33
1 Khokham vang khoug: moo ngoo thung: loung" nyid shi" uri Aseing da" mungdang: nga" jhang doem ju" re" da:.
2 Myid gung ri phain" so: to" da" Aseing- hau: ziri azuang koid wigi nya: joyoo moo to" too" su: gi ngoo ri dang: ji da:. Nya: myeing Aseing ga: su: tid zigi
3 ?Ngoo ri khi: we' nang ri ngoo tu" byid: wa. Nang ci: ase' da" mau" pho" ziyo' mau" pho" moo" zoo" yo' sen: da" khyoo: ri ngoo tid khyoo" wa.
4 Ngoo Israela da" Aseing Mangsoo gi vang: ci: ziyo' gyi khaid da" khyo" Yerusalem mo yhoem: joem yo' Yuda khokham kho" phyo' khyo' pyam zi shau" loo wa.
5 Byu dayham" gi Babelon byu yiri gyi koid wigi khaid zain: loo goo" wa. Houg bang: gi yhoem: joem moo ngoo nheig joem: yo: wigi ngo wigi said khyo' pyam wa nghoid bang: da" manggung joem yo' byeung" sho' koid loo goo" wa. Byumyu" yi koid boem da" akhyeing" da" moo" zoo" joem gang mo he: voomoo" moo ngoo phug lo" byug bye:.
6 Nghoid loug we' he: voomoo" ri yo' hau: da" voobyu yiri byang" byid: wigi nyangnu" ri doem yang" zain: loo nhang: wa. Ngoo gi nyangnu" ri agoin agoo" ngei pyo: yug yo ziyo' goem loem khyoo: ci: shug byid: wa.
7 Ngoo gi Yuda yo' Israela ri nyid gi yab gi nhang: wa. Nyangnu" shid phyang" nghoid lo boem yhang: ti" ngoo nyangnu" ri doem tu: to' byid: wa.
8 Nyangnu" ngoo ri gyi koid wigi shoid loo bye: da" yooboo joem mo nyangnu" ri ngoo kyeing sain' pyam byid: wa. Nyangnu" yooboo joem ri yo' nyangnu" goemlu to' da" khyoo: ri ngoo yooboo khyoid byid: wa.
9 Yerusalem gi ngei bu khyoo:- ngi: shab khyoo:- nga" gang mo phau: khyoo: joem da" ajhung: bue" loo wa. Mougmyid dang moo nyid boem da" byumyu" khang" moo" gi Yerusalem byu yi shid re" ngoo koid byid: da" ge da" moo" zoo" joem yo' ngo wigi voomoo" ri nyid gi yab gi nhang: da" khyoo: joem yo' sen: wigi nyangnu" shoug" gyoo: lang" gyoug wigi ko' ko' nain" loo goo" wa? ga: tid da:.
10 Aseing tid zigi ?He: joyoo gi byu yi we' gougnyhoug we' anyid da" dain" pyoid yoo yo' du da: ga: tid nyid ago". Houg: lho: nyangnu" tid zi jo da:. Yuda mung" mo voomoo" joem yo' Yerusalem mo khyoo: joem gi akoem: nghoid da:. Byu yo' gougnyhoug joem houg moo anyid nghoid da:. Nghoid loug we' he: joyoo joem moo gi
11 Ngei pyo: wigi nyho: da" thui:- lo, xo' pui" moo pyo: da" thui: joem ri nanu" doem shoug" gyoo: loo goo" wa. Byumyu" yi nga" Noku Yhoem: Moo" khyoo: jeju" boin: xoin" ci: re" boem uri nyangnu" jikhoin" khoin" boem da" ziri nanu" shau" gyo: loo goo" wa. Nyangnu" gi ?Myhang: thang Aseing ri jeju" coung" ge'.
Ciwim gari: nyang: gi ge wigi
nya: jheddab myid gi apyaid atoo: nghoid da? ga: tid boem.
Ngoo gi he: mungdain: ri shid phyang" nyid gi yab ge yhi' nyid gi yab gi sho' koid wa. Ngoo Aseing tid too" bye:? ga: tid da:.
12 Myhang: thang Aseing tid zigi ?Dain" pyoid yoo yo' dayhang: ti" nghoid wigi byu yo' gougnyhoug joem we' anyid da" he: mungdain: moo yang zung" bang: nyangnu" yang joem ri yo" shu" yhe: da" coung" yoo dalheing: doem bue" loo wa.
13 Boug gung mo voogung joem mo boem khyid: joem moo Yuda mougpyi:- shoid moo Benyamin mougmyid moo Yerusalem aqei: ayam voogung joem moo Yuda voogung joem moo yang zung" bang: gi nyangnu" yang joem ri dalheing: doem nghab loo wa. Ngoo Aseing tid too" bye:? ga: tid da:.
14 Aseing tid zigi ?Israela byu yi yo' Yuda byu yiri ngoo byid: to" da" dangsoo" joem ri ngoo zei: pyeing byid: wa da" ayo, ju" lo nyid da:.
15 Hau: ayo, moo deungmain" da" David amyed ashen dayug ri khokham khyo" ngoo khyen: yu wa. Hau: khokham phoo gi jo ziyo' tarha" deing byeung" da" moo" ri mungdain: goem: sho' moo koid loo wa.
16 Yuda byu yi yo' Yerusalem byu yigi khyoid yu zi shau" wigi goem loem tung" za: shoug" nyid loo goo" wa. Voogung ri ?Ngoonu" ri khyoid yu da" Aseing? ga: myheing loo goo" wa.
17 David da" amyed ashen dayug gi khanham we' Israela da" khokham koid loo wa yo'
18 ngoo ri dei byid: wa shid re" yo' nghe' ngei" xoin" joem shivoo: xoin" joem to' byid: xoin" joem ri ngei" byid: wa shid re" Levi kung: mo khainjung dayug khanham we' nyid loo wa ein: ziri ngoo Aseing dangsoo" byid: to" bye:? ga: tid.
19 Aseing ngoo ri
20 ?Khanham we' du eung: da" ayo, moo ju" re" boem wa shid re" ngoo gi myen" ri nyid" ri dang: theing koid too" bye:. Hau: dang: theing gi khanham we' age byo, yoin" loo" nghoid da:.
21 Houg yo' dayhang: ti" ngoo gi khanham we' amyed ashen dayug khokham bui" wa ein: da" khyoo: ri nga" dei zoo: David yo' dang: theing koid too" bye:. Houg: lho: nyangnu" ngoo ri khanham we' dei byid: wa ein: ziri Levi kung: mo khainjung yi yo' ngoo dang: theing koid too" bye:. Hau: dang: theing joem gi khanham we' age byo, yoin" wa.
22 Nga" dei zoo: David da" amyed ashen yi yo' Levi kung: mo khainjung yigi myo: je: loo goo" wa. Houg: lang" mougkhung: mo kyi: joem ri yo' panglai: gyid yam mo midcoo: cab ri ayo" tho' nghab loo sho' myo: yhang: ti" myo: loo goo" wa? ga: tid da:.
23 Aseing ngoo ri
24 ?Ngoo khyen: to" da" yhoemkhung: eig loem: nghoid da" Yuda yo' Israela ri ngo wigi ngeug he: pyam da" khyoo: yoomo byu yi khasu" tid nyid boem ziri nang yu" xoem" bye: la". Houg: yoomo nyangnu" gi nga" byumyu" dang moo yu" juang" yu" yi ago". Nyangnu" ri byumyu" damyu" nghoid ga: ajhoo: loo: nghoid ago".
25 Nghoid loug we' ngoo Aseing gi myen" ri nyid" ri dang: theing yo" to" wigi myidgung yo' mougkhung: ri khang" da" tarha" joem ri ngoo koid too" bye:.
26 Ngoo tid su" gyeing" nyang: koid bye: ziyo' dayhang: ti"- Yaku da" amyed ashen yi yo' nga" dei zoo: David yo' koid to" da" nga" dang: theing ri ngoo zoem: ci: wa. Abraham- Isag- Yaku bang: da" amyed ashen yiri vhoeb wa shid re" David da" amyed ashen yi' mo dayug ri ngoo khyen: yu wa. Nga" byumyu" yiri ngoo nheig khyeug shoo" myen: wigi nyangnu" ri doem nyid ge yab gi nhang: wa.