13
Aseing gi Moshe yo' Arun ri he: thung" ri: joem ri byid: da:. Byu dayug yug gi nya: shooyid moo: dam joid anghoid lang" byeing- anghoid lang" manggam ge bue" re" da" khoo: ri yo" nghoid rigi nyang: ri Arun kung: mo khainjung pho jang" khyo: shu" yhi: wa zi nghoid da:. Khainjung phoo gi hau: dam joid ri joeb ca: yu" lho: houg mo shoomoug" joem gi phyu lo" wigi dam joid gi loem: lheing khab mo shooyid tho' je no, vang loo" bye: nghoid rigi hau: zigi manggam nghoid da:. Houg: lang" khainjung phoo gi hau: yug ri ayung" alho' ga: tid wa zi nghoid. Nghoid loug we' dam joid gi phyu: wigi hau: loem: lheing khab mo shooyid joem tho' moo we' ano, vang loo" lho: shoomoug" we' aphyu: loo nghoid rigi khainjung phoo gi nyang: ri kyeing" nyhed nyid" ju" sho' nyhid: too" wa zi nghoid. Khainjung phoo: gi nyhed nyid" ein: nyid" ri nyang: ri doem joeb ca: yu" wa zi nghoid. Nyang: yu" ri hau: dam joid gi dakhyoo" za: bue" jo, wigi gootu: aje: ri" nghoid rigi nyhed nyid" nyang: ri kyeing" doem nyhid: too" wa zi nghoid. Khainjung phoo gi nyhed nyid" ein: nyid" ri nyang: ri doem joeb ca: yu" ri dam joid gi shoem: lo" byug lho: gootu: khyoo: aje: loo" nghoid rigi khainjung phoo gi nyang: ri thung" khyo" younglho' yug nghoid- hau: zigi dam joid za: danghoid ein: tid pyo: kaid wa zi nghoid. Hau: yug gi nya: byimi ri cid" pyam wigi thung" khyo" younglho' bye: zi nghoid. Nghoid loug we' khainjung phoo nyang: ri joeb ca: yu" wigi nyang: ri younglho' ga: tid pyo: kaid thang: ri dam joid doem je: lo nghoid rigi nyang: gi khainjung pho shidkhoin" khyoo: doem yhe: ci: shug ca" wa zi nghoid. Khainjung phoo gi nyang: ri doem joeb ca: yu" wigi dam joid je: re" nghoid rigi khainjung phoo gi nyang: ri ayung" alho' ein: tid pyo: kaid wa zi nghoid. He: zigi manggam nghoid.
Byu dayug yug manggam dab nghoid rigi nyang: ri khainjung pho jang" khyoo: shu" yhi: wa zi nghoid lho: 10 Khainjung phoo gi nyang: ri joeb ca: yu" byid: wa zi nghoid. Nya: shooyid mo dam joid phyu: jang" mo zi shoomoug" joem we' phyu: lo" byug wigi foid we' byeung" sho' bo nghoid rigi 11 Hau: zigi shooyid dam joid xau" nghoid. Khainjung phoo gi nyang: ri ayung" alho' ga: tid fu" wa zi nghoid. Nyang: ri gootu: nyhid: too" aca" loo: nghoid da:. Ciwim gari: nyang: gi bang bang ayung" alho' nghoid da:. 12 Manggam gi je: lo wigi hau: yug da" vhuloem mo zi khyid: thang: ju" sho' joid lo nghoid rigi 13 Khainjung phoo gi nyang: ri dalheing: doem joeb ca: yu" wa zi nghoid. Hau: zi gyeing" nyang: gung goin" moo dam joid joid ziri nyang: myang nghoid rigi Nyang: gi hau: yug ri thung" khyo" younglho' ga: tid fu" wa zi nghoid. Nya: shooyid dangain phyu: loo" bye: nghoid rigi nyang: gi thung" khyo" younglho' da:. 14 Nghoid loug we' hau: uri dam joid joid thu re" nghoid rigi nyang: gi ayung" alho' nghoid da:. 15 Khainjung phoo gi nyang: ri doem joeb ca: yu" wigi nyang: gi dam joid joid re" zi nyang: nghoid rigi khainjung phoo gi hau: yug ri ayung" alho' ga: tid fu" wa zi nghoid. Dam joid joid ein: zigi manggam nghoid yoomo hau yug gi: ayung" alho' nghoid da:. 16 Nghoid loug we' hau: dam joid gi ge lo" lho: dalheing: doem phyu: re" nghoid rigi hau: yug gi khainjung pho jang" khyoo: doem yhi: ca" wa zi nghoid. 17 Khainjung phoo gi nyang: ri doem joeb ca: yu" wa zi: nghoid. Dam joid doem phyu: lo nghoid rigi nyang: gi thung" khyo" younglho' zi nghoid wigi khainjung phoo gi nyang: ri younglho' bye: ga: tid fu" wa zi nghoid.
18 Byu dayug gi byeing myug lho: ge lo wigi 19 Thang: ri hau: byeing dam moo acab cab phyu: re" anghoid lang" ni ni phyu: phyu: khoo: bue" thu re" nghoid rigi nyang: gi khainjung phoo jang" khyoo: yhi: ca" wa zi nghoid. 20 Khainjung phoo gi nyang: ri joeb ca: yu" wigi hau: dam khoo: gi loem: lheing khab mo shooyid tho' je no, vang lo" ti" du ziyo' houg mo shoomoug" phyu: lo nghoid rigi khainjung phoo gi nyang: ri ayung" alho' ein: tid fu" wa zi nghoid. Hau: zigi byeing dam mo bue" shid" da" manggam nghoid. 21 Nghoid loug we' hau: ziri khainjung phoo joeb ca: yu" ri shoomoug" joem aphyu: loo- loem lheing khab mo shooyid tho' mo we' je ano, vang lo" zi shau" myang loug- void voo: bo jo, nghoid rigi khainjung phoo gi nyang: ri nyhed nyid" ju" sho' gootu: nyhid: too" wa zi nghoid. 22 Dam khoo: je: re" nghoid rigi khainjung phoo gi nyang: ri ayung" alho' ein: tid fu" pyam wa zi nghoid. Nyang: gi noo su: nghoid. 23 Nghoid loug we' hau: zigi gootu: ashai" wigi je: we' aje: loo nghoid rigi byeing dam joid khoo: za: danghoid yoomo khainjung phoo gi nyang: ri thung" khyo" younglho' ein: tid fu" wa zi nghoid.
24 Myi: nge" da" byu dayug moo: myi: nge" dam moo: aphyu: bue" lo anghoid lang" ni ni phyu: phyu: khoo: bue" lo nghoid rigi 25 Khainjung phoo wigi nyang: ri joeb ca: yu" ca" wa zi nghoid. Dam khoo: mo shoomoug" joem phyu: lo wigi loem: lheing khab mo shooyid tho' dam je no, vang lo" nghoid rigi hau: zigi myi: nge" dam mo shid" da" manggam nghoid wigi khainjung phoo gi nyang: ri ayung" alho' ein: tid fu" wa zi nghoid. 26 Nghoid loug we' dam khoo: mo shoomoug" joem gootu: aphyu: loo wigi hau: loem: lheing" khab mo shooyid tho' we' je ano, vang loo" loug dam khoo: avoid dajhi zoo: shai" lo khyoo: bo jo, nghoid rigi khainjung phoo gi nyang: ri nyhed nyid" ju" sho' gootu: nyhid: too" wa zi nghoid. 27 Khainjung phoo gi nyang: ri nyhed nyid" ein nyid" doem joeb ca: yu" ri hau: zi je: jo, lang" nghoid rigi manggam nghoid wigi khainjung phoo gi nyang: ri ayung" alho' ein: tid fu" wa zi nghoid. 28 Nghoid loug we' dam khoo: gi gootu: ashai" ziyo' aje: loo wigi void voo: dathu rigi hau: zi manggam anghoid da:. Khainjung phoo gi nyang: ri thung" khyo" younglho' ein: tid fu" wa zi nghoid. Ciwim gari: hau: zigi myi: ngi" dam mo khoo: duang jo, zi danghoid.
29 Yuggi anghoid lang" myiyi: dayug gi vhuloem moo anghoid lang" amcam" moo dam joid bui" lang" 30 khainjung phoo gi hau: ziri joeb ca: yu" wa zi nghoid. Hau: zigi loem: lheing khab mo shooyid tho' je no, vang lo" lho: houg mo shoomoug" joem gi boo" boo" bue" wigi neing: lo" ti" du nghoid rigi manggam nghoid. Nyang: gi hau: yug ri ayung" alho' ein: tid fu" wa zi nghoid. 31 Khainjung phoo gi nyang: ri joeb ca: yu" uri hau: zigi loem: lheing khab mo shooyid tho' je ano, vang loo"- age da" shoomoug" joem we' adab nghoid rigi khainjung phoo gi nyang: ri nyhed nyid" ju" sho' gootu: nyhid: too" wa zi nghoid. 32 Nyhed nyid" ju" lang" khainjung phoo gi dam joid ri doem yu" ri hau: zigi aje: loo- houg mo shoomoug" joem we' aboo" lo ziyo' hau: loem: lheing khab shooyid tho' je ano, vang gyoo" lo" nghoid rigi 33 hau: yug gi dam joid lheing khab mo shoomoug" ri yed pyam wa zi nghoid. Hau: thang: khainjung phoo gi nyang: ri nyhed nyid" ju" sho' gootu: doem to" too" wa zi nghoid. 34 Nyhed nyid" ju" lang" khainjung phoo gi dam joid ri dalheing: doem joeb ca: yu" wigi hau: zigi aje: lo ziyo' hau: loem: lheing khab mo shooyid tho' aje no, gyoo" lo" nghoid rigi khainjung phoo gi nyang: ri thung" khyo" younglho' bye: ein: tid fu" wa zi nghoid. Hau: yug gi nya: byimi ri cid" wa zi nghoid wigi nyang: gi younglho' wa nghoid. 35 Nghoid loug we' nyang: younglho' bye: ga: tid fu" thang: ri dam joid doem joid nghoid rigi 36 Khainjung phoo gi nyang: ri dalheing: doem joeb ca: yu" wa zi nghoid. Dam joid je: lo nghoid rigi shoomoug" boo" abo" zi yu" aca" loo: nghoid da:. Hau: yug gi bang bang ayung" alho' nghoid da:. 37 Nghoid loug we' khainjung pho da" myid khoug: moo: dam joid gi aje: loo: wigi houg moo yug da" shoomoug" we' doem gi bye: nghoid rigi dam joid gi bye: ziyo' khainjung phoo gi nyang: ri thung" khyo" younglho' bye: ein: tid fu" wa zi nghoid.
38 Yuggi anghoid lang" myiyi: dayug da" shooyid moo: phyu: phyu: zi akhoo: duang nghoid rigi 39 khainjung phoo gi hau: yug ri joeb ca: yu" wa zi nghoid. Mid" mid" phyu: da" akhoo: danghoid rigi shooyid tho' mo yo" byug lo" da" dam khoo: za: danghoid da:. Hau: yug gi thung" khyo" younglho' bye: zi nghoid.
40-41 Byu dayug gi nya: da" vhu" noung" lang: thang: anghoid lang" ngilang: moo: xam: shu: byug nghoid rigi houg yhang: te" ziyo' ayung" alho' abui" nhang: nghoid da:. 42 Nghoid loug we' hau: xam: shu: byug da" khoo: moo: ni ni phyu: phyu: bue" wigi dam joid joid re" nghoid rigi hau zigi manggam no zi nghoid da:. 43 Khainjung phoo gi nyang: ri joeb ca: yu" wigi hau: jang" moo ni ni phyu: phyu: dam khoo: duang nghoid rigi 44 nya: vhuloem moo: manggam noo bue" ri" yoomo nyang: gi ayung" alho' ein: khainjung phoo gi tid fu" wa zi nghoid.
45 Manggam dab da" byu dayug gi byimi joid joem void ca" zi nghoid. Nya: vhuloem ri age kyo'. Nya: myonhoo: vho: du ri nghoeb too" ca" ziyo' ?Ayung" alho'- ayung" alho'? ein: nyhoo: ca" zi nghoid. 46 Hau: yug gi dam dabue" nyid nyid gi subi" yo' ve: da" dab tunggung moo: nyid ca" zi nghoid.
47 Moug" jung" ri soug" goug" byimi joem soug" goug" pain" anghoid lang" zin: yung" pain" byimi joem 48 zin: yung" pain" gi cu'- soug" goug" cu'- shooyid cu'- shooyid yo' koid to" da" daja: ja: adang moo bue" wigi 49 hau: zigi nyoug nyoug zi anghoid lang" ni ne zi nghoid rigi yo" je: lo" da" moug" jhung" nghoid ziyo' khainjung ri ci: shug ca" zi nghoid. 50 Khainjung phoo gi hau: ziri joeb ca: yu" lho: hau: ziri nyhed nyid" nyang: to" too" wa zi nghoid. 51 Nyang: gi hau: ziri nyhed nyid" ein: nyid" ri doem joeb ca: yu" wigi moug" jhung" to' jo, nghoid rigi hau: zigi ayung" alho' nghoid da:. 52 Khainjung phoo gi hau: ziri myi: nghe' pyam wa zi nghoid. Ciwim gari hau: zigi yo" je: lo da" moug" jhung" to' nyid yoomo myi: wigi nghe' pyam ca" zi nghoid.
53 Nghoid loug we' hau: ziri nyang: joeb ca: yu" uri hau: jonu" moo moug" jhung" ato' ziri khainjung phoo shau" myang nghoid rigi 54 hau: ziri cid" wigi gootu: nyhed nyid" doem to" too" wa shid re" nyang: gi amyeing" byid: wa zi nghoid. 55 Hau: thang: hau: ziri nyang: joeb ca: yu" ri akhoo: gootu: aji: nghoid loug moug" jhung" gi void voo: shai" byug nghoid rigi hau: zigi ayung" alho' shi" nghoid da:. Hau: da" zigi shidkhoin" khyoo: anghoid lang nungthang khyoo: nghoid loug we' yoem: loo" yoomo hau: ziri nanu" nghe' pyam ca" zi nghoid. 56 Nghoid loug we' hau: ziri khainjung phoo dalheing: doem joeb ca: yu" ri moug" jhung" moid" shoem: byug nghoid rigi byimi mo anghoid lang" shooyid mo hau: khoo: ri nyang: lang: ceig pyam wa zi nghoid. 57 Hau: thang: moug" jhung" gi doem to' re" wigi doem je: re" nghoid rigi yhoem: seing gi hau: ziri nghe' pyam wa zi nghoid. 58 Nyang: gi hau: jonu" ri cid" pyam lang" akhoo: byug lo" nghoid rigi hau: jonu" ri nyang: gi doem cid" wa zi nghoid. Hau: zigi thung" khyo" younglho' bye: zi nghoid.
59 He: zigi soug" goug" byimi joem anghoid lang" zin: yung" byimi joem soug" goug" cu'- anghoid lang" zin: yung" pain" cu'- anghoid lang" shooyid cu' yo' koid to" da" byimi ce: ja: da" atho' moo: dab da" moug" jhung" shid re" tarha" nghoid da:. Thung" khyo" younglho' ziyo' ayung" alho' khyoo: ri he: tarha" khyo" myid phyed ca" da:.