17
Yuda khokham Ahaza vhoeb zi daxe: eig zain moo Ela da" yuggi zoo: Hoshea gi Israela khokham bui" lo da:. Nyang: gi Samari moo goug: zain vhoeb da:. Nyang: gi Aseing ri thougtheung yooboo koid da:. Nghoid loug we' nya: shid vhu" mo Israela mung" ri vhoeb lo boem da" khokham yi yhi' axoo: nghoid da:. Asuri khosen Shalmanesa gi nyang: ri meing: re" zain: da:. Hoshea gi Shalmanesa ri asoem" byid: wigi zain khang" moo" khang" doug byid: da:. Nghoid loug we' dazain moo Hoshea gi Egutu khokham So jhang lagyoo: nhang: wigi nyang: ri pang" yu wa mho' nhang: kaid da:. Houg: lho: zain khang" moo" Asuri ri byid: nyid da" khang" doug ri abyid: loo theung: pyam da:. Shalmanesa gi hau: khyoo: ri si' lang" nyang: gi Hoshea ri myheig yu lho: thung: lhung to" da:.
Hau: thang: Shalmanesa gi Israela mung" khyoo: jhen" vang yhe: lho: Samari voomoo" ri vang: to" da:. Vang: to" da" soem" zain ein: zain Hoshea vhoeb zi goug: zain ein: zain moo Asuri khosen gi Samari ri seing: yu lho: thung: byu yi khyo" Israela byu yiri Asuri mung" khyoo: shu" lo" ago". Dayham" ri Hala voomoo" moo dayham" ri Gozan mung" du mo Habora gyid lang nam moo dayham" rigi Media byu yi voomoo" joem moo nyhid: to" ago".
Israela byumyu" yigi nyangnu" ri Egutu khokham lo, mo khyoid yu lho: nyangnu" ri Egutu mung" mo shu" thu lo yug nghoid da" nyangnu" Aseing Mangsoo ri thougtheung yooboo shoid yoomo Samari gyo" soem" lo" zi nghoid da:. Nyangnu" gi gootu: yu phara" joem ri no' ago". Nya: byu yi shid khyoo: jhen" yhe: lo" uri Aseing wigi khaid thu pyam da" byumyu" yi da" thung" ri: joem ri cang wigi Israela khokham yi wigi koid shug da" thung" ri: joem ri cang koid ago". Israela byumyu" yigi nyangnu" Aseing Mangsoo avho: da" ja: joem ri koid ago". Nyangnu" gi nge thang da" voozoo: mo zi gyi: thang da" voomoo" ju" sho' nyangnu" voo dangain" moo tungbau yu phara" ri no' da" joyoo joem ri koid ago". 10 Nyangnu" gi bouggung dangain"- seiggam yoeb bid shoem: khang" moo" moo lugboem zeing bung: joem yu phara" myhi' Ashera da" soolhoo: joem ri to" wigi. 11 Nyangnu" gi hau: mung" mo Aseing wigi khaid thu pyam da" byumyu" yi koid da" lo, moo" ri cang wigi tungbau thung" phoin: joem dangain" dang moo shoem: nam pyo: ja: nghe' ngei" ago". Nyangnu" gi nyangnu" da" akhyeing" da" lo, moo" dangain" wigi Aseing da" nheigloem: yoin ziri bue" loo nhang: ago". 12 Houg: lho: yu phara" soolhoo: joem ri ano' wa shid re" byid: to" da" Aseing da" amyeing" dang: ri atam" gyoo: nghoid ago".
13 Aseing gi Israela yo' Yuda ri tid poin" byid: wa shid re" nya: lagyoo: yi yo' lapi: yiri nhang: kaid da:. ?Nanu" da" akhyeing" khyoo: joem ri to' pyam lho: nanu" phoug" phyid" yiri ngoo byid: to" da" tarha" moo yo' nga" dei zoo: yi nhoid khyo" nanu" ri byid: to" da" tarha" moo bo da" nga" amyeing" dang: joem ri tam" gyo: cang yhe: nyid ge'? ga: zi nghoid. 14 Nghoid loug we' nyangnu" atam" gyoo: nghoid da:. Nyangnu" Aseing Mangsoo ri aloem da" nyangnu" phoug" phyid" yi yo' dakhyo" nyangnu" nheigloem: thain: ago". 15 Nyangnu" gi nya: jhau" shed dang: ri atam" gyoo: ngeug pyam bye:. Nyangnu" phoug" phyid" yi yo' koid to" da" dang: theing ri nyangnu" acang. Nya: da" tid poin" dang: ri ci asoin: byid: nghoid da:. Nyangnu" gi ce: phoug" adab da" yu phara" soolhoo: joem ri no' wigi nyangnu" nya: gung ri ce: aphoug" adab bang: bue" nhang: ago". Houg: lho: nyangnu" gi ayam aqei: mo byumyu" yi da" thung" joem ri cang ago". Houg bang: da" leig ayu" wa shid re" tid da" Aseing amyeing" dang: ri atam" gyoo: nghoid ago". 16 Nyangnu" gi nyangnu" Aseing Mangso da" tarha" joem dangain" ziri phyo' pyam lho: no' wa shid re" to' nu: nu" soolhoo: eig loem: ri koid ago". Nyangnu" gi yu phara" myhi' Ashera da" soolhoo: ri we' koid lho: kyi: joem ri no' ago". Bala yu phara" ri we' dei byid: ago". 17 Nyangnu" gi nyangnu" da" yuggi zoo: yi myiyi: zoo: yiri nghe' ngei" byid: da" xoin" khyo" tungbau yu phara" ri nghe' ngei" byid: ago". Nyangnu" gi join: zei: bang: yo' boid phyed bang: ri dang: myid: ago". Nyangnu" gi Aseing shidkhoin" moo shoid da" lo, moo" koid wa shid re" nyangnu" gung ri nyangnu" bain: sho' shugbyid: to" ago". Hougsu" yoomo nya: nheigloem: ri zhu: nhang: da:. 18 Aseing gi Israela byumyu" yiri nheig yo: wigi houg bang: ri nya: shidkhoin" mo khaid thu pyam da:. Yuda mungdain: ri za: teing to" da:.
19 Nghoid loug Yuda byu yi we' nyangnu" Aseing Mangso da" tarha" joem ri acang boem nghoid ago". Nyangnu" gi Israela byumyu" koid da" thung" joem ri leig yu" ago". 20 Aseing gi Israela byu yi dangain" ri ngeug pyam lho: nyangnu" ri yooboo dam byid: wigi nyangnu" ri nya: shidkhoin" mo bain sho' khaid thu pyam sho' anoug akhyoid koid da" gyivoo yi lo, khyoo: nyangnu" ri byid: pyam da:.
21 Aseing gi Israela ri Yuda mo bain kho' yu thang: ri Israela byu yigi Nebad nya: yuggi zoo: Yeroboam ri khokham koid nhang: ago". Yeroboam gi Aseing ri she pyam wa shid re" nyangnu" ri koid wigi nyangnu" ri gyoug pho" yooboo khoug: khyoo: vhu" she: da:. 22-23 Aseing gi nya: dei zoo: lapi: yi da" nhoid khyo" nyang: koid wa ga: tid to" ziyo' dakhyoo" ti" nyangnu" ri nya: shidkhoin" mo khaid thu pyam sho' nyangnu" gi Yeroboam thang: cang wigi nyang: shoid da" yooboo dangain" ri xo' lho: cang koid ago". Houg: yoomo Israela byumyu" yigi akhid" nyangnu" nyid boem shigo' da" Asuri mung" khyoo: pyoung" she: loo" shoug" ago".
24 Asuri khosen gi Babelon- Khutha- Ava- Hamad- Sepharvim voomoo" joem mo byu yiri pyoung" yu lho: nyangnu" gi pyoung" she: loo" shau" da" Israela byumyu" yi joyoo nghoid da" Samari voomoo" joem moo houg bang: ri nyid: nhang: to" ago". Nyangnu" gi hau: voomoo" joem ri seing: yu lho: houg moo nyid boem ago". 25 Nyangnu" houg moo xang: shi" yhe: de: nyid boem uri nyangnu" gi Aseing ri anoku nghoid ago". Houg: yoomo nyang: gi khang: khyi joem ri nhang: kaid wigi nyangnu" dayham" ri ngaid said pyam da:. 26 Asuri khosen wigi Samari voomoo" joem moo yhe: de: nyhid: to" da" byumyu" yigi hau: mungdain: da" yu phara" tarha" ri asi' yoomo hau: yu phara" gi khang: khyi joem ri nhang: kaid lho: nyangnu" ri ngaid said pyam da: ga: Asuri khosen ri lo tid kyo" ago".
27 Houg: yoomo khosen phoo gi ?Thung: byu yi khyo" ngoonu" shu" lo da" khainjung yi mo dayug ri doem tau" de" kaid ge'. Hau: mungdain: mo yu phara" da" tarha" ri mung" byu yiri jhau" byid: wa shid re" nyang: ri houg moo lo" nyid nhang: ge'? ga: amyeing" byid: da:. 28 Houg: yoomo Samari mo pyoung" she: lo" shau" da" Israela byu khainjung dayug gi Bethela moo lo" nyid lho: mung" byu yi Aseing ri khasu" noku wa khyoo: ri lo" jhau" byid: bye:.
29 Nghoid loug we' Samari moo lo" de: nyid boem da" mung" byu yigi xo' lho: nyangnu" nya: da" yu phara" soolhoo: joem ri koid wigi hau: joem ri Israela byumyu" yi koid to" da" noku joyoo moo: to" to" da:. Nyang: phung: nyang: nyangnu" nyid da" voomoo" joem moo yu phara" soolhoo: joem ri koid ago". 30 Babelon byu yigi Sukho Benod yu phara" soolhoo: joem Khutha byu yigi Nergala yu phara" soolhoo: joem Hamad byu yigi Ashima yu phara" soolhoo: joem. 31 Ava byu yigi Nibhaza yo' Tartag yu phara" soolhoo: joem ri koid wigi Sepharvim byu yigi nyangnu" yu phara" Adrameleg yo' Anameleg ri nghe' ngei" xoin" khyo" nyangnu" zooshang: yiri nghe' ngei" byid: boem ago". 32 Hau: byu yigi Aseing ri we' noku wigi tungbau yu phara" ri no' da" joyoo joem moo nyangnu" shid re" houg moo xoin" ngei" byid: wa da" khainjung yi khyo" dei byid: da" byu aja: ja: ri we' nyangnu" phung: mo khyen: yu ago". 33 Houg: yoomo nyangnu" gi Aseing ri noku coung" nghoid loug we' nyangnu" gi nyangnu" re" da" mung" mo thung" ri: joem ri cang lho: nyangnu" nya: yu phara" joem ri we' no' ago".
34 Nyangnu" gi akhid" nyid" ju" sho' nyangnu" da" thung" ri: xoug" joem ri ci: ashi". Nyangnu" gi Aseing ri we' a noku. Nyang: wigi Israela ga: myheing byid: da" Yaku da" amyed ashen yiri byid: to" da" tarha" yo' amyeing" dang: joem ri we' acang boem nghoid ago". 35 Aseing gi nyangnu" yo' dang: theing koid to" wigi nyangnu" ri ?Gootu: yu phara" ri ano' goo"- hau: joem ri agoeb pid goo"- adei byid: goo"- xoin" we' angei" byid: goo". 36 Nanu" gi gyi: sheung: da" yoem: so' yo' yoem: wigi Egutu mung" mo nanu" ri shu" thu lo da" Aseing ngoo ri tam" gyoo: cang wa zi nghoid. Nanu" gi ngoo ri goeb pid wigi ngoo ri xoin" ngei" byid: wa zi nghoid. 37 Nanu" gi ngo wigi nanu" shid re" lhid" byid: to" da" tarha" yo' amyeing" dang: ri khanham we' cang boem wa zi nghoid. Gootu: yu phara" ri nanu" ayo" tam" gyo: cang yhi: wa. 38 Houg: lho: nanu" yo' ngoo koid to" da" dang: theing ri nanu" age to" myhed goo" wa. 39 Nanu" gi nanu" Aseing Mangsoo- ngoo ri tid dang: tam" gyoo: lho: nanu" da" gyivoo yi lo, mo ngoo nanu" ri khyoid yu wa? ga: amyeing" byid: to" da:. 40 Nghoid loug we' hau: byu yigi anau tam" gyoo: nghoid ago". Nyangnu" gi nyangnu" thung" ri: xoug" joem ri xo' wigi cang ago".
41 Houg: yoomo hau: byumyu" yigi Aseing ri noku boem nghoid loug we' nyangnu" gi nyangnu" yu phara" soolhoo: joem ri no ago". Akhid" nyid" ju" sho' nyangnu" amyed ashen yigi houg yo' dayhang: ti" za: xo' koid nyid ago".