11
(Tid 14:3-21)
1 Aseing gi Moshe yo' Arun ri vhoo: moo: tid to" da" thung" ri: joem ri
2 Israela byumyu" yi shid re" byid: bye:. Nanu" gi myidgung gougnyhoug nghoid da"
3 khyid: seing" go, ziyo' voem: doem tau" rhe" da" ja: ci: nghoid loug we' yo" zoo: wa zi nghoid.
4-6 Nghoid loug we' nanu" gi gola-ug- ceuglhid"- yo' thanglhoo joem ri age zoo: nghoid da:. Hau: joem rigi ayung" alho' khyo" myid soin: ca" da:. Hau: joem gi voem: doem tau" rhi" nghoid loug we' khyid: seing" ago, nghoid da:.
7 Vu, shoo" azoo: goo". Hau: joem ri ayung" alho' khyo" myid soin: ca" da:. Hau: joem gi khyid: seing" go, nghoid loug we' voem: adoem tau" rhi" nghoid da:.
8 Hau: gougnyhoug joem ri azoo: goo" shid: mang joem rilang" atain" goo"- hau: joem gi ayung" alho' zi nghoid da:.
9 Dung yo' akyab dab da" wimdo, ce: ja: nghoid loug we' nanu" ge zo: ago".
10 Nghoid loug we' dung yo' akyab adab da" gyid khoug: mo gougnyhoug joem ce: ja: ri we' age zoo: nghoid da:.
11 Houg yhang: ti" da" dei noem joem rigi ayung" alho' da" ja: khyo" myid soin: yu ca" da:. Nanu" gi hau: joem ri azoo: goo". Hau: joem da" shid: mang rilang" atain" goo".
12 Nanu" gi gyid khoug: mo dei noem: nghoid da" dung yo' akyab adab da" ja: ci: ja: nghoid loug we' age' zoo: wa.
13-19 Nanu" gi vhoo: moo: tid to" da" ngho' joem daja: ri we' azoo: goo". Hau: joem gi zoin bung:- khung" boeb- zoin kyang"- zoin kyang" myiko- zoin kyang" mi"- voin yu- kuano- gola-ug ngho'- panglai: pheing" kyoug"- gyid ngho'- gyid ngho' khyid sheing:- voin pu ngho'- gyid ngho' nhoid bung:- moug: ngho' yo' pho shid nghoid ago".
20-21 Zoem" byam byam da" ja: mo lid lho: dung dab da" tungdi: dangain" gi ayung" alho' nghoid da:.
22 Nanu gi jhenkhyeug- boem pyu:- boem pyeig joem ri ge zo ago".
23 Nghoid loug we' dung dab lho: yu: yen" ja: nghoid da" tungdi: nu" joem dangain" gi ayung" alho' ein: khyo" xoem" too" ca" da:.
24-28 Vhoo: moo: tid to" da" gougnyhoug shid: mang tain" da" yug hang" nghoid loug we' nyang: gi myen" tang: ju" sho' ayung" alho' bue" jo, wa. Khyid: sen" ago, ziyo' voem: adoem tau" rhe" da" gougnyhoug joem myid: khyid: dab wigi khyid: voo: joem dab da" gougnyhoug joem nghoid da:. Hau: joem shid: mang ri dang bang: hang" nghoid loug we' nya: byimi ri cid" pyam ca" da:. Nghoid loug we' nyang: gi myen" thang: ju" sho' ayung" alho' bue" jo, wa.
29-30 Gyu, shau" joem gyu, joem gyu, nhoid coin" yo' zang gyung joem ri ayung" alho' khyo" xoem" too" ca" da:.
31 Hau: joem ri anghoid lang" hau: joem da" shid: mang ri zang" tain" da" hang" nghoid loug we' myen" thang: ju" sho' ayung" alho' bue" jo, da:.
32 Hau: shid: mang gi daja: ja: moo gyo" zang" nghoid rigi hau: zigi ayung" alho' bue" wa. Hau: joem gi seig yo' koid to" da" jonu"- byimi- shooyid anghoid lang" jid: moo" pain" yhang: te" ci: ca" gu: dangain" nghoid. Hau: joem ri gyid moo: joem too" wa zi nghoid. Nghoid loug we' myen" thang: ju" sho' ayung" alho' bue" jo, wa nghoid.
33 Houg: lho: hau: joem gi zhoo" oug" khoug: khyoo: gyo" vang nghoid rigi hau: akhoug: moo bo da ja: khang" moo" gi ayung" alho' bue" wa nghoid wigi nanu" hau: oug" ri baid kho' pyam ca" wa nghoid.
34 Zoo: noem joem ja: khang" moo" ri goou" yhang: ti" yo" zoo: wa nghoid. Nghoid loug we' houg yhang: te" da" oug" mo gyid foid zang" da" zoo: noem gi ayung" alho' zi bui" wa nghoid. Hau: oug" mo shug ja: dangain" we' ayung" alho' zi nghoid da:.
35 Ce: ja: atho' moo: nghoid nghoid hau: shid: mang joem gyoo" lang" ayung" alho' loo myidzhoo" myikhyoem anghoid lang" myikhyoem baid phyo' pyam ca" da:.
36 Nghoid loug we' hau: shid: mang moo: zang" tain" da" ja: khang" moo" ayung" alho' loug- gyid bug anghoid lang" gyid thung" gi younglho' jo, da:.
37 Shoo" wa shid re" koid to" da" shivoo: atho' moo: hau: shid: mang daja: ja: gyo" zang" nghoid rigi hau: shivoo: gi younglho' shi" da:.
38 Nghoid loug we' shivoo: ri gyid moo: nyhoin" to" jang" moo hau: shid: mang gyo" nghoid rigi hau: shivoo: gi ayung" alho' nghoid da:.
39 Yo" zo: da" gougnyhoug daja: ja: shid: nghoid rigi houg moo zang" thung" tain" da" byu hang" nghoid loug we' myen" thang: ju" sho' ayung" alho' nghoid nyid da:.
40 Hau: gougnyhoug shoo" ri zoo: su: gi nya: byimi ri cid" ca" wa nghoid. Nghoid loug we' myen" thang: ju" sho' nyang: gi ayung" alho' nghoid da:. Hau: shid: mang ri dang su: hang" nghoid loug we' nya: byimi ri cid" ca" wa nghoid. Nghoid loug we' nyang: gi myen" thang: ju" sho' ayung" alho' nghoid nyid da:.
41 Nanu" gi myidgung moo yu: yen" da" gougnyhoug zoo: ce: ja: ri we' age zoo: nghoid da:.
42 Hau: joem gi yu: lo" ja: nghoid ri nghoid khyid: myid: khyid: yo' so" ja: nghoid ri nghoid- khyid: myo" sho' yo' so" ja: nghoid ri nghoid age zoo: nghoid da:.
43 Hau: joem daja: ja: ri zo: lho: nanu" nya: gung ri ayung" alho' akoid goo".
44 Ref 11:44: Xng 19.2; 1Pe 1:16. Ngoo gi nanu" Aseing Mangsoo nghoid. Ngoo gyeung" shang: nyid yoomo nanu" we' nanu" gung ri gyeung" shang: nhang: ca" nyid da:.
45 Ngoo gi nanu" Mangso bui" nyid wa shid re" nanu" ri Egutu mung" mo shu" thu lo da" Aseing nghoid. Nanu" gyeung" shang: ca" da:. Ciwim gari: Ngoo gi gyeung" shang: su: nghoid.
46 He: zigi gougnyhoug joem yo' ngho' joem gyid khoug moo nyid ja: dangain" yo' myidgung moo so" yen" da" ja: dangain" yo' sen da" tarha" nghoid.
47 Nanu" gi thung" khyo" younglho' ziyo' ayung" alho' da" ja: joem ri nyeing" za: kho' yu lho: ge zo: gougnyhoug yo' age zo: gougnyhoug ri se' kho' wa shid re" lhid nyid ge'.