14
Mat.26:1-5, Luk.22:1-2, Yoh.11:45-53
Lhid: kaid pui" yo' doo cid" abo zooyho' zoo: pui" ju loo wa eig nyid" kyoo: shi" ri khainjung agyi moo" yi yo' tarha" sara yi gi Yesu ri sam: za: myheug yu lho: said pyam wa shid re" phajhi" khyoug" go" nyid boem bye:. Nghoid loug we nyangnu" gi mungbyu yi: aloin: lo boem wa shid mo pui" bidnyid gyoo: moo gi akoid shi" ja"- ga: sham: go" boem.
Mat.26:6-13, Yoh.12:1-8
Yesu gi Bethani voo mo manggam bue" yu" bye: da" Simun yhoem: moo voem: zo: nyid da" uri myiyi: dayug gi gye" phoug" dab da" moora: nadu xu:- lug gyeing" jhuang: daloem: ci: re" lho: Yesu da" vhuloem moo hau: xu: re" foid gyoin: byid. Hau: khyi moo nyid mo, dayham" gi hau: ziri nheig yu" yo: lo lho: ?Cenoem wim hau: xu: ri amyid afoo" koid pyam lha"? ga: nyang: cang" nyang: tid go" nyid. Hau: xu: ri ngei soem" shoo: kyab mo oung" pyam lho: myoung shoo" mo, ri yo" gam byid: zi nghoid da:. Nyang: cang" nyang: lu wim go" nyid ziyo' hau: myiyi: ri yooboo foin: ago".
Houg: lang" Yesu gi nyang: sam: zoo: nyid baja"- nanu" nyang: ri ce: noem wim goin, jang nyid go" lha". Nyang: gi ngoo ri ge da" moo" zei: byid: bye:. Khasu" wim ga: ri- myung shoo" mo, gi- nanu" yo' dage" za: nyid boem. Nanu" nyangnu" ri yo" pang" nghoid loug we' ngoo gi- nanu" yo' khanham we' beung: abyid loo: nyid jo, wa zi anghoid. Nyang: koem gi nyang: yo" koid yhi' koid abye:- nyang: gi myhoeb pyam wa nga" shid mo soin' myeung lho: xu: joid byid: abye:. Akhid" ngoo nanu" ri deing" deing tid zigi ngeibu: ludang: ri kho" kyo" lo" da" moug: gyab goin" jang" moo he: myiyi: ri myid boin" wa shid mo nya: moozoo" ri tid kyo" lo" boem wa"- ga: tid.
Mat.26:14-16, Luk.22:3-6
10 Houg: lang" daxe: eig yug moo bo da" Yuda Iskarud gi Yesu ri ab byid: pyam wa shid mo khainjung zeing jhang khyoo: thu' yhe: lo". 11 Nyangnu" gi nya: dang: ri shau" gyo: boem lang" gi ngei wigi nyang: ri ngei byid: wa ga: dang: soo" byid: to" abye: go". Yuda gi kha: yo yo" ab byid: wa zi akhyoo" sho: nyid.
Mat.26:17-25, Luk.22:7-14,22-23,
12 Hau: lhid: kaid xoin" yang nu" ri said da" doocid" da" zooyho' zo: pui" bidnyid ju" wa xangshid" nyid"- nya: cangzoo: yi gi Yesu ri- ngoonu" gi re" shid re" lhid: kaid pui" myen" xoin: ri nang ngoonu" ri khakhyi moo yhe: nyheung too" nhang: nau lha"? ga: myid: ago".
13 Houg: lang" Yesu gi nya: cangzoo: eig yug ri re" eig yug voomoo" khoug: khyoo" vang yhi: ge' gyid jhuang: vu, ci: da" byu dayug gi re" eig yug ri lhoem: tau yu wa 14 Nya: thang: cang lo" lho:- nyang vang lo" da" yhoem: mo yhoem: seing: ri Ngoo nga" cangzoo: yi yo' dage" lhid: kaid da" pui: zoo: noem zoo: wa being" do, yab khayoo: nghoid da" lha?- ga: sara myid: nhang" kaid ein: tid ge. 15 Houg: lang" nyang: gi re" eig yug ri soin' jen" too" bye:- tho' pyam: mo yab moo" dayab ri toin" shid wa nghoid. Hau: yab moo ngoonu" shid re" myen" xoin: yhe: nyheung too" ge"- ga: pyeing: kaid.
16 Cangzoo: eig yug we' thu' yhe: lo" ri voomoo" khoug: khyoo: vang yhe: lho: nya: eig yug ri Yesu tid kaid ziyo' dakhyoo" yhe: myang lang" lhid: kaid pui" zoo: noem ri yhe: nyheung to" ago".
17 Akhid" myenthang: zoo" ri Yesu gi nyang cangzoo: daxe: eig yug yo' dage" ju" re" ago" 18 Nyangnu"- voem zoo: zoobui" moo zheung: zo: nyid uri Yesu gi ngoo nanu" ri tid ba:- ngoo yo' voem: shoin" zo: nyid su: dayug gi ngoo ri gyivoo yi da" lo, moo ab, pyam byid wa nghoid- ga: tid kyo".
19 Houg: yoomo nyangnu" gi nheig gyo: koug ziyo' dayug thang: moo dayug- hau: yug gi ngoo nghoid wa la"- ngoo nghoid wa la"? ga: zheung myid: nyid ago".
20 Yesu gi- hau: yug gi daxe: eig yug moo bo lho: ngoo yo' dage" dabain mo za: zooyho' shoin" zoo: su: nghoid ga: tid. 21 Jhoem: mougsoug" moo lhid" to" ziyo' dakhyoo"- byu nya: zoo: gi shid: kham: wa zi nghoid- nghoid loug we' byu nya: zoo: ri gyivo lo, moo ab byid: pyam su: gi byu xuid" vooyoem: lo" zi shau" wa nghoid- hau: yug gi akhu: re" nghoid ri- nya: shid mo je gi zi nghoid- ga: tid.
Mat.26:26-30,Luk.22:14-20, 1~Ko.11:23-25.
22 Houg su" nyangnu" voem: zo: nyid boem uri Yesu gi zooyho' ri yu lho: jeju" bain coung" byid: lang" hau: ziri xeig phe' lho: yu zoo: ge"- hid: gi nga" gung nghoid ga: tid wigi cangzoo: yi ri gam byid.
23 Yesu gi zabyid goem ri yu lho: Mangsoo ri jeju" bain coung" byid: lang" cangzoo: yi ri byid: da:- nanu" dangain" mo, hau: goem mo shug boem ago". 24 Yesu gi ?He: zigi byu myoo" sho' mo, shid re" shoin: pyam da" nga" suid" nghoid. Mangso dang: theung ri dazid thoung" tab to" da" nga" suid" nghoid? ga: Yesu tid. 25 Ngoo nanu" ri tid ba:- Mangso mungdain moo zabyid seig ri ngoo shau" shug da" bidnyid ju" sho' ngoo gi he: zabyid ri khanham we' shug loo wa zi anghoid ga: tid.
26 Hau: thang: ri nyangnu" gi coung" nghei jikhoin" daloem: bain coung" byid: lang" zhainloin: boem khyoo: thu' yhe: lo boem ago".
27 Yesu gi nyangnu" ri nanu" dangain" mo, ngoo ri too" kho' lho: gei phang: loo" goo" wa"- Khasu" wim ga: ri jhoem: mougsoug" moo Mangsoo gi yang zoem: su: ri said wigi- yang joem dangain" gi- phang: byo sain" lo" boem wa"- ga: lhid" to". 28 Nghoid loug we' ngoo doem dei to'' lo thang: ri moo Galile moug: khyoo: nanu" shid moo ngoo yhe: loo" lang" wa ga: tid to".
29 Petru gi Yesu ri- nyangnu" dangain" mo, nang ri phang: cau" too" khari" nghoid loug we' ngoo gi nang ri khanham we' aphang: cau" too" khyoo: wa ga: Yesu ri phoug tid.
30 Yesu gi nyang: ri ngoo nang ri deing" deing tid ba:- akhid" myen nyang: gyo, eig khoin" atoin" shi" ri- nang gi ngoo ri asi ga: soem" lheung: ngeug pyam wam bye: ga: Petru ri tid.
31 Nghoid loug we Petru gi- ngoo gi nang yo' dage" shid: ca" loo nghoid loug we nang ri ngoo angeug pyam wa ga: je phain" tid lo- cangzoo: gooji yi dangain" we' houg: yo' dakhyoo" tid ago".
Mat.26:36-46,Luk.22:39-46
32 Yesu yo' cangzoo: yi gi Gesemane ga: myeung da" joyoo: moo ju" re" lo ago". Yesu gi nya: cangzoo: yi ri ngoo akyu" mho' nyid uri nanu" gi hid: moo zhoung: jo, lang" ge' ga: tid khare". 33 Hau: lho: nyang: gi Petru Yaku Yohan yo' dage" shu" yhe: lo". Nyang: gi gye" myidmyoo: ungloug yau: khe: shau" nyid. 34 Houg: lang" nyang: gi nyangnu" ri nga" nheigloem: boug go' wa yhi' gye" kougshu: nyid- nanu" hid: moo lhid lho: lang" nyid shi" ge' ga: tid da:-
35 Nyang: gi houg: mo dajhi' zoo: lid: yhe: lo" wigi myid: jang: moo yhe: goeb jo, lho: ge bui" nghoid ri gi ayo' akhyeing: lid: loo" baja". 36 Nga"- phoo' we"- nang gi dangain" ri yo" ze" bui" su: nghoid nyid- houg: yoomo hid: yau khe kyikhyeug da" goem ri nga" jhang mo yu pyam byid we- nghoid loug we' ngoo vho: khyo" anghoid nang vho: khyo" za" nghoid baja" ga: akyu" mho' nyid.
37 Nyang: doem tau" lo rigi cangzoo: soem" yug yhoeb myhid jo, ziri lo myang lang"-Yesu gi Petru ri Simun we" nang yhoeb myhid jo, la". Nang gi danayi khyalhang" ayo" lhoug nyid rhe". 38 Nanu" gi jhuphyo' jang" moo agyo: loo" wa shid re" lhid lho: akyu" mho' nyid ge' Venyi: gi vho: nau nyid nghoid loug we' gungshoo" gi yoem: neung: nyid ga: nyangnu" ri tid.
39 Nyang dalheing doem thu lo" lho: akhang: dang: yo' dakhyoo"- akyu" mho' nyid. 40 Nyang doem tau" lo ri- nyangnu" gi myo, kug gye" lid: boem yoomo yhoeb myed jo, ziri lo doem myang- houg: lang" nyangnu" gi Yesu ri khasu" doem phoug tid wa zi we' asi loo nghoid ago". 41 Yesu gi soem" lheung: ein: lheung: doem tau" loo lang" nyangnu" ri nanu" gi akhid" ju" sho' yhoeb myhid lho: no: nyid goo" nhung: lha"- gi" bye:- ayo' ju" bye:- yu" ge"- byu nya: zoo: gi yooboo koid akhyeung" mo, lo, moo ab pyam zi shau" abye:. 42 Too' ge'. Ngoonu" yhe: lo" boem loo: shang- yu" ge ngoo ri ab pyam wa su: gi ju" re" nyid bye" ga: nyangnu" ri tid.
Mat.26:47-56,Luk.22:47-53,Yoh.18-3-12,
43 Yesu houg: su" da tid nyid shi" uri daxe: eig yug moo bo da" Yuda gi khainjung agyi moo" yi tarha" sara yi yo' Ludaid vhujhung: yi wigi nhang: kaid da- sham: lham: ci: da" byu phung: moo" yo' dage" ju" ri" bye:. 44 Yesu ri ab byid: pyam su: gi- ngoo boobug bug su: gi nanu" vho: yug nghoid ga:- nyang: ri myheug yu lho: goolhoo' za: zung" lhug shu" loo" ge' ga: nyangnu" ri aved byid: to".
45 Houg: su wigi Yuda ju" ri" yo' Yesu jhang khyoo: tain" yhe: lo" lho: sara we"- ga: tid lho: boobug, yhe: boug- 46 Houg: lang" nyangnu" gi Yesu ri myheug tei" lho:- teung za: zei zeung, ci: boem bye:- 47 Hau: yam moo yab jo, mo, mo dayug gi nya: sham: coin" she: yu lho: Khainjung moo" yen" dayug da" join pho nookhyab jab phyid khyo' pyam byid. 48 Hau thang Yesu gi nyangnu" ri khyangtoug: ri yhang: ti" ngoo ri myheug wa shid re" sham: yo' thung" keung: yo' ri" go" la". 49 Ngoo gi Noku Yhoem: Moo" moo jhau" byid: zoore nanu" yo' dage" nyid nghoid loug we' nanu" ngoo ri amyheug nghoid ago". Nghoid loug we' jhoem: mougsoug" gi joeb byeung" loo ca"? ga: tid.
50 Houg: lang" cangzoo: yi dangain" mo, gi nyang: ri too" kho' lho: tang" phang: lo" byug: boem bye:. 51 Jid: moo" paindu za: gang" ci: da" zooyam dayug gi Yesu thang: moo cang yhe: lo" da:- nyangnu" gi nyang: ri myheug wa ga: soin' boem ri 52 Nyang: gi jidmoo" pain" du ri too" kho' lho: gung cen: tang" phang: loo" khare".
Mat.26:57-68.Luk.22:54-55,63-71,Yoh.18:13-14,19-24
53 Hau: thang: ri nyangnu" gi Yesu ri khainjung moo" yhoem: khyoo: shu" yhe: lo" ago". Khainjung agyi yi dangain" mo, yo' sayen" yi- yo' tarha" sara yi mo gi houg: moo zeung foem: to" boem ago". 54 Petru gi khainjung moo" da" yhoem: vang" khoug: moo ju" sho' vi" vi: mo Yesu thang: moo cang yhe: da:- nyang: gi goemloem gyizoo: yi yo' dage" zhoung: jo, wigi- myikhyoem moo myi: bo gang nyid da. 55 Khainjung yi yo'-Yuda tarha" yab do, goin" jangmo sayen" yi dangain" mo, gi Yesu ri yo" said pyam sho' ga: sagsi sho: boem nghoid loug we' nyangnu" ce" sagsi ashau" shoo: nghoid ago". 56 Khasu" wim ga: ri byu myoo" sho' mo, gi Yesu khyoo: ri mhau' lho: sagsi kham nyid ago".
57 Nghoid loug we' nyangnu" da" sagsi dang: joem gi dayug yo' dayug du goo"- Houg: lang" byu dayham" bang: gi to' yab re" lho: nyang: khyoo: ri sagsi mhau' kham boem lho: 58 He: yug gi byu lo, wigi koid to" da" he: Noku Yhoem: Moo" ri phyo' pyam lho: soem" nyid" kyoo: lang" byu lo, wigi akoid loo: za:- ngoo koid too" wa"- ga: tid ziri ngoonu" shau" gyo: boem bye:- ga: tid ago". 59 Nghoid loug we nyangnu" da" sagsi dang: lang" gi daja yo' daja azhung" goo".
60 Houg: lang" khainjung moo" gi- mo, phung gung mo to' yab lho: Yesu ri nyangnu nang ri yooboo foin: nyid ri nang dakhoin" we' aphoug, tu" rhe". 61 Nghoid loug we Yesu gi dakhoin" we' atu" loo sam" zoo: nyid Houg: lang" khainjung moo" gi- nyang: ri nang gi ngi: lho' da" Mangso nya zoo Meshia nghoid la"? ga: doem myid.
62 Yesu gi ?Ngoo nghoid- byu nya: zoo: gi myhang: thang su: da" lo, yo shoid moo zhoung: jo, ziyo' mougkhung: mo, jhoem: thei" khoug: moo ju" re" ziri nanu" dangain" lhoem: myang goo" wa nghoid? ga: tid.
63 Khainjung yen" gi nya: atho' byi sheung: lang: ceug sain" pyam lho: ngoonu" ce" sagsi ca" lo: la". 64 Nyang: Mangsoo ri Juang" yi gei sang: zi ri nanu" shoug" gyoo: boem bye nanu kha dang: phyed yo" ga: tid. Nyangnu" dangain" mo, we Yesu ri shid: moin: yooboo yo" zi nghoid ga: dang: phyed pyam ago".
65 Dayham" gi Yesu ri shikain" byi" gyoin: boem ago" nya: myonhoo: ri thoeb pyam byid: lho: ?Nang ri thoin: kha: yug nghoid lapi: pe: yu" we? ga: tid ago". Goem loem gyizoo: yi we nyang: ri boopyug pyoug yug ago".
 
Mat.26:69-75,Luk.22:56-62,Yoh.18:15-18,25-28
66 Petru gi hau: vang" khoug: moo nyid jo, da: uri Khainjung moo" da" vhookung: myiyi: nu" dayug re" lho: 67 Petru myi: gang, nyid ziri myang lang" nyang: ri yu" zhug to" lho:- nang we' Nazared mo Yesu yo' dage" lhoung nyid yen" su: nghoid? ga: tid da:.
68 Nghoid loug we' Petru gi hau: ziri ngeug pyam lho:- nang tid zi ngoo asi- gyoo: we' ase' gyoo:- ga: tid. Houg: su: nyang: gi vang" khoem duang: khyoo: yhe: lo". Hau u" ri gyo, dalheung: toin: bye:. 69 Hau: vhookung: myiyi: nu" nyang: ri doem myang lang" ayam moo yab jo, mo, ri he: yug we' nyangnu" phung: mo dayug nghoid da:? ga: tid. 70 Nghoid loug we' nyang: gi hau: ziri doem ngeug pyam bye houg: lang" hau: thang: daso' zoo: rigi hau: ayam moo yab jo, mo, gi Petru ri gi" gi nyang: nang gi nyangnu" phung mo nghoid da: khasu" wim ga: ri nang gi Galile mungbyu nghoid da: ga: tid ago".
71 Houg: lang" Petru gi jo da" khyoo: ri ngoo jham tang: lho tid wa. Ngoo tid zi ajoo lang" Mangsoo ngoo ri dam byid: baja"- nanu" tid yid da" hau: yug: khyoo ri ngoo asi ga tid.
72 Houg: lang" gyo, eig lheung: toin: loo bye:- Petru gi Yesu nyang: ri- gyo, eig lheung: atoin: shi" ri nang ngoo ri soem" lheung: ngeug pyam wa nghoid ga: da" dang: ri doem myid boin: lo wigi nheig myed koug ngau nyid.