MATHE
NGEI BU: LU DANG:
(Matthew)
Lagyoo: Mathe lhid" to" da" ngeibu: lu dang: moo Jhoem: mungdang: xoug" yo' dakhyoo" ti" Mangsoo da" Dang: thang" cab yo' dakhyoo" ti" ju" gyoo" loo wa da" khyoid yu Aseing gi Aseing Yesu nyang: nghoid bye: da" khyoo:- lu dang: gi ri fu" kaid. Houg: su" fu" kaid jangmoo- Aseing khu: lo da" young" lho' mungdain: moo zei: so' koid shau" jangmo Yuda byumyu" ri vhu" zhug wigi mougmyid xangsu: byu yi dangain" ri fu" kaid da" khyoo: nghoid.
Lagyoo: Mathe gi he: da" Jhoem: mungdang: ri akhyoo" jang jang so' lhid" to". He: Jhoem: dang: moo Aseing Yesu khu: lo da" khyoo: ri ayang: qei" lho: babtisma ri kham: yu khyoo: yo' Aseing Yesu ri yu satan jhuphyo' da" khyoo:- Galile mung" moo moo" zei: da" khyoo:- tarha" kho" kyo" da" khyoo: yo' ayang" zain: da" byu yiri yang" zain: loo" nhang: da" khyoo: yi ri lhid" xoem" to". Hau: thang: ri: Galile mung" mo Yerusalem voogung khyoo: lo" da" khyoo: ri we' lo" thang labain khoug: moo zei: kho' da" moo" yi yo' pyang" zeing tho' moo shid: kham: khyoo:- shid: jangmo doem dei to' lo da" khyoo: yi ri we' lhid" xoem" to".
Aseing Yesu gi Mangsoo byid: to" da" toung: to" tarha" ri dangkang: no" no, se' phoid: kyo" da" Aseing yo' Mangso Mungdain: da" khyoo: ri yo" kho" kyo" Aseing nghoid. He: da" Jhoem: dang: moo abeing: (5) loem: khyo" kho" kyo" to" zi nghoid. 1. Mougkhung: mungdain: byu yi da" yoem: vhoo" yo' akhyoo" again da" yoovoin amyeung" akhang" yo' vhu" poid: lo, kyo' ri phoid: shug da" bouggung tho' mo da" mungdang:- abeing: (5) loem: mo zi (7) loem: ju" sho' nghoid. 2. Nya: cangzoo: yi daxe: eig yug mo, moo" zei: loo" wa shid re" akhyoo" shed to" zi abeing: daxi: moo nghoid. 3. Mougkhung: mungdain: da" dangtu' joem abeing: (13) loem: moo bo. 4. Cangzoo: yi ein: da" dangkang: ri abeing: daxe: shid (18) moo lhid" to". 5. Akhid" he: da" pyaid thang loo" wa da" khyoo: yo' Mangso mungdain: doem tam: too" wa da" khyoo: jhau" byid: zi abeing: (24) mo (25) ju" sho' nghoid.
1
(Luk 3:23-38)
1 He: da" khyoo: gi Abraham da" nya: zoo: yo' David da" nya: zoo: Yesu Khristu da" byuxeig shab jhoem: mungdang: nghoid.
2 Abraham gi Isag ri khu: kaid. Isag gi Yaku ri khu: kaid. Yaku gi Yuda yo' nya: mang: nya: nhung" yi ri khu: kaid.
3 Yuda gi Thama mo Phared yo' Zerag ri doem khu: kaid. Phared gi Hesrum ri khu: kaid. Hesrum gi Aram ri khu: kaid.
4 Aram gi Aminada ri khu: kaid. Aminada gi Nason ri khu: kaid bye:. Nason gi Salmon: ri khu: kaid.
5 Salmon gi Rahab mo Bua ri khu: kaid bye:. Bua gi Rutha mo Obed ri khu: kaid bye:. Obed gi Yese ri khu: kaid bye:.
6 Yese gi David khokham ri khu: kaid bye:. David gi Uria da" yhoem: seing: myhi' ga: jangmo Sholumun ri khu: kaid bye:.
7 Sholumun gi Rehoboam ri khu: kaid bye:. Rehoboam gi Abia ri khu: kaid. Abia gi Asab ri khu: kaid. Asab gi Yosaphaid ri khu: kaid.
8 Yosaphaid gi Yoram ri khu: kaid. Yoram gi Uzia ri khu: kaid. Uzia gi Yotham ri khu: kaid bye:.
9 Yotham gi Ahaza ri khu: kaid. Ahaza gi Hezekia ri khu: kaid.
10 Hezekia gi Manashe ri khu: kaid. Manashe gi Amon ri khu: kaid. Amon gi Yosia ri khu: kaid bye:.
11 Yosia gi Babelon mung" moo thung: lo" lung" wa da" xeig moo Yekhonia yo' nya: mang: nya: nhung" ri khu: kaid bye:.
12 Babelon moo thung: loung" thang: ri Yekhonia gi Salathila ri khu: kaid. Salathila gi Zerubabela ri khu: kaid bye:.
13 Zerubabela gi Abiu ri khu: kaid. Abiu gi Aliakim ri khu: kaid. Aliakim gi Azura ri khu: kaid.
14 Azura gi Zadug ri khu: kaid. Zadug gi Akhim yo' Eliu ri khu: kaid.
15 Eliu gi Aliaza ri khu: kaid. Eliaza gi Mathan ri khu: kaid bye:. Mathan gi Yaku ri khu: kaid bye:.
16 Yaku gi Mari da" yhoem: seing: phoo' Yoseb ri khu: kaid bye:. Mari gi Khristu ein: da" Yesu ri khu: kaid bye:.
17 Houg: su" wigi Abraham da" pyaid mo David da" pyaid ju" sho' daxe: myid: xeig- hau: lho: David da" pyaid mo Babelon mung" moo thung: loung" lo" da" ayo, ju" sho' daxe: myid: xeig- Babelon moo thung: loung" jang mo Khristu da" pyaid ju" sho' daxe: myid: xeig nghoid.
18 Akhid" Yesu Khristu khu: lo da" khyoo: gi hid: su" nghoid. Nya: myhi' Mari gi Yoseb dang: myid: too" bye: nghoid loug we' nya: eig yug gi dage" azoem" nyid shi" ri Mari gi gyeungshang: Venyi: khyo" zoonu" gung bue" loo bye:.
19 Nya: yhoem: seing: phoo' Yoseb koem gi deingmain" su: nghoid yoomo nya: yhoem: seing: myhi' ri sho' athu' nhang: noug yoomo nyang: ri gau" nhang: kaid wa ga: soin: nyid.
20 He: da" khyoo: damyid yu" nyid shi" uri ?yu" ge' Aseing da" moug: lagyoo: dayug yhoebmo, moo nyang: ri gung re" yab shug lho: ?David da" nya: zoo: Yoseb we"- re" da" yhoem: seing: myhi' Mari ri lo, xo' yu wa zi myid amyoo:. Nya: da" zoonu" gung gi hau: gyeungshang: da" Venyi: mo bue" lo da" zi nghoid.
21 Nyang: gi yuggi zoo: khu: loo wa zi nghoid. Nang nya: myeing ri Yesu ein: myheing byid: ca" wa. Khasu" wim gari nya: da" byumyu" ri nyang: nya: yau: noo yooboo mo khyoid yu wa su: nyang: nghoid nyid?.
22 He: da" khyoo: dangain" gi Aseing nyang: Lapi: bang: da" nhoid khyo" tid dang: byeung" loo ca" yoomo bue" loo bye:.
23 Nyang: gi ?Yu" ge' zoomyi: gyeing" gi zoonu" gung bue" lo wigi yuggi zoo: khu: loo wa nghoid. Nya: myeing ri Emanuela ga: myheing byid: boem wa? ga: tid to". Hau: da" dangkang: gi ?Mangsoo ngoonu" yo' dage" nyid? ga: zi nghoid.
24 Yoseb yhoeb' so" ri" lang" hau: Aseing da" moug: lagyoo: nyang: ri tid to" ziyo' dakhyoo" ti" nya: yhoem: seing: myhi' ri jha" yu bye:.
25 Nghoid loug we' yuggi zoo: akhu: ri" ri" gi Mari yo" azoem" goo" looza: danyid nyid. Hau: yuggi zoo: ri Yoseb gi Yesu ga: myeing myheung byid: bye:.