23
Gye myang" thang: ri Aseing gi Israela byumyu" yiri nyangnu" ri lheing khoem to" da" gyivoo yi lo, mo goem loem byid: da:. Hau: ayo, ri Yoshu gi gye" mang: bye:. Houg: yoomo nyang: gi Israela byumyu" yi dangain"- ludaid yi vhujhung: yi tarha" agyi yi byumyu" yi mo gyizoug: dangain" ri khe: yu wigi ?Akhid" ngoo gi gye" mang: bye:. Nanu" gang mo he: byumyu" dangain" ri nanu" Aseing Mangsoo cikoid lid loo bye: da" ja: khang" moo" ri nanu" shau" myang abye: go". Nanu" Aseing Mangsoo gi nanu" shid re" gyi khaid byid: loo bye:. Ngoo gi nanu" da" byumyu" yi mougmyid jonu" khyo" akhid" nyid boem shi" go" da" byumyu" yi mung" ri we' bid thu shoid Yodan gyid lang mo zi bidvang shoid Meing: gung panglai: ju" sho' ngoo oung: yu bye: da" byumyu" yi mungdain: dangain" ri nanu" ri kho' gam byid: bye:. Nanu" Aseing Mangsoo gi nyangnu" ri nanu" jang" mo zoid phang: loo" nhang: da:. Nanu" shid khyoo: yhe: lo" uri nyang: gi houg: bang: ri khaid thu pyam wa zi nghoid. Nanu" Aseing Mangsoo nanu" ri dangsoo" byid: to" ziyo' dakhyo" nyangnu" mung" ri nanu" seing: yu wa zi nghoid. Houg: yoomo Moshe da" tarha" pug moo lhid" to" zi ja: khang" moo" ri zid" lho: tam" gyo wigi cang koid ge'. Houg: mo dadu ri we' ashe: pyam goo". Houg: lang" nanu" phung: moo: nyid deing jo, da" tungbau byu yi yo' azoem" goo". Nyangnu" yu phara" joem da" myeing ri alang: goo". Hau: myeing joem ri lang: wigi jham' atang: goo". Hau: yu phara" joem ri ano' goo". Houg: joem ri agoeb pid goo". Hau: gungthid akhid nyid" ju" sho' nanu" jhug zug nyid da" Aseing ri jhug zug nyid ge'. Aseing gi nanu" shid vhu" khyoo: yhe: loo" lang" gyi: sheung: wigi yoem so' bo da" byumyu" yiri khaid thu pyam da:. Hang" dayug we' nanu" ri khanham we' ayo" thougtheung yu" nghoid da:. 10 Nyang: dangsoo" byid: to" ziyo' dakhyo" nanu" Aseing Mangsoo gi nanu" shid re" gyi khaid byid: bye: yoomo nanu" mo hang" nghoid loug we' byu dakhyeing" ri yo" tang" phang: loo" nhang: da:. 11 Nanu" Aseing Mangsoo ri jheddab wa shid re" zid" nyid ge'. 12 Nanu" gi dang: azung" loo: za: nanu" phung: moo: nyid deing nyid da" tungbau byu yi yo' zoem" wigi nyangnu" gi myi: byid: myi: yu khyoo: koid boem nghoid rigi 13 Nanu" Aseing Mangsoo gi nanu" shid vhu" khyoo: yhe: lo" ri hau: byumyu" yiri khaid thu pyam byid: wa anghoid lo: ziri boin: nyid ge'. Nyangnu" gi lhid anghoid lang" duang: gyam" yo' dayhang: ti" nanu" shid re" gyoug ca" ziyo' nanu" nung" khung: moo: tei" wigi baid anghoid lang" nanu" myojid" mo zu: yhang: ti" noo nhang: wa. He: zigi nanu" Aseing Mangsoo nanu" ri byid: to" da" he: mougmyid gi moo: hang" dayug we' anyid deing jo, loo: sho' bui" nhang: loo wa.
14 Akhid" ngoo gi shid: yo, ju" bye:. Nanu" yugkhang" moo" nyang: nya: emyed nheigloem: yo' ung: khung: soozoo: mo nanu" Aseing Mangsoo gi nyang: dangsoo" byid: bye: da" ge da" ja: dangain ri byid: bye: khyoo: ri se' nyid ago". Nyang: dangsoo" byid: to" zi ja: khang" moo" ri cang koid pyeing wigi daja: ri we' ashe: pyam nghoid da:. 15 Ngoonu" ri nyang: byid: to" da" dang soo" ja: khang" moo" ri koid pyeing bye: yhang: ti" nyang: gi kyug nhain' zi ja: khang" moo" ri we' bui" nhang: wa. 16 Nanu" cang wa shid re" nanu" Aseing Mangsoo wigi amyeing" byid: to" da" dang: theing ri nanu" ayo" cang pyeing lho: nanu" gi gootu: yu phara" ri no' wigi dei byid: nghoid rigi nyang: nheig yo: wigi nanu" ri yooboo dam byid: wa. Houg: lho: nyang: nanu" ri byid: to" da" he: ge da" mung" mo amyang" ri nanu" mo hang" dayug we' nyid deing jo, loogoo" wa anghoid? ga: tid.