23
1 Aseing gi Moshe ri
2 Israela byumyu" yigi noku wa shid re" zheing: foem da" uri noku thung" pui yo' sen: da" vhoo: mo thung" ri: joem ri byid: too" bye:.
3 Ref 23:3: Thu 20:8-10; 23:12; 31:15; 34:21; 35:2; Tid 5:12-14. Nanu" gi nanu" nya: moo" koid wa shid re" khyug nyid" yo" da:. Nghoid loug we' nyhed nyid" nyid" gi Dougno: Bidnyid- doug no yu da" bidnyid nghoid ein: ziri boin: nyid ge'. Hau: nyid ri moo" age zei: nghoid loug we' noku ku wa shid re" zeing foem: nyid ca" da:. Nanu" khamoo: nyid nyid Dougno: Bidnyid gi Aseing da" bidnyid nghoid.
4 Vhoo: moo: tid to" da" pui" joem ri ayo, tu' to" uri tid pyoo: byid: ge'.
(Gys 28: 16- 25)
5 Ref 23:5: Thu 12:1-13; Tid 16:1,2. Aseing ri phoug" tab ngi: shab byid: khyo" koid da" lhid: kaid pui" ri lhammoo" xang: shi" khyab daxe: myid: nyid" ein: nyid" bidvang zoo" mo koid shid" ge'.
6 Ref 23:6-8: Thu 12:14-20; 23:15; 34:18; Tid 16:3-8. Daxe: wim: nyid" nyid" rigi doocid akaid da" zooyho' zoo: pui" ri koid shid" wigi nyhed nyid" ju" sho' doocid" kaid lho: koid to" da" zooyho' ce: ja: ri we' nanu" age zoo: wa.
7 Hau: bidnyid joem mo xang: shi" nyid" ri noku ku wa shid re" zeing: foem: nyid wa zi nghoid wigi nanu" nyid" khang" nyid" zei: da" moo" ri age zei: wa zi nghoid.
8 Hau: nyhed nyid" moo: nanu" da" zoo: noem xoin" ri Aseing jang" moo shugbyid: ge'. Hau: nyhed nyid" ein: nyid" ri noku ku wa shid re" dalheing: doem zeing: foem: nyid ge'. Nanu" nyid" khang" nyid" zei: da" moo" ri agi zei: wa zi nghoid.
9-10 Aseing wigi nanu" ri byid: wa zi nghoid da" Mungdain: khyoo: ju" vang yhe: lho: nanu" shivoo: ri yhoem" yu lang" xang: shi" da" shivoo: deing: ri khainjung pho jang" khyoo: ci: yhi: ge'.
11 Nanu" da" xoin" ri lhoem: kham: yu zi shau" wa shid re" nyang: gi hau: ziri gooki lid da" xoin" khyo" Aseing ri shugbyid: wa zi nghoid. Khainjung phoo gi hau: ziri Dougno: Bidnyid da" thang: nyid" ri shugbyid: wa zi nghoid.
12 Shivoo: xoin" ri nanu" shugbyid: da" bidnyid moo: noo abo da" dazain byeung" yang loo: nu" dadu: ri we' nghe' ngei" xoin" khyo" xoin" ngei" byid: wa zi nghoid.
13 Nanu" gi houg: yo' dage" zhainloin: xu: yo' lheug to" da" cen moin" dajoid: jain" ri zoo: noem xoin" khyo" shugbyid: wa zi nghoid. He: xoin" da" shoem: gi Aseing ri ngei nhang: wa zi nghoid. Nanu" gi houg yo' dage" zabyid yhid: xoin" eig parheing" ri we' shugbyid: wa zi nghoid ago".
14 He: xoin" joem Mangsoo jang" moo ayhe: bain shugbyid: byid: gi gug seig nghoid nghoid- gug shen" nghoid nghoid zooyho' nghoid nghoid- dajhi' we' azoo: goo". He: thung" tarha" joem gi ju" loo wa da" ayo, dangain" moo: nanu" da" amyed ashen yi dangain" cang yhe: loo" wa da" tarha" nghoid.
(Gys 28:26-31)
15 Ref 23:15-21: Thu 23:16; 34:22; Tid 16:9-12. Nanu" da" shivoo: deing: ri Aseing jhang nanu" shugbyid: da" Dougno: Bidnyid da" thang: nyid" mo zi nyhed lheing: ein: lheing: da" Dougno: Bidnyid byeung" sho' nghab ge'.
16 Nyhed lheing: ein: lheing: da" Dougno: Bidnyid da" thang: nyid" nghoid da" wim: xi: nyid" ein: nyid" ri shivoo: seig gootu: Aseing ri shugbyid: wa zi nghoid.
17 Deungkhu: khang" moo" gooki lid jhungshug khyo" zooyho' eig loem: ri yu lo wigi Aseing ri shug byid: wa zi nghoid. Zooyho' khang" moo" ri cen: moin" dajoid: jain" ri doocid" yo' zooyho' koid wigi xang: shi" yhoem" yu da" shivoo: shiloem xoin" khyo" Aseing ri shugbyid: wa zi nghoid.
18 Houg: lho: shava byu yigi zooyho' yo' dage" noo abo da" dazain byeung" yang nu" nyhed du:- nuloo: dadu:- yang loo: eig du: ri shugbyid: wa zi nghoid. Nyangnu" gi nghe ngei" xoin" khyo" shivoo: shiloem xoin" yo' zabyid yhid: xoin" ri dage" Aseing ri ngei" byid: wa zi nghoid. He: xoin" da: shoem: gi Aseing ri ngei nhang: wa zi nghoid.
19 Yooboo khyoid xoin" khyo" coidbaid loo: dadu: yo' zoem" khau: xoin" khyo" dazain byeung" da" yang loo: eig du: ri we' ngei" byid: wa zi nghoid.
20 Khainjung phoo gi khainjung yi shid re" gooki lid jhungshug khyo" zooyho' yo' hau: yang nu" eig du: Aseing ri ngei" byid: wa zi nghoid. He: ngei" byid: xoin" joem gi gyeung" shang: da:.
21 Hau: nyid" ri nanu" da" moo" ciri: we' azei: goo". Nghoid loug we' noku coung" nghei wa shid re" dage" zeing: foem: nyid ge'. Ju" loo wa da" ayo, dangain" nanu" da" amyed ashen yigi nyangnu" khamoo: nyid nyid he: thung" tarha" ri cang ca" ago".
22 Ref 23:22: Xng 19:9,10; Tid 24:19-22. Nanu" yoo moo: shivoo: shiloem yham" yu uri yoo gyoem: mo shivoo: shiloem ri ayham" yu goo". Yhoem" khyo' to" da" shivoo: ri we' adoem yhe: koid: goo". Hau: joem ri sho" jhen: bang: yo' tungbau byu yi shid re" teing too" byid: kho' ge'. Aseing gi nanu" da" Mangsoo nghoid da:.
(Gys 29:1-6)
23-24 Lhammoo" nyhed khyab ein: khyab xang: shi" nyid" ri gooki lid no: nyid da" bidnyid khyo" cang nyid wigi laboo" moid thui: myeing lang" noku wa shid re" dage" re" zeing: foem: nyid ge'.
25 Aseing ri zoo: noem xoin" ngei" byid: wigi nanu" da" moo" ciri: we' azei: goo".
(Gys 29:7-11)
26-27 Ref 23:26-32: Xng 16:29-34. Lhammoo" nyhed khyab ein: khyab daxi nyid" ein: nyid" gi shava byu yi da" yooboo ri khyoid pyam byid: wa shid re" thung" ri cang wigi dazain dalheing: koid da" bidnyid nghoid. Hau: bidnyid ri ci: we' azoo: goo". Noku wa shid re" dage" zeing: foem: nyid ge'. Houg: lho: Aseing ri zoo: noem xoin" ri shugbyid: nyid ge'.
28 Hau: nyid" ri ce: moo" azei: goo"- ciwim gari: hau: bidnyid gi yooboo joem ri yu pyam byid: wa shid re" thung" ri cang wigi koid da" bidnyid nghoid da:.
29 Hau: bidnyid moo: daja: ja: ri zo: da" yug hang" ri nghoid loug we' nyang: ri Mangso da" byu dayug khyo" myid soin: yu loo: wa zi anghoid.
30 Hau: nyid" ri dayug yug moo" zei: nghoid rigi nyang: ri Aseing wigi said pyam wa zi nghoid.
31 Nyangnu" amyed ashen yi dangain" gi nyangnu" khamoo: nyid nyid he: thung" tarha" joem ri ci: wa zi nghoid.
32 Hau: lhammoo" khyab goug nyid" nyid" bidvang yo, mo daxi: nyid" nyid" bidvang yo, ju" sho' he: nyid" ri gooki lid Dougno: Bidnyid khyo" cang nyid wigi hau: ayo, gyoo: moo: ci: we' age zoo: nghoid da:.
(Gys 29:12- 40)
33-34 Ref 23:33-36: Tid 16:13-15. Zoem" pui" ri lhammoo" nyhed khyab ein: khyab daxe: wim: nyid" mo shid" wigi xo' lho: nyhed nyid" ju" sho' koid wa zi nghoid.
35 Hau: bidnyid mo xang: shi" nyid" ein: nyid" mo noku wa shid re" dage" zeing: foem: nyid wigi nanu" da" moo" ciri: we' azei: goo".
36 Hau: nyhed nyid" moo nanu" gi nyid" khang" nyid" zoo: noem xoin" ri shugbyid: wa zi nghoid. Shed nyid" ein: nyid" ri noku wa shid re" dalheing: doem zeing: foem: wigi zoo: noem xoin" ri shugbyid: wa zi nghoid. Hau: bidnyid gi noku wa shid re" nghoid wigi nanu" gi moo" age zei: wa zi nghoid.
37 (Hau: joem gi noku wa shid re" dage" zeing: foem: re" wigi Aseing ri nanu" ngi: to' ziyo' nyid" khang" nyid" ca" da" zoo: noem xoin"- nghe' ngei" xoin"- shivoo: shiloem xoin"- xoin" du: ngei" xoin" yo' zabyid yhid: xoin" joem ri shugbyid: da" laloem lakhoug: pui" joem nghoid da:.
38 Main: main: koid da" he: pui" joem gi Dougno: Bidnyid moo loung: lho: koid da" pui" joem nghoid. Hau: xoin" joem gi nanu" da" main: main: byid: da" jhungshug joem thang" cab ri pyeing byid: da" nanu" xoin" joem yo' nanu" Aseing ri byid: da" nanu" myid bo xoin" joem moo: loung: wigi shugbyid: da" xoin" joem nghoid da:.)
39 Nanu" yoo moo: bain yhoem" yu lang" lhammoo" nyhed khyab ein: khyab daxe: wim: nyid" ein: nyid" mo shid" lho: he: pui" ri nyhed nyid" byeung" sho' koid ge'. Xang: shi" nyid" gi gooki lid da" dougno: yu da" bidnyid nghoid.
40 Hau: bidnyid ri nanu" da" shigam joem mo ge thang da" shi" dayham" ri yo' thab gam mo akung: joem afu mung" da" seiggam joem mo akung: joem ri cu: yu wigi nanu" Aseing Mangsoo ri phau" myang: ngi: shab byid: wa shid re" noku thung" pui" ri koid shid" ge'.
41 Hau: pui" ri nyhed nyid" byeung" sho' koid ge'. He: thung" tarha" gi ju" loo wa da" ayo, dangain" moo nanu" da" amyed ashen yi cang yhi: wa da" thung" tarha" nghoid.
42 Israela byumyu" dangain" bang: gi zoem" khoug: moo nyhed nyid" byeung" sho' nyid nyid wa zi nghoid.
43 Houg: lang" Aseing gi nanu" ri Egutu mung" mo shu" thu lo da" uri Israela byumyu" yiri bid shoem zoem" khoug: moo: nyid nhang: lo da" khyoo: ri nanu" amyed ashen yi si' wa zi nghoid. Nyang: gi nanu" Aseing Mangsoo nghoid.
44 Hid su" khyo" wigi Moshe gi Israela byumyu" yiri Aseing ri phau" myang: ngi: shab byid: wa da" noku thung" pui" joem ri koid lho: cang nyid wa da" thung" tarha" joem ri byid: da:.