2
Yhoeb yoo tho' moo jhang" jo, wigi akhyeung" da" moo" ri soin' nyid mo, shid re" khayhi' gyoug pho" zi nghoid nyid la". Myo, myang loo lang" nyangnu" gi ayo, agoo, gi yoo" yo' nyangnu" soin' to" da" akhyeing" ashoeb moo" ri zei: lo" ago". Nyangnu" gi yoothung" yoogu: ri vhoo: lang" lhoid seung: yu boem. Yhoem: joem ri we' yu" vhoo: lang" hau: ziri nyangnu" lhoid yu boem. Hang" ikoin deungkhu: we' hang" ziyoo we' gau: nyu: khyoo: ayoo" nghoid ago".
Houg: yoomo Aseing tid zigi ?Ngoo gi nanu" ri nyeigdain tung" da" yau: khe" khyoo: ri byid: wa soin' nyid lho: nanu" gi houg: mo yo" loid loo" goo" wa zi anghoid. Nanu" gi yau: khe" khyoo: thoung" shau" lho: hau: thang: moo nanu" gi ayo" phau: khuang yen" goo" wa. Houg: ayo, ju" lang" byu yigi nanu" moo bue" lo khyoo: ri kyi" khyeug yau: khi" da" leig daloem: khyo" ci: yhoung: loo" goo" wa nghoid wigi nanu" thoung" shau" lo da" khyoo: joem ri hid: su" ga: nheig koug nheig nge da" lid jhoem" ri yhang: lo" boem wa nghoid.
 
Ngoonu" gi bain sho' byo, yoin" loo" bye:
Aseing gi ngoonu" da" mougmyid ri yu pyam byid: lho:
Ngoonu" ri myheug tei" she: loo" mo, ri byid: pyam abye:? ga: tid to".
 
Houg: yoomo Aseing da" byu yigi nyangnu" da" mougmyid ri doem toug" byid: da" ayo, moo nanu" dayug we' ayo" boem loo.
Meing: byu yigi ngoo ri tarha" kho" kyo" lho: tid zigi ?Ngoonu" ri tarha" akhoo" noo". Hau: joem dangain" ri akho" kyo" noo". Mangsoo gi ngoonu" ri myonhoo: shoem: nhang: wa zi anghoid. Israela byumyu" yigi nheing" khoin" zang" nyid ein: nang jho: nyid la". Aseing gi nheigloem: atho' sheing: loo: la". Nyang: gi houg: yhang: ti" moo" zoo" joem ri gyeing" nyang: koid kaid wa la". Nyang: gi deing byeung" khyo" koid nyid mo, ri nheig khyeug shoomyen: tung" dang: tid nyid zi anghoid la".?
Aseing phug tid zigi ?Nanu" gi nga" byumyu" yiri gyivoo joem ri yhang: ti" khaid zain nyid ago". Meing: zain: jang: mo doem tau" loo bang: gi nyangnu" yhoem: moo gau: nyu: bye: ga: myid loem nyid ri nanu" gi nyangnu" gung mo byisheing: ri khau" yu pyam byid: wa shid re" houg: moo zung" yu" nyid boem. Nanu" gi nga" byumyu" myiyi: yiri nyangnu" nheig tei" da" yhoem: khoug: mo khaid thu pyam lho: Nga" mainkaid jeju" ein: da" nyangnu" zoo: yiri apyaid atoo: shid re" lhoid yu pyam abye: go". 10 To' ge'. Yhe: loo" loo: ge'. Hid: moo gau: nyu: khyoo: ci: we' ajo, loo:- nanu" da" yooboo gi he: joyoo ri byo, yoin loo" wa da" nheing" khoin" zang" jo, abye:.
11 ?He: da" byumyu" yigi mhau' fain" ziyo' nanu" shid re" zabyid yhid: yo' yhid: yau thu ri" wa ein: da" lapi: pi: byid: ga: tid lho: mhui" jhoem" yen" da" lapi: yiri vho: nyid boem ago".
12 ?Nghoid loug we' deung nyid shi" da" Israela byumyu" yi nanu" dangain" ri ngoo doem zheung" yu wa nghoid. Ngoo gi yang khyam: khyoo: doem tau" lo da" yang phung: ri yhang: ti" nanu" ri doem shu" yu wa nghoid. Yang joem byeung" jo, da" yang kaid jang: yo' dakhyoo" ti" nanu" da" mougmyid moo byu myoo" sho' yo' doem myo: loo wa zi nghoid?
13 Mangsoo gi nyangnu" shid re" khyoo: doem phang byid: lho: tungbau meing: khyoo: pyoung" loo" shau" jang" mo nyangnu" ri shu" thu loo wa zi nghoid. Nyangnu" gi voomoo" khoem" joem ri phyo' sain" pyam wigi loid byoin loo" wa zi nghoid. Nyangnu" da" khokham Aseing: nyang: nyangnu" ri shu" thu loo" wa zi nghoid.