22
(Mat 26:1-5: Mar 14:1-2: Yoh 11:45-53)
1 Lhid: kaid pui" ga: da" doo cid" abo da zooyho' zoo: pui" ju" wa zi jhang loo bye:.
2 khainjung agyi moo": yi yo' tarha" sara" yi gi byu phung: yi ri gyug yoomo Yesu ri yo" gau" said pyam wa da" akhyoo" shoo: go" nyid.
(Mat 26:14-16: Mar 14:10-11)
3 Hau: thang: ri satan gi cangzoo: daxe: eig yug moo bo da" Iskarud ga: myheing da" Yuda da" nheigloem: moo vang loo" bye:.
4 Houg: su" nghoid yoomo nyang: gi akyu" mho' yhoem: moo zung" lhug da" dab vhoeb zoug: yo' khainjung zeing yi yi jhang khyoo: yhe: lho: Yesu ri nyang: khasu" koid: fain" lho: ab byid: wa da" khyoo: ri yhe: sham: goo" nyid.
5 Nyangnu" gi gyo: goug yoomo nyang: ri ngei zheung: byid: boem bye:.
6 Yuda gi gyo: veing" yoomo byu phung: yi asi sho' Yesu ri nyangnu" da" lo, moo ab byid: wa ge da" ayo, ri sho: nyid bye:.
7 Doo cid" abo da" zooyho' zo: pui" moo lhid: kaid da" yang nu" ri said lho: xoin" to' byid: wa da" bidnyid ju" lo.
8 Yesu gi Petru yo" Yohan eig yug ri ngoonu" zo: wa shid re" lhid: kaid myen" xoin: ri lo" nyheung lang" ge' ga: nhang: kaid.
9 Nya: eig yug gi kha: joyoo moo lo" nyheung' too" wa lha"? ga: zheing: myid.
10 Nyang: tid zi gi nanu" voo khoug: moo vang lo" ri gyid jhuang: dang loo lang" su: yug gi dayug yo" shau" goo" wa. Nya: thang: moo cang lo" lho: nyang: vang lo" da" yhoem: moo bo vang loo" ge.
11 Cangzoo: yi yo" dage" lhid: kaid pui" myen" xoin: ri zoo: wa shid re" kha: yab moo gi wa lha"? ga: sara: nang ri tid nhang: kaid? ein: tid kyoo" lho: yhoem: seing: ri tid we'.
12 Hau: yug gi ?Atho' pyam: moo nyheung shoung: to" da" yab zeing: ri toin" shid wa hau: yab moo nyheung ge? ga: tid.
13 Cangzoo: eig yug gi thu' lo" lho: Yesu pyeing: kaid ziyo' dakhyoo" shau" goo" yoomo lhid: kaid pui" myen" xoin: ri goolhoo' soin too" bye:.
(Mat 26:26-30: Mar 14:22-26: Yoh 1kor 11:23-25)
14 Ayo, ju" lang" Yesu gi lagyoo: yi yo" dage" zoobui" moo zhoung: jo.
15 Nyang: tid zigi ngoo gi kyikhyeug ashoug" shi" da" uri he: da" lhid: kaid myen" xoin: zo: pui" ri nanu" yo" dage" zoo: wa shid re" gye myid vho.
16 Nanu" ri ngoo tid nau da" zigi lhid: kaid pui" koid: da" akhyoo" gi Mangso da" mungdain: moo pui" zeing: koid wa bidnyid aju" shi" uri ngoo gi lhid: kaid myen" xoin: ri khanham we' azoo: loo: wa.
17 Hau: thang: ri Yesu gi zabyid khu, ri yu lho: Mangso da jeju" ri bain coung" nghei lang" he: zabyid yhid: khu, ri yu ge' nyang: cang" nyang: gam shug goo" ge ga: tid.
18 Nanu" ri ngoo tid zigi akhid" mo wigi Mangso da" mungdain: aju" ri" ri" gi ngoo he: zabyid yhid: ri ashug loo: wa: ga: tid tid.
19 Hau: thang: ri nyang: gi zooyho' ri yu lho: Mangso da" jeju" ri bain coung" byid: lang" zooyho' ri phe' yu wigi cangzoo: yi ri byid. He: zooyho' gi nanu" shid re byid: pyam da" nga" gung nghoid. Ngoo ri myid: boin: nyid wa shid re" hid: su" koid: ge" ga: tid.
20 Houg: yo' dakhyoo" ti" myen" xoin: bain zo: thang: ri zabyid khu, ri doem yu lho: he: da" khu, gi nanu" shid re shoin: pyam da" nga" suid" moo zhoug: to"- Mangso da" dang: theing" tarha" seig nghoid ga: tid.
21 Houg: su" nghoid loug we' yu" ge- Ngoo ri gyivoo yi da" lo, moo ab byid: pyam wa su: gi ngoo yo' dage" zoobui" moo nyid.
22 Byu da" nya: zoo: gi Mangsoo nyheung soin to" ziyo' dakhyoo" ti" byu nya: zoo: gi shid: kham: wa. Nghoid loug we' byu da" nya: zoo: ri ab pyam su: koem gi joem: loo" wa zi nghoid ga: tid.
23 Hau thang: ri cangzoo: yigi nyangnu" mo kha: yug gi hid: su" koid wa lha"? ga: nyang: cang" nyang: myid: go" nyid.
24 Cangzoo: yi gi nyangnu" mo kha: yug gi aya: je gyi: su: nghoid da: khyoo:- ngeug go" nyid boem.
25 Yesu gi ?Mougmyid khokham yi gi mungbyu yi tho' moo yo" seing: vhoeb khang" se' nyid. Mungvhoeb mo, we' nyang: nya: da" gung ri mung" byu yiri pang" thoug bang: ga: tid nhang: nau nyid boem.
26 Nghoid loug we' nanu" nyang: cang" nyang: moo koem gi houg: su" abui" nhang: goo". Nanu" mo gyi: thang su: gi je nge thang su: yhangti" bui" ca. Vhujhung: bui: noug mo, gi dei: zoo: lo, nyhab' yhang: ti" koid bui" ca.
27 Kha: yug gi je gyi: lha" zoobui" moo zhoung: jo, su: la". Anghoid lang" dei zho" nyid su: la". Zoobui" moo zhoung: jo, su: gi je gyi: su: anghoid la". Nghoid loug we' ngoo gi nanu" mo dei zho" da" zooshang: yhangti" nghoid nyid.
28 Nanu" gi ngoo yo' dage" jhuphyo' lhu: pyang shau" nyid mo, nghoid da.
29 Phoo Mangsoo gi ngoo ri vhoeb khang" wa da" amyeung" byid: to" ziyo' dakhyoo" ti" ngoo we nanu" ri vhoeb khang" wa da" amyeung" ri byid: bye:.
30 Nanu" gi nga" mungdain: khoug: moo- zo: shug nyid doem wa. Hau: tho' moo gootu: tarha" zhungtang' tho' moo zhoung: lho: Israela byu daxe: eig koung: bang: ri yo" vhoeb khang" ci: boem wa zi nghoid.
(Mat 26:31-35: Mar 14:27-31: Yoh 13:26-31)
31 Simun we"- Simun we"- tam" gyoo: we' yoothung" gug, soem: yo" gug, moo, ge ziyo' age ziri khyeung' yhangti"- nanu" dangain" mo, ri khyeung' yu" wa shid re" satan gi amyeung" yoo" bye:.
32 Houg: yoomo Simun we" re" da" loem" jeing" nheigloem: emyed geing: teing wa shid re" ngoo akyu" mho' byid: bye:. Nang doem boin: gyeing: lo da" uri re" mangnhung" yiri yoem: doem lung: byid: ca" wa"- ga: tid kyo".
33 Petru gi Aseing we"- ngoo gi thung: yhoem: ju" loo" loug we' shid: wa joyoo moo ju" loug we' Aseing yo" dage" cang loo wa jen" jen" anghoid ga: phoug tid.
34 Petru we" nang ri ngoo tid ba:- akhamyen gyo, atoin: shi" ri nang gi ngoo ri asi ga: soem" lheung: ju" sho' ngeug pyam wa zi nghoid ga: ga: Yesu tid.
35 Hau: thang: ri Ngoo gi nanu" ri ngei thung:- thung: vhui" khyidbaid aci: nhang: loo: danhang: kaid. Hau: uri nanu" moo daja: ja: ca" goo" la"? ga: nya: cangzoo: yi ri myid.
Cangzoo: yi koem gi ci: aca" ga: doem tid boem.
36 Yesu doem tid zigi akhid" nanu" gi ngei thung:- thung: vhui" yo" ri ci: ge. Sham: ayo" rigi byimi oung" pyam lho: sham: qei ci: ge.
37 Nanu" ri ngoo tid zigi hau: yug gi byu said mo, da" zhayen" moo yo" bo ga: da" jhoem: dang: yo' dakhyoo" ti" ngoo moo bui" wa nghoid. Khasu" wim gari nga" khyoo: ri lhid" to" ziyo' dakhyoo" deing" deing bue" loo yoomo nghoid.
38 Cangzoo: yi koem gi ?Aseing we" yu" we' hid: moo sham: eig cam" bo? ga: tid boem. Nyang: gi ?hau: gu: gi" bye:? ga: doem phoug tid
(Mat 26:36-46: Mar 14:32-42)
39 Yesu gi lhoung koid ziyo' dakhyoo ti" zhainloin: boem tho' khyoo: do, yhe: lo". Cangzoo: yi we' nya: thang: moo cang yhe: lo".
40 Hau: joyoo moo ju" yhe: lo" boem ri Yesu tid zigi Nanu" gi jhuphyo' mhoid" shu" lo" jangmoo abo loo" wa shid re" akyu" mho' nyid ge" ga: tid.
41 Hau: thang: ri cangzoo: yi yo" lug go, du" fi' moo doem yhe: lo" lho: wigi poid thug thoug akyu mho' zigi
42 O"- nga" phoo we"- nang nau nghoid rigi he: da: shen" yhen kyikhyeug da" goem ri nga" jhang mo ve: pyam byid: we. Nghoid loug we' ngoo vho: khyo" anghoid nang myid: vho: khyo" za: bue" loo baja".
43 Mougkhung: tho' mo moug: lagyoo: dayug gi ju" thu' lo lho: nyang: ri yoem: re" byid.
44 nyang: gi atho' tid loo: sho' nheigloem: moo kyikhyeug nyid wigi soo" soo" akyu" mho' nyid. Houg: yoomo nya: da" bidkyu" khyi gi suid" zo, yhangti" myidjang moo gyo" nyid.
45 Nyang: gi akyu" mho' nyid da" jangmo to' lho: cangzoo: yi jhang moo doem lo" yu" ri nyangnu" gi gye" myoung: dau zoore yhoeb' pyo: jo, lang" ziri lo" myang.
46 Nyang: tid zigi nanu" ci: koid: yhoeb jo, goo" lha"- too ge'- jhuphyo' mhoid" shu" lo" jangmoo- abo loo" wa shid re" akyu" mho' nyid ge' ga: tid.
(Mat 26:47-56: Mar 14:43-50: Yoh 18:3-11)
47 Houg: su" ga: Yesu dang: da tid nyid shi" uri nyang:- byu phung: daphung: jure" boem bye:. Cangzoo: daxe: eig yug moo boo su: Yuda gi houg: bang: ri shu" vhu" she: re. Nyang: gi Yesu ri boobug bug wa ga: yu: tain" re.
48 Nghoid loug we'-Yesu gi Yuda we"- nang gi boobug boug khyo" byu da" nya: zoo: ri gyivoo yi da" lo, moo ab pyam wa la"? ga: myid.
49 Nya: cangzoo: yi koem gi akhyoo" ri zheing: se' yu yoomo Aseing we"- ngoonu" gi sham: yo" zheing: khaid jab wa la"? ga: myid: boem.
50 Cangzoo: dayug gi Khainjung agyi pho da" join dayug ri jab' kaid ri hau: yug da" lo, yo shoid mo nookhyab byid gyo" lo.
51 Houg: lang" nga: gi gi" bye: ga: tid. Yesu da" lo, wigi hau: byu da" nookhyab doem koid: tab byid: ri houg: jang: doem ge lo.
52 Hau: thang: ri Yesu gi nyang: ri myheig wa ga: jure" da" Khainjung agyi zeing yi Noku Yhoem: Moo" zung" nyid da" gyizoug: yi yo' Phoung: vhujhung: yi ri Nanu" gi khyangtoug: ri myheug yhangti"- ngoo ri myheig wa shid re" sham: we' thung" keung: we' dari" go" rhe.
53 Ngoo nyid" khang" moo" Noku" Yhoem: Moo" khoug: moo nanu" yo' dage" nyid da" uri nanu" gi ciwim ngoo ri amyheig go". Nghoid loug we' he: da" ayo, gi nanu" da" ayo,- mougcoid da" phung yoeb nghoeb ci: da" ayo, nghoid ga: tid.
(Mat 26:57-58, 69-75: Mar 14:43-54, 55-72: Yoh 18:12-18, 25-27)
54 Houg: bang: gi Yesu ri yo" myheig yu lang" khainjung agyi moo" da" yhoem: khyoo: khe: shu" yhe: lo" boem. Petru gi vi" vi: moo cang re" nyid.
55 Byu dayham" gi tarha" yung" agung moo myi: moid gang go" nyid. Petru gi nyangnu" da" agyoo: moo bo vang zhoung: jo.
56 Nyang: houg: su" bo vang zhoung: jo, ziri dei dei da" myiyi: zoo: dayug myang wigi Nyang: ri yu" zhug to" lho: he: yug gi Yesu yo' nyid yen" su: nghoid ga: tid.
57 Nghoid loug we' Petru gi myiyi: zoo: nang we"- hau: yug ri ngoo asi lhe"- ga: ngeug pyam.
58 Hau: thang: daso' myang" lho: ri byu dayug we' Petru ri myang wigi ?Nang we' houg: bang: phung: moo boo su: dayug nghoid? ga: tid.
Nghoid loug we' Petru gi ?Byu phoo nang we"- hau: byu phung: moo ngoo aboo? ga: doem ngeug pyam.
59 Hau: thang: ri da nayi koo: myang" lang" byu gootu: dayug gi ?He: yug gi Galile mungbyu nghoid lho: Yesu da" byencang" phoo' nghoid zi ci: loem" shoid cang aboo ga: tid. Khasu" wim gari nyang we' Galile byu dayug nghoid nghoid loug we' Petru gi byu nang we"- nang cenoem tid ziri ngoo ase' gyoo:? ga: doem ngeug pyam.
60 Houg: jang: nyang:- hid: su" tid nyid da" uri gyo, toin: loo bye:.
61 Aseing gi Petru ri lheung: yu" kaid. Houg: lang" Petru gi nang akhamyen gyo, atoin: shi" ri nang gi ngoo ri asi ga: soem" lheung: ngeug pyam wa ga: tid, to" da" Yesu dang: ri myid: boin: lo
62 Houg: yoomo nghe: shoid khyoo: thu' lo" lho: nheig koug wigi ngau nyid.
(Mat 22:67-68: Mar 14:65)
63 Yesu ri zung" nyid mo, gi nyang: ri juang" yi yug baid boopyug pyoug to" boem.
64 Nyangnu" gi nya: myonhoo: moo nghoeb too" byid: lho: ri baid zi hang" nghoid Lapi: pe: yu" we' ga: tid boem.
65 Dang: gootu: khyo" we' nyangnu" gi nyang: ri juang" yi nyid boem ago".
(Mat 26:59-66: Mar 14:55-64: Yoh 18:19-24)
66 Myo, myang lo da" uri Yuda byumyu" vhujhung: yi nghoid da" khainjung agyi yi yo' tarha" sara: yi gi zeing: foem: nyid abye: go". Hau: thang: ri Yesu ri nyangnu" nya: da" tarha" kongsi: moo khe: shu" lo" ago".
67 Nyangnu" tid zigi nang gi Meshia nghoid la". Ngoonu" ri tid kyoo" we' ga: myid: boem. Nyang gi ngoo tid ri nanu" loem" jeing' zi anghoid.
68 Ngoo nanu" ri dang: myed: ri nanu" we' phoug tid wa zi anghoid.
69 Nghoid loug we' akhid" mo wigi byu da" nya: zoo: gi yoem: moo" bo da" Mangso da" lo, yo shoid moo yo" zhoung: jo, wim bye: ga: tid.
70 Houg: bang: gi houg: su" nghoid lang" nang gi Mangso da" nya: zoo: nghoid la"? ga: myid.
Nyang: nyangnu" ri doem phoug tid zigi nanu" tid ziyo' da khyoo" ngoo nghoid.
71 Houg: lang" nyangnu" gi ce: sagsi shoo: ca" shi" la". Ngoonu" nyang: nya: dang: ri shoug" gyoo: bye: gootu: sagsi ashoo: ca" loo.