25
1 Yoshia da" yuggi zoo: Yehoiakim- Yuda khokham koid zi myid: zain ein: zain moo Yuda byumyu" dangain" yo' sen: da" Aseing mo mungdang: ri ngoo shoug" kham yu. (He: zigi Nebukhadneza Babelon khokham koid zi xang: shi" zain ein: zain moo nghoid da:.)
2 Ngoo gi Yuda yo' Yerusalem byu dangain" bang: ri -
3 ?Amon da" yuggi zoo: Yoshia Yuda khokham bue" zi daxe: soem" zain ein: zain mo he: akhid" nyid" bidnyid ju" sho' eig xe: soem" zain nyang: Aseing tid ziri nanu" ri khanham we' athid pyam loo: tid kyoo" bye:. Nghoid loug we' nanu" atam" gyoo: nghoid da:.
4 Aseing gi nya: da" dei zoo: Lapi: yiri xo' wigi nanu" jhang nhang: kaid byid: sho' nghoid loug we' nanu" gi anau tam" gyoo: nyeing" atam" gyoo: nghoid ago".
5 Apyaid atoo: jonu" khyo" nanu" ri yo' nanu" phoug" phyid" yiri Aseing wigi byid: to" da" mungdain: moo nanu" xo' wigi yo" nyid boem goo" wa shid re" nyangnu" gi nanu" ri nanu" da" akhyeing" kangso' dei khyoo: mo yo' nanu" koid da" akhyeing" da" lo, mo" joem mo tau" loo wa nanu" ri tid abye: go".
6 Nyangnu" gi nanu" ri gootu: yu phara" joem ri ano' wa yo' adei byid: wa houg: lho: nanu" koid to" da" yu phara" soolhoo: joem ri no' da" khyo" Aseing ri nheig ayoo: nhang: wa shid re" tid abye: go". Nanu" Aseing ri tid dang: tam" gyo: nghoid rigi nyang: gi nanu" ri yooboo dam abyid: wa.
7 Nghoid loug we' nanu" gi nyang: ri tam" gyoo: wa he: pyam ago" ga Aseing nyang: tid abye:. Hau: gungthid nanu" da" yu phara" soolhoo: joem wigi nyang: ri nanu" nheig yoo: nhang: wigi nya: da" yooboo dam byid: ziri nanu" nya: adang moo ju" nhang: abye: go".
8 ?Houg: lho: nanu" nyang: ri anau tam" gyoo: byid: boem yoomo myhang: thang Aseing tid zigi
9 ?Ngoo gi mougzhung: shoid mo byumyu" dangain" ri yo' nga" dei zoo: Babelon mo khokham Nebukhadneza ri khi: nhang: kaid wa. Ngoo gi nyangnu" ri Yuda yo' houg moo nyid bang: mougkyoo" cang" yi dangain" mo byumyu" dangain" ri gyi koid wa shid re" shu" loo wa. Ngoo gi he: byumyu" mungdain: ri yo' hau: mougkyoo" cang" yiri phyo' shoin' pyam wigi apyaid atoo: moo yu" gyoug yu" lhung: sho' byo, jo, nhang: wa. Ngoo Aseing tid too" bye:.
10 Ngoo gi nyangnu" da" pyo: ziyo' gau wigi nyho: da" thui: joem lo, xo' pui" mo pyo: da" thui: joem ri jo, tam" lo" byug nhang: wa. Nyangnu" myikug joem shid re" xu: ayoo" wa. Shivoo: we' ayoo" loo goo" wa.
11 Mungdain: goin" gi byo, yoin" jo, wigi yu" dain sho' da" joyoo nghoid loo wa. Houg: lho: mougkyoo" cang" mung" dain joem gi Babelon khokham ri nyhed xi: zain dei byid: loo goo" wa.
12 Hau: thang: ri ngoo gi Babelon mung" ri yo' nya: khokham ri nyangnu" da" yooboo gang mo yooboo dam byid wa. Ngoo gi hau: mungdain: ri phyo' shoin' pyam wigi apyaid atoo: moo byo, jo, nhang: wa.
13 Ngoo gi Babelon mung" ri Yeremia nhoid khyo" tid uri byumyu" yi dang moo bui" nhang: wa ngo wigi kyug nhain' da" yau: khe" kyi" khyeug dangain" wigi yooboo dam byid: wa. Yau: khi" kyi" khyeug dangain" ziri he: mougsoug" pug moo lhid" xoem" to" ago".
14 Ngoo gi Babelon ri nyangnu" koid lo da" moo" yoomo aphoug" doem tau" byid: wa. Byumyu" myoo" sho' yo' yoem: bo da" khokham yigi nyangnu" ri join koid pyam loo wa ga: tid da:.
15 Israela da" Aseing Mangsoo gi ngoo ri ?Nga" nheig yo: zi byeung" jo, da" zabyid yhid: goem hid: moo nghoid da:. Hau: ziri yu ci: wigi nang ri ngo wigi nhang: kaid byid: da" byumyu" dangain" ri houg: mo nyangnu" ri shug nhang: we'.
16 Nyangnu" hau: ziri shug lang" nyangnu" ri gyi khaid wa ngo wigi nhang: kaid byid: da" gyipui" gang mo nyangnu" apyi: akam" bue" re" wigi aboin: asoo" bue" loo wa? ga: tid da:.
17 Houg: yoomo ngoo gi Aseing da" lo, mo goem ri yu yu wigi Aseing wigi ngoo ri nhang: kaid byid: da" byumyu" dangain" ri byid: wigi nyangnu" ri hougmo shug nhang: bye:.
18 Yerusalem yo' Yuda voogung dangain" nyangnu" khokham yi vhujhung: yi dangain" gi houg: mo shug nhang: zi shoug" ago". Houg: yoomo nyangnu" gi dain" pyoid yoo- yu" gyoug yu" lhung: sho' da" joyoo bue" lo wigi nyangnu" akhid" ju" sho' ci: boem ziyo' dayhang: ti" nyangnu" da" myeing ri nheing" khoin" khyo" byumyu" yi ci: da" myeing bue" lo ago".
19-26 He: zigi hau: goem mo shug boem bye: da" gooji dangain" mo, da" zhayhen" nghoid da:.
Houg: bang: gi Egutu khokham- nya: gyizoug: yi yo' vhujhung: yi
Egutu byu yi dangain" yo' Egutu mung" moo nyid boem da" tungbau byu yi dangain"
Uza mung" mo khokham yi dangain"
Philisti voomoo" joem nghoid da" Ashkelon- Gaza: Ekron khokham yi dangain" yo' Ashdod mo deing da" bang:
Edom- Moba- yo' Amon byumyu" yi
Turu yo' Sidon khokham yi dangain"
Meing: gung panglai: mungdain: joem mo khokham yi dangain" Dedan- Tema- Buza voomoo" joem
Nyangnu" da" xam: ri leung" da" khyo" phyed ci: da" byumyu" dangain"
Arabia Khokham yi dangain"
Dain" pyoid yoo moo nyid boem da" byumyu" kung joem da" khokham yi dangain"
Zimri- Elam yo' Media khokham yi dangain"
Mougzhung: shoid- ve: moo jang" mo joyoo dakhyi' mo dakhyi' khyoo: nyid lam" yen" da" khokham yi dangain" bang: nghoid ago". Mougmyid tho' mo byumyu"
Khang" moo" gi hau: ziri shug ca" ago".
Lo" thang moo Babelon khokham we'
hau: ziri shug wa? ga: tid da:.
27 Hau: thang: Aseing ngoo ri ?Nyangnu" ri gyi koid wa ngo wigi nhang: kaid da" gyipui" gang mo nyangnu" yed sho' dug sho' leung loo" sho' ayo" doem too' loo: sho' shug goo" wa shid re" Israela da" Mangsoo yoem bo da" Aseing ngoo nyangnu" ri amyeing" byid: da" khyoo: ri byumyu" yiri tid kyoo" we'.
28 Nyangnu" re" lo, mo goem ri yu wa he: pyam nghoid rigi nyangnu" houg mo shug ca" shigo" wa nghoid ga: yoem bo da" Aseing tid to" da" khyoo: nyangnu" ri tid kyoo" byid: we'.
29 Ngoo gi phyo, shoin' da" moo" ri ngoonya: voomoo" mo shid" wa. Nyangnu" gi yooboo dam ashoug" wa ga: jho: ago" rhe". Anghoid nyangnu" yooboo dam byid: zi shoug" goo" wa. Ciwim gari mougmyid tho' mo byu dangain" bang: dang moo gyipui" ri ngoo nhang: kaid byid: wa. Myhang: thang da" Aseing ngoo tid too" bye:.
30 ?Nang Yeremia we"- ngoo tid to" gu: dangain" ri tid fu" ca" da:. Nang gi he: byu yiri
?Aseing gi mougkhung: mo nyho: loo wa.
houg: lho: myhang: da" mougkhung: mo mouggoem: goem: loo wa.
Nyang: gi nya: byumyu" yiri thougtheung wigi nyho: loo wa.
Nyang: gi zabyid shi" nang: su: yhang: ti" nyho: loo wa.
Mougmyid tho' mo yugkhang" moo" nya: thui: ri shau" gyo: loo goo" wa.
31 Houg: lho: thui: gi mougmyid thang sho' lang: thang: tu" loo wa.
Aseing gi byumyu" yiri yooboo zhug wa moo" daja: yo" da:.
Nyang: gi byu dangain" ri joeb ca: yu" wa shid re" shu" loo" wa.
Houg: lho: akhyeing" bang: ri said pyam wa.
Aseing tid too" bye:? ga: tid da:.
32 Myhang: thang Aseing gi byumyu" damyu" thang: damyu" adang moo yau: khe" kyi" khyeug zigi ju" lo nyid wigi uglid gi ve: da" mougthang: moo foem: jo, ago".
33 Hau: bidnyid moo Aseing wigi said pyam shau" boem bang: da" manggung joem gi mougmyid thang: dashoid mo zi gootu: dathang: ju" sho' abyi asain" bue" jo, wa. Nyangnu" shid re" hang" we' akug ngau goo" wa. Nyangnu" gi dang ci: lo" wigi myhoeb shoung: zi ashau" goo" wa. Nyangnu" gi myid gung mo jen" yhang: ti" boem jo, loo goo" wa.
34 Vhujhung: yi nanu" we"- kyi: ngoug ge'. Nga" byumyu" yiri zung" da" yang zung" bang: we"- nyho: yoid ge'. Koug ngau wigi pheilhoug: boem" moo lu: lheing yen" ge'. Nanu" ri said pyam wa yo, ju" lo wigi nanu" gi yang loo: ri yhang: ti" said pyam zi shoug" wa.
35 Nanu" shid re" phang: loid wa khyoo: ajo,
36-37 Aseing gi nya: nheig yo: ziyo' nanu" da" byumyu" yiri phyo' shoin' pyam bye: ziyo' nanu" da" ngei pyo: yug yo da" mungdain: gi byo, yoin" jo, yoomo nanu" noo kyeing" kyeing" wigi nheigloem: thang wigi kyi: ngau ago".
38 Khangkhyi: gi nya: lug-ug ri she: pyam pyam yhang: ti" Aseing gi nya: byumyu" yiri she: pyam bye:. Yu" gyoug yu" dain sho' da" gyipui" yo' Aseing da" thain: da" nheig yo: zigi mungdain: ri dain" pyoid yoo bui" nhang: bye:.