MARKU
NGEI BU: LU DANG:
(Mark)
Marku lhid" da" ngeibu: ludang: gi gi ?He: zigi Mangso nya: zoo: Yesu da" khyoo:- nghoid? ga: da" dang: yo' lhid" shid" to" zi nghoid. Yesu gi amyeung" akhang" bo ziyo' lo, ju" khyid: yug nyang: zei: so' su: nghoid to". Nya: da" yoem: vhoo: ri gi nyang jhau" byid: to" jang" moo we' main" yu joem ri oung: pyam da" nya: yoemso mo we' byu yi da" yooboo joem ri khyoid pyam byid: da" khyoo: joem mo we' yu" lho: yo" myang yu boem.
Yesu gi nya: gungdu: ri byu yi ri yooboo mo loid byoin loo" nhang: wa shid re" nyang: nya: da" kangso ri byid: pyam wa ga: ju" re" da" byu nya: zoo: nghoid da" khyoo: ri nyang: nyang: tid to".
Marku gi Yesu da" mhoomyid: yo' sen: lho: nya: da" mungdang: yo' jhau" byid: khyoo: joem tho' moo nyang zei: shug lo da" moo" zoo: ri ayang: kaid lho: jang jang bang bang za: toin" shid to". Hau thang- babtisma Yohan da" khyo:- Yesu we' babtisma kham: yu da" khyoo:- Yesu jhuphyo' zi shau" da" khyoo: joem ri leung" khyo" dang: phang bain phang yo' dalheung: dam nyang:- Yesu nyang: jhau" byid: da" khyoo: yo' noo phyoo" gi byid: lo" da" sasana moo" zoo" khyoo: ri lhid" to". Yesu thang: cang mo, we' nya: da" khyoo: ri zo" zo" je se' gyo: lo boem ago". Nghoid loug we Yesu ri thougtheung wigi gyi daje koid lo boem ago". Dang: thang: said lo" da" abeing: zeing joem moo Yesu da" lo" thang labain gyoo: kangso dei jang" moo bue" lo da" khyoo: yo' shid: jangmo doem dei to'' lo da" khyoo: ri yhau: gyen: to" lho: wigi toin" shid to".
Dang nya: da" xoin thang eig khoin"- Marku wigi lhid zi nghoid ga: jho: tho' moo gootu:- dayug yug wigi lhid" to" zi nghoid ga: dang: lheing dang: kho' khoug: moo bo.
1
( Mat.3:1-12, Luk,3:1-8 Yoh 1:19-20 )
1 He: zigi Mangso nya: zoo: Yesu Khristu da khyoo:- ngeibu: ludang: nghoid bye:.
2 Lapi: Esaia lhid" to" ziyo' dakhyoo" ti bue" loo bye:.
?Mangsoo tid zigi ?Yu" ge' re" shid moo re" da" khyoo: ri
soin' byid: wa shid re" nga" lagyoo: ri ngoo nhang: kaid bye:.
3 Dain" pyoid yoo moo dayug nyho: nyid da" thui: gi
Aseing da" khyoo: ri nyheung too" ge'.
Nya: khyoo: ri jang jang nyheung to" ge' ga:??.
4 Yohan gi dain" pyoid yoo moo thu' re" wigi babtisma kham yu wa khyoo: kho" kyo". ?Nanu" yooboo mo lheung: lo lho: babtisma kham: yu ge'? ga: byu phung: joem ri nyang tid. ?Houg: lang" Mangsoo: gi nanu" da" yooboo joem ri khyoid byid: wa.?
5 Yerusalem voobyu yi dangain" mo, yo' Yuda moug: goin" jang: mo byu yi Yohan jhang khyoo: yhe: lho: nyang nya: yooboo joem ri yhen: yu ziyo' nyangnu" gi nya: lo, moo Yodan gyidlang mo babtisma ri kham: yu.
6 Yohan gi gola-ug moug" yo' yo, da" byi: ri void ci: lho: shooyid phyid" cu" ri cu" ci: da. Nya: zoo: noem gi jhen" khyeig nyoug yo' siyoo mo byooyhid: nghoid.
7 Houg: lang" Yohan gi ?Nga" thang: moo ju" ri wa yug gi nga" tho' moo yoemso je boo: su: nghoid da:- ngoo gi nya: khyidbaid tei" goeb phoid: byid: wa zilang" amoin: yi" ga: nyang: gi byu phung: yiri tid fu".
8 Ngoo gi nanu" ri gyid moo babtisma byid:. Nghoid loug we' nyang: gi nanu" ri gyeungshang: Venyi: mo babtisma wa.?
(Mat.3:13-4:11 Luk.3: 21-22, 4:1-13)
9 Hau: thang: amyang" ri Yesu gi Galile moug: Nazared voogung mo ju" re" wigi Yohan da" lo, moo Yodan lang mo babtisma kham: yu bye:.
10 Gyid mo thu loo lang" moug gung bang" lo" lho: gyeungshang: Venyi: gi pheing" kyoug" yhang: ti" nya tho moo re" gyoo" no: ziri nyang: myang.
11 Houg: lang: mougkhung: mo thui: tid thu' re" zigi ?Nang gi ngoo jheddab da" nga" zoo: nghoid- nang ri: ngoo gye" vho: ngei nyid? ga: tid.
12 Houg: lang" Venyi: gi nyang: ri dain" pyoid yoo khyoo: yhi: wa shid re" joug, jhoin" kaid bye:.
13 Nyang: gi dain" pyoid yoo moo bidnyid myid: xi: nyid"- satan wigi jhuphyo' zi shau nyid. Houg: moo siyoo gougnyhoug joem we' nyid ago". Nghoid loug we' moug: lagyoo: yigi nyang: ri re" yu" coung: goin ago".
(Mat.4:12-22.Luk.4:14-15, 5:1-11)
14 Yohan ri thung: myeug lhoung pyam thang: ri Yesu gi Galile moug: khyoo: yhi: bye:.
15 ?Ayo, byeung" bye:- Mangso mungdain ju" ri" bye:- nanu" da" yau: mo yooboo mo lheung: lho ngeibu: ludang: ri loem" jeing" loo: ge'?
16 Yesu gi Galile thoem" yam moo so" lo" nyid da" uri wimdo, kuang zo: byu- Simun yo' nya: nhung" Andre eig yug- goin du" yen" ziri lo" myang.
17 Yesu gi ?Nga" thang: cang ge'. Ngoo gi retang: ri byu kuang wa shid re" jhau" byid: wa? ga: nyangnu" ri tid.
18 Houg: lang" jang: nyangnu" gi goin joem ri to" pyam kho' lho: nya: jhang cang loo" bye:.
19 Daso' zoo: yhe: lo" ri nyangnu" da" lhid tho moo goin pho: nyid da" Zebedi nya: zoo: Yaku yo' Yohan tang: ri myang.
20 Nyangnu" ri myang lang" Yesu khe: kaid bye Houg: nya: eig yug gi nya: phoo Zebedi we' vhookung: yi yo' dage" lhid tho' moo nyhed too" kho' lho: Yesu jhang moo bo cang loo" bye:.
(Luk 4:31-37)
21 Nyangnu" gi Kapernaum voo khyoo vang yhe: lo" ago"- Dougno: Bidnyid ri Yesu gi tarha" jung moo vang yhe: lho: jhau" byid: nyid.
22 Nyang: jhau" byid: da" khyoo ri shau" gyo: da" mungbyu yi gi gye" gyo: mau" nyid boem ago". Khasu" wim ga: ri nyang gi mougsoug" lhid" da" sara: yi yhang: ti anghoid- amyeung" akhang" yoo" su: yhang: ti" jhau" byid: nyid.
23 Houg lang" tarha" jung moo re: bo nyid da" yu dab su: dayug gi agoin: nyho: yoid lo wigi
24 ?Nazared mo Yesu we"- nang yo' ngoonu" cisen: la". Ngoonu" ri lhu: phyo' pyam wa ein: ju" re" la". Nang hang" nghoid ziri ngoo se'. Nang gi Mangso gyeungshang: lagyoo: nghoid? ga: tid.
25 Houg: lang: Yesu gi ?sam: zoo: nyid we' nyang: mo thu' loo: we'? ga: yu ri amyeung" khyo' kaid.
26 Hau: yu gi nyang ri lang: thain: lheung: kaid ziyo nya jhang mo nyho: thu' lo".
27 Mung" byu yi dangain: mo, mau" hang" to" boem wigi ?hid: gi cenoem koid lha". Hau: zigi cite" da" jhau" byid: khyoo: aseig nghoid lha". He: yug gi yu ri amyeung" byid: wa amyeung" akhang" boo su: nghoid ziyo' nyangnu" tam: gyo: nyid? ga: nyang cang" nyang: tid go" nyid ago".
28 Hau: ludang: khyoo: gi Galile moug: goem: sho' moo gye myab sho' fu" nheung lo" boem bye:.
(Mat 8:14-17, Luka 4:28-41)
29 Houg: lang" Yesu yo' nya: cangzoo: yi gi tarha" jung mo, thu' lo" lho: Yaku yo' Yohan eig yug yo' dage" Simun yo' Andre tang: yheom: khyoo: zheung: vang lo" ago".
30 Yesu Ju" vang yhi: yo' Simun da" yug myhi' gi nuyoem" no wigi yhoeb joyoo moo leung jo, da" myiyi: myhi khyoo: nyang: ri tid kyo" ago".
31 Nyang: myiyi: myhi jhang khyoo: yhe: lho: nya: lo, wigi nyang: ri she: to' kaid. Houg: lang" jang: nooyoem" ge lo" byug ziyo' nyangnu" ri dei zhoo" dei jhoug bye:.
32 Myenthang: bidvang jham" lo" yo' ju" lang" Noo phyoo" shau" nyid da" mungbyu yi dangain" yo' yu vang ci: mo, we' Yesu jhang moo shu" re" boem ago".
33 Voobyu yi dangain" mo, yhoem: pain moo re" zeung: foem: to" ago".
34 Houg: lang: Yesu gi noo phyoo" aja: ja: shau" mo, ri ge loo" nhang: ziyo' yu myoo" sho' ri we' khaid pyam" byid:- nyang: gi yu joem ri dang: tid wa akhang" abyid: nghoid da:- Khasu" wim ga: ri Yu joem gi nyang hang" nghoid ziri se' ago".
( Luk.4:42-44)
35 Thang: nyid: nab kyoo moug: boo" myen: ri Yesu to' lho: myen, jham" da" joyoo daloem: moo akyu" yhe: mho' nyid.
36 Nghoid loug Simun yo' nya: byencang" yi gi nyang: ri cang sho: yhe: lo"-
37 Yhe: sho: myang lang" ?dangain" mo, nang ri sho" nyid boem ago"? ga: tid kyo" boem.
38 Nghoid loug we Yesu tu" lho: ?He: lheungkhoem mo voogung joem moo ngoo yo" kho" kyoo" wa ziyo' goovoo khyoo: ngoonu" yhe: lo" boem: shang. Ciwim ga: ri hau: shid mo ngoo ju" re" zi nghoid? ga: tid.
39 Hougsu" wim nyang: gi Galile moug: goem: sho' moo so" yen" wigi tarha" jung khang" moo" moo cang kho" kyo" ziyo' yu joem ri khaid thu' pyam da.
(Mat. 8:1-4, Luk.5:12-16)
40 Mang: gam: noo dab su: dayug Yesu jhang re" nyang: gi Yesu shidkhoin" moo poid thug thoug lho: ?Nang nau rigi ngoo ri yo" gyeungshang: loo" nhang: zi nghoid da:? ga: nyang: ri mho' nyid.
41 Yesu gi nheug gyo: khyeug ziyo' nya: lo, yhoin" kaid wigi nyang: ri zei: ci: zoore ?ngoo ge loo" nhang: nau- gyeungshang: loo" re,? ga: tid.
42 Houg: lang" nyang: manggam: noo ge lo" wigi gyeungshang: lo".
43-44 Hau: thang: Yesu gi nyang ri jhug za: zoug" nhang: wigi ?he: khyoo: hang" ri we' ci" atid kyoo"- lhid we. Nghoid loug we' Khainjung pho jhang yhe: lho: re" gung toin" shid we'. Hougsu" wigi mung" byu yi shid moo nang ge shang: lo" zi sagsi bui" baja". Moshe amyeung" byid: to" da" xoin" ri lo" ngei" byid: we'? ga: tid lho: phyed za: phang: loo" nhang:.
45 Nghoid loug we' nyang gi thu' yhe: lo" wigi hau: khyoo" ri yoem: kaid tid kyo" ziyo' ludang: ri fu" nheung, kaid bye:. Houg yoomo Yesu gi voo khoug: khyoo: di: di: age vang yhe: shug wigi vooyam vooqei: moo nyang: kyeing" nyid da-_ khyi khang" moo" mo mungbyu yi gi nya: jhang moo re: lo boem ago".