YOSHU
MOUGSOUG" PUG
(Joshua)
Yoshu mougsoug" pug gi Israela byumyu" yi Moshe mo vhujhung: xo' koid da" Yoshu da" vhu" she: da" akhoug: moo: cang wigi Khanan mung" khyoo: jhen" vang yhe: da" khyoo: mhoomyid: mougsoug" nghoid da:. Yodan gyid lang ri gu: dab da" khyoo: Yerikho voomoo" gyi soem" lo" da" khyoo: Ai voogung mo meing: zain: pui"- Mangsoo yo' nya: byumyu" yi agyoo: moo: dang: theing ri doem so' da" khyoo: joem he: soug" pug moo: xoem" ge akhyoo" khyo" lhid xoem" to" da:. He: soug" pug mo myeing gyi: da" jhoem: du gi ?Nanu" nyang: ri anau dei byid: goo" nghoid rigi: hang" ri dei byid: wa khyoo: ri akhid" nyid" myid phyed ge'. Ngoo yo' nga" yhoem: byu yi koem' gi Aseing ri dei byid: wa? (24:15) ga zi nghoid.
1
1 Aseing da" dei zoo: Moshe shid: thang: ri Nun da" yuggi zoo: nghoid wigi Moshe ri bo pang" su: Yoshu ri Aseing gi: dang: tid da:.
2 Nyang: gi ?Nga" deizoo: Moshe shid: bye:. Ngoo nanu" ri byid: wa ein: da" mung" khyoo: Yodan gyid lang gu: lho: vang yhi: wa shid re" nang yo' Israela byumyu" yi dangain" akhid" jen" jen" soin too" we'.
3 Ngoo Moshe ri tid bye: ziyo' dakhyo" nanu" yhe: zain: oung: yu wa da" mung" goin" ri nang yo' re" byumyu" dangain" ri ngoo byid: bye:.
4 Nanu" mougkyoo" gi mougpyi: shoid dain" pyoid yoo mo zi: mougzhung: shoid Lebanon boem ju" sho' bidthu shoid Uphrad gyid lang moo" mo Hiti mung" khyo" zi bidvang shoid Meing: gung panglai: ju" sho' nghoid wa.
5 Yoshu- nang kangso dei nyid ayo, dangain" moo: nang ri dayug we' yo" oung: pyam wa zi angoid. Ngoo Moshe yo' dage" nyid yhang: ti" nang yo' we' ngoo dage" nyid wa. Ngoo gi nang yo' khanham we' dage" nghoid wa. Ngoo nang ri khanham we' ashe: pyam wa.
6 Ngoo nyangnu" da" phoug" phyid" ri dangsoo" byid: to" da" he: mung" ri nyangnu" yhe: seing: yu uri nang gi hau: byumyu" yi da" vhujhung: bui" wa ein: ziri myid phyed loem jeing" we'.
7 Date: myid phyed lho: loem jeing" we'. Nga" dei zoo: Moshe nanu" ri byid: da" tarha" dangain" ziri nanu" yo" cang sho' koid nyid ge'. He: joem mo kha: adu ri we' ato" myhed goo". Houg: lho: nanu" yhe: da" joyoo khang" moo" oung: doid wa.
8 He: tarha" mougsoug" pug gi nanu" noku koid khang" moo" nghab ca" ziri boin: nyid ge'. Nyid" ri myen" ri hau: ziri zhang: yu ge'. Hougmoo: lhid" to" zi ja: khang" moo" ri nanu" cang wa khyo" koid ge'. Houg: lang" nanu" nyid gi yab ge lho: oung: doid lo boem goo" wa.
9 Ngoo nang ri myid phyed lho: loem jeing" wa shid re" amyeing" byid: bye: ziri myid boin: we'. Agyug goo"- yoem: ashoin: goo"- ciwim gari: re" Aseing Mangsoo ngoo gi nang khakhyoo: yhi: khakhyoo: nang yo' dage" nghoid wa? ga: tid.
10 Hau: thang: Yoshu gi vhujhung: yiri amyeing" byid: zigi
11 Dab khyoo: jang: sho' yhe: wigi byumyu" yiri ?Zoo: noem joem soin ge'. Ciwim gari: soem" nyid" ein: ri: nanu" gi nanu" Aseing Mangsoo wigi byid: da" mungdain: ri yhe: seing: yu wa shid re" Yodan gyid lang ri gu: dab yhi: wa nghoid ago"? ein: tid ge' ga zi nghoid.
12 Yoshu gi Ruben kung:- Gad kung: yo' Manashe kung: agung da yi" ri
13 ?Nanu" yhoem: moug: khyo" he: mungdain: mo Yodan gyid lang bidthu shoid mougmyid ri nanu" Aseing Mangsoo nanu" ri byid: wa ga: Aseing da" dei zoo: Moshe khasu" tid ziri myid boin: ge'.
14-15 Nanu" yhoem: seing: myhi' yi nanu" zooshang: yi yo' nanu" yhoem: gougnyhoug joem hid: moo: theing: nyid khoo' wa nghoid. Nghoid loug we' nanu" gyizoo: yi gyi zain: jang: shid re" gyi jonu" soin voin ci: boem wigi nanu" Aseing Mangsoo nyangnu" ri byid: to" da" Yodan gyid lang bidvang shoid mougmyid ri nyangnu" yo" seing: yu da" ayo, ju" sho' nyangnu" ri pang" thoug byid: wa shid re" nyangnu" Israela mang: nhung" yi shidvhu" khyoo: gu: dab yhi: goo" wa zi nghoid. Israela byumyu" kung: dangain" ri goem loem ziri nyang: byid: lang" nanu" gi doem tau" lo" lho: Aseing da" dei zoo: Moshe nanu" ri byid: da" Yodan gyid lang bidthu shoid mo he: nanu" nya: mougmyid moo: lo de: nyid ge'? ga: tid.
16 Nyangnu" Yoshu ri ?Nang ngoonu" ri tid bye: gu: ja: khang" moo" ngoonu" koid lho: nang ngoonu" ri nhang: da" khakhyoo: we' ngoonu" yhi: wa.
17 Moshe dang: ri khanham we' ngoonu" tam" gyo: lo ziyo' dakhyo" re" dang: we' ngoonu" tam" gyoo: wa. Re" Aseing Mangsoo Moshe yo' dage" nghoid yhang: ti" nang yo' we' dage" nghoid baja".
18 Re" amyeing" akhang" ri dang: myid: myid: anghoid lang" re" amyeing" dang: daja: ja: ri acang yug hang" nghoid ri we' said pyam zi shau" boem wa. Myid phyed lho: loem jeing" we'? ga: phoug tid boem.