24
(Thu 27:20- 21)
Aseing gi Moshe ri Israela byumyu" yiri vhoo: moo: tid to" da" amyeing" dang: joem ri byid: we' ga: tid. Hau: joem gi atheing: loo: dab bang nyid wa shid re" zoem" khoug: mo myikug joem shid re" ge thang gyeung" da" zhainloin: xu: ri ci: yhe: ge'. Arun gi myen khang" moo" hau: myikug joem ri myi: tab lho: gyeung" shang: thang da" joyoo nghoid da" Dang: Theing Kuid: shidkhoin" mo yabkyo pain" ruang:- tunggung shoid Aseing shidkhoin" moo nab soin: ju" sho' nge" bang jo, nhang: wa zi nghoid. He: thung" tarha" gi ju" loo wa da" ayo, dangain" moo cang wa da" tarha" nghoid da:. Arun gi sheing: gyeing" myikug too" wa zeing tho' moo jo, da" myikug joem ri yu" coung: wa zi nghoid wigi hau: zigi Aseing shidkhoin" moo myi: atheing: dab bang nyid wa ziri yu" ca" zi nghoid.
Cen: moin" khyug joid: dakyen" jain" ri yu wigi zooyho' daxe: eig loem: bung: wa zi nghoid. Hau: zooyho' joem Aseing shidkhoin" moo jo, da" sheing: gyeing" yo' thoeb to" da" zoobui" dang moo: dajen moo khyug loem: loem: koid lho: eig jen too" wa zi nghoid. Aseing ri shugbyid: da" zoo: noem xoin" zooyho' gungthid khyo" hau: zooyho' eig jen goin" moo nam pyo: da" ayeing dajhi ri foid gyoin: wa zi nghoid. Ju" loo wa da" ayo, dangain" mo Dougno: Bidnyid khang" moo" moo zooyho' ri Aseing shidkhoin" moo: to" too" ca" da:. He: zigi Israela byumyu" yi apyaid atoo: zei: ca" da" yoovoin nghoid da:. Zooyho' gi Arun yo' nya: amyed ashen yi shid re" nghoid wigi nyangnu" gi hau: ziri gyeung" shang: da" joyoo moo: zoo: wa zi nghoid. Ciwim gari: he: zigi khainjung yi shid re" Aseing ri ngei" byid: da" zoo: noem xoin" mo gye" gyeung" shang: da" adu nghoid da:.
10-11 Byu dayug gi nya: phoo gi Egutu byu- nya: myhi' gi Dan kung: mo Debri ga: yug da" myiyi: zoo: Israela myiyi: Shelomid nghoid da:. Dab daloem moo: hau: yug gi Israela byu dayug yo' myeing" myoo: go" da:. Myeing" myoo: go" nyid uri byu hau: yug gi Aseing ri nheing" da:. Hougsu" yoomo nyangnu" gi hau: yug ri Moshe jang" khyoo: shu" yhe: wigi. 12 nyang: ri zung" nyid ago". Houg: lho: nyang: ri khasu" koid wa khyoo: Aseing wigi nyangnu" ri tid wa ziri lang" nyid ago".
13 Aseing gi Moshe ri 14 ?Hau: yug ri dab tunggung khyoo: she: thu pyam ge'. Nyang: nheing" ziri shoug" gyoo: bang: yugkhang" moo" gi nyang: yooboo yo" da" khyoo: ri sagse: kham wa shid mo hau: yug da" vhuloem tho' moo: nya: lo, ri ki" wa zi nghoid ago". Hau: thang: shava byu yigi nyang: ri lug boem yo' du" said pyam wa zi nghoid. 15 Hau: thang: Israela byumyu" yiri hid su" ein: tid ge'. Mangsoo ri nheing" da" kha: yug ri nghoid loug hau: akyu" ri shau" kham zo: wigi 16 said pyam zi shau" wa. Israela byu kha: yug nghoid nghoid- Israela akhoug: moo: nyid da" tungbau byu kha: yug nghoid nghoid Aseing ri nheing" su: rigi shava byu yi wigi lug boem yo' du" said wa zi nghoid. 17 Byu said da" hang" ri nghoid loug we' said pyam zi shau" wa nghoid. 18 Houg: lho: sube" da" gougnyhoug ri said da" yug hang" nghoid loug we' hau: ziri doem xab ca" da:. Hau: apoem: ayang: gi kangso' shid re" kangso' nghoid da:.
19 Byu dayug wigi gootu: dayug ri dam tab byid: nghoid ri nyang: koid yhang: ti" nyang: ri we' doem koid wa zi nghoid. 20 Nyang: gi shooyoug: dakhaid baid khyau" nghoid rigi nya: shooyoug: dakhaid ri we' baid khyau" wa zi nghoid. Nyang: gi myojid" daloem ze" phug byid: nghoid rigi nya: myojid" daloem ri we' thau" phug byid: wa zi nghoid. Nyang: gi zei dakhaid baid khyu byid: nghoid rigi nya: zei dakhaid ri we' baid khyu byid: wa zi nghoid. Nyang: gootu: byu yiri khasu" dam tab ri nyang: ri we' hougsu" doem koid wa zi nghoid. 21 Gougnyhoug ri said da" yug hang" nghoid loug we' hau: ziri doem xab ca" wa zi nghoid. Byu said da" yug hang" nghoid loug we' said pyam zi shau" wa. 22 He: tarha" gi nanu" dangain" bang: nghoid da" Israela byumyu" yi yo' nanu" akhoug: moo nyid da" tungbau byumyu" yi cang wa da" tarha" nghoid. Ciwim gari ngoo gi nanu" Aseing Mangsoo nghoid.
23 He: ziri Moshe wigi Israela byumyu" yiri bain tid kyoo" lang" byu hau: yug ri dab tunggung khyoo: shu" thu yhe: lho: nyang: ri lug boem yo' du" said pyam ago". Hid khyo" wigi Israela byumyu" yigi Aseing wigi Moshe ri byid: to" da" amyeing" dang: ri cang boem bye:.