7
1-3 Aseing gi ngoo ri Yuda byumyu" yi yhe: vang noku boem da" Noku Yhoem: Moo" khyam: khoem" khyoo: nhang: kaid da:. Nyang: gi ngoo ri houg: moo yab jo, nhang: wigi myhang: thang Aseing Israela da" Mangso wigi nyangnu" ri tid ca" khyoo: ri tid fu" nhang: da:. Hau: zigi ?Nanu" nyid da" avoid ri thid pyam ge'. houg: lho: nanu" koid da" ziri thid pyam we'. Houg: lang" ngoo nanu" ri hid moo xo' nyid nhang: wa. ?Ngoonu" goem loem ziyoo" bye:- hau: zigi Aseing da" Noku Yhoem: Moo" nghoid- hau: zigi Aseing da" Noku Yhoem: Moo" nghoid. Hau: zigi Aseing da" Noku Yhoem: Moo" nghoid? ga: da" mhoug dang: ri loem" nyid go".
Nanu" nyid da" avoid ri thid pyam ge'. Nanu" koid da" moo" ri theing: pyam ge'. Nanu" nyang: cang" zoem" khau: jang" moo tarha" deingmain" khyo" zoem" ge'. Tungbau byu yi coug" zoo: yi cougmoo" yiri akho: akhang" yu wigi mhau' zo: ziri theing: pyam we'. He: mougmyid moo yooboo ayoo" bang: ri said khyoo: ri theing: pyam ge'. Yu phara" gootu: no' khyoo: ri theing: pyam ge'. Ciwim ga: ri hau: ziri koid zigi nanu" ri phyo' shoin' pyam loo goo" wa. Nanu" akyang thid boem lang" ngoo gi nanu" da" phoug" phyid" yiri apyaid atoo: mo jonu" khyo" byid: to" da" he: mougmyid moo nanu" ri xo' nyid nhang: wa.
Yu" ge'. Nanu" gi mhoug fain" da" dang: joem ri myid loem nyid ago". Nanu" gi khau" zo:- byu said- myi: shoid lang shoid- jham' tang: wigi mhau'- Bala ri xoin" ngei" byid:- nanu" shid phyang" khanham we' ase' lo da" yu phara" joem ri no' ago". 10 Nanu" gi ngoo ngheing" da" he: joem ri koid wigi nga" Noku Yhoem: Moo" moo nga" shidkhoin" moo re" yab boem wigi?Ngoonu" goem loem nyid boem bye:? ga: tid ago". 11 Nga" Noku Yhoem: Moo" gi lhoid zo: da" khyangtoug: yi shid re" goug" wa joyoo ein: jhoo: go" rhe". Nanu" cikoid nyid ziri ngoo shau" myang byid: bye:. 12 Ngoo ri noku wa shid re" xang: shi" joyoo khyo" ngoo khyen: to" da" Shilo khyoo: yhe: wigi nga" byumyu" yi yooboo shoid moo" zoo" yoomo hau: ziri ngoo cikoid to" ziri yhe: yu" ge'. 13 Nanu" gi he: yooboo dangain" ri shoid abye: go". Nanu" ri ngoo alheing: lheing: pug tid nghoid loug nanu" anau tam" gyoo: nghoid ago". Nanu" ri ngoo khe: da" uri nanu" atu" nghoid ago". 14 Houg: lho: Shilo ri ngoo koid kho' yhang: ti" nanu" myid loem nyid da" he: nga" Noku Yhoem: Moo" ri we' koid wa. Shilo ri ngoo koid kho' yhang: ti" nanu" da" phoug" phyid" yi yo' nanu" ri ngoo byid: to" da" he: joyoo moo we' koid wa. 15 Ngoo gi nanu" da" bidnoem seing" cang" Israela ri khaid thu pyam yhang: ti" nanu" ri we' nga" shidkhoin" mo khaid thu pyam wa. Ngoo Aseing tid too" bye:.
16 Aseing tid zigi ?Yeremia we"- hau: byumyu" yi shid re" akyu" amho'- nyangnu" gungthid angau- akyu" we' amho'- ngoo ri amho' nyid Ciwim gari nang ri ngoo tam" gyoo: byid: zi anghoid. 17 Yuda voomoo" joem moo yo' Yerusalem fu" moo" khyoo: joem moo nyangnu" cikoid nyid boem ziri nang amyang rhe". 18 Zooshang: yigi thang" sho: zheing" ago"- yuggi yigi myi: moid ago". Houg: lho: myiyi: yigi nyangnu" wigi Mougkhung: khokham myhi' ga: myheing da" yu phara" myhi' ri shugbyid: wa shid re" zooyho' phoid wa ga: cen: moin" lheig nyid boem. Nyangnu" gi ngoo ri myid noo nhang: wa khyo" gootu: yu phara" joem ri zabyid yhid foid shoin" xoin" ngei" byid: ago". 19 Nghoid loug we' gyeing" nyang:- nyangnu" myid no nhang: zigi ngoo ri nghoid la". Anghoid nyangnu" nyang: dam no yu wigi sho' ze" phu" yu ago". 20 Houg: lho: ngoo- yoem: moo" bo Aseing gi he: Noku Yhoem: Moo" khyoo: nga" gyoug pho" nheig yo: ziri foid shoin" kaid wa. Ngoo gi hau: nheig yo: ziri byumyu" yi yo' gougnyhoug joem adang moo foid shoin" kaid wa. Houg: lho: seiggam joem yo' shivoo: shiloem gam joem adang moo lang" foid shoin" kaid wa. Nga" da" nheig yoo gi hang" wigi we' ayo" said pyam da" myi: yo' du wa.
21 ?Nga" byumyu" yi we"- nanu" gi xoin" dayham" gu: ri phoin: moo bain sho' nghe' ngei" byid: wigi dayham" gu: rigi nanu" zoo: wa akhang" byid: too" bye:. Nghoid loug we' ngoo Aseing tid nau zigi nanu" hau: gu: dangain" nyang: zo: pyam we'. 22 Ngoo gi nanu" da" phoug" phyid" yiri Egutu mo ngoo shu" thu lo uri nghe' ngei" xoin" joem yo' sen: wigi anghoid lang"- gootu: xoin" joem yo' sen: wigi we' ce: amyeing" abyid: too" kho'. 23 Nghoid loug we' ngoo gi nyangnu" Mangsoo bue" wigi nyangnu" gi nga" byumyu" bui" wa shid re" nga" tid dang: tam" gyoo: wa khyo" koem' gi nyangnu" ri ngoo amyeing" byid: too" bye:. Houg: lho: nyangnu" nyid gi yab gi wa shid re" nyangnu" ri ngoo amyeing" byid: to" da" khyo" nyid wa shid re" ngoo tid too" bye:. 24 Nghoid loug we' nyangnu" gi acang atam" gyoo: nghoid ago". Hau: gungthid nyangnu" gi nyangnu" da" nheigloem: thain: ziyo' akhyeing" da" myid wigi nyangnu" ri koid nhang: da" ci ri we' koid lho: nyangnu" gi je ge loo wa gungthid je agi loo dam xo: lo" ago". 25 Nanu" da" phoug" phyid" yi Egutu mo thu lo da" bidnyid mo akhid" nyid" ju" sho' nyang: ngoo gi nanu" jhang nga" dei zoo: Lapi: yiri nhang: kaid byid: bye:. 26 Nghoid loug we' hang" we' atam" gyoo: cishu: we' anhang: nghoid ago". Hau: gungthid- nanu" gi nanu" phoug" phyid" yi tho' je nheigloem: thain: wigi je goemlu too' wa myid bo ago".
27 ?Houg: yoomo Yeremia we"-nang gi nga" byumyu" yiri he: dang: khoin" dangain" ri tid kyoo" ca" loo wa. Nghoid loug we' nyangnu" gi nang ri tam' gyoo: wa anghoid. Nang gi nyangnu" ri khe: wa nghoid loug nyangnu" tu" wa zi anghoid. 28 Nang gi nyangnu" ri nyangnu" byumyu" gi nyangnu" da" Aseing Mangsoo ngoo ri atam" gyoo: nghoid boem ein: da" khyoo: ri tid kyoo" ca" wa anghoid lang" nyangnu" da" yooboo dam mo jhau" yu loo goo" wa ein: tid kyoo" ca" wa. Jhug zug zigi shid: byug bye:. Hau: khyoo: ri hang" atid loo: nghoid da:.
29 Yerusalem mo voobyu yi we"- koug ngau ge'
nanu" xam: ri ko' wigi she: pyam pyam ge'.
Boug gung moo shid: mang yang"- ji thoo: ge'
Ciwim gari ngoo Aseing nheig yo: wigi nga" byumyu" yiri ngeug he: pyam bye:.
30 Yuda byumyu" yigi akhyeing" khyoo: daja: koid abye:. Nyangnu" gi ngoo ngheing" da" soolhoo: joem ri nga" da" Noku Yhoem: Moo" moo to" wigi hau: ziri agyeungshang: bui" nhang: abye:. 31 Hinnom lang: khung" moo Tophed ga: myheing da" phoin: daloem: zhug da:. Hougmoo: nyangnu" gi nyangnu" da" yuggi zoo: myiyi: zoo: yiri nghe' ngei" da:. Ngoo gi nyangnu" ri hau: zi akoid nhang:. Hau: zigi nga" nheigloem: moo: boo lang" aboo. 32 Houg: lho: hau: ziri Tophed ga: we' amyheing. Hinnom lang: khung" ga: we' amyheing loo: byu said lang: khung" ga: myheing da" ayo, ju" lo wa. Nyangnu" gi gootu: kha: joyoo moo we' byumang myhoeb wa joyoo ajo, yoomo hau: joyoo moo byu mang myhoeb loo goo" wa. 33 Byu mang joem gi ngho' joem yo' siyoo gougnyhoug joem shid re" zoo: noem bue" lho: hau: joem ri khaid pyam wa byu hang" anyid goo" wa. 34 Hau: mougmyid gi dain" pyoid yoo bue" jo, wa Yuda voomoo" joem akhoug: moo yo' Yerusalem mo fu" mo" khyoo: joem mo gau yi thui:- ngei pyo: thui: yo' lo, xo' pui" joem mo thui: joem ri thang lo" byug nhang: wa.