22
1 Aseing gi Moshe ri
2 Arun yo' nya: yuggi zoo: yiri tid wa shid re" amyeing" byid: to" zigi ?Nanu" gi nga" gyeung" shang: myeing ri aphoug" akhyoid akoid nyid goo". Houg: yoomo Israela byumyu" yi wigi ngoo ri re" shugbyid: da" younglho' xoin" joem ri phau" myang: da" khyo" koid ge'. Ngoo gi Aseing nghoid.
3 Nanu" da" amyed ashen yi mo dayug yug gi thung" khyo" ayung" alho' bue" nyid uri Israela byumyu" yi ngoo ri shugbyid: to" da" younglho' xoin" joem anam khyoo: tab yhe: nghoid rigi nyang: gi phoin: moo: khanham we' age dei byid: loo: wa nghoid. He: joem gi ju" loo wa da" ayo, dangain" moo cang wa da" khyoo: joem nghoid. Ngoo gi Aseing nghoid.
4 ?Arun da" amyed ashen yi mo manggam dab yug anghoid lang" ayeing thu yug hang" nghoid loug we' thung" khyo" younglho' yug abui" bui" gi younglho' da" xoin" ri dajhi we' age zoo: nghoid da:. Khainjung dayug yug gi shid: mang yo' zang" tain" da" daja: ja: ri anghoid lang" myoug: yeing thu da" yug-
5 anghoid lang" ayung" alho' da" gougnyhoug anghoid lang" ayung" alho' da" dayug yug ri yhe: zang" tain" nghoid rigi nyang: gi ayung" alho' bue" nyid da:.
6 Ayung" alho' bue" da" khainjung phoo gi myen" thang: ju" sho' ayung" alho' bue" nyid da:. Gung abain cid" pyam pyam gi younglho' da" xoin" ci ri we' yo" zoo: wa zi anghoid.
7 Bidvang lo" byug thang: ri nyang: gi younglho' da" su: bue" bye: wigi hau: thang: ri nya: zoo: noem nghoid da" younglho' xoin" ri nyang: zoo: wa zi nghoid.
8 Nyang: gi nyang: nyang: kyeing" shid: da" gougnyhoug lam" ri we' anghoid lang" gougnyhoug joem wigi ngaid said da" shoo" daja: ja: ri azoo: wa zi nghoid da:. Hau: zigi nyang: ri ayung" alho' bui" nhang: wa zi nghoid. Ngoo gi Aseing nghoid.
9 ?Khainjung yi dangain" gi ngoo byid: to" da" thung" ri: joem ri cang nyid ca" wa zi nghoid. Hougsu" anghoid lang" nyangnu" gi yooboo yo" wigi shid: loo" goo" wa. Ciwim gari: nyangnu" gi younglho' da" thung" ri: joem ri atam" gyoo: acang yoomo nghoid ago". Ngoo gi Aseing nghoid- nyangnu" ri ngoo gyeung" shang: nhang: bye:.
10 ?Khainjung pho da" yhoem: byu yi za: hau: younglho' xoin" joem ri ge zo: da:. Gootu: hang" we' hau: xoin" joem ri age zoo: nghoid da:. Khainjung phoo yo' dage" zoem" nyid yug anghoid lang" khainjung phoo ngho" to" da" vhoo' kung: phoo lang" hau: joem ri age zoo: nghoid da:.
11 Nghoid loug we' khainjung phoo nya: ngei yo' qei to" da" join yi anghoid lang" nya: yhoem: moo: khu: da" join yi gi khainjung phoo shau" yu da" zoo: noem ri ge zo: da:.
12 Khainjung anghoid yug yo' lo, xo' da" khainjung pho da" nya: myiyi: zoo: gi younglho' da" xoin" ciri we' age zoo: nghoid da:.
13 Nghoid loug we' cougmoo" anghoid lang" yhoem: seing: phoo yo' kang" nyid wigi zooshang: ayo" da" myiyi: zoo: gi nya: yhoem: moo doem lo tau" khau: nghe: nyid yug gi nya: phoo khainjung khyo" wigi yo" yu to" da" zoo: noem ri ge zo: da:. Khainjung pho da" yhoem: byu yi za: hau: joem ri ge zo: da:.
14 ?Khainjung pho da" yhoem: byu anghoid da" byu dayug yug hau: younglho' da" xoin" joem mo daja: ri pa: yhi: akoid loo: zang" zoo: yug nghoid rigi nyang: gi khainjung phoo ri hau: aphoug" byeung" sho' bo lho: shoo: boem eig xi: lung: wigi doem khyoug" wa zi nghoid.
15-16 Khainjung yi gi amoin: yi" da" yug ri hau: joem ri zoo: nhang: da" khyo" wigi hau: younglho' da" xoin" joem ri ayung" alho' age koid wa zi nghoid. He: zigi yooboo bue" nhang: wigi houg: yhang: te" yug atho' moo: yooboo dam bui" loo nhang: wa zi nghoid. Ngoo gi Aseing nghoid wigi hau: xoin" joem ri gyeung" shang: nhang: too" bye:? ga: tid.
17 Aseing gi Moshe ri
18 Arun yo' nya: yuggi zoo: yi Israela byumyu" dangain" ri vhoo: moo tid to" da" thung" ri: joem ri cang nhang: wa shid re" amyeing" byid: too" bye:. Israela byu dayug yug anghoid lang" Israela byu yi yo' dage" nyid da" tungbau byu dayug yug thang" cab to" ziri zei: pyeing khyo" nghoid ri nghoid anghoid lang" nyang: myid vho: khyo" nghoid ri nghoid nghe' ngei" xoin" ngei" byid: uri gougnyhoug gi noo abo zi nghoid ca" da:.
19 Lhoem yu byid: zi shau" wa shid re" hau: zigi noo daja: we' abo da" aloo: nghoid ca" da:.
20 Ref 22:20: Tid 17:1. Noo bo da" gougnyhoug daja: ja: ri nanu" shugbyid: nghoid rigi Aseing gi hau: ziri lhoem: yu byid: wa zi anghoid.
21 Byu dayug yug gi thang" cab ri zei: pyeing da" khyo" nghoid ri nghoid- anghoid lang" nya: myid vho: khyo" nghoid ri nghoid- Aseing ri zoem" khau: xoin" ri shugbyid: uri lhoem: yu byid: zi shoug" wa shid re" gougnyhoug gi noo abo zi nghoid ca" da:.
22 Myo, jed- khyid: gyau:- gung doem: yoin"- dam joid joid- shooyid ago, akhyeing" bui"- dam pyi" pyi" da" gougnyhoug Aseing ri angei" byid: goo". Houg yhang: te" gougnyhoug joem ri zoo: noem xoin" khyo" phoin: moo: angei" byid: goo".
23 Axoin: xoin:- gung doem: ajoeb byeung" da" gougnyhoug ri nya: myid vho: xoin" khyo" ge ngei" byid: da:. Nghoid loug we' thang" cab ri zei: pyeing" da" xoin" khyo" hau: ziri lhoem: yu wa zi anghoid.
24 Ajid" ri baid cab pyam- yham" pyam- lang: ced khyo" thau" phug khyo" shain: pyam bye: da" gougnyhoug ri ashugbyid: goo". He: ziri nanu" mungdain: moo akhang" abyid: goo".
25 Tungbau yi mo shau" yu da" ce: ja: gougnyhoug ri we' zoo: noem xoin" khyo" ashugbyid: goo". Houg yhang: te" da" gougnyhoug joem rigi noo dab da ein: myid soin: yu wigi age lhoem: yu nghoid da:.
26-27 Nu nu"- yang nu"- coidbaid nu" soid uri nyhed nyid" ju" sho' nya: myhi' yo' age kang" nghoid da:. Nghoid loug we' hau: thang: rigi hau: ziri zoo: noem xoin" khyo" yo" lhoem: yu wa nghoid.
28 Nu zeing yo' nya: zoo: ri yang myhi' yo' nya: zoo: ri coidbaid myhi' yo' nya: zoo: ri danyid" dam xoin" a ngei" byid: goo".
29 Jeju" boin: so" da" xoin" Aseing ri nanu" ngei" byid: uri nanu" ri lhoem: yu byid: zi shau" wa shid re" thung" ri: joem ri cang ca" wa zi nghoid.
30 Hau: ziri hau: nyid" riza: zo: wigi thang: nab soin: ju" sho' ateing too" goo".
31 Aseing gi ?Nga" amyeing" dang: ri tam" gyo: nyid ge'. Ngoo gi Aseing nghoid.
32 Nga" gyeung" shang: da" myeing ri aphoug" akhyoid abui" nhang: goo". Israela byumyu" yi dangain" gi ngoo ri gyeung" shang: yug khyo" se' yhen: yu ca" da:. Ngoo gi Aseing nghoid wigi nanu" ri ngoo gyeung" shang: nhang: bye:.
33 Ngoo gi nanu" da" Mangsoo bui" nyid wa shid re" Egutu mo nanu" ri shu" thu loo bye:. Ngoo gi Aseing nghoid da? ga: tid.