1 Yeroboam gi xoin" to' wa shid re" phoin: nam moo yab jo, uri Aseing amyeing" dang: yo' dayhang: ti" Yuda mung" mo lapi: dayug gi Bethela khyoo: ju" ri" bye:. 2 Vhoo: mo Aseing da" amyeing" dang: ri lapi: phoo gi phoin: ri tid phu: nyid. ?O" phoin: we"- phoin: we" he: zigi Aseing tid da" dang: nghoid. Yoshia ga: da" zoonu" dayug gi David ikoin deungkhu: mo khu ri" wa zi nghoid. Nyang: gi tungbau yu phara" phoin: joem moo: re" shid re" xoin" to' byid: wigi dei byid: nyid da" khainjung ri re" dang moo said noung" lho: nyang: gi re" adang moo byu shooyoug: ri we' nghe' ngei" wa zi nghoid? ga: tid. 3 Lapi: phoo xo' lho: ?He: phoin: gi asain" sain" byo, gyo" pyam wa zi nghoid. Hau: adang mo myiyab joem we' shoin: gyo" byug wa. Houg: lang" nanu" gi Aseing nyang: ngoo khyo" wigi dang: tid nyid ein: ziri si' wa zi nghoid? ga: tid. 4 Khokham Yeroboam hau: ziri shoug" gyoo: lang" nyang: gi lapi: phoo ri toin" shid wigi ?He: yug ri myheig too" ge'? ga: amyeing" byid: bye:. Khokham phoo da" lo, dalheing: dam lo, joem: shid: byug wigi nyang: gi ayo" doem tu: loo: nghoid da:. 5 Phoin: gi lapi: phoo Aseing da" myeing moo lapi: pi: bye: ziyo' dayhang: ti" asain" sain" byo, gyo" pyam wigi myiyab we' dalheing: dam myidjang moo gyo" boem too" bye:. 6 Khokham Yeroboam gi lapi: phoo" ri mho' yoid, zigi ?Jeju" mo re" Aseing Mangso jang" moo nga" shid re" akyu" mho' byid: we' nga" lo, sain: doem ge loo wa shid re" we' nya: jhang akyu" mho' byid: we'? ga: tid.

lapi: phoo gi Aseing jhang akyu" mho' byid: wigi khokham phoo da" lo, sain: ge loo" khari" da:. 7 Hau: thang: khokham phoo gi lapi: phoo ri ?Ngoo yo' dage" yhoem: khyoo: lo" lho: daja: ja: lo" zoo: shang. Nang koid bye: da" moo" zoo" shid re" ngoo nang ri jhungshug byid: wa? ga: tid. 8 lapi: phoo gi ?Nang ngoo ri re" ziyoo jonu" mo dakhyam" byid: wa ga: rilang" nang yo' dage" daja: ja: zoo: wa shug wa shid re" ngoo ayo" cang. 9 Aseing gi ngoo ri daja: ri we' azoo: ashug ziyo' re" da" khyoo: khyo" yhoem: khyoo: age doem tau" loo" ga: amyeing" byid: to" da:. 10 Houg: yoomo nyang: gi nyang: re" khyoo: khyo" adoem tau" loo" loo: za: gootu: khyoo: khyo" tau" lo" byug bye:.

11 Hau: ayo, ri Bethela moo lapi: mang: zoo: dayug nyid. Nya: zoo: yi lo wigi hau: nyid" ri Yuda mung" mo lapi: phoo gi Bethela moo koid shug bye: da" moo" yo' khokham Yeroboam ri nyang: tid da" khyoo: ri nyang: ri lo tid kyo" ago". 12 Lapi: mangzoo: gi nyangnu" ri ?Nyang: thu lo" uri khyoo: kha" khaid khyo" loo" khare" lha"? ga: myid:. Nyangnu" gi nyang: ri khyoo: toin" shid wigi 13 lapi: mangzoo: gi nyangnu" ri nya: shid re" loo zei: too: soin' byid: wa shid re" tid bye:. Nyangnu" we' soin' byid: bye: wigi nyang: gi 14 Yuda mung" mo lapi: thang: khyoo: cang zhung: gyoo" lo" ri shookhi" gam vhoo: moo: zhung: no: nyid da" Lapi: phoo ri yhe: myang bye:. Nyang: gi ?Nang Yuda mung" mo lapi: phoo anghoid la"? ga: myid:. Hau: yug we' ?Ngoo nghoid? ga: phug tid bye:. 15 Nyang: gi ?Yhoem: khyoo: lo" wigi ngoo yo' dage" zoo: noem damyoo: coem' zoo: shang? ga: tid. 16 Nghoid loug we' Yuda mung" mo lapi: doem phug tid zigi ?Ngoo nang yo' dage" yhoem: khyoo: ayo" cang loo- nang doo" byid: ziri we' ngoo ayo" khab yu. Ngoo hid: moo nang yo' dage" zoo: noem shug phoo" ciri we' ayo" zoo: ayo" shug. 17 Ciwim gari Aseing gi ngoo ri daja: ri we' azoo: ashug ziyo' re" da" khyoo: khyo" yhoem: khyoo: age doem tau" loo" ga: amyeing" byid: to" da:. 18 Hau: thang: Bethela mo lapi: mangzoo: gi nyang: ri ?Ngoo we' nang yhang: ti" lapi: dayug nghoid. Aseing amyeing" dang: moo nang: ri ngoo yo' dage" yhoem: khyoo: shu" lo" wigi nang ri doo" zhoo" wa khyoo: moug: lagyoo: khyo" ngoo ri tid? ga: tid. Nghoid loug we' lapi: mangzoo: gi mhau' nyid da:. 19 Houg: yoomo Yuda mung" mo lapi: phoo gi lapi: mangzoo: yo' dage" yhoem: khyoo: lo" wigi nyang: yo' zoo: noem dage" zoo: bye:. 20 Nya: tang: zoobui" moo: zhung: jo, uri Aseing da" mungdang: lapi: mangzoo: jang" moo ju" re" wigi 21 Nyang: gi Yuda mung" mo lapi: phoo ri ?Aseing gi nang nya: dang: atam" gyoo:. Nya: amyeing" dang: ri acang koid. 22 Hau: gungthid nyang: nang ri ayhe: ge zoo: ga: amyeing" byid: to" da" joyoo khyoo: tau" lo" wigi zoo: noem zo: abye:. Hougsu" yoomo nang shid: wa zi nghoid lho: re" mang ri we' re" ikoin deungkhu: loeb yoo moo yo" myhoeb wa zi anghoid? ga: tid. 23 Nya: tang: zoo: shug bain zoo: shug lang" lapi: mangzoo: gi Yuda mung" mo lapi: shid re" loo: zei: too: soin' byid: wigi 24 Nyang: zhung: thu loo" khari" bye:. Khyoo: moo khangkhyi yo' shoug" go" wigi nyang: ri ngaid said pyam bye:. Nya: shid: mang gi khyoogung moo: leung jo, wigi loo zei: yo' khangkhyi gi hau: anam moo: yab jo, da:. 25 Byu dayham" lid yhe: lo" ri shid: mang gi khyoogung moo: leung jo, wigi khangkhyi gi hau: anam moo: yab jo, ziri myang boem. Nyangnu" gi Bethela khyoo yhe: wigi shoug" goo" mo, dangain" ri tid kyoo" bye:.

26 lapi: mangzoo: shoug" gyoo: lang" nyang: gi ?Hau: zigi Aseing da" amyeing" dang: ri atam" gyo: da" lapi: phoo nghoid wa bye: o". Aseing gi nyang: tid ziyo' dakhyoo" ti" koid nyid yoomo nyang: ri lhoem: ngaid said wa shid re" Aseing wigi khangkhyi ri nhang: kaid zi nghoid? ga: tid. 27 Hau: thang: nyang: gi nya: zoo: yiri ?Nga" loo zei: moo too: tab ge'? ga: tid. Nyangnu" we' soin' tab byid: bye:. 28 Nyang: zhung: yhe: lo" ri lapi: phoo da" manggung khyoogung moo lheing: jo, ziri we' loo zei: yo' khangkhyi gi hau: anam moo: yab jo, ziri we' yhe: myang bye:. Khangkhyi gi manggung ri we' azoo: loo zei: ri we' gyi akoid nghoid da:. 29 lapi: mangzoo: gi manggung ri tu: yu wigi loo zei: moo tho' lho: nheig koug nheig nge ziyo' myhoeb pyam wa shid re" Bethela khyoo: tho' tau" loo bye:. 30 Nyang: gi hau: mang ri nya: deungkhu: loeb yoo moo myhoeb bye:. Nyang: yo' nya: zoo: yigi hau: adang moo: nheig koug nheig nge ziyo' ?O" nga" mang: we" nga" mang: we"? ga: tid boem ago". 31 Mang bain myhoeb thang: ri lapi: phoo gi nya: yuggi zoo: yiri ?Ngoo shid: lang" he: loeb yoo nya: ayam moo: myhoeb we'. 32 Bethela voogung moo jo, da" phoin: ri we' Samari mung" voogung joem mo noku joyoo joem dangain" ri we' thougtheung wa ga: nyang: tid da" Aseing amyeing" dang: mungdang: gi gyeing" nyang: bui" loo wa? ga: tid.

33 Israela khokham Yeroboam gi nya: akhyeing" da" khyoo: mo myid athid looza: nyang: koid to" da" phoin: joem moo: moo" zei: wa shid re" Khainjung ikoin deungkhu: anghoid da" ikoin deungkhu: joem mo khainjung yiri xo' sho: da:. Khainjung koid nau mo, hang" ri nghoid loug we' nyang: gi khainjung aya: kham: yu khyoo: koid byid: bye:. 34 He: nya: da" yooboo gi nya: khokham akung: ri byo, yoin nhang: wigi dangain" ri doem: loo" nhang: bye:.