3
(Mat 12:9-14, Luk 6:6-11)
1 Houg: lang" Yesu gi tarha" jung moo doem vang lo". Houg: moo lo, dashoid shid: da" byu dayug nyid.
2 Mungbyu yi dayham" gi Dougno: Bidnyid moo hau: yug ri nyang: gi byid: wa la"- agi byid: wa la". Yesu ri yooboo zhug wa ga: jhang mo zheung: yu" nyid boem.
3 Hougsu" wim Yesu hau: yug ri ?hid: shidvhu" khyoo: re" yab we'? ga: tid.
4 Houg: lang" nyang gi mungbyu yi ri ?Dougno: Bidnyid moo ge da" moo" zei: wa anghoid lang" age da" moo" zei: wa kangso khyoid wa anghoid lang" gi said wa kha: loem: tarha" vang la"? ga: myid: da:. Nyangnu" gi sam: zoo" tam" to" ago".
5 Nyangnu" da" nheigloem: thain: lho: shoid vhang: nyid yoomo nyang nheug yu" koug wigi nheug yo: ziyo' ayam aqei: cang yu" zhoug to". Hau thang: hau: yug ri re" ?lo, yhoin" kaid we'? ga: tid. Nyang: lo, yhoin" kaid yo' nya: lo, ge loo" khari" bye:.
6 Houg: lang" Pharishe" gi tarha: jung mo thu' lho: Yesu ri yo" said pyam wa zi Herod da byu yi dayham" yo' houg: jang: nyang: byen, phyoo" lo" zain: go" nyid boem.
7 Yesu gi nya: cangzoo: yi yo' dage" Galile thoem" khyoo: yhe: lo". Galile mo byu phung: moo" zeing we' nya: da" thang: moo bo cang lo ago".
8 Yerusalem: voo mo mo, Idumia moug: mo mo, Yodan gyidlang thei: tab' mo mo, Turu yo' Sidon mo bang: we' ju" re". Hid: bang: dangain" Yesu jhang ciwim ju" re" boem ga: ri nyang: koid da" moo" ri shoug" gyoo: yoomo nghoid.
9 Houg: lang" Yesu gi nyang ri mungbyu yi gye" jhin" jhab go" loo yoomo nyang: ri anyhin" lheung: goo" baja" ga: nya: shid re" lhid daloem: soin too" byid: wa shid mo nya: cangzoo: yiri tid to".
10 Khasu" wim ga: ri byu myoo" sho' ri ge loo" nhang: yoomo nyang: ri shau" tain" sho' ga: nyang: jhang moo noo mo, dangain" jhen" go" nyid.
11 Yu vang ci: mo, we' nyang: ri myang lang" nyangnu" gi nya: shidkhoin" moo leung goeb lo lho: ?Nang gi Mangso nya: zoo: nghoid da? ga: nyo: ago".
12 Yesu gi nyangnu" ri nya khyoo: yo' sen: lho: afu" nheung loo" wa shid re" zheung: zung" nhang: kaid boem.
(Mat, 10:1-4, Luk. 6:12-16)
13 Houg: lang" nyang: gi boug gung daloem: khyoo: do' yhe: lho: nyang: vhoo: mo, ri khe: yu da" nyangnu" we nya: jhang khyoo: lo" ago".
14 Nyang: gi daxe: eig yug ri khyen: yu lho: nyang: nu' ri Lagyoo: yi ga: myheing myeung byid. Nyang gi nyangnu" ri ?nanu" ngoo yo' dage" nyid wa shid mo khyen: to" zi nghoid? ga: tid. ?Mungdang: kho" loo" wa shid re" we' nanu" ri ngoo nhang: kaid wa.
15 Houg: lang" nanu" gi yu joem ri yo" khaid thu' pyam wa da" yoem: vhoo" we' yo" lo boem wa"? ga: tid.
16 Nyang nu" daxe 2 yug mo Simun khyen: yu lho nyang ri Yesu ri Petru ga: myeung myheung byid.
17 Zebedi nya: zoo: Yaku yo' Yohan tang: ri (Buaenega ga: Yesu myheung byid: hau: zigi ?Mouggoem: nu" tang:? ga: zi nghoid da).
18 Houg: mo Andre- Philib- Batholume-Mathe- Thoma- Alphe nya: zo: Yaku- Thade- myu" jhed myid gyi: su: Simun Yo'
19 Yesu ri ab pyam da: Yuda Iskarud nghoid.
(Mat 12:22-32 Luk 11:14-23.12:10)
20 Houg: thang" Yesu gi yhoem: khyoo: doem lo:- Yesu yo' nya cangzoo: yi voem: zoo: ayo, lang" ayoo" loo: sho' byu phung: moo" yi doem zeung: re" ago".
21 Hau: khyoo: ri nya: yhoem: byu yi shoug" gyoo: lang" nyangnu" gi nyang ri myheug yu wa ga: thu' yhe: lo" ago". Khasu" wim ga: ri mungbyu yi gi nyang: ri ?foin" abye:? ga: tid nyid boem ago".
22 Hougsu" wigi Yerusalem mo gyoo" lo da" tarha" sara dayham bang: tid zigi ?Bezebula gi: nyang moo bo. Hau yu zoug: phoo gi yu joem ri yo" khaid thu pyam wa Yoem nyang ri byid yoo mo nghoid? ga: tid boem.
23 Houg: lang" nyang: gi nyangnu" ri khe: yu lho: ?dangtu yo' satan gi satan ri khasu" se' khaid thu' wa lha".
24 Mungdang daloem: gi nyang: phung: nyang: kho' go" lho: nyang: cang" nyang: gyi koid go" nyid rigi hau: mungdain: gi byo, gyo" lo" byug wa zi nghoid.
25 Oug" khu, daloem: we' nyang: cang" nyang:- kho' go" lho: myeung" myo: byo go" nyid rigi hau: oug" khu' gi byo, sain" lo" byug wa.
26 Houg: yo' dakhyoo" ti" satan gi satan nyang: cang" kho' go" lho: gyi to' koid thu' re" rigi- satan da" mungdain: gi ayo" geingteing jo, loo: thang lo" byug wa zi nghoid.
27 ?Yoem: boo su: ri shi"- xangshid" atei" too" loo: za: hang" nghoid loug we nya: yhoem: khoug: khyoo: vang yhe: lho: nya: ziyoo jonu" ri ayhe: yo" lhoid yu nghoid da. Nyang: ri bain tei" to" thang: ri she- nya ziyoo ri dayo" yhe: lhoid yu wa zi nghoid.
28 ?Ngoo nanu ri deing" deing, tid zigi ?Xangsu: byu yi gi nyang: nu shoid da" yooboo dangain" yo' akhyeung" da" dang: aja: ja: tid da" yooboo ri yo" khyoid pyam byid:.
29 Nghoid loug we gyeungshang: da" Venyi: ri akhyeung" dang: tid shoid su: gi khanham we yooboo khyoid pyam byid: zi shau" loo: wa anghoid. Khasu" wim ga: ri nyang gi apyaid atoo: mo yooboo ri shoid loo" su: nghoid.?
30 (Yesu he: zi tid zigi ?khasu" wim ga: ri mungbyu yi dayham" nyang: moo yu bo? ga: tid byid: yoomo nghoid.)
(Mat. 12:46-50 Luk.8:19-21)
31 Houg: lang" Yesu da" nya: myhi' yo' nya: no, gi ju" re" nyangnu" gi yhoem nghe: shoid moo re" ju" yab jo, wigi byu dayug ri nya: jhang khi: nhang: kaid ago".
32 Yesu ayam aqei: moo zhung: jo, da" mungbyu yigi nyang: ri ?Re" myhi' yo" re" nhung"- re" nham" moo" yi yhoem: nghe: shoid moo nang ri re" sho" nyid ago"? ga: tid kyo" boem.
33 Yesu tu" lho: ?Nga" myhi' yo' nga" nhung" gi hang" nghoid ago" lha"? ga: tid.
34 Houg: su" nyang: gi nya: ayam aqei: moo zheung" zhoung: jo, da" mungbyu yi ri goem: sho' lheung: yu" lho: ?Yu" ge" hid: bang: gi nga" myhi' yo' nga" nhung" nghoid.
35 Khasu" wim ga: ri Mangsoo: myidvho: khyo" cang mo, hang" nghoid loug we' nga" no' nga" nham" moo" yo' nga" myhi' nghoid bye".?