44
1 Aseing gi Egutu mung" mo Migdola- Taphan- Memphi voomoo" joem yo' mungdain: da" mougpyi: shoid moo nyid boem da" Israela byu yi dangain" yo' sen: wigi ngoo ri dang: ji da:.
2 Myhang: thang Aseing Israela da" Mangsoo tid zigi ?Yerusalem yo' Yuda mung" mo gootu: voomoo" joem dangain" dang moo ngo wigi bui" nhang: da" phyo' shoin' pyam ziri nanu nyang: myang gu nghoid bye:. Akhid" ju" sho' lang" byo, yoin" jo, wigi hang" dayug we' hau: joyoo moo anyid loo: nghoid ago".
3 Ciwim gari houg: mo byu yigi akhyeing" da" lo, moo" koid ziyo' ngoo ri nheig yoo: nhang: ago". Gootu: yu phara" joem ri nyangnu" xoin" ngei" byid: wigi nyangnu" we' nang we' re" phoug" phyid" yi we' ano' yu" da" yu phara" joem ri dei byid: ago".
4 Ngoo ngheing" da" he: gyoug dain tung" da" moo" ri akoid wa shid re" nanu" ri tid kyo" da" nga" dei zoo: Lapi: yiri nanu" jhang ngoo xo' wigi nhang: kaid byid: bye:.
5 Nghoid loug we' nanu" anau gyoo:- dajhi' we' atam" gyoo: nghoid ago". Gootu: yu phara" joem ri xoin" ngei" byid: da" akhyeing" lo, moo" ri nanu" anau to" pyam nghoid ago".
6 Houg: yoomo nga" da" nheig yo:- nheig joem: yo: ziri Yuda mung" voogung joem moo yo' Yerusalem khyoo: joem moo foid shoin" khyo' kaid wigi hau: voogung joem ri ngoo myi: nghe' pyam wa. Hau: joem gi akhid" nyid" bue" jo, ziyo' dayhang: ti"- byo, yoin" jo, lho: nyangnu" da" myo, shid ti: moo yu" gyoug yu" dain sho' zi bue" loo bye:.
7 ?Houg: yoomo Ngoo myhang: thang Aseing Israela da" Mangsoo gi nanu" nya: gung ri houg: yhang: ti" akhyeing" zi ciwim koid nyid ago" ein: akhid" ngoo myid: da:. Nanu" da" mung" byu yi dayug we' adeing loo sho' yuggi yi myiyi: yi zooshang: yi zoonu" yi adang moo byo, yoin" zi bui" nhang: nau go" rhe".
8 Nanu" re" ju" nyid boem da" he: Egutu mung" moo yu phara" soolhoo: joem ri no' byid: da" khyo" we' gootu: soolhoo: ri xoin" ngei" byid: da" khyo" wigi we' nanu" ngoo ri ciwim nheig yoo: nhang: go" la". Mougmyid dang moo nyid boem da" byumyu" khang" moo" nanu" ri yi juang" pyam wa yo' nanu" myeing ri nheing" khoin" khyo" ci: boem shang ein: nanu" gung ri phyo' shoin' pyam wa shid re" he: ziri nanu" koid nyid boem go" rhe".
9 Nanu" da" phoug" phyid" yi wigi we' Yuda khokham yi yo' nyangnu" da" yhoem: seing: myhi' yi wigi we' nanu" yo' nanu" da" yhoem: seing: myhi' yi wigi we' Yuda mung" voomoo" joem moo yo' Yerusalem khyoo: joem moo koid da" akhyeing" moo" joem ri nanu" dangain" ri to" myhid pyam bye: go" rhe".
10 Nghoid loug we' akhid" nyid" ju" sho' nanu" gung ri nheigloem: anyhoem: khyoo' nghoid ago". Nanu" ngoo ri ngi: ashab byid:. Nanu" yo' nanu" da" phoug" phyid" yiri ngo wigi byid: to" da" tarha" joem dangain" ri cang wigi kangso' adei goo" nghoid da:.
11 Houg: yoomo ngoo myhang: thang Aseing Israela Mangsoo gi nanu" ri gyi koid wigi Yuda mung" dangain" ziri phyo' shoin' pyam wa.
12 Yuda mung" mo thu lo" da" Yuda byu yi yo' Egutu mung" khyoo: yhe: nyid wa myid phyed boem da" bang: koem' gi dangain" bang: phyo' shoin' pyam shau" boem goo" wa. Gyi: zoo: nge zoo: nyangnu" dangain" gi gyipui" anghoid lang" zooyoid ziyo' Egutu moo shid: byug goo" wa. Nyangnu" da" myo, shid ti: moo yu" gyoug yu" lhung: sho' da" zi bue" loo wa. Byu joem gi nyangnu" ri juang" yi pyam lho: nyangnu" myeing ri nheing" khoin" khyo" ci: loo goo" wa.
13 Yerusalem ri ngoo yooboo dam byid: yhang: ti" Egutu mung" moo nyid bang: ri ngoo gyipui"- zooyoid- noo bue" ziyo' yooboo dam byid: wa.
14 Yuda mung" moo nyid deing bang: yo' Egutu mung" khyoo: yhe: ju" nyid boem da" Yuda byu yi mo dayug we' aphang: loid- anyid deing wa. Nyangnu" doem nyid nau da" Yuda mung" khyoo: nyangnu" mo dayug we' ayo" tau" loo goo" wa. Phang: khau: nyid da" byu dajhi' mo jain" wigi hang" we' ashau" tau" loo goo" wa? ga: tid da:.
15 Hau: thang: Yuggi dangain" gi nyangnu" da" yhoem: seing: myhi' yigi gootu: yu phara" joem ri xoin" ngei" byid: lo da" khyoo: ri se' loo goo" wa. Houg: lho: houg: moo yab jo, da" myiyi: yi Egutu mung" mougpyi: shoid moo nyid da" Israela byu yi byu phung: moo: bo wigi nyangnu" dangain" bang: gi ngoo ri
16 ?Aseing myeing mo nang wigi ngoonu" ri tid to" da" khyoo: ri tam" gyoo: wa ngoonu" he: pyam boem bye:.
17 Ngoonu" koid wa ein: tid to" da" ja: khang" moo" ri ngoonu" koid wa. Ngoonu" yo' ngoonu" phoug" phyid" yi ngoonu" khokham yi yo' vhujhung: yi Yuda voomoo" joem moo yo' Yerusalem fu" moo" khyoo: moo ngoonu" lhung koid lo ziyo' dayhang: ti"- ngoonu" da" yu phara" myhi' joem mougkhung: moo khokham myhi' joem ri ngoonu" xoin" ngei" byid: wigi nyang: ri zabyid yhid: foid shoin" byid: wa. Houg: lang" ngoonu" gi zoo: noem agoin agoo" yo" wigi nyid de lho: yau: khi" ashau" wa.
18 Nghoid loug we' mougkhung: mo khokham myhi' ri xoin" ngei" byid: ziyo' nyang: ri zabyid yhid: foid ngei" byid: ziri ngoonu" theing: pyam bye:. Hau: ayo, mo ngoonu" ciwe' ayoo" loo: wigi ngoonu" byu yigi gyipui" yo' zooyoid jang" moo shid: abye: go"? ga: tid.
19 Hau: thang: myiyi: yigi ?Mougkhung: mo khokham myhi' gung du: soolhoo: zooyho' koid wigi nyang: ri ngei" byid: lho: zabyid yhid: ngoonu" foid ngei" byid: uri ngoonu" koid nyid ziri ngoonu" da" yhoem: seing: phoo yi myid veing" byid: ago? ga: bo tid ago".
20 Houg: lang" ngoo ri hid: su" tu" da" yuggi myiyi: dangain" bang: ri ngoo tid zigi
21 ?Nanu" yo' nanu" phoug" phyid" yi nanu" da" khokham yi nanu" da" vhujhung: yi mungdain: byu yigi Yuda mung" mo voogung joem moo yo' Yerusalem fu" moo" khyoo: moo ngei" byid: boem da" xoin" joem khyoo: ri Aseing asi' nghoid da:. Anghoid lang" to" myhid pyam bye: da ein: nanu" jhoo: go" rhe".
22 Akhid" nyid" ju" sho' nanu" da" mougmyid gi byo, yoin" jo, lho: houg: moo hang" we' anyid nghoid ago". Hau: zigi yu" gyoug yu" lhung: khyoo: bue" lo wigi nanu" da" akhyeing" ziyo' akhyeing" da" lo, moo" joem ri Aseing gi ayo" zeing: shang" byid: loo yoomo byu yigi nanu" myeing ri nheing" khoin" khyo" ci: loo goo" wa.
23 He: akhid" bue" nyid da" yau: khe" kyi" khyeug gi gootu: yu phara" joem ri nanu" xoin" ngei" byid: lho: nya: amyeing" dang: joem dangain" ri atam" gyoo: khyo" Aseing ri thougtheung yooboo shoid boem bye: yoomo nanu" dang moo ju" re" zi nghoid da? ga: tid bye:.
24-25 Myhang: thang Aseing Israela Mangsoo gi Egutu mung" moo nyid nyid boem da" Yuda byumyu" yiri tid nyid da" dang: ri byu dangain" ri je wigi myiyi: yiri ngoo tid zigi ?Nanu" yo' nanu" yhoem: seing: myhi' yigi mougkhung: khokham myhi' ri geing: teing dangsoo" byid: to" abye: go". Nyang: ri nanu" xoin" ngei" byid:- zabyid yhid: foid ngei" byid: wa ga: dangsoo" byid: abye:. Houg: lho: nanu" da" dangsoo" ri tam" gyo: cang yhe: ago". Gye" gi bye:. Nanu" da" dangsoo" ri tam" gyo: cang yhe: we'. Nanu" da" thang" cab ri zei: pyeing we'.
26 Nghoid loug we' Egutu mung" mo Israela byu yi dangain" ri ngoo Aseing wigi myhang: thang da" nga" myeing moo thang" cab to" ziri akhid" tam" gyoo: ge'. ?Kangso' dei nyid gyi: sheung: thang Aseing khyo" ngoo jham' tang:? ga: tid wigi thang" cab koid wa shid re" nga" myeing ri hang" dayug ri we' khanham we' adoem ci: nhang: wa.
27 Nanu" nyid gi yab agi wa ziyo' phyo' shoin' pyam shoug" wa. Nanu" mo dangain" bang: gi dayug we' adeing loosho' gyipui" moo anghoid lang" noo bue" ziyo' shid: loo" goo" wa.
28 Nghoid loug we' nanu" mo dayham" gi shid: jang" mo phang: loid wigi Egutu mo zi Yuda mung" khyoo: tau" lo boem goo" wa. Houg: lang" nyid deing bang: gi nga" dang: anghoid lang" nyangnu" dang:- khayug dang: joeb byeung" re" ziri se' loo goo" wa.
29 He: joyoo moo nanu" ri ngoo yooboo dam byid: wa ziyo' nanu" dang moo bui" nhang: wa ein: ngoo dangsoo" byid: to" da" byo, yoin" zi joeb byeung" ri" wa nghoid ziri Aseing ngoo gi nanu" ri sagse: ci: shug byid: wa.
30 Yuda khokham Zedekia ri nya: gyivoo nghoid wigi nyang: ri said pyam nau da" Babelon khokham Nebukhadneza lo, moo ab byid: pyam ziyo' dakhyoo" ti"- Egutu khokham Hophra ri we' nyang: ri said pyam nau da" nya: gyivoo yi lo, moo ngoo ab byid: pyam wa? ein: tid bye:.