8
1 ?Hau: ayo, moo Yuda mung" mo khokham yi yo' zoug: ludaid yi da" shooyoug: joem khainjung yi da" shooyoug: joem Lapi: yi da" shooyoug: joem Yerusalem moo nyid da" mung" byu gootu: bang: da" shooyoug: joem gi nyangnu" da" loeb mo lab thu yu pyam zi shoug" goo" wa..
2 Koid: zheing" yu wigi myhoeb pyam wa gungthid nyangnu" da" shooyoug: joem gi myidxu: jen" yhang: ti" myidgung moo gyo" jo, wa. Hau: joem gi he: byumyu" yi jheddab wigi dei byid: lo ziyo' nyangnu" boid phyed myid: gyo: wigi no' da" bid zhoo: yoo- lhammoo" zhoo: yoo- kyi: joem bang: da" shidkhoin" myidgung moo gyo" sain" jo, wa.
3 Houg: lho: ashid: lho: nyid deing nyid wigi ngo wigi khaid sain" kaid da" joyoo moo nyid boem da" he: akhyeing" da" byumyu" mo mung" byu yigi xo' lho: nyid wa gungthid- shid: wa loem: je vho: loo goo" wa. Ngoo- Myhang: thang Aseing tid bye:.
4 Aseing gi nya: byumyu" yiri tid kyoo" wa shid re" ngoo ri tid da:. Hau: zigi ?Byu dayug yug leung baid ri nyang: adoem to' loo nghoid da rhe". Byu dayug yug nyang: khyoo: vhang: vhang: ri adoem tau" loo nghoid da rhe".
5 Houg ri nga" da" byumyu" nanu" gi nga" jhang adoem phang: toug" loo loo: za: ciwim yoomo nga" jang" mo phang: loo" nyid go" la". Nanu" gi nanu" da" soolhoo: joem khyoo: nheig dab wigi nga" jhang alheing: tau" loo nghoid ago".
6 Ngoo nyeing" za: tam" gyo: nghoid loug nanu" jo zi atid goo" nghoid da:. Nanu" mo hang" dayug we' nyang: nya: akhyeing" da" nheigloem: shid re" akug- nanu" mo hang" dayug we' ?Ngoo cikoid shoid bye: loug? ga: atid. Yugkhang" moo" gi meing: zain: jang: khyoo: tang" thu yhe: lo" da" myang: yhang: ti" nyang: nya: khyoo: khyoo: xo' yhe: lo" ago".
7 Gyid ngho' leung sheing: joem lang" we' khanham tau" loo" wa ga: da" ayo, ri se' ago". Pheing" kyoug" joem jhen" jang: joem Ngho' hei" joem lang" khanham zug byung: wa ga: ziri se' ago". Nghoid loug we' nga" byumyu" nanu" gi nanu" ri ngoo vhoeb da" tarha" ri asi' nghoid ago".
8 Nanu" gi phajhi" se' ein: ziyo' nga" da" tarha" ri se' ein: khasu" yo" tid goo" wa la". Yu" yu" ge'. tarha" ri adeingmain" da" jhoem: lhid" bang: wigi thid pyam ago".
9 Nanu" da" phajhi' boo bang: gi sho' phu" ago". Nyangnu" gi nheig coid nuyug bue" wigi khyoo: lung" lung" ago". Nyangnu" gi nga" mungdang: ri ngeug pyam ago". Akhid" nyangnu" ce: phajhi' yo" ashi" go" la.
10 Houglho: ngoo gi nyangnu" da" mougmyid joem ri subi" goo" bang: jhang byid: pyam wigi nyangnu" da" yhoem: seing: myhi' yiri we' yuggi gooji bang: jhang byid: pyam wa. Byu gyi: zoo: nge zoo: yi yugkhang" moo" gi adeingmain" khyo" ngei shoo: wa yoem kaid nyid boem. Lapi: yi yo' khainjung yi lang" byumyu" yiri mhoug zo: ago".
11 Nyangnu" gi nga" byumyu" yi da" dam joid joem ri agoin: khyeing" te: yu" ago". Dangain" age ziri dangain" ge ga: nyangnu" tid ago".
12 Nga" byumyu" yi we"- nanu" gi he: aco' ajhoid da" moo" joem ri koid da" gang mo sho' boem go" rhe". Anghoid nanu" gi dajhi' we' asho' nghoid ago". Nanu" gi myonhoo: lang" ase' lung nghoid da:. Houg: lho: nanu" ri ngoo yooboo dam byid: da" uri nanu" gi subi" goo" bang: leung gyoo" lo" yhang: ti" leung gyoo" lo" byug wa. Hau: zigi nanu" da" lo" thang zi nghoid loo wa. Ngoo Aseing tid too" bye:.
13 ?Yoo zei: su: gi nya: shivoo: shiloem joem ri zheing" yu yhang: ti" ngoo gi nga" byumyu" yiri khe: zheing" yu nau. Nghoid loug we' nyangnu" gi zabyid shi" azei: da" zabyid nei- lafoem shi" azei: da" lafoem gam yhang: ti"- afu' lang" nyhau" byug bye: zi yhang: ti" nghoid da:. Houg: yoomo ngoo gi tunggung mo gooji bang: yiri hau: mougmyid ri seing: yu nhang: pyam bye:? ga: tid da:.
14 Mangso byu yi myid: zigi ?Ngoonu" ciwim sam: zoo: tam" jo, boem la". Sage'- ngoonu" gi gyidab voomoo" joem khyoo: phang: tang" vang yhe: wigi houg moo yhe: shid: shang. Ngoonu" Aseing Mangsoo gi nyang: ri ngoonu" yooboo shoid boem bye: yoomo ngoonu" ri shid: wa shid re" dang: phyed byid: bye:. Nyang: gi ngoonu" ri myoono, byid: jhug abye:.
15 Ngoonu" gi yug yo ngei pyoo: wa yo' noo gi byid: wa ayo, ri myid lang" nyid nghoid loug we' ce: akyu" aboo nghoid da- hau: gungthid gyoug dain ja: ju" re" da:.
16 Ngoonu" da" gyivoo yigi Dan voomoo" moo re" ju" nyid boem bye:. Ngoonu" gi nyangnu" da" myang: joem nhoo: moid ziri shoug" gyoo: bye:. Nyangnu" da" myang: joem myeing lang" damung" goin" noin" da:. Ngoonu" da" gyivoo joem gi ngoonu" da" mougmyid ri yo' houg: moo bo da" ja: dangain" ri ngoonu" da" voomoo" yo' houg: mo voobyu yi dangain" ri phyo' shoin' pyam wa ga: ju" re" boem abye: go"? ga: tid boem.
17 Aseing gi ?Zid" ge'. Nanu" da" mo, phung: gung khyoo: age mhid" yu da" dug thain: lhangmyu joem ri nhang: kaid wa. Houg: lho: hau: joem gi nanu" ri thei" loo goo" wa? ga: tid da:.
18 Nga" nheig koug khyoo: gi atho' byang" ge pyam.
Ngoo gi nheigloem: no nyid bye:.
19 Tam" gyo: yu" ge'. Damoug: gyab goin" moo nga"
byumyu" yi ngau nyid ziri shoug" gyo.
Aseing gi Ziun moo anyid loo rhe".
Ziun khokham gi houg moo anyid loo la"? ga: ngau nyid.
Aseing nyangnu" khokham gi
?Nanu" gi nanu" da" soolhoo: joem ri no' da" khyoo: yo'
Ci akyu" abo da" nanu" da" tungbau meing: mo yu phara" joem ri goeb pid da" khyo"
Ngoo ri ciwim yoomo nheig yoo nhang: go" la"? ga: phug tid da:.
20 Byumyu" yigi ?Xung" gung lid: lo" byug bye:. Shivoo: yhoem" yo, we' lid: lo" byug bye:.
Nghoid loug we' ngoonu" gi khyoid yu zi ashoug" shi"? ga: nyho: ago".
21 Nga" byumyu" yi khyoeb mhoin' shoug" yoomo
nga" nheigloem: we' gyoeb byug bye:.
Ngoo gi koug ngau nyid ngoo gi nheigloem: thang wigi yhoem: shoin: nyid.
22 Gilead moo macid" ajo, rhe". Houg: moo
macid" sara: voin: anyid goo" rhe"
Houg ri ciwim yoomo nga" byumyu" yiri noo abyang" go" la".