6
(Mat 12:1-8: Mar 2:23-28)
Dougno: Bidnyid ri Aseing Yesu gi sungsoo: yoo khyo" kho: lid lo" da" uri cangzoo: yi gi sungsoo: nham: ri kho: lho: ne khyu: zo: ago". Pharishe dayham" bang: gi ?Nanu" ciwim wigi Dougno: Bidnyid ri age koid: da" moo" ri koid: go"? ga: myid: boem.
Aseing Yesu gi ?David khokham we' nya: byencang" daphung: yo' zooyoid da" uri khasu" koid: da" khyoo: ri nanu" anghab' yu" goo" rhe. Nyang: gi Noku" yhoem: moo vang lo" lho: Moshe da" tarha" yo" dakhyoo ti" khainjung agyi yi mo gootu: hang" we' age zo: da" myo, shid" ti: mo zooyho' ri yu zo: pyam Nya: byencang" yi ri we' gam zho.
Byu da" nya: zoo: gi Dougno: Bidnyid da" Aseing nghoid? ga: tid.
(Mat 12:9-14: Mar 3:1-6)
Dougno: Bidnyid goo" nyid" moo Yesu gi tarha" jung daloem: moo vang lo" lho: tarha" kho" nyid. Hau: tarha" jung moo lo, yo lo, shid su: dayug we' nyid. tarha" sara: yo' Pharishe yi gi Yesu ri yooboo shau" shoo: sho' khyoo: shoo: nau boem yoomo Dougno: Bidnyid ri hau: yug da" noophyoo" ri ze: ge aze: ge ziri yu" go" nyid. Yesu gi houg: bang: da" nheigloem: ri si' byid: yoomo lo, shid su: ri to' lho: shid moo lo" yab we' ga: tid. Hau: yug gi to' lho: shid moo lo" yab jo. Hau: uri Yesu gi ?Moshe da" tarha" yo" dakhyoo ti" Dougno: Bidnyid ri ge da" khyoo: ri gi ge koid: la". Age da" khyoo: gi ge koid: la". Byu da" kang: ri ge khyoid yu la"- ge said pyam la". Nanu" ri ngoo myid: da:? ga: tid. 10 Yesu gi houg: bang: dangain" mo, ri lheung: yu" lho: lo, shid su: ri re" lo, dain: kaid we' ga: tid. Hau: yug gi lo, ri dain: kaid da" uri goonham' mo lo, yhangti" nyang: doem ge loo" khare".
11 Pharishe yi gi nheig gye" yu" yo: lho: Yesu ri khasu" koid: myheug pyam wa lha"? ga: sham: go" nyid boem.
(Mat 10:1-4: Mar 3:13-19)
12 Hau: thang: ri Yesu gi Akyu" mho' wa shid re" boem khyoo: do, lo". Damyen goin" Mangso jhang moo akyu" mho' nyid. 13 Myo, myang loo lang" Cangzoo: yi ri nya: jhang moo khe: yu lho: houg: bang: daxe: eig yug ri khyen: yu wigi Lagyoo: yi ga: myeing myheung byid. 14 Hau: daxe: eig yug gi Petru ga: Aseing wigi myeing myheung byid: da" Simun- yo" Simun da" nya: no, Andre- Yaku yo" Yohan- Philib yo' Batholume- 15 Mathe yo" Thoma- Alphe nya: zoo: Yaku- byumyu" ri jheddab nheigloem: tho' su: Simun. 16 Yaku da" nya: zoo: Yuda yo' thang: ri fain" loo" su: Yuda Iskarud zheing: nghoid da.
(Mat 4:23-25)
17 Aseing Yesu gi lagyoo: yi yo" dage" boem tho' mo gyoo" lo lho: janggyoin: moo ju" lo. Hau: joyoo moo cangzoo: yi phung: moo" daphoung: tho' moo gootu: Yuda mung" yo" Yerusalem voo mo we' panglai: gyid mung" yam moo jo, da" Turu yo" Sidon voo mo mo, we' ju" ri" mo, myoo" sho' nyid lang" boem. 18 Houg: bang: gi Yesu da" mungdang: tarha" ri re" tam" gyoo: wa ziyo' nyangnu" da" noophyoo" joem ri ze: gi byid: baja" ga: zeung: ri" mo, nghoid. Agyeungshang: da" yu joem shen" yhen zi shau" nyid mo, we' jure" lho: noo ge lo" boem ago". 19 Yesu da" gung mo yoemso thu' lo" lho: noophyoo" ri ge nhang: yoomo byu phung: moo" yi gi Yesu ri shau" zang" tain" yoo: ga: gye" yoem: kaid nyid boem ago".
(Mat 5:1-12)
20 Yesu gi cangzoo: yi ri yu" lho:
sho" jhen: mo, nanu" gi ngi: lho' boem wa. Mangsoo vhoeb khang" zi nanu" shau" yu boem bye:.
21 Akhid" uri zooyoid gyid shed nyid mo, nanu" gi ngi: lho' bye:.
Nanu" gi voem: gyi: da" ayo, ju" loo wa.
Ngau nyid mo, nanu" gi ngi: lho' bye:.
Nanu" gau yi da" ayo, ju" loo wa.
22 Byu nya: zoo: yoomo nanu" ri ngheing" lo boem da" uri we' she: lhei" pyam zi shau" boem uri we' nanu" da" myonhoo: ri gyoeb nhang: da" uri nghoid loug- nanu" gi ngi: lho' bye:. 23 Houg: yhang te" da" khyoo: thoung" shau" zo: da" uri gau yi nyid ge'. Gau wigi go" yen" ge'. Mougkhung: tho' moo nanu" da" jhungshug gi gye" myoo jo, bye:. Hid: su" nanu" ri age khyo" koid: mo, da" nya: phoug" nya: phyid" gi shid phyang" mo lapi: yi ri we' houg: su" nyang: shen" yhen pyi: sho: lid lo boem bye:.
24 Nghoid loug we' Yoo" mo, jo, mo, nanu" gi joem: loo" goo" wa.
Nanu" gi he: pyaid moo za: date: shau" pyo: nyid.
25 Akhid" uri gyi" gyi: shau" zo: nyid mo, nanu" gi joem: loo" goo" wa.
Nanu" da" zooyoid gyid shed da" ayo, ju" loo wa.
Akhid" uri gau yi nyid mo, nanu" gi joem: loo" goo" wa.
Nanu" gi myid myoo: ungloug: lho: koug ngau nyid da" ayo, ju" loo wa.
26 Byu myoo" sho' mo, gi nanu" ri coung" byid: da" uri nanu" gi joem: loo" goo" wa. Hid: bang: da" nya: phoug" nya: phyid" gi mhau da" lapi: yi ri houg: su" ga: coung" byid: boem yu" bye:.
(Mat 5:38-48, 7:12a)
27 Nghoid loug we' nga" tarha" ri shoug" gyoo: mo, nanu" ri ngoo tid da" zigi nyang: nya: da" gyivoo ri jheddab ge. Nanu" ri anoug: mo, ri jeju" koid: ge. 28 Nheing" mo, ri jheddab ge' anau akhyoid koid mo, shid re" akyu" mho' byid: ge. 29 Nanu" da" boo yam dashoid moo pyug byid: su: ri thei: dashoid moo we' pyug nhang: shi" we. Re" da" atho' byi: yu loo" su: ri akhoug: mo shid" goo byi: ri we' yu loo" nhang: shi" we. 30 Nang ri re" mho' mo dangain ri byid: we' re" da" zi lhoid yu loo" mo, jhang mo adoem mho' yu loo. 31 Nang ri subi" zei: byid: zi vhoo: yhangti" subi" ri we' nang houg: su" zei: byid: we.
32 Nang ri jheddab mo, ri za: te: doem jheddab nghoid rigi Mangso da" mainkaid da" jeju" ri nanu" khasu" se' kham: yu wa lha". Yooboo shoid vhang: nyid mo, lang" Nyang: ri jheddab mo, ri za: date: se' jheddab boem. 33 Nanu" ri jeju" koid: mo, ri jeju" te: doem phoug nghoid rigi khasu" wigi Mangso da" mainkaid jeju" se' yo" kham: yu goo" wa lha". Yooboo yoo" mo, we' houg: su" za: date: se' koid: boem. 34 Hau: tho' moo gootu: doem yo" xab byid: wa ga: myid: loem: su: ri za: Nanu" te: jhid" te: nghoo" byid: rigi Mangso da" mainkaid jeju" ri khasu" koid: se' kham: zo: wa. Yooboo yoo" mo, we' doem yo" xab byid: wa ga: myid: loem: mo, ri za date: jhid" byid: nghoo" byid: ago". 35 Nanu" gi gyivoo yi ri jheddab ge' Jeju" koid: ge' daja: ja: khyalhang" doem yo" yu abe ein: amyid nyid loo:- jhid" byid: nghoo" byid: ge. Houg: su" koid: nghoid rigi Nanu" gyi: thang da" jhungshug ri yo" yu wigi myhang: thang da" Mangso da" nya: zoo: yi nghoid boem wa. Hau: Aseing gi jeju" ase' boin: mo, yo' akhyeing" ashoeb mo, ri jeju" koid: nyid. 36 Nanu" da" nya: phoo Mangsoo gi jheddab nheig se' khyeig yhangti"- nanu" we' jheddab nheigkhyeig go" nyid ge.
(Mat 7:1-5)
37 Subi" ri joid tab yooboo afoin: goo"- houg: su" nghoid lang" Mangsoo gi nanu" ri joid atab yooboo afoin: loo: nyid wa. Subi" ri gam vhoo: akhyo, goo"- houg: su" lang" she- Mangsoo gi nanu" ri gam vhoo: akhyoo loo: nyid wa zi nghoid. Subi" da" yooboo ri khyoid pyam byid: ge' houg: su" lang" she- Mangsoo gi nanu" da" yooboo ri kyoid pyam byid: wa. 38 Subi" ri lid: lid: zoo: byid: ge- houg: su" nghoid lang" she- Mangsoo we' Nanu" ri lid lid zoo: doem byid: wa. Byeing" shoin: sho' main" da" tang: yo' nanu" da" lo, moo doin: jheung: byid: boem wa. Khasu" wim gari Nanu" nyang: leig byid: da" tang mo doem leig byid: wa ga: tid.
39 Hau: thang: ri Yesu gi houg: bang: ri dangtu' yu lho: myo, amyang su: gi gootu: myo, amyang su: ri khyoo: shid wa zigi ge bui" wa la". Hau: eig yug goin" su: duang: khuang" moo byid gyoo" loo" wa zi anghoid la". 40 Cangzoo: gi sara: tho' moo aje gyi:- nghoid loug we' Phajhi" bain jhau" yu lang" gi cangzoo: we' sara: yhangti" bui" wa nghoid.
41 Nanu" ciwim wigi nyang: nya: da" myojid" moo bo da" thang" toem zeing rigi amyang lho: mangnhung" phoo da" myojid" moo bo da" pheilhoug: ri myang go" lha". 42 Ciyoomo mangnhung" phoo ri ?Re" myojid" mo pheilhoug: ri yu pyam byid: wa? ein: lhoug: tid go". Nheigloem: fain" bo su: we"- Re" da" myojid" mo thang" toem zeing ri xangshid" keung" khyo' pyam we. Hau: thang: ri za: nang gi re" mangnhung" phoo da" myojid" mo pheilhoug: ri goolhoo' myang lho: yo" yu pyam byid: wa nghoid ga: tid.
(Mat 7:16-20, 12:33-35)
43 Agam ge zigi ashi" age zi ayo" zei:- age da" agam gi ge da" ashi" ri ayo" zei:- 44 Ashi" ri myang lang" agam ri se'- Lafoem shi" ri shilhang" byab mo zabyid shi" ri zukyin: byab mo byu yi alhoung: shau" phyo' yu. 45 Gi su: gi ge da" ziyoo yo' byeung" shoin: da" nheigloem: boin" khoug: mo ge da" ziri za: thoid shug se. Akhyeing" ashoeb su: gi akhyeing" ashoeb ziyo' byeung" jo, da" nheigloem: boin" khoug: mo age da" zi joem ri za: te: thoid shug se' nyid, ci: yoomo gari nheigloem: khoug: moo byeung" jo, da" ziri nhoid moo tid thu' ri" si' yoomo nghoid.
(Mat 7:24-27)
46 Nanu" gi nga" dang: lang" atam" gyo: zi ci: koid: ngoo ri- Aseing we" Aseing we" ein: yoid nyid go". 47 Nga" jhang moo re" lho: nga" da" mungdang: tarha" ri shau" gyo: thang: ri cang loo" su: ri dangtu' khyo" tid kyoo" ba. 48 Hau: yug gi myidjang ri no" no, du: lho: lug boem tho' moo ayang: qei" wigi yhoem: ri zhug too" su: yo" du nyid. Gyid je: lo uri gyid gi hau: yhoem: ri lo thoung"- nghoid loug we' gyid gi hau: yhoem: ri ayo" doin: lheing. Khasu" wim gari hau: yhoem: gi lugmoo" boem tho' moo geing" geing: zhoug too" yoomo nghoid. 49 Nghoid loug we' nga" da" tarha" mungdang: ri shau" gyo: thang: ri acang loo" su: gi myidjang moo za: adu: zhug loo: za: myid tho' moo te: koid: too" su: yo" du nyid. Gyid je: lo wigi hau: yhoem: ri lo thung" lang" gi dalheung: dam byo lheing lo. Hau:byo lheing lo" zigi mhoin' nyang: kaid bye:- ga: tid kyo".