5
Yerusalem voobyu yi we"- nanu" fu" moo" khyoo: cang wigi tang" phang: ge'.
Aqei: ayam khyoo: lheing: yu" kaid ge'. Nanu" nyang: yu" myang yu ge'.
Kid" oung? jang: cang yu" yu ge'.
Jo zi koid wigi Mangsoo ri jhug zug wa yoem: kaid zi dayug rilang" shau" myang go" la".
Nanu" shau" myang nghoid rigi Aseing gi Yerusalem ri yooboo khyoid byid: wa.
Nanu" gi Aseing ri noku ga: phau: tid fu" nghoid loug we'
Nanu" tid ziyo' koid zigi azhung" nghoid ago".
Gyeing" nyang: Aseing gi jhug zug ziri sho: da:.
Nyang: gi nanu" ri baid da:. Nghoid loug we' nanu" gi ci: atam" gyoo: nghoid da:.
Nyang: gi nanu" ri phyo' pyam da:. Nghoid loug we' nanu" jhau" yu wa he: ngeug pyam ago".
Nanu" gi nheigloem: thain: wigi nanu" da" yooboo joem mo anau lheing: phoug loo nghoid ago".
Houg: lang" ngoo hid su" shau" myid- ?Hid bang: gi myung bang: yo' ci: asi' bang: za: danghoid.
Nyangnu" gi nheig agyeing: khyo" koid ago".
Nyangnu" gi nyangnu" Mangsoo cimho' ziri asi' nghoid ago".
Nyangnu" ri Aseing koid nhang: nau khyoo: ri asi' goo" nghoid da:.
Ngoo gi yoem: so' gyi: da" byumyu" yi jhang yhe: wigi nyangnu" yo' yhe: ji goo" wa.
Gyeing" nyang: nyangnu" gi nyangnu" da" Mangsoo mho' khyoo: ri se' da:.
Aseing wigi nyangnu" ri koid nhang: nau ziri se' ago"? ein: shau" myid.
Nghoid loug we' nyangnu" dangain" Aseing da" akhang" amyeing" akhang" ri ngeug he: pyam lho:
nyang: ri anoug tam" gyo: cang yhi: nghoid ago".
Hougsu" yoomo siyoo mo khangkhyi gi nyangnu" ri said pyam loo wa.
Dain pyoid yoo mo zeigni joem gi nyangnu" ri adu du ngaid phyed ceig pyam loo wa.
Houg: lho: zooloo: joem gi nyangnu" da" voogung joem moo shoo: zo: lam" yen" loo goo" wa.
Hau: byumyu" yi so" thu lo" nghoid rigi nyangnu" agang gang lang: khyam" pyam zi shoug" wa.
Ciwim gari nyangnu" da" yooboo joem gi sung myo: wigi
Dalheing: thang: dalheing: nyangnu" gi Mangsoo mo lheing: thu lo" ago".
Aseing myid: zigi ?Ngoo gi ciwim nga" byumyu" yi da" yooboo joem ri khyoid byid: boem wa la".
Nyangnu" gi ngoo ri she: pyam too" kho' lho: Mangso gyeing" anghoid da" yu phara" joem ri no' abye: go".
Ngoo gi nga" byumyu" yiri nyangnu" gyi: sho' byid: zhoo" byid: jhug bye:.
Nghoid loug we' nyangnu" gi myi: shoid lang shoid wigi
Nyangnu" da" ayo, akhyeing: ri shava myhi' yi yo' nyid pyam da:.
Nyangnu" gi gyi: gyi: bug bug zho" xu: to" da" myang: loo joem yo' du wigi
yugkhang" moo" gi nyang: nya: yhoem: kyoo" cang" mo yhoem: seing: myhi' yiri yu" shoid ago".
Ngoo gi he: moo" joem gang mo nyangnu" ri yooboo dam age byid: rhe".
Hid yhang: te" da" byumyu" yiri latoo: phug wa a eung: rhe".
10 Ngoo gi gyivoo yiri nhang: kaid wigi nga" byumyu" yi da" zabyid yoo joem ri zain: pyam nhang: wa.
Nghoid loug we' nyangnu" ri bain sho' gi aphyo' shoin' nhang: wa.
Ngoo gi nyangnu" ri akung: joem cu: pyam wa shid re" tid wa.
Ciwim gari hau: akung: joem gi nga" re" anghoid nghoid da:.
11 Israela yo' Yuda byumyu" yigi ngoo ri bain sho' ab abye: go".
Ngoo Aseing tid too" bye:?.
12 Aseing da" byumyu" yigi nyang: ri ngeug pyam lho: tid boem zigi ?Nyang: gi gyeing" ci: we' akoid wa. Ngoonu" gi yau: khi" da" ayo, shoug" wa anghoid- ngoonu" gi meing: zain: ziri we' phang" khoug khoug ziri we' shoug" wa anghoid? ga: tid abye: go". 13-14 Nyangnu" tid zigi Lapi: yigi ci gyeing" anghoid nghoid da:. Lid thung: za: danghoid ago". Houg: lho: nyangnu" moo Aseing mo ce: lu dang: we' ayoo" nghoid ago"? ga: tid boem bye:. Myhang: thang Aseing Mangsoo ngoo ri ?Yeremia we"- He: byumyu" yigi houg yhang: te" dang: joem ri tid boem yoomo ngoo gi nga" dang: khoin" joem ri re" nhoid moo myi: yhang: ti" bui" nhang: wa. Hau: byumyu" yigi thang" yo' du wigi myi: gi nyangnu" ri nge" pyam wa? ga: tid.
15 Israela byumyu" yi we"- Aseing gi nanu" ri khaid zain: wa shid re" moug: vi: mo byu damyu" ri shu" lo loo wa. Hau: byumyu" gi yoem: bo wigi nyangnu" myeing" ri nanu" ase' gyo: da" goonham' mo byumyu" damyu" nghoid ago". 16 Nyangnu" da" lid: ci: bang: gi nheig akhyeug loo: byu said da" yoem: moo" bo gyizoo: yi nghoid ago". 17 Nyangnu" gi nanu" da" shivoo: shiloem joem yo' zoo: noem joem ri lhoid zo: pyam loo goo" wa. Nyangnu" gi nanu" da" yuggi zoo: myiyi: zoo: yiri said pyam loo goo" wa. Nyangnu" gi nanu" da" coid kyung yang kyung yo' nu: kyung joem ri said pyam wigi nanu" da" zabyid nei joem yo' lafoem' gam joem ri phyo' shoin' pyam byid: goo" wa. Nanu" loem khau: nyid da" gyidab voomoo" joem gi nyangnu" gyidab wigi phyo' shoin' pyam zi shau" boem wa.
18 Aseing tid zigi ?Hau: bidnyid moo lang" ngoo gi nga" byumyu" yiri bain sho' aphyo' shoin' pyam wa. 19 Yeremia we"- ngoo ciwim yoomo he: gu: ri koid loug la'- ga: nyangnu" myid: lo boem ri nyangnu" ri hid su" ein: tid kyoo" we'. Nyangnu" ngoo mo phang: lo" wigi nyangnu" nya: moug: moo tungbau yu phara" joem ri dei byid: yhang: ti" nyangnu" gi nyangnu" nya: moug: anghoid jang" mo being" voo yiri dei byid: ca" goo" wa ein: tid kyoo" wa? ga: tid da:.
20 Aseing tid zigi ?Yaku da" amyed ashen yiri tid kyoo" ge'. Yuda byumyu" yiri tid kyoo" we'. 21 Myojid" dab loug amyang- nukhyab dab loug ashau" gyo: da" nheig agyeing: ko" da" byumyu" yi nanu" we"- goolhoo' tam" gyoo: we'.. 22 Ngoo gi Aseing nghoid. Nanu" gi ngoo ri ciwim agyug go" la". Nga" shidkhoin" moo ciwim yoomo nanu" ko' ko' anain" boem la". Ngoo gi panglai: da" mougkyoo" khyo" midcoo: doem: ri to" too" byid: bye:. Hau: ziri ayo" ge lid: phyid yhe: da" apyaid atoo: moo geing: teing bye: mougkyoo" nghoid da:. Panglai: gyid boug joem to' ri too' wa nghoid loug we' hau: zigi hau: mougkyoo" mo ayo" lid: nghoid da:. Being: lhung" joem myeing ri myeing wa nghoid loug we' hau: joem gi ayo" lid: phyed goo" wa. 23 Nghoid loug we' byu nanu" we"- nanu" gi nheigloem: thain: wigi goemlu too' wa myid bo ago". Nanu" gi khyoo: thung vang wigi ngoo ri too" kho' ago". 24 Nanu" gi ngo wigi nanu" shid re" byang gain lid jhen" moug: yo' xung" thu yid ri moug: voo nhang: wigi zain khang" moo" shivoo yhoem" yo, ri byid: nghoid loug we' ngoo ri ngi: shab wa ga: khanham we' amyed nghoid ago". 25 Hau: gungthid nanu" da" yooboo joem wigi he: ge khyoo: joem ri toem' pyam byid: ago".
26 Akhyeing" da" byu yigi nga" byumyu" yi phung: gung moo bo nyid boem ago". Nyangnu" gi ngho' joem ri kuang wa shid re" nyangnu" goin ri myu" too" bang: yhang: ti" gau" lhoem: nyid ago". Nghoid loug we' nyangnu" gi byu yiri kuang yu wa shid re" nyangnu" da" lhid: joem ri thoung: to" ago". 27 Shoo" khaid su: gi nya: da" gyoin: khoug: moo ngho' joem byeung" sho' kaid ci: yhang: ti"- nyangnu" gi nyangnu" yhoem: joem khoug: moo lanyhoeb byeung" sho' kaid to" ago". Houg: yoomo nyangnu" gi yoem: so' bo lho: jonu" yo" ago". 28 Nyangnu" gi lid: sho' xu: wigi zooshug goolhoo: shau" zo: ago". Nyangnu" da" akhyeing" moo" joem gi thang ga: zi ajo, nghoid ago". Nyangnu" gi coug" zoo: nu" yiri nyangnu" akho: akhang" ri abyid: lho: doin: zeig zoo: shoug" bang: ri tarha" deingmain" zi ayo" byid: nghoid da:.
29 Nghoid loug we' ngoo Aseing gi hid: joem shid re" nyangnu" ri yooboo dam byid: wa. Ngoo gi he: byumyu" ri latoo: phug wa. 30 Hau: mougmyid moo gye gyoug pho" ziyo' dain mau" pho" joem bue" loo bye:. 31 Lapi: yigi mhoug dang: za: tid thu ago". Khainjung yigi Lapi: yi amyeing" byid: da" khyo" vhoeb ago". Houg: lho: nga" byumyu" yigi ci: dakhoin" we' angeug nghoid da:. Nghoid loug we' he: gu: dangain" lo" thang bain byug ri nyangnu" cikoid loo goo" wa la".