da" nhoid' ri ngho" tid loo wa zi nghoid.
21 ?Hau: uri gi nya: mang: nya: nhung" nyang: cang" nyang:- said pyam wa shid re" ab pyam go" loo wa zi nghoid. Nya: myid: nya: zoo: yi we' myhi' phoo' yi ri gyi koid lho:- said pyam lo boem wa. 22 Byu myoo" sho' mo, we' nga" myeing yoomo nanu" ri ngheing" lo boem goo" wa. Hang" nghoid loug lo" thang bidnyid ju" sho' yoem: kaid geing: teing nyid nghoid rigi hau: yug gi Mangso wigi khyoid yu zi shau" wa nghoid. 23 Davoo moo nanu" ri pyi: sho: loo lang" gi goo" voo khyoo phang: loo" ge'. Israela amyu" yi da" voogung joem moo nanu" moo" abain zei: shi" ri hau: byu da" nya: zoo: gi ju" gyoo" loo wim bye:.
24 ?Cangzoo: gi sara: tho' moo je gyi: zi anghoid. Deizoo:, phoo' we' nya: yhoem: seing: tho' moo je gyi: zi anghoid. 25 Cangzoo: gi sara: yhangti"- deizoo:, phoo' gi nya: yhoem: seing: yhangti"- nghoid nyid rigi myid je pyoo: wa. Nyangnu" nyang: gi Bezebula ga: nghoid rigi nya: yhoem: byu yi ri hau: tho' re" je tid go" wa anghoid goo la" ga: tid.
(Luk 12.2-7)
26 ?Houg: yoomo nyangnu" ri agyug goo"- nghoeb' to" da" zi dangain" gi shau" phang shug wa. Yhoem" to" zi dangain" we' shau" myang loo wa. 27 Mougcoid moo nanu" ri tid kyo" dang: dangain"- bidbang moo shau" tid kyoo" wa. Nanu" da" nookhyab moo so' kyo" da" dang: gi yhoemkhung: tho' mo zeig: yoid ge'? ga: kho" kyo". 28 Hau: lho: daja: gi gungshoo" ri za: te: yo" said pyam lho: nheigloem: Venyi: ri ayo" said pyam mo, ri agyug goo"- gungdu: yo" Venyi: ri dalheung: dam- moovoo moug: moo yo" shoin pyam su: Mangsoo ri je gyug nyid ge. 29 Jookhyang eig du: ri ngei dapyi" yo' yo" qei anghoid goo" la". Nanu" nya: pho amyeung" abo ri hau: jookhyang dadu: we' myidjang moo age byid gyoo". 30 Nanu" da" vhuloem mo xam: dangain" ri we' Mangsoo gi nghab' too" bye:. 31 Houg: yoomo agyug goo"- nanu" gi jookhyang myoo" sho' tho' moo je phau" nyid mo, nghoid.
(Luk 12.8, 9)
32 ?Hang" nghoid loug we' Sube" shidkhoin" moo ngoo ri yhen: yu ri Mougkhung: tho' moo nyid nga" pho da" shidkhoin" moo ngoo we' hau: yug ri yhen: yu wa. 33 Hang" nghoid loug sube" da" shidkhoin" moo ngoo ri ngeug pyam lang" gi Mougkhung: tho' moo nyid da" nga" pho shidkhoin" moo we' ngoo hau: yug ri ngeug pyam wa.
(Luk 12:51-53: 14:26-27)
34 ?Myidjang: tho' moo ngei pyo: khyoo: byid: wa ga: ngoo re" ein: ajhoo: goo"- ngei pyo: khyoo nhang: kaid wa ein: ngoo re" zi anghoid. Gyi koid goo" wa shid re" ngoo dare. 35 Nya: phoo' yo" yuggi zoo:- nya: myhi' yo" myiyi: zoo:- nya: nid yo' nya: dumoo"- nyang: cang" nyang: gang: go" loo" wa shid re" ngoo re" zi danghoid. 36 Nyang: nya: da" yhoem: byu yi mo we' gyivoo bui" go" loo wa.
37 ?Hang" nghoid loug- ngoo ri jheddab da" tho' moo nya: myhi' nya: phoo' ri je jheddab rigi hau: yug gi ngoo yo" amoin: yi". Hang" nghoid loug- ngoo ri jheddab da" tho' moo nya: zoo: yi ri je jheddab nghoid rigi hau: yug gi ngoo yo" amoin: yi". 38 Hang" nghoid loug- nyang: nya: da" pyang" zeing ri vu, lho: nga" thang: acang rigi hau: yug gi ngoo yo" amoin: yi". 39 Nya: kangso ri yoo" su: gi kangso soem" wa. Ngoo yoomo nyang: nya: da" kangso soem" loo" su: gi kangso ri yo" yu wa zi nghoid.
(Mar 9:41)
40 ?Nanu" ri lhoem: kham: yu su: gi ngoo ri we lhoem: kham: yu bye:. Ngoo ri lhoem: kham: yu su: we' ngoo ri nhang: kaid da" Mangsoo ri lhoem kham: yu zi nghoid bye:. 41 Mangso lagyoo: da" myonhoo: ri tu: lho: Mangso da" lagyoo: ri lhoem: kham: yu su: gi Mangso lagyoo: yo" da" aphoug" ri bo yoo" wa. Deingmain" su: da" myonhoo: ri tu: lho: deingmain" su: ri kham: yu su: gi deingmain" su: yo" da" aphoug" ri bo yoo" wa. 42 Hang" nghoid loug- lagyoo: pho da" myonhoo: ri tu: lho: he: da" nga" cangzoo: nge thang su: mo dayug yug ri gyid jham" dagoem shoin: jhoug nghoid ri hau: yug gi nya: aphoug" ayo" yu loo: nyid wa zi anghoid. Ein: wigi ngoo jhug" jhug tid? ga: tid.