2
(Mat 1:18-25)
1 Hau: ayo, moo Roma da" mung" goin" jangmo Mung" byu yi myeing kaid wa da" shid re" khokham Agustu gi amyeung" khyo' kaid bye:.
2 Hau: mungbyu yi myeing kaid da" zigi Suri mung" moo Kureni Mung" zoug: koid: nyid uri xangshid" koid: da" zhayen" nghoid.
3 Byu dangain" mo, gi zhayen" kaid wa shid re" nyang: nya: mung" khyoo: zeing: lo" boem.
4-5 Yoseb we nyang: lo, xo' wa ga: dang: myed: to" da" Mari yo" dage" Galile mung" Nazared voogung mo wigi Yuda mung" Bedlehem ga: da" David khokham da" voogung khyoo: yhe: lo" ago". Mari gi zoo: khu: wa jen" jen" nghoid bye:. Yoseb gi David khokham da" nya: myid: nya: zoo: nghoid yoomo Bedlehem voogung khyoo: yhe: lo" zi nghoid.
6 Bedlehem moo nyid da" uri Mari gi zoo: khu: wa ayo, ju" yoomo Zoo: shid" yuggi zoo: ri khu: kaid bye:.
7 Being" dab moo nyangnu" shid re" joyoo aboo loo yoomo zoonu" ri boug: bang" yo" thoeb lho: nu: zo: thung" lhang" moo lheung: to".
8 Hau: mung" ayam aqei: moo yang zung" mo, dayham" nyid ago"- Nyangnu" gi myen" ayo, moo dain" dam moo yang zung" nyid ago".
9 Hau: uri Mougkhung: mo Mangso da" lagyoo: gi yang zung" mo, shid moo re" thu' yab lang" hau: ayam aqei: dangain" doug bang lo wigi nyangnu" gi gye" gyug dain nyid boem bye:.
10 Moug: lagyoo: gi agyug goo"- ngoo gi byu dangain" mo, shid re" gye" gau yi ge da" lu dang: ri nanu" jhang moo voin ri" bye:.
11 David da" voogung moo Aseing Khristu ga: da" khyoid yu su: gi nanu" shid re akhid" nyid" khu: loo bye:.
12 Noug" nu" dayug gi boug: bang" yo" thoeb lho: nu: zo: thung" lhang" moo jhang" to" zi nanu" myang goo" wa. He: da" khyoo: ri shau" myang lang" zoonu" nghoid khyoo: ri si' goo" wa? ga: tid.
13 Hau: da" moug: lagyo: nam moo dalheing dam mougkhung: lagyoo: yi ajoem ayoo thu' myhang re" boem lho:
14 Mougkhung: mougdi moo Mangsoo gi myonhoo: phung" yoeb bo nyid baja"-
Myidjang: tho' moo we' nyang: vho: ngei da" byu yi moo myen, jham" ngei pyo: khyoo: gi dajo, jo, baja" o"? ga:
Mangso da" myeing khyang" ri coung" nghei boem ago".
15 Moug: lagyoo: yi mougkhung: khyoo: doem lo" byug boem thang: ri yang zung" mo, gi ngoonu" gi Bedlehem voogung khyoo: yhe: yu" boem shang Ngoonu" ri Aseing re" tid kyo" khyoo: ri yhe: yu" yu" boem shang? ga: nyang: cang" nyang: tid go" lho: Bedlehem voogung khyoo: myab myab yhe: lo" boem.
16 Nyangnu" gi Mari yo" Yoseb ri we' nu: zo: thung" lhang" moo lheung: to" da" zoonu" ri we' yhe: myang boem.
17 Zoonu" ri nyangnu" shau" myang lang" gi zoonu" yo" sen: da" khyoo: nyangnu" myang yu" ziyo' shau" gyo: da" khyoo: ri tid kyo lo".
18 Yang zung" mo, tid kyo" da" khyoo: ri shau" gyoo: mo, dangain" gi gye" gyo: mau" nyid boem.
19 Nghoid loug we' Mari koem gi hau: khyoo: dangain" ziri gyo: xoem" yu lho: myid soin: yu" nyid.
20 Yang zung" mo, koem gi moug: lagyoo: yi toin" shid ziyo' dakhyoo" ti" shau" gyo: shau" myang yoomo Mangso da" myonhoo: phung: yoeb ri coung" nghei myed: lho: doem lo" ago".
21 Zoonu" gi shed' nyid" ju" bye: yoomo a thang: yham" da" khyoo: kham: yu wa shid re" ayo, ju" lang" Nyang: ri Yesu ga: myeing myheung byid: ago". He: da" myeing gi zoonu" gung lhang" alei loo shi" ri moug: lagyoo: myheing nhang: da" myeing nghoid bye:.
22 Moshe da" toung: to" da" tarha" moo shed to" ziyo' dakhyoo" ti" nya: myhi' yo' nya: pho eig yug gi young" shang: khyoo: koid wa shid re" ayo, ju" bye: yoomo zoonu" ri Yerusalem voo khyoo: shu" yhe: lho: Mangsoo ri ab byid: ago".
23 Zoo: shid" yug khang" moo" ri Mangsoo ri ab byid: ca" ga: wigi we'
24 Pheing" kyoug" eig du: anghoid lang" gi jid u: nu" eig du: nghoid loug- xoin" to' byid: ca" ga: ziyo' dakhyoo"- Mangso da" mungdang: moo tid too" yoomo xoin" ri we to' byid: bye:.
25 Hau: uri Yerusalem voo moo Simun ga: da: byu dayug nyid. Hau: yug gi Mangso da" tarha" ri cang- loem" jeing" da" deingmain" su: dayug nghoid.
26 Gyeungshang: da" Venyi: gi nyang: yo' dage" nyid. Nyang: gi Mangso dang: theing to" da" Meshia ri ashau" noku ku" gi ashid: wa" ga: gyeungshang: da" Venyi: khyo" wigi ayoeb abang ri yo" kham: yu nyid su: nghoid.
27 Nyang: gi Venyi: wigi poin" kyeing" zi shau" yoomo Noku" yhoem: moo" khyoo: vang yhe. Tarha" yo' dakhyoo" ti" zei: wa da" moozoo" ri zei: wa shid re" nya: myhi' tang: nya: phoo gi Noku" yhoem: moo" khyoo: shu" yhe: lo" da" uri
28 Simun gi zoonu" ri lhoem: vu yu lho: Mangso da" myonhoo: ngilang Jeju" ri coung" nghei zoore tid da" zigi
29 Aseing Mangso da" Dang: thang" cab gi joeb byeung" loo bye
Yoomo- Aseing da" join phoo ri akhid" loo" nhang: kaid re" o"-
30 Tungbau byumyu" yi ri Aseing vho: da" khyoo: yo" toin" shid wa yoeb bang bui" nhang: wa ziyo'
31 Aseing da" byu phung: nghoid da" Israela gi myonhoo: phung" yoeb doug bang thu' loo wa shid re" byumyu" bain sho' da" shidkhoin" moo
32 Aseing soin jen" to" da" khyoid yu jeju" ri ngoo gi myang nyang: myang kho" bye:- ga:
coung" byid:.
33 Nya: myhi' yo' nya: phoo gi zoonu" yo" sen: lho: wigi Simun tid da" dang: ri shoug" gyoo: lang" gye" gyo: mau" nyid ago".
34 Simun gi nyangnu" ri mainkaid byid: lho: Israela byumyu" moo byo, sain" joem: thang loo" mo, yo' khyoid yu shau" mo, nyid thu' loo wa shid re" he: zoonu" ri Mangsoo khyen: nyheung too" bye:. Nyang: gi Mangso da" thang" cab alhoo: nghoid wigi nyang: ri byu myoo" sho' mo, ngeug se: yooboo foin: khyo" nyangnu" nya: da" nheigloem: mo myid khyoo: ri thoid shug goo" wa.
35 Re" da" nheigloem: seing" khyab gi sham: coin" thau" yhangti" kham: zo: wa" ga: nya: myhi' Mari ri tid.
36-37 Hau: tho' moo gootu: Ashe byumyu"- Phanuela myiyi: zoo:- Anna: ga: da" myiyi: lapi: myhi'- dayug nyid. Nyang: gi apyaid gye sheing: bye: su: nghoid. Nge yo, mo deungkhu: vang lho: yhoem: seing: phoo yo" nyhid' zain date: zoem" nyid. Hau: thang: ri apyaid shid' xe: myid: zain ju" sho' cougmoo" mo" nyid. Nyang: gi Mangsoo ri Noku akyu" mho' nyid su: nghoid. Nyid" myen" atheung: anoo: Mangso moo" ri zei: pyo: zoore Noku" yhoem: moo" mo athu' loo" loo.
38 Zoonu" ri ab nung" byid: da" ayo, moo hau: myiyi: gi ju" re" lho: Mangso da" jeju" ri coung" nghei. Hau: thang: ri Yerusalem voo ri khyoid yu wa ga: nheig byu nyid da" byu dangain" mo, ri zoonu" da" khyoo: ri tid pang kyo".
39 Nya: myhi' yo' nya: phoo gi Mangso da" tarha" dangain" ziri bain zei: kho' lho: Galile mung" mo Nazared voo ga: da" nyang: nya: mung" khyoo: doem lo" boem.
40 Zoonu" gi gyi: sheung: yang" zain: loo bye:. Lasi' phajhi" we je se' lo- Mangso da" jeju" we' nya: tho' moo dajo, jo.
41 Nya: myhi' yo' nya: phoo gi zain khang" moo" lhid: kaid pui" loem wa shid re" Yerusalem voo khyoo: lhoung yhe: ago".
42 Zooshang: Yesu gi apyaid daxe: eig zain bo uri we' Yerusalem voo khyoo: yhe: lo" ago".
43 Hau: da" pui" bain lang" yhoem: khyoo: doem lo" ago". Hau: uri zooshang: Yesu gi Yerusalem voo moo nyid gyoo" kho" zi nya: yhid yo' nya: ba" gi azheing: si.
44 Pui" yhi: mo, agyoo: moo boo wim bye ga: zheing: jho:- danyid" so" gyoem thang: ri bidnoem byencang" yi phung: moo sho: yu" ri we' amyang loo.
45 Sho: yu" ri amyang lang" gi Yoseb yo" Mari eig yug gi Yerusalem voo moo nyang: ri yhe: doem sho. Soem" nyid" ein: nyid" ri zooshang: ri Mangso yhoem" khoug: moo yhe: myang.
46 Nyang: gi Yuda sara: moo" yi yo" dage" zhoung: jo, lho: nyangnu" da" tarha" mungdang: ri tam" gyo: wigi nya: nu" yo' doem myed: phoid: go" nyid lang.
47 Zooshang: Yesu da" dang: ri shoug" gyoo: mo gi nyang: myed: da" dang: yo" doem phoid: da" dang: khoin" yoomo gye" gyo: mau" nyid boem.
48 Yoseb yo" Mari eig yug we nyang: ri myang lang" gye" mau" ago". Hau: thang: ri nya: yhid gi ?Nga" zoo: we"- nang ciwim wigi nga" tang: ri hid: su" koid: lha". Re" ba" yo" ngoo gi nang ri gye" gung yau yau wigi cang sho: yen"? ga: tid.
49 Zooshang: Yesu gi yhid yo" ba" ciwim wigi ngoo ri cang sho: yen" go" lha". Ngoo gi pho da" yhoem: moo nyid wa ziri asi goo" rhe" ga: doem tid.
50 Nyang: tang: gi hau: dang: ri ase' gyoo.
51 Hau: thang: ri zooshang: Yesu gi nya: yhid yo' nya: ba" tang: jhang moo cang lo" lho: Nazared voo moo ju" loo" lang" gi myhi' pho tang: da" dang: ri tam" gyo: nyid. Nya: myhi' Mari koem gi hid: su" bue" da" khyoo: dangain" ziri nya: nheigloem: moo xoem" to".
52 Zooshang: Yesu gi Gung shoo" gyi: sheung: lo zoore se' da" phajhi" myo: loung: lo lho: Mangso shidkhoin" moo we' byu da" shidkhoin" moo we' myonhoo: rua loo bye:.