4
( Mat. 13:1-9, Luk. 8:4-8)
1 Hau: thang: ri Yesu gi Galile thoem" yam moo doem jhau" byid: nyid. Byu phung: moo" zeing nya: jhang zeung: re" boem lang" gi byu yi sung myo: loo yoomo nyang gi lhid loem: tho' moo yhe: vang zhoung: jo, mung" byu yi gi tung gung gyid soo" moo nyid nyid lhid gi gyid khyoo: yu yhe: lo".
2 Houg: lang" nyang: gi dangtu khyoo"- nyangnu" ri myoo" sho' ja: jhau" byid: lho: tid zigi
3 ?Tam" gyo: yu" ge' byu dayug gi myoug: shi" sain" wa ga: thu' yhe: lo" da.
4 Nyang: yoo moo yhe: sain" kaid da" myoug: shi" dayham" gi khyoo: gung moo gyo" lo" ago". Hau: myoug: shi' joem ri gi ngho' joem re" kuid: zo: pyam ago".
5 Dayham" gi lugthi: tho' moo gyoo" lo". Myid zhoo" athu: yoomo houg: jang: yug re" boem.
6 Hau thang: ri bid zho: loo lang" lhab yhau" pyam- khasu" wim ga: ri agyi: no, sho ayo" cen, yoomo nyhau" shid: lo" boem bye:.
7 Myoug: shi" dayham" gi zubyab gyoo: moo gyoo" lo". Zubyab gi gyi: nghoeb lo ziyo' shivoo: poem: joem ri re" foeb pyam yoomo ashi" ayo" zei: loo nghoid da.
8 Nghoid loug we' myoug: shi" dayham" gi myidjang ge jang" moo gyo" lo" lho: houg: gi yug gyi: lo wigi ashi" zei: lo ago"- dayham" soem" xi: zhang dayham" khyug xi: zhang dayham" gi dashoo: zhang myo: tham: lo ago".
9 Nookhyab dab mo, gi ?gyo: yu ge'? ga: Yesu dang: thang tid.
(Mat 13:10-17, Luk, 8:9-10)
10 Yesu nyang: kyeing" nghoid lang" gi nya: dang: ri shoug" gyoo: mo, dayham" cangzoo: daxe: eig yug yo' dage" nya: jhang moo re" wigi hau: dang: tu joem da" dangkang: ri phid: kyoo" byid: wa shid re" mho' ago".
11 Houg: lang" nyang: gi nyangnu" ri ?Mangso mungdain: yo' sen: da" no, thang khyoo: ri se', gyoo: wa da" akhang" nanu" shoug" yu boem bye: go"- nghoid loug we' hau: da" akhang" ri ashau" yu mo, gootu: byu yi koem gi qeishoem dang: tu khyo" za: se gyo: yu boem.
12 Khasu" wim ga: ri nyangnu" gi ?yu" nghoid loug we' amyang- tam" gyoo: nghoid loug we' ase' gyoo:? nghoid ago". Nyangnu" myang lho: se' gyo: yu boem nghoid rigi Mangso jhang moo doem tau" loo goo" wa Houg: lang" nyang: gi nyangnu" ri yooboo khyoid pyam byid: wa ga:??.
(Mat.13:18-23, Luk.8:11-15)
13 Houg: lang" Yesu gi nyangnu' ri ?he: dangtu ri nanu" ase' gyoo: boem rhe"- hougsu" nghoid ri dangtu gootu ri nanu" khasu" se' gyoo: goo" wa, lha"? ga: myed:.
14 Myoug: shi" sain" su: gi hau: Mangso da" mungdang: ri sain" kaid.
15 Byu dayham" gi khyoo: moo gyo" lo" da" myoug: shi": yo' du nyid boem da. Mangso mungdang: ri shoug" gyoo: lang" satan ju" re" wigi nyangnu" moo sain" to" da" hau: mungdang: ri yu pyam byid.
16 Gootu: dayham" gi myid zhoo" athu: da" lugthi: tho' moo gyoo" lo" da" myoug: shi" joem yo' du. Hau: mungdang: ri shau" gyoo" lang" su- nyangnu" gi ngeibu: ziyo' lhoem: kham: yu ago".
17 Nghoid loug we hau: mungdang: gi nyangnu" da" nheigloem: khoug: moo agyi: no, sho' ayo" cen, yoomo myang" sho' ayo" kham nghoid ago". Hougsu" hau: mungdang: yoo mo yau: khe" zi anghoid lang" shen" yhen zi:- thoung" shau" loo lang" myab myab doem phoug lo" boem bye:.
18 Houg: mo gootu gi zubyab moo sain" kaid da" myoug: shi" yo' du nyid ago", nyangnu" gi hau: mungdang: ri shau" gyo: yu boem nghoid loug we.
19 He: mougmyid byu nyid yo, boin: shid re" myidmyoo: ungloug zi ngei sheing: jo, nu" amyung ashoo" yoo" jo, nau: ziyo' gootu: aja: ja: ri myo, no, vhoo" byid da" ze wigi hau: mungdang: ri foeb pyam lho: ashi" ayo" zei: loo nghoid ago".
20 Nghoid loug we' gootu: dayham" gi myid gi moo sain" kaid da" myoug: shi": yo' du nyid ago". Nyangnu" gi hau: mungdang: ri shoug" gyoo: lang" kham: yu lho: dayham" soem: xi: zhang- dayham" khyug xi" zhang dayham" gi dashoo: zhang ashi" zei: lo boem.
(Luk. 8:16-18)
21 Yesu doem xo' gi ?myikug ri nya: ke" jang: mo: da ke" to" anghoid goola". Lain" khoug: moo zhung" lhoung too" wa hougsu" anghoid lang" gi yhoeb cuang gyid" moo kaid to" zigi khayug lhoug koid yu" la".
22 Khasu" wim ga: ri amyang loo: sho' yhoem" to" ja: gi di: di: nyang: myang thu' loo wa nghoeb to" ja: dangain" we phang shug lo boem wa.
23 Nookhyab dab mo, gi tam" gyoo: baja"? ga: tid.
24 Nanu" shau" gyo: ja: ri zid" lho gyo: yu" ge'. Houg: su" ga: nyangnu" ri tid. ?Nanu" subi" ri leug, byid: da" jo, leug, mo Mangsoo gi nanu" nyang: ri: doem tau" leug byid: loo wa nghoid. Hau tho' je wigi lung byid: wa nghoid.
25 Yoo" su: rigi je, doem lung: byid: shi" wa"- ga: nyangnu" ri tid kyo". Ayoo" mo, ri gi Nyangnu" yo" da dajhi' kyeing" zilang yu pyam byid wa? ga: tid.
26 Yesu doem xo' lho: ?Mangso mungdain: gi hid: yo' du nyid. Byu dayug nya: yoo moo myoug: shi" yhe: sain" kaid too" kho' lho:
27 Nyang: myen" ri yhoeb- nyid" rigi doem yhoeb doem to' soo" yen" koid nyid da" ayo' moo hau: shi" gi boug go' thu' lo wigi yug lo nyid. Nghoid loug we hau: ashi" khasu" yug gyi: lo nyid ziri nyang: asi nghoid da:.
28 Khasu" wim ga: ri myidjang gi nyang: za: nyang hau: shivoo: joem ri yug gyi: loo nhang: lho: ashi" zei: loo nhang: nyid da. Xangshid" ri anyug thu'- hau: thang: ri gugnham: thu' ri" nhang: wigi thang: thang ri gug, shi" yo' byeung" da" gug shi" ri thu ri" nhang:.
29 Gug, myheung lang" yed, yo, ju" loo wigi nyang: gi gyen: goem: yo' yed yu pyam? ga: nyangnu" ri tid.
30 ?Hougsu" Yesu gi Mangso mungdain: ri ce: ja: yo' tu tid wa lha". Ce: ja: dangtu ci: lho tid pang: kyoo" wa lha".
31 Hau: zigi nghang" shicab' yo' du nyid. Nghang" shi" gi sain" kaid uri mougmyid tho' moo jo, da" ashi" jid" jo, moojo, tho' moo je nge thang da" ajid" nghoid.
32 Nghoid loug we- Myidjang moo sain" kaid lang" gi yug gyi: lo wigi gootu: shivoo: dangain" tho moo je gyi: re" da" shivoo: gam bue" lo. Akyang: joem we' gyi: sheung: byo lo wigi hau: ayoeb moo ngho' joem soid lo soid nyid boem ago"?.
33 Hougsu" Yesu gi houg yhang te" dang: tu myoo sho' nyangnu" se' yo" gyoo sho' nya: mungdang kho" kho" kyo". Nyang: kho" kyo" ziyo' dakhyoo" nyangnu" se gyo: boem.
34 Dangtu aci: loo za: ri nyangnu" nyang: ci" we' atid kyoo" nghoid loug Yesu gi nya: cangzoo: yi yo' dage" nyid uri acang: joeb sho' phid: kyo" da:.
35 Hau: nyid" myenthang: ri nyang- Yesu gi nya cangzoo: yiri ?ngoonu" thoem" thei: tab khyoo: gu: dab loo" shang? ga: tid.
36 Houg: lang" nyangnu" gi mungbyu yi ri too" kho' lho: Yesu gi nyang: zhoung: jo, da" lhid tho' moo cangzoo: yi yhe: do, zhoung: lho: nyangnu" dage" gu: lo" ago". Gootu: lhid joem we houg: moo jo, boem.
37 Hau: uri uglid moo" nyeigdain tung" hau lo wigi beingmhoid wigi lhid khoug: moo gyid alug lug byeung" lo nyid.
38 Yesu gi lhid' thang: moo vhukhoug khoug lho: yhoeb jo, da:. Cangzoo: yi gi nyang ri nhau" lho: ?Sara We"- ngoonu" noeb shid: lo" nyid ziri nang cishu: anhang: rhe"? ga: tid boem.
39 Yesu gi to' re" lho: uglid ri ?sam: zoo: nyid we'? ga: amyeung" byid:. Being: mhoid ri we' ?tam" loo: we'? ga: tid kaid. Houg: lang" uglid no: lo" lho: gye" myenjham" tam" lo" bye:.
40 Houg: lang" Yesu gi nya: cangzoo: yi ri ?nanu" ciwim wigi houg: yhi' yhi toung" gyug go" la". Nanu" gi akhid" ju" sho' loem" jeing" myid aboo goo" rhe"? ga: tid.
41 Nyangnu" koem gi gye" gyoug dain pyam boem bye:. Houg: yoomo ?he: yug gi khayhang: te" byu nghoid lha". Uglid yo' beingmhoid, lang" nya: dang: ri tam" gyo: ago"? ga: nyang cang" nyang tid go" nyid boem.