MALAKHI
MOUGSOUG" PUG
(Malachi)
Malakhi ga: zigi nga" lagyoo: ga: zi nghoid. He: mougsoug" bug gi BC 500 zain khoug: koo: moo Yerusalem mo Noku Yhoem: Moo" doem koid thang: ri lhid" to" zi nghoid. Lape: da" myid youg: khyoo: gi Mangsoo yo' koid to" da" dang: theing thang" cab moo nyangnu" da" nheigloem: zung" khyoo: doem bo loo wa shid re"-khainjung yi yo' mung" byu yiri khe: yoid nhang: da" mungdang: nghoid. He: jang" moo Mangso byu yi da" loem khoug: khyoo: yo' byu nyid byu yab khyoo: moo akyang byo, yoin" khyoo: yo' adu: adam: bue" nyid khyoo: yo" myang nyid. Khainjung yi yo' mung" byu yigi Mangsoo ri byid: eung: da" khoug: loem jhungshug abyid: khyo" we' nyang: jhau" byid: khyo" anyid yab da" khyoo: we' Mangso ziyoo lhoid zo: nyid ago".
Nghoid loug we' Aseinggi nya: byumyu" yiri dang: phyed lho: kyeung pyam loo wa zi nghoid. Nya: dang: theing khoin" ri tid fu" wa ziyo' khyoo: nyheing byid: wa shid re"-nya: shid vhu" moo nya: lagyoo: ri nhang: kaid da" khyoo: nghoid.
1
1 Aseing pang shoug da" mungdang:- Israela byumyu" yiri Malakhi khyo" wigi tid kyo" kaid zi nghoid.
2 Aseing gi Israela ri hid: su" ga: tid- ?Ngoo gi nanu" ri khanham we' jheddab nyid.?
Hougsu" nghoid loug we' nanu" tid nyid zigi ?Nang gi ngoonu" da" atho' moo re" jheddab myid khasu" toin" shed loo bye: lha"? ga: tid ago".
Eso yo' Yaku gi nyang: tang: nyang: nghoid- hougsu" nghoid loug we' ngoo gi Yaku yo' nya: amyed ashen yiri jheddab nyid.
3 Eso yo' nya: amyed ashen yi rigi ngheing" nyid. Eso da" boem moug: rigi byo, yoin" loo" nhang: lho: khuidkoo" joem da" nyid joyoo bue" loo" nhang: bye:? ga: tid.
4 Eso da" amyed ashen yi nghoid da" Edom byumyu" yigi ?Nyangnu" da" voomoo" gi phyo' pyam byid: zi shoug" nghoid loug we' doem nyheing zhug wa? ga: tid nghoid rigi Aseing gi hid: su" ga: tid wa zi nghoid. Nanu" so' koid too" nghoid loug we' ngoo gi doem phyo' pyam wa houg: yoomo subi" gi nanu" da" moug: ri ?Agi ashoeb da" moug:? ga: myheing goo" wa houg: moo nyid mo, ri we' Aseing apyaid atoo: nheig yoo: nau da" mung" byu yi ga: myheing goo" wa? ga: tid wa nghoid.
5 He: ziri Israela byumyu" yigi ?Nyangnu" myojid" yo' myang lang" Aseing ri Israela moug: nghoid jang" moo we' phung" yoeb myonhoo: boo nhang:? ga: tid goo" wa? ga: tid.
6 Yoem: moo" bo da" Aseing Mangsoo gi khainjung yiri hid su" ga: tid- ?Zooshang: gi nya: phoo ri phau" myang:- join we' nya: yhoem: seing: ri phau" myang:- nanu" da" nya: phoo gi ngoo nghoid ri ngoo ri khanham phau" myang: yu" go" lha". Ngoo gi nanu" da" Aseing nghoid- khanham gyoug phoug" yu" go". Nanu" gi ngoo ri aphoug" akhyoid koid lho: ngoo gi nanu" Aseing nghoid ri khanham gyoug phoug" yu" go". Nanu" gi ngoo ri aphoug" akhyoid koid lho: ngoonu" gi Aseing ri arui" yu"? ga: we' datid ashi" go".
7 Nga" da" zoobui" tho' moo aco' ajhoid da" xoin" to' ngei" byid: zigi ngoo ri rue" khyoo: nghoid bye:. Hau: tho' moo nanu" gi ?Ngoonu" gi nang Aseing ri khasu" koid wigi aphoug" akhyoid koid yu" boem bye: lha"? ga: tid ago". Aseing gi ?Nga" zoobui" aphoug" zigi ngoo ri aphoug" zi nghoid? ga: tid nyid.
8 Nanu" said ngei" byid: da" xoin" gi myo, jed khyid: gyau: zi noo dab da" gougnyhoug byid: zigi ge da" khyoo: nghoid go" la". Nanu" da" mung" zoug: phoo ri houg: yhang: te" jhungshug yhe: byid: ri nyang: gi yu" ngei wa la". Nang ri ge zi koid byid: wa ein: myid la"? ga: tid.
9 Khainjung yi we"- Mangsoo gi nyhang" ri jeju" byid: wa shid re" nanu" gi nyang: ri mho' nghoid loug we'-nyang: tam" gyoo: byid: wa zi anghoid. Hau: zigi nanu" da" shoid khyoo: za: danghoid wa.
10 Yoem: moo" bo da" Aseing hid: su" ga: tid nyid ?Nanu" gi nga" da" phoin: tho' moo akyu" abo da" myi: ri are" tab wa shid re" nanu" yugkhang" moo" gi nga" gyeung" shang: da" yhoem: khoem" ri myhid" byid: rigi gi wa zi nghoid. Ngoo gi nanu" ri yu" ngei wa khyoo" aboo- nanu" da" jhungshug ri we' ngoo avhoo:.
11 Bid thu shoid mo zi bidvang shoid khyoo: ju" loo" sho' moo nyid da" nga" mung" byu ja: khang" moo" gi ngoo ri phoug" tab ngi: shab byid: lo boem wa joyoo khyi' khang" moo" moo nyangnu" gi ngoo ri nam pyo: da" shoem: nghe' ngei" byid: boem wigi nyangnu" xoin" joem dangain" ngoo ri phoug" tab ngi: shab byid: lo boem wa zi nghoid.
12 Nghoid loug we' nyangnu" gi nga" da" phoin: ri ce: phoug" adab ga: lho: hau: phoin: moo aco' ajhoid da" zoo: noem ri ngei" byid: khyoo: gi ngoo ri aphoug" amyang: da" khyoo: nghoid.
13 Nyangnu" gi hid su" ga: we' tid ashi" ?Hid: myhoo' ja: gi ngoonu" myoung: dau joyoo danghoid? ga: tid boem lho: wigi nhoo: myeing myeung- juang" yi boem ago". Nanu" gi khau" yu da" gougnyhoug nghoid loug we' khyid: gyau: ziyo' noo bo da" gougnyhoug ri ci: re" wigi we' xoin" to' byid: boem ago". Ngoo gi nanu" jang" mo houg: yhang: te" da" xoin" ri kham: yu abe ein: myid nyid go" la".
14 Nyang: gi nya: da" gougnyhoug kyung mo ?Reung: thang da" gougnyhoug ngoo ri byid: wa? ga: dangsoo" to" lho: dam boo noo bo da" gougnyhoug said lho: xoin" ngei" byid: da" lhoid zoo: lhoid shug byu yigi nheing" khoin" zang" mo, nghoid. Khasu" wim gari ngoo gi ?Khokham zeing nghoid nyid wigi ngoo rigi byumyu" yi bain sho' gyoug phoug" nyid boem? ga: wigi yoem: moo" bo da" Aseing Mangsoo gi tid nyid.