16
(2 Km 28:1-27)
1 Remalia da" yuggi zoo: Peka Israela khokham koid zi daxe: nyhed zain moo: Yotham da" yuggi zoo: Ahaza gi Yuda khokham bue" lo da:.
2 Nyang: gi nya: apyaid eig xi: zain ri khokham bue" wigi Yerusalem moo: daxe: khyug zain vhoeb da:. Nyang: gi nya: phoug" phyid" khokham David da" ge da" leig ri acang nghoid da:. Hau: gungthid nyang: gi nya: Aseing Mangsoo ri avho: ngei nhang: da" moo" ri koid da:.
3 Ref 16:3: Tid 12.31. Nyang: gi Israela khokham yi da" leig ri cang da:. Nyang: gi Israela byumyu" yi shid khyoo: yhe: lo" ri mungdain: mo Aseing wigi khaid thu kaid da" byumyu" yi da" aco' ajhoid lo, moo" ri leig yu" wigi nya: yuggi zoo: rilang" yu phara" soolhoo: joem ri nghe' ngei" byid: da" xoin" khyo" xoin" ngei" byid: da:.
4 Ahaza gi tungbau yu phara" ri no' da" joyoo joem bouggung joem seiggam khyid: bid shoem: joem moo: xoin" joem yo' nam pyo: ja: nghe' ngei" khyo" xoin" to' byid: da:.
5 Ref 16:5: Esa 7:1. Suri khokham Rezin yo' Israela khokham Peka gi Yerusalem ri gyi re" zain: lho: houg ziri vang: to" ago". Nghoid loug we' Ahaza ri a oung: nghoid ago".
6 (Hau: ayo, moo: Edom khokham gi Elad voomoo" ri doem seing: yu lho: houg moo nyid boem da" Yuda byu yiri khaid thu pyam da:. Edom byu yigi Elad moo: voomoo" tam: wigi akhid" ju" sho' nyid boem ago".)
7 Ahaza gi Asuri khosen Tiglad Pilesa ri ?Ngoo gi re" dei zoo: nghoid. Houg: lho: ngoo ri gyi zain: nyid boem da" Suri yo' Israela khokham eig yug lo, mo ngoo ri re" khyoid yu la? ga: da" mungdang: yo' dage" byu nhang: kaid da:.
8 Ahaza gi Noku Yhoem: Moo" yo' khokham kho" jonu" jhi: mo ngei yo' sheing: ri yu wigi khosen: phoo ri jhungshug khyo" foin: kaid da:.
9 Tiglad Pilesa gi Ahaza mho' da" khyoo: ri tam" gyo: wigi nya: gyidab yo' dage" to' yhe: lo" lho: Damasku ri yhe: zain: seing: yu pyam da:. Khokham Rezin ri said pyam lho: mung" byu yiri thung: byu yi khyo" Kira khyoo: shu" lo" da:.
10 Khokham Ahaza gi khokham Tiglad Pilesa ri shoug" goo" wa shid re" Damasku khyoo: yhe: lo" uri nyang: gi houg moo phoin: da loem: ri myang wigi houg yo' du da" soolhoo: ngi da loem: khainjung Uria jhang doem tau" foin: kaid da:.
11 Houg: yoomo Uria gi houg yo' du da" phoin: da loem koid da:. Ahaza adoem tau" ju" loo shi" ri bain koid abye:.
12 Damasku mo nyang: doem ju" lo ri phoin: bain koid too" bye: ziri Ahaza lo myang da:.
13 Houg: yoomo nyang: gi hau: adang moo: gougnyhoug nghe' ngei" xoin"- shivoo: xoin" joem ri ngei" byid: wigi zabyid yhid: xoin" yo' zoem" khau: xoin" khyo" suid" ri hau: adang moo: ngei" byid: da:.
14 Ref 16:14: Thu 27:1,2: 2 km 4:1. Aseing ri shugbyid: to" da" gyid: mid" phoin: gi phoin: aseig yo' Noku Yhoem: Moo" agyoo: moo: nghoid da:. Houg: lho: Ahaza gi nya: phoin: aseig loem: ri mougzhung: shoid khyoo: shu" to" da:.
15 Hau: thang: nyang: gi Uria ri ?He: nga" da" phoin: gyi: loem: moo nab soin nghe' ngei" xoin" yo' myen" thang: mo shivoo xoin"- khokham yo' mung" byu yi da" nghe' ngei" byid: da" xoin"- shivoo: xoin"- mung" byu yi da" zabyid yhid: xoin" ngei" byid: jang" moo ci: we'. Xoin" ngei" byid: da" gougnyhoug dangain" da" suid" ri hau dang moo: foid shoin" we'. Nghoid loug we' gyid: mid" phoin: rigi boid phyed wa shid re" ngoo ri byid: too" we'? ga: amyeing" byid: da:.
16 Uria gi khokham phoo amyeing" byid: ziyo' dakhyo" koid bye:.
17 Ref 16:17: 1Kh 7.23-39: 2 km 4.2-6. Khokham Ahaza gi Noku Yhoem: Moo" moo: ci: da" gyid: mid" rheing" ri phyo' pyam lho: houg dang moo jo, da" jarung: joem ri yu pyam da:. Nyang: gi gyid: mid" nujung loo: daxe: eig du: da" nung" khung: mo gyid: mid" gyid thung" lhang" ri we' yu pyam da:. Houg: lho: hau: ziri lug boem tho' ke" to" da:.
18 Ahaza gi Asuri khosen: ri myid ngei nhang: wa shid re" Noku Yhoem: Moo" yo' khokham zhungtang agyoo: mo khyoo: soo" jang: ri yu pyam lho: Noku Yhoem: Moo" khyoo: khokham phoo vang yhi: wa khoem" ri we' myhid" pyam da:.
19 Khokham Ahaza koid da" gootu: lo, moo" ja: khang" moo" ri Yuda khokham yi da" mhoomyid: shen" dam pug moo: lhid" xoem" to" da:.
20 Ref 16:20: Esa 14:28. Ahaza shid: wigi David voomoo" khokham loeb boug moo: myhoeb shoung: pyam ago". Houg: lho: nya: yuggi zoo: Hezekia gi nya: khoo: moo: khokham xo' koid da:.