6
(Mat.13:53-58, Luk.4:16030)
Houg: lang" Yesu gi nya: cangzoo: yi yo' dage" hau: joyoo mo thu' lo" lho: nya: yhoem: moug moo tau" lo". Dougno: Bidnyid ju" lang" nyang gi tarha" jung moo byu myoo" sho' mo, ri jhau" byid: nyid. Nya: jhoug" myeung" ri shoug" gyoo: mo, dangain" gi gyo: mau" ago". Houg: lang" nyangnu" gi ?He: yug gi kha: khyi mo hid: te" da" phajhi" ri se' la, lha". Nyang: se' yu da" phajhi" gi ce: ja: phajhi" nghoid lha". Mau" pho" moo" joem ri nyang khasu" se' zei: lha". Nyang: gi Mari da" nya: zoo:- Yaku Yoseb Yuda yo' Simun da" nya: mang:- lagsama phoo anghoid la". Nya nham mo we' hid: moo nyhang" yo" dage" nyid mo, anghoid goo" la"? ga: nyangnu" nyang ri ngeug he: boem. Yesu nyangnu" ri ?Lapi: gi nya: moug- nya: bidnoem- nya: yhoem: mo jain" lho: khayoo: we myonhoo: bo phougmyang: shoug" da? ga: tid. Nyang: gi noophyoo" shau" mo, mung" byu dajhi dathang: ri lo, ke" lho: ge loo nhang: jangmo lid lho: hau: voo moo mau" pho" moo" ciwe' ayo" zei: nghoid da. Nyang: gi mungbyu yi loem" jeing" myid azheung: boo boem yoomo gye" mau" nyid.
(Mat.10:5-15, Luk,9:1-6)
Houg: lang" Yesu gi hau: ayam aqei: mo voogung joem dangain" jang" khyoo: yhe: lho: mungbyu yi ri jhoug" byid. Hau: lho nyang gi cangzoo: daxe: eig yug ri khe: yu lho: eig yug dazoem" zoem" koid lho: nhang: kaid da. Yu joem ri oung: doid loo" wa da" amyeung" akhang" nyangnu" ri byid: kaid. Yesu gi nyangnu" ri ?Gyung: khyoo: mo shid re" lham: dung: mo jain" lho: zookhoo:- thung: nghui" yo' nanu" da" byi: thung: moo ngei avoin goo". Khyid baid zhung" ge'. Nghoid loug we' byimi ajain" avoin yen" goo". 10 Hau: lho: nanu" ri beung" lhoem: tau yu da" voo mo yhoem: khyoo:- kha: yhoem: moo nghoid loug we' hau: voo mo doem thu' loo" yo, ju" sho' hau: yhoem: moo za: theung: nyid ge'. 11 Davoo mo mo, gi nanu" ri beung" alhoem: tau: yu loo:- nanu" kho" kyo" da" dang ri alheom: tam" gyo; boem nghoid rigi hau: joyoo mo thu' loo" ge' houg: mo thu' lo" da" uri nyangnu" shid mo zid" nhang: zi bui" wa shid re" nanu" khoovoo: mo pheilhoug: ri ko: khyo too" kho' ge'? ga: tid. 12 Houg: lang" nyangnu" thu' yhe: lo" boem wigi mungbyu yi ri nyangnu" yooboo mo nheigloem: thid lo boem wa shid re" kho" kyo" ago". 13 Nyangnu" gi yu myoo" sho' khaid thu' pyam byid: ziyo' noo phyoo" shau" mo, myoo" sho' ri zhainloin: xu: joid byid: lho: ze: gi byid: boem ago".
(Mat.14:1-12, Luk.9:7-9)
14 Akhid" Yesu da" khyoo: dangain" ri Herod khokham shau" gyo:. Khasu" wim ga: ri Yesu myeing ri khyi khang" moo" moo sube" fu" gyi: lo nyid bye:. Byu dayham" gi ?Babtisma byid: su: Yohan doem dei to' lo zi nghoid ga: houg yoomo mau" pho" moo" yo" zei:? ga: tid nyid boem. 15 Nghoid loug we' gootu: dayham" gi ?Nyang: gi Elia nghoid? ga: tid boem. Dayham" gi ?Goonham' pyaid mo lapi: yi yo' du da:- lapi: dayug nghoid? ga: tid nyid ago". 16 Herod gi hau: ziri shoug" gyoo: lang" ?babtisma byid: su: Yohan doem dei to' lo zi nghoid la"? ga: nya: vhuloem ri ngoo phyed pyam bye: nghoid loug nyang: doem dei to'' lo la. 17 Herod nyang: gi Yohan ri myheig wa amyeung" byid: wigi myhed tei" lho: thung lhoung to". Ciwim hid: su" koid lha" ga: ri nya: no, Philib, da" yheom: seing: myhi' Herodi yo' lo, xo' yoomo nghoid. 18 Herod gi babtisma byid: su: Yohan ri myheug lhoung to". Houg su" wigi ?re" nhung" da" yhoem: seing: myhi' ri lo, xo' yu wa zigi re" shid re" ajoo, aeung: nghoid da:? ga: wigi da tid poin" nyid. 19 Houg: su" nghoid yoomo Herodia gi Yohan ri thug theung anoug angei- said pyam noug nghoid loug we' nyang: gi Herod yoo mo khasu" ase' said pyam nghoid da. 20 Khasu" wim ga: ri Yohan gi deingmain" ziyo' gyeungshang: byu dayug nghoid ziri Herod se' lho: nyang: ri gyoug phau" ziyo' yu" goem byid: nyid. Yohan da" mungdang: shoug" gyoo: khang" moo"- nya: nheigloem: moo gyi" sho' nheigloem: amyen nghoid loug ri we' nya: mungdang: ri ngeibu: tung" za: tam" gyoo: nau nyid. 21 Lo" thang moo Herodia gi Herod khokham khu: lo da" bidnyid ju" lang" nyang: myid to" zi koid wa ayo, gi ri yo" yu abye:- Khasu wim ga: ri Herod gi nyang: khu: lo da" bidnyid ayo, moo Galile moug: mo vhu" she: nyid da" sayen" yi mung" zoug: yi yo' nya: gyi zoug: moo" yi ri khe: lho: zoo: pui" zeung doo" zho" nyid. 22 Hau: zoo: pui" moo Herodia da" nya: zoo: zoomyi: gi voem: zoo: pui" moo vang re" lho: re" go" nhoin shug da" hau: ziri Herod yo' nya: beung" voo yi gi yu" ngei nyid ago". Houg su" khokham gi hau: myiyi: nu" ri ?Nang ci vho:- nang vho: ja: civhoo: ci: ngoo nang ri byid: wa"? ga: tid. 23 ?Nang ngoo ri mho' da" gu: nga" mungdain: agung dago" yi" ju" sho' ngoo nang ri byid: wa? ga: jham tang: lho: tid to". 24 Houg: lang" myiyi: nu" gi thu' lo" lho: nya: myhi ri ?Ngoo ce: ja" mho' wa lha"? ga: lo" myid:. Nya: myhi' gi ?Babtisma byid: su: Yohan vhuloem ri mho' yu we'? ga: phoug tid. 25 Houg: lang" jang: myiyi: nu" gi hain: hain: za: khokham jhang doem tau" vang lo" wigi ?Babtisma byid: da" Yohan vhuloem ri bain tho' moo ke" lho: akhid" nyang: ngoo ri byid: wa zi vho:? ga: mho'. 26 Khokham"- phoo gi nheigloem: gye" angei apyoo: loo: bue" lo". Nghoid loug we' nya: being" vhoo yi da" shidkhoin" moo nyang: jham tang: lho: tid pyam bye: dang: khoin" yoomo myiyi: nu" ri ayo" he: pyam loo: nghoid da. 27 Hougsu' wim nyang: gi houg: lang" goemloem gyizoo: dayug ri Yohan da" vhuloem ri ci: loo wa da" amyeung" yo' dage" nyang: ri nhang: kaid bye:- zung" lhug su: gi phoo gi thung: khyoo: yhe: lho: Yohan da" vhuloem ri phyed pyam bye:. 28 Hau: thang ri hau: vhuloem ri bain tho' moo ke" ci: lo wigi myiyi: nu" ri lo byid:- myiyi: nu" we' nya: myhi' ri doem byid bye:. 29 Yohan da" cangzoo: yi gi he: khyoo: ri zheung: shau" gyo: lang" nyangnu" re" lho: nya: mang ri zheung: koid: myhoeb pyam byid: boem bye:.
(Mat.14:13-21, Luk.9:10-17,Yoh 6:1-14)
30 Lagyoo: yi gi Yesu jhang moo doem tau" lo lho: nyangnu" zei: loo bye: da" moozoo" yo' jhau" byid: da" khyoo: joem bain sho nyang: ri lo tid kyo" ago". 31 Mung" byu yi myoo" sho' yhi: yhi: loo loo beung: abyid boem yoomo Yesu yo' nya: cangzoo: yigi voem: zoo: wa ayo, lang" ayoo" nghoid da. Houg: su" Yesu gi nya: cangzoo: yiri ?Nyhang" myen, jham" da" joyoo dakhyi khyi moo yhe: lho: nyhang" kyeing" daso' zoo: yhe: no: yu shang? ga: tid. 32 Hougsu" nyangnu" gi myenjham" joyoo khyoo: lhid yo' nyangnu" za: thu lo" boem. 33 Nghoid loug we' mungbyu yi myoo" sho' mo, gi nyangnu" thu' yhe: lo" boem ziri cang myang kaid ziyo' nyangnu" hang" nghoid ziri se' yu" kaid lang" voo khang" moo" mo mungbyu yi gyidyam khyo" gei yhe: lo" wigi Yesu yo' nya: cangzoo: yi da" shid moo ju" nyid lang" boem bye:. 34 Yesu lhid khoug: mo thu' ri" lang" nyang: gi byu phung: zeing: ri myang bye:- yang zung" su: abo da" yang joem yo' du boem yoomo Yesu gi nyangnu" ri gye" nheug yu" khyeug- houg: yoomo nyang: gi nyangnu" ri myoo" sho' ja: jhau" byid: bye:. 35 Ayo, myang" lang" nya: Yesu da" cangzoo: yigi nya: jhang lo lho: ?He: joyoo gi siyoo nghoid ziyo' ayo, we' gye" thang: gyo" lo" nyid bye:? ga: tid. 36 Zoo: noem daja: ja: ri qei wa shid mo nyangnu" ri aqei: ayam mo voo khyoo: yhi: wa amyeung" byid: kaid we' ga: nyang: ri tid ago". 37 Yesu gi ?Nanu" khyo" nyangnu" ri zoo: noem daja: ja: zhoo" ge'? ga: nyangnu" ri tid. Houg: lang" nya: cangzoo: yigi ?Ngoonu" ngei eig shoo: kyab phoug" mo zooyho' yhe: qei lho: nyangnu" ri byid: zhoo" wa nang anoug la"? ga: myid: ago". 38 Yesu gi ?Nanu" zooyho' khamyhoo yoo" go" yhe: yu" yu" ge'? ga: nyangnu" ri tid. Nyangnu" yhe: sho: myang lang" ?Zooyho' wim: loem: yo' wimdo, eig du: nghoid? ga: nyang: ri tid ago". 39 Houg: lang" Yesu gi mungbyu dangain" ri khe lho: vufu" yoo moo afoem: foem: zhung: nhang: wa shid re" nya: cangzoo: yiri tid. 40 Houg: yoomo mungbyu yi gi dafoem: moo dashoo:- dafoem: moo wim: xi: koid lho: zhoung: jen yoin" to" ago". 41 Hau thang: Yesu gi zooyho' wim: loem: yo' wimdo, eig du: yu lho: mougkhung: khyoo: yu" lho: Mangso da" jeju" ri coung" byid:- nyang: gi zooyho' ri khyu' phe' yu lho: mungbyu yi ri gam byid: wa shid re" nya: cangzoo: yiri byid: kaid. Houg mo Yesu gi wimdo, eig du: ri we' nyang nu' ri gam byid. 42 Yug khang" moo" gyi" gyi: shau" zo: boem bye:. 43 Hau: thang: ri cangzoo: yigi deung da" wimdo, yo' zooyho' ajab amoin" daxe: eig gyoin byeung" sho' koid: zheung" to". 44 Zooyho' zo: da" yug gi yi za: wim: khyeung" ri zho" kaid bye:.
(Mat, 14:22-23,Yoh.6:15-21)
45 Yesu gi mungbyu yi ri nhang: kaid zoore nya: cangzoo: yi ri we' myab, myab, lhid tho' moo do, zhoung: lho: thoem" thei: tab mo Bedsaida voo khyoo:- gu: dab loo" lang" wa shid re" nhang: kaid. 46 Mungbyu yi ri vhu: kaid thang: ri Yesu gi akyu" mho' wa shid mo boug gung daloem khyoo: do, yhe: lo". 47 Myenthang: ju" lang" cangzoo: yi zhoung: lo" da" lhid gi thoem" gung moo gu: yhe: lo" nyid boem bye:- Yesu gi nyang: kyeing" tung: gung moo nyid nyid. 48 Lid tau" hau loo yoomo nya: cangzoo: yi lhid gu: yug: nyid ziri myang lang" gyid dang moo so" lho: nyangnu" jhang yhe: da. Houg: akhyeing: gi soem" nayi: yo' khyug nayi: agyoo: nghoid. 49 Nyangnu" gi Yesu gyid dang moo khyoo: so" nyid ziri myang lang" ?Soobyoo nghoid? ga: myid soin: lho: nyho: nyid boem. 50 Nyang: ri myang lang" nyangnu" gye" gyoug pyam boem bye:. Houg: lang" Yesu gi dalheung: dam nyangnu" ri dang: tid zigi ?Agyug goo" ngoo danghoid? ga: tid. 51 Yesu gi nyangnu" zhoung: jo, da" lhid khoug: khyoo: vang yhe: thang: ri lid gi noem: loo" khare" yoomo cangzoo: yi gi atho' tid loo: sho' mau" byug boem bye:. 52 Khasu" wim ga: ri byu wim: khyeung" ri zho" da" mau" pho" moozoo" dangkang: ri nyangnu" gyeing" nyang: ase' gyo: boem yoomo nghoid. Nyangnu" myid yo' atho' yo" si goo" da.
(Mat.14:34-36)
53 Yesu yo' nya: cangzoo: yi gi thoem" thei: tab khyoo: gu: yhe: lo" boem ri Genesared moo ju" lang" yhe: theung: wigi Lhid, ri houg: moo tei" to" ago". 54 Lhid khoug: mo nyangnu" thu' ri" yo" su- mungbyu yi gi Yesu nghoid ziri: dalheung: dam se boem. 55 Nyangnu" gi ayam aqei: mo mung" goin" jang" moo gei yhe: lo" boem wigi noo phyoo" shug mo, we' yhoeb myhu" pheung" thain: yo' zuang goin" goin"- Yesu nyid ga: shau" gyo: da" joyoo khang" moo" khyoo: dang, re" lo boem ago". 56 Houg: yoomo Yesu vang yhe: da" voo zeing voo zoo: mo mo, fu" moo" khyoo: yam cang noo phyoo" shau" mo, ri re" shu" lheung: yoin" to" wigi noo mo, we' nya: byi: sheing thang: moo khyalhang" shau" tain" nhang: wa shid re" mho' nyid ago". Nya: byi: sheing thang: moo shau' tain" yu mo, dangain" gi noophyoo" ge shang lo" byug boem da.