40
Gyizoug: moo" Nebuzaradan wigi Rama moo ngoo ri nhang: kaid byid: thang: ri Aseing gi ngoo ri dang: ji da:. Ngoo gi thung: byu yhi khyo" Babelon khyoo: shu" loo" shau" da" Yerusalem yo' Yuda mo byu gootu: yi yo' dage" jangcoo" wigi tei" she: lo" zi shau" da:.
Amyeing" byid: nyid zoug: moo" gi ngoo ri gootu: sain' shu" yu wigi ?Re" da" Aseing Mangsoo gi he: mungdain: ri phyo' shoin' wigi kyug nhain lho: Nyang: koid wa ga: tid to" zi akhid" bui" loo bye:. Re" byumyu" yigi Aseing ri yooboo shoid wigi nya: da" tid dang: agyoo: yoomo he: gu: dangain" bue" zi nghoid da:. Akhid" ngoo gi re" lo, youg: mo jangcoo" ri khyoid pyam byid: lho: nang ri nhang: kaid wa. Nang ngoo yo' dage" Babelon khyoo: cang nau nghoid rigi cang we' nang ri ngoo goin coung: byid: wa. Nghoid loug we' nang ayhi: nau nghoid rigi ayhi: ja". Mungdain: goin" mo nang vho: zi khyen: yu wigi yo" lo" da? ga: tid da:.
Ngoo ci: aphug tid lang" Nebuzaradan tid zigi ?Shaphan da" nya: myid:- Ahikam da" nya: yuggi zoo: Gedalia jhang tau" loo" we'. Nyang: ri Babelon khokham wigi Yuda voomoo" joem da" mung" zoug: koid nhang: too" su: nghoid. Nang gi nyang: yo' dage" byumyu" mo, phung: gung moo nyid we'. Anghoid lang" nang yhi: noug da" joyoo khyi' khang" moo" khyoo: yo" yhe: da:? ga: tid. Hau: thang: nyang: gi ngoo ri jhungshug yo' zoo: noem dajhi' byid: wigi ngoo ri nhang: kaid da:. Ngoo gi Mizpa mo Gedalia yo' dage" hau: mungdain: moo nyid deing jo, boem da" byumyu" yi phung: moo nyid wa shid re" yhe: loo" bye:.
(2kh 25:22-24)
Yuda mung" mo gyizoug: yi yo' gyizoo: yi dayham" gi lo, atu: boem nghoid da:. Babelon khokham gi Gedalia ri mungdain: da" mung" zoug: koid nhang: wigi Babelon khyoo: ashu" lo" da" mungdain: mo myung thang bang: dangain" da" vhujhung: khyo" koid nhang: da" khyoo: ri shau" gyo: ago". Houg: yoomo Nethania da" yuggi zoo: Ishmaela- Karea da" yuggi zoo: Yohanan- Tanhumet da" yuggi zoo: Seraia- Netopha mo Ephai da" yuggi- zoo: yi Makha mo Yezania bang: gi nyangnu" byu yi yo' dage" Mizpa moo nyid da" Gedalia jhang yhe: lo" ago". Gedalia nyangnu" ri ?Babelon byu yiri lo, tu: wa nanu" gyoug aca" ein: ziri nanu" ri ngoo dang: byid:. He: mungdain: moo tam: nyid ge'. Babelon khokham dangain" ri dei byid: ge'. Nanu" gi gi za: nghoid goo" wa. 10 Ngoo we' Mizpa moo nyid nyid wigi Babelon byu yi hid: khyoo: ju" re" boem lang" nanu" da" gungthid bui" wa. Nghoid loug we' nanu" gi zabyid yhid:- shi"- zhainloin: xu: ri zheing" yu wigi yo" young: to" wa. Houg: lho: nanu" seing: to" da" voomoo" joem moo nyid ge'? ga: tid da:. 11 Hau: uri Moba- Amon- Edom yo' gooji mungdain: moo nyid boem da" Israela byu dangain" bang: gi Babelon khokham wigi Israela byu yiri Yuda mung" moo nyid nhang: lho: Gadelia ri nyangnu" da" mung" zoug: koid nhang: da" khyoo: ri shau" gyo: ago". 12 Houg: yoomo nyangnu" nyid byo yen" da" joyoo mo thoid lo wigi Yuda mung" khyoo: doem tau" lo ago". Nyangnu" Mizpa khyoo: Gedalia jhang ju" re" wigi nyangnu" houg: moo zabyid yhid: yo' shi" myoo" sho' zheing" boem to" ago".
(2kh 25:25-26)
13 Hau: thang: Yohanan yo' gyizoo: yi da" vhujhung: yi lo, atu: asoem" abyid: bang: gi Mizpa: khyoo: Gedalia jhang re" lo wigi 14 Nyang: ri ?Amon khokham Bali gi nang ri said pyam wa shid re" Ishamaela ri nhang: kaid ziri nang asi' rhe" ga: tid. Nghoid loug we' Gedalia gi hau: ziri aloem" nghoid da:. 15 Hau: thang: Yohanan gi nyang: ri kyeing" za: ?Ishmaela ri yhe: said wa shid re" ngoo ri akhang" byid: la. Hang" wigi said ein: ziri hang" asi' wa. Ciwim nang ri nyang: wigi said pyam nhang: wa la". Hau: zigi re" aqei: ayam moo nyid da" Yuda byu dangain" ri phang: sain" loo" nhang: wa. Houg: lho: hau: zigi Yuda mung" moo nyid da" byu dangain" dang moo yau: khe" kyi" khyeug zi bui" nhang: wa? ga: tid da:.
16 Nghoid loug we' Gedalia gi ?Hougsu" akoid- Ishmaela yo' sen: wigi nang tid nyid zigi ajoo nghoid da? ga: phug tid.