13
(Mat.24:1-2,Luk.21:5-6,)
1 Yesu gi Noku Yhoem: Moo" mo thu' lo" nyid uri nya: cangzoo: yi mo dayug gi nyang: ri Sara we" yu" we' khayhi' ge da" lug zeing joem yo' lug yhoem: moo" joem nghoid da" ga: tid.
2 Yesu gi nyang ri nang he: yhoem: moo" ri myang la". He: lug yhoem: mo lug zeing joem daloem: we' nya joyoo moo adeung loo: byo, gyo" lo" byug boem wa"- ga: tid kyo".
Mat.24:3-14, Luk.21:7-19
3 Yesu gi Zhainloin: boem tho' moo Noku Yhoem: Moo" shoid khyoo: myonhoo: shu: lho: zhoung: jo, da uri Petru- Yaku- Yohan yo' Andre gi sam: zoo: nya: jhang moo re" lho.
4 He: gu: ri khanham bue" loo wa zi nghoid lha" hau: gu: bue" loo wa da" uri ce: noem alhoo: again bue" thu' loo wa lha". Ngoonu" ri tid kyoo" we' ga: tid ago".
5 Houg: lang" Yesu gi nyangnu" ri nanu" ri hang" wigi we' ashu" vhang: loo" goo" baja"- lhid nyid ge'.
6 Byu myoo" sho' mo, gi nga" myeung voin lho: thu' lo wigi ngoo gi Meshia nghoid bye: ga: tid yoomo byu myo" sho' ri shu" vhang: lo" byug boem wam bye:.
7 Jhang moo vi moo gyi khaid meing: byo, ludang: shau" gyo: lo uri nanu" myid amyoo goo"- hau: gu: gi bue" loo ca" nyid nghoid lug we houg: gi lo" thang ayo, gi anghoid shi".
8 Da moug: yo' da moug: mungdain: daloem: yo' daloem:- gyi zain: go" lo boem wa. Joyoo khyikhang" moo" moo myid leig we' leig loo wa. Zoo yoid phang" khoug we' ju" loo wa. He: gu: gi yaukhe" lo da" ashid" shi" nghoid nyid. Hau khyoo: gi zoo: khu: wa ri xang shid" no shid" zi yo' du nyid.
9 Nanu" koem gi nyang: tu: nyang: lhid lho: nyid ge' nyangnu" gi nanu" ri myheug yu lho: tarha" yung" khyoo: ab pyam boem wa tarha" jung moo nanu" ri baid boem wa zoug: yi yo' kho: kham" yi ri- ngeibu: ludang: tid kyoo" wa shid mo ngoo yoomo nanu" gi nyangnu" da" shidkhoin" moo shau" yab jo, boem wa.
10 Nghoid loug we' lo" thang ayo' aju" shi ri ngeibu: ludang: ri byumyu" bain sho' mo, ri kho" kyoo" ca" wa zi nghoid.
11 Nanu" ri myheug lho: tarha" yung" khyoo: ab byid: pyam da" uri khasu" tid wa la" ein: shid mo amyid ci' nyid goo"- ayo, ju" lang" nanu" ri dang tid nhang: ziyo' dakhyoo" tid ge'. Khasu" wim ga: ri hau: dang: joem gi nang tid dang: anghoid- gyeungshang: Venyi: mo thu re" dang: nghoid wa.
12 Houg: lang" nya: mang: gi nya: nhung" ri shid: wa khyoo: shu" ab pyam loo wa- nya pho bang: gi nya zoo: yiri ab pyam wa- nya: zoo: yigi nya: myhi' nya: pho ri gyi koid lho: wigi said pyam nhang: lo boem wa.
13 Hougsu" nga" myeing yoomo byu dangain mo, gi nanu" ri anoug angei bue" lo" wa nghoid loug we' lo" thang sho' zeung: kham su: gi khyoid yu zi shau" wa nghoid.
Mat.24:15,28, Luk.21:20-24
14 Houg: su: wigi- hau: yu" dain sho' da" aco' ajhoid zigi atoo" eung: da" jo, yoo moo to" to" ziri nanu" shau" myang lang gi(Mougsoug" nghab nyid su: gi dang: se' gyoo: kang: wa) Yuda mung" moo nyid mo, gi boem tho' khyoo: phang: loo" goo" baja".
15 Yhoemkhung: tho' moo nyid su: gi- zi daja: ja: ri yu ci: phang: wa shid re" yhoem: khoug: khyoo: avang, loo" loo: baja".
16 Yoothung" dain" moo nyid su: we- nya: byisheung: yu ci: wa shid mo yhoem: khyoo: adoem tau" loo loo: ja".
17 Hau: bidnyid gyoo: moo- zoonu" gung nghoid mo, yo" noug" nu" shu" mo, gi gye" gyoug boem wa nghoid.
18 Hau: ayo gi ngam" yo, ri anghoid wa shid mo Mangsoo ri akyu" mho' nyid ge.
19 Khasu" wim ga: ri Mangsoo phain" to" da" mougmyid jo, shid" jangmo akhid" nyid" ju" sho' abue" yu" shi" ziyo' thang" phyang" kha" nham we' abue" yu" loo wa da" yau: khe: kyikhyeug khyoo: gi hau: bidnyid gyoo: moo bue" thu loo wam bye:.
20 Houg: yoomo ayo' bidnyid yi ri Aseing: wigi ashoung" pyam byid: nghoid rigi hang" we' yo" dei nyid wa zi anghoid. Nghoid loug we' nyang: khyin: yu too" mo, shid mo hau: bidnyid joem ri nyang shoung" pyam byid: wa.
21 Byu dayug yug gi nanu" ri yu" ge' hid: moo Meshia nyid yu" ge'- thei" thei moo Meshia nyid ga: tid nghoid loug we' aloem" goo".
22 Mhau da" Meshia joem yo' mhau' da" lapi: apyeug, joem thu lo boem wa nghoid. Ge bue" nghoid rigi- nyangnu" gi Mangsoo khyen: yu too" bye: mo, rilang" yo" shu" vhang: loo" sho' ga: alhoo: again aja: ja: yo' mau" pho" moozoo" aja: ja: toin" shid loo goo" wa.
23 Nanu" koem gi lhid lho: nyid ge"- ngoo gi abui" loo shi" mo nanu" ri ja: khang" moo" he: gu: tid too" bye:.
Mat.24:22-35,Luk.21:29-38
24 Hau: lho: hau: da" yau khe" kyikhyeug zi shau" thang: ri bid, gi no, lo" byug wa lhammoo" we' azhoo: loo: wa.
25 Kyi: joem we' mougkhung: mo byid, gyo" lo" byug wigi- mougkhung: mo yoemso joem gi noin" lo boem wa.
26 Houg: lang" byu nya: zoo: gi yoemso phung" yoeb yo' dage" jhoemmoug" khoug: moo re" ziri nyangnu" myang boem wa.
27 Byu nya: zoo: gi moug: lagyoo: joem we' moug: thang myid thang mougmyid myid khyoug: goin" khyo" nhang: kaid wigi nyang: khyen: yu too" bye: mo, ri cang zheung" yu re" boem wa.
Mat.24:32-35,Luk.21:29-33
28 Lafoem gam ri yu" lho: jhau" yu ge' Lafoem kung joem mo anyug thoid lo wigi fu, nu" toid loo lang" gi zain vang khoem" ju" loo bye: ziri nanu" se' ago".
29 Houg: yo' dakhyoo" ti" hau: gu: bue" lo ziri nanu" shau" myang lang" gi nyang: ju" ri" wa ayo, jen" jen" nghoid bye: ziri nanu" si' ge'.
30 Akhid" nyid nyid da" byu he: yam: dangain"- ashid: shi" ri" hau: khyoo: dangain" bue" loo wa zi ri myid boin: ge.
31 Mougkhung: yo' myidjang lid lo" byug nghoid loug we' nga" mungdang: gi khanham we' alid loo" wa.
Mat.24:36-44
32 Nghoid loug we' bidnyid ayo' ri gi Mougkhung: tho' moo nyid da" moug: lagyoo: yo' hau: nya: zoo: we' asi nghoid da. Nya: phoo' za: se nyid.
33 Hau: bidnyid yo' ayo, khanham ju" ri wa ziri nanu" asi yoomo lhid zid" lho: gyeing" gyeing: za: yu nyid ge'.
34 Houg: su" wigi hau: khyoo: gi byu dayug nya: yhoem mo:- gyung: so" loo" wa nghoid lang" nya: join yi ri dayug yo' dayug- nya: moo" yo' nya: yhoem: moo" ri pyo: too" byid: kho' wigi khoem" zung" su: ri we' lhid lho: zung" nyid wa shid mo amyeung" byid: kho' ziyo' du nyid.
35 Khasu" wim ga: ri hau: a seing: gi myenthang: zoo" la'- gamgung myen: ri la'- gyo, toin: boem: ri la'- bidxain" zoo" ri la'- khanham ju" loo wa zi nanu" ase' too" yoomo lhid lho: zung" nyid ge.
36 Houg: su" nghoid yoomo yhoem: seing: gi nyeigdain tung" ju" lo uri nanu" yhoeb myed, jo, ziri alo myang wa.
37 Ngoo nanu" ri tid bye: zigi Nanu" dangain" mo ri tid zi nghoid lhid lho: zung" nyid ge'.