5
1 Yerusalem voobyu yi we"- nanu" da" gyi yoem: ri zheing" ge'. Ngoonu" gi gyivoo joem khoem lheung ci: zi shoug" bye:. Nyangnu" gi Israela vhujhung: yiri re" khaid zain: nyid boem bye:.
2 Aseing tid zigi ?Bedlehem Ephrad we"- nang gi Yuda voogung joem mo nge thang voogung daloem: nghoid loug we' goonham' gooco' byuyoug gyung: gyo" loo su: Israela khokham dayug ri nang mo khu: thu loo nhang: wa nghoid.
3 Hougsu" nghoid wigi myhi' zeing gi zoo: khu: re" jang" moo ju" sho' Aseing gi nya: byumyu" yiri nyangnu" da" gyivoo joem lo, khoug: moo she: pyam too" wa zi nghoid. Hau: thang: ri tungbau moug: moo pyoung" to" zi shau" da" Israela byumyu" yi gi nya: da" moug: moo nyid yam: cang" yi yo' dage" doem shoug" shoin" nyid wa nghoid.
4 Nyang: ju" ri" lang" nyang: gi Aseing jang" mo yo" yu da" yoem: vhoo" yo' Aseing Mangsoo nyang: nya: da" yoem: so' moo" yo' nya: byumyu" yiri vhoebkhang" loo wa zi nghoid. Moug: gyab goin" mo byumyu" dangain" bang: gi nya: gyi myang: khyoo: ri boin loo wa yoomo nya: byumyu" yi gau: nyu: za: shoug" nyid wa nghoid wigi
5 Nyang: gi myenjham" khyoo: ri byid: loo wa zi nghoid.
Asuri byumyu" yigi ngoonu" da" mung" ri zain: ce" vang lo lho: ngoonu" da" gyi khoug: goo zung joem phyo' sain" boem uri ngoonu" yo' ngoonu" da" yoem: bo thang da" vhujhung: yiri zain: wa shid re" nhang: kaid wa zi nghoid.
6 Nyangnu" gi sham: lham: gyi yoem: yo' Nimrod moug: Asuri mung" ri oung: pyam lho: nyangnu" gi ngoonu" da" mougmyid khyoo: zain: ce" vang lo da" Asuri byumyu" yi lo, khoug: mo ngoonu" ri khyoid yu wa zi nghoid.
7 Ashid: loo nyid deung jo, da" Israela byumyu" yigi byumyu" myoo" sho' mo, shid re" Aseing wigi khyoo' byid: da" nghain: jhu" yo' nyau young" lo da" shivoo: joem da" atho' moo voo byid: da" moug: gyid yhang: ti" bue" loo wa nghoid. Nyangnu" gi byu yiri anghoid Mangsoo ri khau: nghe: lo boem wa nghoid.
8 Byumyu" yi moo nyid deung gyoo" mo, gi siyoo moo zoo: noem ri kuang yen" da" khangkhyi joem yo' dakhyoo" ti" nghoid boem wa. Nyangnu" gi yang phung: gung khyoo: vang yhe: lho: yang joem ri byam zeug myheug yu wigi adu atoem ngaid phyed pyam lho: houg: mo yo" khyoid yu wa da" nheig byu jang: ajo, loo.
9 Israela byumyu" yigi nyangnu" da" gyivoo joem ri meing: zain: oung: pyam lho: nyangnu" dangain" ri yo" phyo' shoin' pyam wa zi nghoid.
10 Aseing tid zigi hau: da" bidnyid moo ngoo gi nanu" da" myang: joem ri yu pyam byid: wigi nanu" da" gyi myang rheing" joem ri phyo' shoin' pyam byid: wa.
11 Ngoo gi nanu" da" mougmyid mo voomoo" joem ri phyo' shoin' pyam lho: nanu" da" khoug: goo zung: joem dangain" ri we' doin: lheung: pyam byid: wa.
12 Ngoo gi nanu" koid da" main tain khyau" da" moo" zoo" ri we' phyo' shoin' pyam lho: nanu" mo boid phyid- lo, kyo' yu" bang: ri we' teung too" wa zi anghoid.
13 Ngoo gi nanu" da" soolhoo: joem yo' gyeung" lho da" lug zeingboung: ri phyo' sain" pyam byid: wigi nanu" nyang: koid to" da" zi joem ri ayo" goeb pid boem loo wa.
14 Ngoo gi nanu" da" mougmyid mo Ashera yu phara" myhi' da" soolhoo: joem ri phoin' pyam lho: nanu" da" voomoo" joem ri we' phyo' sain" pyam byid: wa nghoid.
15 Hau: lho: nga" da" nheig yo: zi yoomo nga" da" dang: atam" gyo: da" byumyu" yi dangain" ri ngo wigi latoo: phug byid: wa zi nghoid.