18
(2 km 29:1-2: 31:1)
1 Ela da" yuggi zoo: Hoshea Israela khokham khyo" vhoeb zi soem" zain moo Ahaza da" nya: yuggi zoo: Hezekia gi Yuda khokham bue" da:.
2 Nyang: gi apyaid eigxe: wim: zain moo khokham bue" wigi Yerusalem moo eigxe: gau zain vhoebkhang" bye:. Nya: myhi' gi Zekharia da" nya: myiyi: zoo: Abiya ga: su: nghoid da:.
3 Nya: phoug" phyid" khokham David da" leig ri cang lho: Aseing vho: da" moo" ri koid da:.
4 Nyang: gi tungbau yu phara" ri no' da" joyoo joem ri phyo' pyam lho: lug zeingboung: joem ri baid khyau" pyam wigi yu phara" myhi' Ashera da" soolhoo: joem ri ceing khyo' pyam da:. Nyang: gi Moshe koid to" da" gyid: mid" lhangmyu lhoo: ri adu du baid mhoin' pyam da:. Hau: ziri Nehusthan ga: myheing ago". Hau: ayo, ju" sho' Israela byumyu" yigi hau: ziri ngi: shab byid: wigi shoem: noem pyo: ja: nghe' ngei" ago".
5 Hezekia gi Israela da" Aseing Mangsoo ri loem: khoug: da:. Nya: shid vhu" moo we' nya: thang: moo we' Yuda mung" gi nyang: yo' du da" khokham khanham we' ayo" yu nghoid da:.
6 Nyang: gi Aseing ri jhug zug wigi tid dang: agyoo: khanham we' akoid nghoid da:. Aseing wigi Moshe ri byid: to" da" amyeing" dang: joem dangain" ri goo" lhoo' za: cang da:.
7 Houg: yoomo Aseing gi nyang: yo' dage" nghoid da:. Nyang: koid da" moo" ja: khang" moo" oung: doid da:. Nyang: gi Asuri khosen ri gyi koid thougtheung lho: nyang: moo khoug: nghi: wa ziri ngeug pyam da:.
8 Nyang: gi Philisti byumyu" yiri oung: pyam wigi Gaza we' hau: ziri lheing khoem to" da" mougmyid bo bo lho: nge thang voozoo: mo zi gyi: thang voomoo" ju" sho' nyangnu" nyid joyoo joem ri yhe: khaid zain: da:.
9 Hezekia vhoeb zi myid: zain ein: zain- khokham Hoshea Israela mung" ri vhoeb zi nyhed zain ein: zain moo Asuri khosen Shalmanesa gi Israela mung" khyoo: jhen" vang yhe: wigi Samari ri vang: to" da:.
10 Vang: to" zi soem" zain ein: zain moo Samari gi gyo" soem" byug da:. He: zigi Hezekia vhoeb zi khyug zain ein: zain- Hoshea vhoeb zi gau: zain ein: zain ri bue" da:.
11 Asuri khosen gi Israela byumyu" yiri thung: byu khyo" Asuri khyoo: shu" lo" lho: dayham" ri Hala voomoo" moo dayham" ri Gozan mung" du mo Habora gyid lang nam moo dayham" ri Media voomoo" joem moo lo" nyhid: to" ago".
12 Samari gyo" soem" lo" zigi Israela byumyu" yi nyangnu" Aseing Mangsoo ri tid dang: agyoo:- nyangnu" yo' koid to" da" dang: theing ri phyo' pyam lho: Aseing da" dei zoo: Moshe wigi byid: to" da" tarha" dangain" ri atam" gyoo: acang yoomo nghoid. Nyangnu" gi atam" gyoo: acang yhi: nghoid ago".
(2 km 32: 1-19 Esa 36: 1-22)
13 Khokham Hezakia vhoeb zi daxe: myid: zain ein: zain moo Asuri khosen Senakherib gi geing: teung da" Yuda voomoo" joem ri yhe: khaid zain: wigi houg joem ri oung: pyam da:.
14 Hezekia gi Lakhisha moo nyid da" Senakherib ri ?Ngoo shoid bye:- re" gyi khaid ziri theing: pyam we' nang mho' zi cinghoid loug we' ngoo byid: wa? ga: mungdang: pyeung: kaid da:. Khosen gi Hezekia ri ngei daxi: tain: yo' sheing: datain: nyang: ri foin: byid: wa shid re" dang: phyed byid: da:.
15 Hezekia gi Noku Yhoem: Moo" yo' khokham kho" ngei jhi: mo ngei dangain" ri nya: jhang foin: kaid byid: da:.
16 Nyang: gi Noku Yhoem: Moo" khoem" zeing joem mo sheing: joem yo' nyang: wigi nyang: khoem" bung joem moo tab to" da" sheing: joem ri shid yu lho: nyang: gi hau: joem dangain" ri Senakherib ri foin: kaid byid: da:.
17 Asuri khosen gi Yerusalem moo nyid da" Hezekia ri gyi khaid wa shid re" Lakhisha mo zi gyiphung: moo" daphung: nhang: kaid da:. Hau: ziri aya: myhang: thang da" nya: gyizoug: soem" yug wigi shu" ago". Nyangnu" Yerusalem khyoo: ju" yhi: lang" tho' gyid thoem" mo gyid she: yu da" gyid khyoo" nam mo byimi cid" joyoo mo khyoo: deing ri seing: yu pyam ago".
18 Hau: thang: nyangnu" gi khokham Hezekia ri khe: kaid ago". Houg: lho: Hezekia da" gyizoug: soem" yug nghoid da" khokham kho" ri yoovoin yu yu" nyid da" Hikia nya: yuggi zoo: Eliakin- khokham kho" moo" seing: nghoid da" Shebna- lhid" xoem" moo" ri yoovoin yu yu" nyid da" Asab da" nya: yuggi zoo: Yoah bang: ri nyangnu" yo' yhe: shau" wa shid re" nhang: kaid da:.
19 Asuri gyizoug: dayug gi nyangnu" ri khokham Hezekia gi ciri houg yhi' myid loem nyid da: ga: ziri khokham phoo si' nau ga: tid da:.
20 Nyang: gi ?Nhoid dang: thui: gi gyi khaid kung ziyo' yoem: yoo" goo" wa ein: nanu" soin: go" rhe". Asuri ri thougtheung gyi koid jang" moo nanu" ri hang" bo pang" byid: ri" wa ein: soin: go" rhe".
21 Nanu" ri Egutu wigi re" pang" wa ein: myid go" rhe"- nghoid loug we' hau: zigi gyidpheing" gam ri gyung: soo" lhamdung: koid ci: ziyo' dakhyo" nghoid wigi hau zigi gyau: lo" lho: re" lo, ri zang" thoug" yu wa. Houg yo' dakhyo" nyang: ri dayug yug khau nghe: da" uri Egutu khokham moo bue" zi nghoid da:? ga: tid.
22 Asuri gyizoug: yigi xo' lho: ?Anghoid lang" nanu" Aseing Mangsoo ri nanu" khau nghe: nyid boem da" khyoo: ngoo ri tid kyoo" goo" wa rhe". Nyang: gi Yuda yo' Yerusalem byu yiri Yerusalem moo jo, da" phoin: moo za: noku wa tid uri Aseing da" noku joyoo yo' phoin: joem ri phyo' pyam yug gi Hezekia nyang: nghoid abye:.
23 Ngoo gi khosen pho myeing moo nanu" yo' gu tid wa. Nanu" moo myang: jui: byu myoo" sho' nyid ziri yo" myang nghoid rigi ngoo nanu" ri myang: eig khyeing" du: byid: wa.
24 Nanu" gi Asuri gyizoug: mo nyhoem: thang yug yo' lang" ayo" shi' goo" nghoid da:. Nghoid loug we' gyi myang: rheing" joem yo' myang: jui: bang: ri nanu" jhang nhang: kaid byid: wa ein: Egutu bang: ri nanu" myid loem ago".
25 Aseing da" pang" thoug zi aboo loo- nanu" mungdain: ri khaid zain: lho: phyo' shoin' pyam ein: nanu" jhoo: go" rhe". Hau: ziri gyi khaid lho: phyo' shoin' pyam wa shid re" Aseing wigi ngoo ri tid? ga: tid da:.
26 Hau: thang Eliakim- Shebna yo' Yoah bang: gi hau: gyizoug: phoo ri ?Ludaid phoo we"- ngoonu" ri Aramid myeing" ji we' Houg ziri ngoonu" se' gyo: da" Hebre myeing" khyo" aji goo". Vang khyam: tho' moo nyid boem da" byu yi shau" gyo: nyid boem ago"? ga: tid.
27 Nyang: gi ?Nang yo' khokham phoo ri za: he: gu: dangain" ri tid wa. Khosen pho wigi ngoo ri nhang: kaid zi nghoid ein: nanu" jhoo: go" rhe". Anghoid. Ngoo gi nanu" yhang: ti" nyangnu" khyid" ri zo:- nyangnu" yhed" ri shug goo" wa da" vang khyam: tho' moo zhung: nyid boem da" mung" byu yiri we' ngoo tid nyid zi nghoid? ga: tid.
28 Hau: thang: gyizoug: phoo gi to' yab lho: Hebre myeing" khyo" ?Asuri khosen tid da" dang: ri tam" gyoo" ge'.
29 Nyang: gi Hezekia wigi nanu" ri ayo" mhoug pyam wa ziri tid poin" kaid da:. Hezekia gi nanu" ri ayo" khyoid yu nghoid da:.
30 Aseing ri khau nghi: wa shid re" nanu" ri nyang: wigi amhoid" jhoem" nhang: pyam goo". Aseing gi nanu" ri khyoid yu wa ziyo' ngoonu" Asuri gyidab wigi nanu" voomoo" ri khaid oung: yu wa ziri toem' pyam byid: ri" wa ein: nanu" ajhoo: goo".
31-32 Hezekia dang: ri atam" gyoo: goo". Asuri khosen gi nanu" voomoo" mo thu re" lho: asoem" byid: pyam ge' ga: amyeing" byid: zi nghoid. Houg: lang" nanu" nya: mungdain: yo' gye" du da" moug:- zabyid yhid: myoo: sho' thu da" zabyid khyam: joem jo, da" moug:- zooyho' koid wa shid re" shivoo: thu da" moug:- zhainloin: gam- zhainloin: xu:- yo' byoo: yhid: jo, da" moug: moo khokham phoo nanu" ri doem de: nyid nhang: da" ayo, ju" sho' Nanu" dangain" gi nanu" nya: zabyid khyam: mo zabyid shi"- nanu" nya: lafoem' gam mo lafoem' shi" shoug" zoo: nhang: wa. Nanu" nya: da" gyid thung" mo gyid shau" shug nhang: wa. Nanu" nya: amyeing" ri cang koid nghoid rigi nanu" ashid: lho: dei nyid wa. Nghoid loug we' nanu" ri Aseing wigi khyoid yu wa ga: myid jhoo: wa khyo" Hezekia ri koo" myeing" akaid nhang: goo".
33 Kha: mungdain: mo yu phara" joem gi nyangnu" mung" ri Asuri khosen jang" mo yo" khyoid yu yu" go" rhe".
34 Akhid" Hamad yo' Arpad yu phara" joem khamoo: nghoid go" lha". Sepharvim- Hena- Iva da" yu phara" joem gi Khamoo: nyid go" lha". Samari ri hang" khyoid yu boem la".
35 Hau: mungdain: dangain" mo yu phara" joem wigi ngoonu" da" khokham lo, mo nyangnu" mungdain: ri kha: uri khyoid yu yu" boem lha". Aseing gi Yerusalem ri yo" khyoid yu da: ga: nanu" ri myid jhoo: nhang: boem rhe"? ga: nyho: tid boem ago".
36 Khokham Hezekia wigi nyangnu" ri tid to" ziyo' dakhyoo" ti" mung" byu yigi sam: zoo: nyid boem ago". Nyangnu" ci: dakhoin" we' atid nghoid ago".
37 Hau: thang: Elia kim- Shebna- Yoa bang: gi koug ziyo' nyangnu" byimi lang: ceig pyam lho: Asuri gyizoug: phoo tid da" dang: ri khokham phoo ri lu lo" tid kyo" ago".