17
1 Aseing gi Moshe ri
2 Arun yo' nya: yuggi zoo: yi yo' Israela byumyu" yi dangain" ri vhoo: moo: tid to" da" thung" ri: joem ri byid: wa shid re" amyeing" byid: bye:.
3-4 Israela byu dayug yug gi Aseing zoem" khoem" duang: mo lid lho: gootu: moo Aseing ri ngei" byid: da" xoin" khyo" nu: anghoid lang" yang anghoid lang" coidbaid ce: ja: ri nghoid nghoid said nghoid rigi tarha" ri shoid zi nghoid abye:. Nyang: gi suid" shoin: nhang: bye: su: nghoid bye: yoomo nyang: ri Aseing da" byu dayug khyo" myid jhoo: byid: loo: wa zi anghoid.
5 He: amyeing" dang: da" dang: kang: gi Israela byumyu" yigi nyangnu" pa: dam moo: lhung said da" gougnyhoug joem ri akhid" Aseing jang" khyoo: ci: ri" goo" wa shid re" nghoid. Akhid" nyangnu" gi hau: joem ri zoem" khoem" duang: mo khainjung phoo jhang ci: re" wigi hau: joem ri zoem" khau: xoin" khyo" said wa zi nghoid.
6 Khainjung phoo gi suid" ri zoem" khoem" duang: mo phoin: yam cang foid khyo' wa zi nghoid wigi Aseing vho: ngei da" shoem: thu nhang: wa khyo" xu: ri nghe' wa zi nghoid.
7 Coidbaid yu joem ri xoin" ngei" byid: khyo" jang: pa: cang nyangnu" ri gougnyhoug said zo: da" khyo" Israela byumyu" yigi Aseing ri dang: azung" loo: khanham we' age koid loo: go" wa. Israela byumyu" yigi he: thung" ri: joem ri ju" loo wa da" ayo, akhyeing: dangain" mo: cang pyeing yhi: ca" wa zi nghoid.
8-9 Zoem" khoem" duang: mo lid lho: gootu: da" joyoo moo: Aseing ri ngei" byid: wa shid re" nghe' ngei" xoin" anghoid lang" gootu: xoin" ri ngei" byid: da" Israela byumyu" anghoid lang" hau: shava phung: moo: nyid nyid da" tungbau byu hang" ri nghoid loug we' Mangso byu dayug khyo" myid jho: yu loo: zi anghoid.
10 Ref 17.10: Apm 9.4; Xng 7.26,27; 19.26; Tid 12.16,23; 15.23. Israela byu anghoid lang" Israela phung: moo: nyid nyid da" tungbau byu dayug yug gi shoo" moo suid" bo jo, shi" ziri zo: nghoid rigi Aseing gi nyang: ri thougtheung wigi nya: byumyu" khyo" myid jhoo: byid: loo: wa zi anghoid.
11 Ref 17.11: Heb 9.22. Dei noem dangain" da" kangso' gi suid" moo bo wigi Aseing gi byumyu" yi da" yooboo joem ri yu pyam wa shid re" suid" joem dangain" ri phoin: dang moo: zhain: khyo' pyam wa da" amyeing" byid: too" bye:. Kang so' nghoid da" suid" gi yooboo ri yu pyam byid: da:.
12 Hougsu" yoomo Israela byumyu" yi yo' nyangnu" moo nyid da" tungbau byumyu" yigi suid" boo shi" da" shoo" ri age zoo: wa khyoo: ri Israela byumyu" yiri Aseing tid to" zi nghoid.
13 Israela byu anghoid lang" Israela byumyu" yi phung: moo: nyid da" tungbau byu dayug yug gi thung" khyo" younglho' da" gougnyhoug anghoid lang" ngho' dadu: du: ri shau" myheig yu nghoid rigi nyang: gi hau: suid" ri myidgung khyoo: zhain: khyo' pyam wigi hau: ziri phei lhoug: yo' shoem" nghoeb pyam wa zi nghoid.
14 Dei noem dangain" da" kangso' gi suid" moo bo wigi nyangnu" gi suid" boo shi" da" shoo" ce: ja: ri we' age zoo: wa zo: da" yug hang" nghoid loug we' nya: byumyu" dayug khyo" myid soin: byid: wa zi anghoid khyoo: ri Aseing gi Israela byumyu" yiri tid too" bye: zi nghoid.
15 Nyang: kyeing" shid: da" gougnyhoug shoo" ri anghoid lang" siyoo gougnyhoug wigi ngaid said da" gougnyhoug shoo" ri zo: da" Israela byumyu" anghoid lang" tungbau byumyu" hang" nghoid loug we' nya: byimi yo' nya: gung ri cid" pyam ca" wa zi nghoid lho: nyang: gi thung" khyo" younglho' wa shid re" myen" thang: ju" sho' lang" ca" wa zi nghoid.
16 Nyang: hougsu" akoid nghoid rigi hau: akyu" dam ri shau" kham zoo: wa zi nghoid.