10
Hau: thang: ri Aseing gi cangzoo: nyhed xe: eig yug ri khyen: thu' yu lho: eig yug dazoem" zoem"- Aseing nyang: yhi: wa da" voogung- khyi khang" moo" khyoo:- yhe: loo" lang" wa shid re" nhang: kaid. Nyang: tid zigi yham" yu wa da" gug myoo" sho' myheing jo, bye:- nghoid loug we' gug yham" deizoo: gi atham:- houg: yoomo gug yham" deizoo: myoo" sho' nhang: kaid wa shid re" gug seing: ri akyu" mho' nyid ge. Yhi: ge' voemkhuid" phung: moo yangnu" ri yhangti"- ngoo nanu" ri nhang: kaid. Nanu" gi ngei thung: nghui"- khyidbaid- ri aci: goo"- khyoo: moo yab lho: hang" yo" we' adoem goo" goo". Nanu" kha: yhoem: moo vang loo" nghoid loug we' he: yhoem: moo myenjham" goo" baja" o"- ein: wigi xangshid" ri mainkaid dang: tid ge. Hau: yhoem: moo myenjham" khyoo: ri vhoo: su: nyid nghoid rigi nanu" tid byid: da" mainkaid jeju" ri hau: yug shau" kham: zoo wa nghoid. Houg: te" byu da yug we' anyid: nghoid rigi nanu" tid byid: da" mainkaid jeju" gi nanu" nya: jhang moo doem tau" loo wa. Nanu" gi hau: yhoem: moo nyid lho: yhoem: seing: bang: doo" zho" gu: ri zo: shug ge. Khasu" wim ga: ri deizoo: gi nya: vhookung: phoug" kham: zo: moin: yoomo nghoid. Yhoem: dayhoem: mo gootu: dayhoem: khyoo: athoid yhi: goo". Nanu" ri lhoem: kham: yu da" voo bang: byid: zho" gu:- dangain" zoo: ge. Hau: voo moo noo phyoo" shau" nyid mo, ri ze: gi byid: ge. Hau: thang: ri nyangnu" jhang moo Mangso da" mungdain: ju wa zi jhang bye: da" khyoo: ri tid kyoo" ge. 10 Nanu" ri alhoem: kham: yu da" voo moo khyoo: gung moo yhe: lho: hid: su" tid ge' 11 Ngoonu" khyid: moo dab da" Nanu" voogung mo pheilhoug: ri ngoonu" ko: khyoo bye: ein: tid ge. Nghoid loug we' Mangso da" mungdain: gi nanu" nam moo jhang lo nyid bye: da" khyoo: ri myid boin: ge. 12 Ngoo deing" deing tid nau zigi tarha" dang: kho" da" bidnyid moo Sodom voo tho' re- hau: voo je noo: wa ga: tid.
(Mat 11:20-24)
13 O"- Kurazin voo we"- Nang joem: loo" wa. O"- Bedsaida voo we"- nang we' joem: loo" wa. Re" eig yug jhang moo toin" shid da" mau" pho" alhoo: again ri Turu yo" Sidon voo ri toin" shid nghoid yoo: gi hau: eig yug gi goolheung: mo jidmoo" mi gang" ci: lho: wigi myiyab cang" moo zhoung: jo, lho: nya: yooboo mo nheigloem: thid' lheung: loo goo" wim bye:. 14 Turu yo"Sidon: gi- tarha" dang: kho: da bidnyid moo- nanu" da tho' moo gi- khyam" sa: yoo" shi" wa zi nghoid. 15 O"- Kapernaum voo we"- nang gi moug: gung moo ju" sho' tu: to ziri vho: nyid la". Moovoo moug: khyoo: nang ri du" khyo pyam zi shau" wa nghoid ga: tid.
16 Yesu nya cangzoo: yi ri tid zigi nanu" da" dang: ri tam" gyoo: mo gi nga" dang: ri we' tam" gyo: zi nghoid bye:. Nanu" ri keung" pyam mo, gi ngoo ri keung" pyam zi nghoid. Ngoo ri keung" pyam zigi ngoo ri nhang: kaid su: ri keung" pyam zi we' nghoid bye:.
17 Cangzoo: nyhed xe: eig yug gi gye" gau yi ziyo' doem zheing: ju" lo boem lho: Aseing we"- ngoonu" gi Aseing da" myeing ri lang: lho: amyeung" byid: lang" yu joem lang" ngoonu" dang: ri tam" gyo: boem ago" ga: lo tid kyo" boem.
18 Yesu phoug tu" zigi ?Mougkhung: mo- satan gi lhab, myeig yhang: ti" byid gyoo" lo" zi ngoo myang. 19 Tam" gyoo: ge- lhangmyu yo' gunggau" tho' moo yo" nang: lid lo" lho: gyivo: da" yoemso dangain" ri yo" ung: pyam wa da" amyeung" akhang" ri ngoo nanu" ri byid: too" bye:. Ce ja: gyi we' nanu" ri ayo" ung: wa. 20 Nghoid loug we' nanu" moo yu join: joem ri yo" khaid thu' pyam yoomo agoug yi goo". Mougkhung: mungdain: moo nanu" da" myeing lhid" too" bye: yoomo za: dagoug ge'? ga: wigi tid.
(Mat 11:25-27, 13:16-17)
21 Hau: da" uri gyeungshang: Venyi: gi ngeipyoo: gau yi nhang: yoomo Yesu gi hid: su" ga: tid- Mougkhung: myidjang da" Aseing phoo Mangsoo we"- Se thang Phajhi" zoug: yi moo yhoem" to" da" khyoo: yi ri phajhi" aboo mo ri phang shug byid: yoomo re" jeju" zeing: ri ngoo coung" nghei nyid. Phoo we" hid: su" bue" lo da" khyoo: gi nang vho: ngei da" khyoo: nyang: nghoid bye:.
22 Nga" phoo gi ziyoo bain sho' ngoo ri ab byid: too" bye:. Zooshang: kha: yug nghoid zigi Nya: phoo mo lid: lho: gootu: hang" we' asi. Nya: phoo gi kha: yug nghoid zi we' nya: zoo: yo' nya: zoo:- khyen: yu lho: toin" shid noug su: mo lid: wigi hang" we' asi ga: tid.
23 Hau: thang: ri Yesu gi cangzoo: yi jhang khyoo: phug lho: akhid" nanu" myang da" zi joem khyoo: ri yo" myang da" myojid" joem gi ngi: lhoo' wa. 24 Nanu" ri ngoo tid zigi nanu" shau" myang da" khyoo: yi ri Lapi: yi khokham yi gi myang noug nghoid loug we' ashau" myang boem. Nanu" shau" gyo: da" khyoo: ri gyoo: noug goo" nghoid loug we' ashoug" gyo: boem.
25 Tarha" sara: dayug gi Yesu jhang moo re" lho: Sara: we"- ngoo gi apyaid ato: kangso khasu" koid ri yoo" wa lha"? ga: Yesu ri phajhi" ca: yu noug yoomo re" myid.
26 Yesu gi Jhoem: mungdang: moo khasu" ga: tid to" lha". Nang ci: lhoung shau" nghab yu lha"? ga: nyang: ri doem phoug tid.
27 Hau: yug tid zigi Re" da" Aseing Mangsoo ri Re" nheigloem: soo zoo: dangain"- Re" yoemso dangain"- re" phajhi" juyi dangain" yo' jheddab we. Re" yhoem: kyoo" cang" ri nanya: gung yo' dakhyoo ti" jheddab we' ga: doem tid.
28 Houg: lang" Yesu gi nang phoid: zigi joo bye:. Nang we' houg: yo' dakhyoo ti" kang so dei nyid yab we'.
29 Hau: tarha" sara gi nya: deingmain" khyoo: vhoo noug yoomo nga" yhoem: kyoo" cang" gi hang" nghoid lha"? ga: nyang: gi Yesu ri myed.
30 Hau: uri Yesu tid zigi shid phyang" byu dayug gi Yerusalem voo mo Yerikho voo moo gyoo" lo" da" khyoo: moo khyangtoug: joem yo' shau" go". Hau: khyangtoug: joem gi hau: yug da" byimi, lhoid khyoid yu lho: coem nhoug wigi alug lug shid: loo" lang" she: pyam too" khare" boem. 31 Khainjung agyi dayug gi gyung: so" lo" ri hau: nhoug lheung: too" su: ri khyoo: moo lo" myang. Houg: loug we' nyang: jang" pyam khare". 32 Houg: yo" dakhyoo" Levi kung: mo dayug we' hau: joyoo moo ju" lo. Hau: yug we' houg: noo su: ri yhe: yu" lho: jang" goo" khaid khyo" phang: lo. 33 Nghoid loug we' Samari byu dayug gi gyung: so" lo" ri hau: da" byunoo jhang moo ju" loo" lang" hau: noo su: ri myang wigi nheigkhyeig myid boo. 34 Noo su: jhang ju" sho' yhe: lho: noo su: da" dam, joem moo shooxu: yo' zabyid yhid: kaid byid: wigi pain" cu' yo' thoeb byid. Hau: thang: ri nya: loozei: dang moo noo su: ri zhung: nhang: wigi yhoeb' wa jang: ju" sho' shu" lo" lho: coung: goin byid: da. 35 Thang: nyid" ri ngei eig kyab ri thoid lho: yhoeb jang: yhoem: seing: ri byid: wigi ?He: noo su: ri yu" goin cung: lang" we'. Ca" shi" gu: gi ngoo doem loo lang" lo xab' wa? ga: tid kho'.
36 Houg: bang: soem" yug mo khyangtoug: shau" su: da" yhoem: kyoo" cang" gi kha: yug nghoid ein: nang jho: la"? ga: Yesu dang: thang: said
37 Tarha" sara: phoo gi nheigkhyeig ziyo' pang" thoug khari" su: nghoid ga: tid ri
Yesu gi nang we' houg: su" lo" koid: we' ga: tid kaid.
38 Yesu yo' nya: cangzoo: yigi voo davoo khyoo: gyung: so" yhe: lo". Hau: voo moo Matha ga: myeing su: myiyi: zoo: gi nya: yhoem: moo nyang ri being" lhoem: kham: yu. 39 Matha moo nya: no, Mari ga: da" myiyi: zoo: dayug bo. Nyang: gi Aseing da" khyid: yang: moo nyang: jhau" byid: khyoo: ri tam" gyo: zhoung: jo. 40 Matha gi being" di" moo" myo: nhoung' nyid yoomo Yesu jhang lo" lho: Aseing we" nga" no, gi being" di" zho" moo" ri ngoo dayug nyang: kyeing" ri noung" to" zi nang abo myang la". Ngoo ri bo pang" zei: wa shid re" nyang: ri tid kaid we' ga: lo" tid.
41 Aseing gi Matha we"- Matha we"- nang gi moozoo" myoo" sho' shid re" myid myo: nyid ga: nyang ri tid. 42 Nghoid loug we' nang moo daja: ca" shi"- Mari gi jo da" ziri khyen: yu abye:. Hau: ziri nya: jhang mo hang" we' ayo" lhoid yu loo:- ga: tid.