22
1-2 Aseing gi ?David da" amyed ashen nghoid da" Yuda da" khokham kho" khyoo: yhe: wigi houg: moo khokham- nya: gyizoug: yi Yerusalem byu yiri Aseing tid to" da" dang: ri tam" gyoo: boem wa shid re" yhe: tid we' ga? ngoo ri tid da:.
3 Hau: zigi ?Ngoo Aseing gi deingmain" ziyo' jo ziri koid wa shid re" nanu" ri amyeing" byid:. Mhau' fain" zi shau" da" su ri nyang: ri mhau' fain" su: da" lo, mo goem loem byid: we'. Tungbau byu yi coug" zoo: yi cougmoo" yiri age zi akoid goo"- azeig zoo: goo"- he: gyeung" shang: joyoo moo ce: yooboo ayo" da" bang: ri asaid pyam go".
4 Ngoo amyeing" byid: to" yhang: ti" nanu" koid boem nghoid rigi David da" amyed ashen yigi khokham xo' bui" wa. Houg: lho: nyangnu" gi nyangnu" gyizoug: yi nyangnu" da" mung" byu yi yo' dage" myang: rheing" joem myang: joem dang moo zhung: lho: he: khokham kho" mo khoem" khyo" xo' wigi vang vang thu thu yo" koid goo" wa.
5 Nghoid loug we' nanu" gi nga" amyeing" dang: ri atam" gyoo: acang yhi: boem nghoid rigi he: khokham kho" gi byo, yoin" byug wa ein: ziri ngoo nanu" ri jham' tang: wigi tid. Ngoo Aseing tid too" bye:.
6 ?Nga" shid re" Yuda da" khokham kho" gi Gilead mung" yo' Lebanon boem joem yhi' yung" da:. Nghoid loug we' ngoo gi hau: ziri byu hang" anyid da" jham" coug: youg joyoo koid pyam wa.
7 Hau: ziri phyo' shoin' pyam wa byu yiri ngoo nhang: kaid byid: wa. Nyangnu" dangain" gi nyangnu" da" voozung: joem ri ci: wigi hau: shamu zeing bung: joem ri thug lheing: pyam lho: hau: zi myikhyoem' khoug: khyoo: du" zei pyam byid: goo" wa.
8 ?Hau: thang: ri houg khyo" so" lid: lo" boem da" tungbau byu yigi ngoo Aseing wigi he: gyi: sheung: da" voomoo" ri houg: yhang: ti" da" moo" ciwim koid bye: la" ga: nyang: cang" nyang: myid loo goo" wa.
9 Houg: lang" nyangnu" gi nanu" Mangsoo nghoid da" ngoo yo' koid to" da" nanu" da" dang: theing ri nanu" she: pyam wigi yu phara" gootu: ri no' wigi dei byid: yoomo nghoid ago" ga: nyangnu" tu" loo goo" wa? ga: tid da:.
10 Yuda byumyu" yi we"- Khokham Yoshia gang mo ngoug byid agyoo" goo".
Nyang: shid: ziri akoug ngoug goo".
Nghoid loug we' nya: yuggi zoo: Yoahaza gang mo koem gi nheig khoo" sho' ngoug ge'.
Nyangnu" nyang: ri shu" lo" byug ago". Khanham we' atau" loo loo: wa.
Nyang: khu: lo da" mung" ri khanham adoem myang loo wa.
11 Aseing gi Yuda khokham khyo" nya: pho khoo: moo khokham xo' koid su: Yosha da" yuggi zoo: Yoshaza yo' sen: wigi ?Nyang: gi khanham we' adoem tau" loo loo: wa shid re" he: joyoo mo o" byug abye:.
12 Nyang: gi nyang: ri shu" lo" da" mungdain: moo shid: wa. Houg: lho: nyang: gi he: mungdain: ri khanham we' adoem myang loo wa nghoid da? ga: tid.
13 Adeingmain" da" khyo" yhoem: ri koid wigi
hau: ziri adeing amain" khyo" wigi gyi sheing: nhang: da" su:-
Nya: mang: nhung" yiri ce: aphoug" abyid: loo moo" koid nhang: wigi
Nyangnu" da" bidnyid phoug" ngei abyid: da" su: gi joem: abye:.
14 Ngoo gi atho' pyam: moo gooki' lid yab joem koid lho:
Ngoo nya: shid re" yhoem: moo" daloem: koid wa ga: tid su: gi joem: abye:.
Houg: yoomo nya: yhoem: moo bangzoo: khoem" ri
shamu thi" wigi dung" tab lho:
ne ziyo' xau" to" da:.
15 Gootu: tho' je ge da" shamu thi" wigi
nang yhoem: joem ri koid wigi
hau: ze wigi nang ri je ge da" khokham bui" nhang: wa la".
Re" phoo gi kang: sheing: sho' pyoo: pyoo: yo" nyid da:.
Nyang: gi khanham we' tarha" deingmain" ziyo' tarha" deing byeung" wigi
Nyang: koid khyoo: ja: khang" moo" moo yoo" zoo: yoo" shug khyoo: bo da:.
16 Nyang: gi myung shoo" bang: ri tarha" deing byeung" da" khyo" tarha" dang: phyed wigi
dangain" bang: nyid gi yab ge ago".
Hau: zigi Aseing ri se' da" dang: kang: nghoid da:.
17 Nghoid loug we' nang gi nanya: shid re" za: myang da:.
Nang gi ce: yooboo ayo" da" bang: ri said pyam wigi
Re" mung" byu yiri ajoem: theing zeig zo: da:.
18 Houg: lho: Aseing gi Yoshia da" yuggi zoo: Yuda khokham Yehoiakim yo' sen: wigi
?Nyang: shid: yoomo hang" we' akug ngau goo" wa.
?Nga" byencang" phoo we"- gya: we"- gya: we"? ga: hang" atid goo" wa.
Hang" dayug we' ?Nga" aseing: we"- nga" khokham we"? ga: nya: shid re" akoug ngoug goo" wa.
19 Loo zei: shid: mang ri myhoeb shoung: pyam yhang: ti" nyang: ri she: khyoid yhe: wigi
Yerusalem khoem" nghe: shoid khyoo: yhe: she: pyam go" wa zi shau" loo wa? ga: tid da:.
20 Yerusalem byu yi we"- Lebanon khyoo: yhe: wigi nyho: we'.
Bashan mung" khyoo: yhe: wigi nyho: ge'
Nanu" da" myid shoin" bidnoem yi dangain" bang: gyi soem" byug bye: yoomo
Moba boem joem mo nyho: yoid ge'.
21 Nang yoo" zoo: yoo" shug uri Aseing gi nang ri dang: tid da:.
Nghoid loug we' nang atam" gyoo: byid: nghoid da:.
Hau: zigi nanu" pyaid goin" moo nanu" koid lo zi nghoid abye:.
Nanu" gi khanham we' Aseing ri tid dang: alhoung tam" gyo: loo: nghoid da:.
22 Nanu" da" vhujhung: yigi lid wigi hau" tang" lo" zi shoug" goo" wa.
Nanu" da" myid veing" bidnoem yigi gyipui" moo thung: byu yi khyo" myheig shu" loo" shau" wigi
nanu" koid lo da" akhyeing" da" moo" dangain" gang mo nanu" da" voomoo" gi ngi: yoem" wigi sho' phu" zi shoug" goo" wa.
23 Nanu" gi Lebanon mung" mo de" lo da" shamu gam joem agung moo goem loem zi shau" boem wa.
Nghoid loug we' myiyi: dayug zoo: khu: noo no yhang: ti"
Kyi" khyeug kham zoo: ziri nang shoug" lang" nanu" gi khayhi' kyi" khyeug shoug" su: nghoid la".
24 Aseing gi Yuda khokham Yehoiakim da" yuggi zoo: khokham Yehoiakhin ri ?Ngoo gi kangso' dei da" Mangsoo gyeing" nyang: nghoid. Nang gi nga" lo, yo lo, mo dazid lo, pain" nghoid rilang" nang ri ngoo khyoid khyo, pyam wa.
25 Houg: lho: nang ri said pyam nau da" byumyu" nghoid da" nanu" gyoug da" byumyu" lo, khyoo: nang ri ngoo byid: pyam wa. Ngoo gi nang ri Babelon khokham Nebukhadneza yo' nya: gyizoo: yi lo, khyoo: byid: pyam wa.
26 Ngoo gi nang ri yo' re" myhi' ri goo" mung" khyoo: agyoo: atho' pyoung" shu" loo" nhang: wa. Nang akhu: da" mung" khyoo: yhe: loo" wa. Houg: moo re" mitang: goin" shid: boem wa.
27 Nang gi he: mungdain: ri doem myang nau ri" wa. Nghoid loug we' nang khanham we' atau" loo loo: wa? ga: tid.
28 Ngoo gi ?Khokham Yehoiakhin gi she: pyam bye: wigi hang" avho: da" jhuang: go, yhang: ti" bui" bye: la". Hau: zigi nyang: yo' nya: zooshang: yi ci: ase' to" da" mung" khyoo: pyoung" shu" loo" shau" da" khyoo: nghoid la"? ein: tid.
29 O"- mougmyid- mougmyid- mougmyid-
Aseing tid to" ziri tam" gyoo: we'
30 ?He: byu Yehoiakhin yug gi zooshang: yi ci: phyug wa dang: phyed zi shoug" yug
Khanham we' oung: doid khyoo: ashau" wa yug nghoid da:.
Nyang: gi David da" khoo: moo khokham xo' koid bang: yhang: ti"
Yuda mung" ri vhoeb wa bang: nghoid wa da amyed ashen yi ayoo" wa.
Ngoo Aseing tid too" bye:? ga: tid da:.