12
(Mat.21:33-46, Luk.20:9-19)
Yesu gi dangtu joem nyangnu" ri tid kyo" byu dayug gi zabyid khyam: daloem: ri sho" nyheung to" lho: hau: ziri khyam: kyam, lheung to". Zabyid pyeig wa duang: du: to" ziyo' joozam daloem: ri we' nyham" to" lho: wigi khyam: koid zoo: mo, ri nghoo" byid: too" kho' lho: gyung: so" lo". Zabyid shi phyo' ayo' ju" lang" nyang: gi khyam: ngho" zei: mo, jhang khyoo: join dayug ri khyam: nghoo" phoug" zabyid shi" mho' nhang: kaid. Khyam: ngho" zei: mo, gi hau: join ri loem" myang lang" tei" baid lho: gung koem: doem nhang: kaid ago". Khyam: seing: gi join gootu: dayug ri doem nhang: kaid- khyam: ngho" zei: mo, gi hau: join ri vhuloem lhoem: yug khyoid- dam tab wigi sho' lhoem: phyo' ago". Houg: su" wigi khyam: seing: gi join gootu: dayug ri doem nhang: kaid lang" khyam: ngho" zei: mo, gi nyang: ri we' lhoem: said pyam ago". Gootu: myoosho' mo, ri we' houg: yo' dakhyoo"- baid mo, ri baid- said mo, ri said pyam koid ago". Khyam: seing: gi nhang: kaid wa zi nya: zooti" zoo" dayug za: dadeung jo, lo: da:. Hougsu" nyang: gi nga" zoo: rigi loem: phau" myang: boem wa? ga: tid lho: lo" nang moo gi khyam: ngho" zei: mo, jhang khyoo: nya: zoo: ri nhang kaid da. Nghoid loug we' khyam: ngho" zei: mo, gi he: yug gi khyam: seing: da" nya: zoo: nghoid da:- ri" ge' he: yug ri said pyam shang- houg lang" nya: da" ziyoo jonu" gi nyha" zi bui" wa nghoid ga: nyang cang" nyang tid go" nyid. Houg: su" wigi nyangnu" gi nyang ri myheug yu lho: said pyam wigi zabyid khyam: nghe: shoid moo yhe: she: pyam to" boem Houg: lang" khyam: seing: gi khasu" koid wa lha". Nyang gi re" lho: khyam: ngho" zei: mo, ri said pyam wigi hau" zabyid khyam: ri we' gooji yi ri nghoo" byid: pyam wa nghoid. 10 Hougsu" wigi yhoem: zhug mo, khyen: khyo pyam da" lug zeing gi dangain" tho' mo je" yhau: gyen: thang da" yhoem: jhoin: lug zeing bue" loo bye:. 11 He: khyoo: gi Aseing koid zi nghoid- hau: zigi ngoonu" da" shidkhoin" moo mau" pho" moo" nghoid nyid ga: da" jhoem: dang: ri nanu" anghab yu" goo la"? ga: tid. 12 Yuda vhujhung: yi gi nyangnu" ri yeung lho: Yesu he: dangtu ri tid zi si yoomo nyangnu" gi Yesu ri myheig, wa ga: soin'- nghoid loug we' byu phung: moo" ri gyoug nyid boem yoo mo nya: jhang mo gang: thu' lo" boem bye:.
(Mat 22:15-22, Luk. 20:20-26)
13 Hau: thang: ri nyangnu" gi Yesu nya: khoin" thui: yoomo nyang: ri myheig wa shid re" Pharishe dayham" yo' Herod byu dayham" bang: ri Yesu jhang moo nhang: kaid ago". 14 Nyangnu" gi re" lho: Sara we"- nang gi deingmain" ziyo' hang" ri we' myonhoo: akhyen: da" khyoo: ri ngoonu" se- khasu" wim ga: ri nang gi byu ri gei ayu" loo:- Mangso da" khyoo: ri deing" deing, za: dajhoug" byid: nyid. Roma kho': sen" ri khang" doug, ge kaid la". Age kaid la". Ngoo nu" ri tid kyoo" we'. 15 Ngoonu" byid: wa la". Abyid: wa la"? ga: myid: ago". Yesu koem gi- nanu" ngoo ri cewim leig yu yu" go" nga" jhang" gei dakyab, ci: lo yu" ge' ngoo yu" yu" wa ga: tid. 16 Nyangnu" gi ngei dakyab, ci: lo boem- Yesu gi hid: moo hang" soolhoo: yo' hang" da" myeing tab to" lha"? ga: myid: da:. Nyangnu' gi Roma khosen: da" soolhoo: yo' myeing dab ga: tid. 17 Hau: thang: Yesu gi gi bye:- Roma kho: sen" seung: gu: gi Roma kho: sen" ri byid: ge- Mangsoo yo' sen: gu: gi Mangsoo ri byid: ge' ga: tid. Nyangnu" koem gi gye" mau" byug boem abye: go".
 
(22:23-33, Luk. 20:27-40)
18-19 Hau: thang: ri doem dei to'' lo khyoo: ajo, ga: tid go" nyid da" Saduke dayham" Yesu jhang ju" re" lho: Sara we"- byu dayug yug nya: mang: gi zoo: du ayoo" loo: za: nya: yhoem: seing: myhi' ri shid: cau" too" kho' nghoid rigi hau: yug nya: nhung" gi nya: mang" cougmoo" ri lo, xo' lho: nya: mang: yhoemkhung: xo' zoo: du khu: byid: ca"- ga: Moshe tarha" ngoonu" ri lhid" too" byid: khare". 20 Akhid" nya: mang: nya: nhung" nyhed yug nyid boem- Mang: mo" yug gi myi: dayug yu bye:- nghoid loug we' zoo: aboo shid" ri shid: lo". 21 Houg: thang" mang: laid yug we' hau: cougmoo" ri lo, doem xo' da-- mang: laid we' zoo: du aboo shi" zi doem shid: lo". 22 Nya: nham ho' nyhed yug goin"- zoo: du ayoo" loo: shid: lo" boem- lo" thang moo gi hau: myiyi: we' cang shid: lo". Soem" yug ein: yug we' houg; yo' dakhyoo" ti" bue" loo" bye:. 23 Shid: jangmo doem dei to'' lo da" bidnyid moo hau: myiyi: myhi' gi kha: yug da" yhoem: seing: myhi' nghoid wa lha". Khasu" wim ga: ri nyang: nham: ho' nyhed yug goin"- hau: myiyi: ri lo, xo' boem bye- nyang: nham: ho' nyhed yug goin"- hau: myiyi: ri lo, coem xo' nyid lo boem abye: go"- ga: tid ago". 24 Houg: lang" Yesu gi nyangnu" ri nanu" gi jhoem: mougsoug" yo' Mangso yoemso ri asi yoomo shoid vhang: nyid boem anghoid goo" rhe" ga: myed:. 25 Khasu" wim ga: ri shid: loo" mo, doem dei to' lo da" uri rigi nyangnu" gi myi: yu myi: byid: zi akoid loo goo" wa nyangnu" gi mougkhung: tho' mo moug: lagyoo: yi yo' dakhyoo" ti" nghoid. 26 Houg: yoomo shid: mo, doem dei to'' lo da" khyoo: yo' sen: wigi myi: nge" nyid da" mhain" pung yo' sen: da" khyoo: ri tid da" Mangsoo gi Moshe ri ngoo gi Abraham da" Mangsoo- Isag, da" Mangsoo- Yaku da" Mangsoo ga: tid da" jhoem: dang: ri lhid" to" da" Moshe lhid pug ri nanu" anghab yu" goo" la". 27 Mangsoo gi shid: jo, mo, da" Mangsoo anghoid- dei nyid mo, da" Mangsoo danghoid, nanu" gi gye" shoid vhang" byug boem bye" ga: tid.
(Mat.22:34-40,Luk. 10:25-28).
28 Houg lang" tarha" sara yi mo dayug gi Yesu yo' Saduke dayug yo' dayug tid ngeug go" nyid boem ziri shoug" gyoo: lang" Yesu nyangnu" ri phoid: byid: nyid ziri shau" myang lang" gi nya: jhang moo re" lho:- nyang" ri Dang: Theung Khoin" mo kha: loem: je gyi: thang zi nghoid lha"? ga: myid:-
29 Yesu gi Israela byumyu" yi we"- tam" gyoo: ge"- hau: Aseing ngoonu" da" Mangsoo gi dayug kyeung" da" Aseing nghoid. 30 Hau: Aseing re" Mangsoo ri re" ungkhoug: dangain"- re" nheigloem: emyed dangain"- re" Venyi: soozoo: dangain" yo' jheddab we'. 31 Eig loem: ein: da" Dang: Theung Khoin" gi re" yhoem: kyoo" cang" ri nanya: gung yo' dakhyoo" ti" jheddab ca"- ga: zi nghoid. He: eig loem: tho' moo je gyi: da" Dang: Theung Khoin" gi ajo, loo: ga: tid kyo". 32 Houg: lang" hau: da" tarha" sara gi Yesu ri nghoid bye:- Sara we"- Mangsoo gi dayug kyeung" zi nghoid. Nyang mo jain lho:- gootu: phara" aboo loo: ga: zi gi deung nyid. 33 Houg: lang" byu gi Mangsoo: ri nya: ung: khoug nheigloem: dangain" yo' nya: nheigloem: emyed dangain" yo' gungdu: yoemso dangain" yo' jheddab ca" ga: ziyo' yhoem: kyoo: cang" ri nyang nya" gung yo' dakhyoo" jheddab ca" ga: da" a myeing" tarha" eig khoin" ri tam" gyo: zigi Mangsoo ri ngei" byid: da" xoin" dangain" tho' moo je gyi: nyid xoin" du: joem yo' xoin"? ga: tid. 34 Yesu gi hau" yug doem tid nyid ziri si' lang" nyang ri nang gi Mangso mungdain yo' atoung" vi: loo: ga: tid. Hau" thang: ri gi Yesu ri hang" we' ci: avoem" myid: boem loo: nghoid ago".
(22:441-46,Luk, 20:41-44)
35 Yesu gi noku yhoem: moo jhau" byid: nyid uri- nyangnu" ri Meshia gi David da" amyed' ashen nghoid ga: tarha" sara yi khasu" wim tid go" lha". 36 Re" gyivoo joem ri re" khyid: voo: khoug moo ngoo atoo" byid: byid: gi
nga" lo, yo shoid moo dazhoung: jo, we' ga: hau: Aseing gi nga" Aseing ri tid da:? ga: David gi gyeungshang: Venyi: vang lho: tid da.
37 David nyang: lang gi Meshia ri Aseing ga: tid rigi Meshia gi khasuwim wigi David da" amyed ashen se nghoid wa lha"? ga: tid. Byu phung: moo" yi gi Yesu da" jhoug" myeing" ri ngei pyoo" za: tam" gyo" yu boem ago".
 
Mat.23:1-36, Luk.20:45-47
Byu phung: moo" yi gi Yesu da" jhoug" myeing" ri ngeipyoo: za: tam" gyo yu boem ago". 38 Houg: su" Yesu gi jhau" byid: nyid zoore tarha" sara yi ri lhid ge' nyangnu" gi byisheung: ri void pyam lho: so" yen" noug mo, kid" vang" cang lhoem: phau" myang: wa zi vhoo: mo, nghoid. 39 Tarha" jung yhoem: khoug: moo we' gootu: khyen: to" da" zhungtang moo zhung: noug mo, nghoid ago". 40 Nyangnu" gi cougmoo" yi da" yhoem: zi yookhoid joem ri lhoid zo: ci: lho: subi" yu" gi sho' nghoid boin yen" mo, nghoid. Akyu" sheung" sheung: mho' noug mo, nghoid ago". Nyangnu" rigi je gyi: da" tarha" dang: kho' zi shau" boem wa nghoid ga: tid.
Luk.21:1-4
41 Hau: thang: ri Yesu gi Noku Yhoem: Moo" mo alu: boin" nam, moo zhoung: jo, wigi mungbyu yi phung: moo alu ngei re" kaid nyid boem ziri yu" nyid ziyoo jonu" yoo" mo, myoo" sho' bang: alu myoo" sho' re" kaid boem. 42 Hau: thang: ri sho" jhen: da" cougmoo" myhi dayug we' re" lho: ngei dapyi" yo' moin: da" gyid: pyi" eig pyi" re" kaid da. 43 Nyang: gi nya: cangzoo: yi ri khe: yu lho: nyangnu" ri ngoo nanu" ri deing" deing tid ba:- he: da" asho" ajhen: myoung, sho" da" coung" moo" myhi' gi alu boin" moo re" kaid mo, dangain" tho' moo je kaid abye:. 44 Khasu" wim gari nyangnu" gi nyangnu" agoin ayoo yo" jangmo jain" da" gu: ri re" kaid ago". Nghoid loug we' he: coung" moo" myhi' koem gi nyang: asho" ajhen: damyoung shoo" nghoid loug we' yo" gu: dangain"- nyang: zoo: zi dangain" re" kaid pyam abye:- ga: tid.