2
1 Aseing gi ngoo ri
2 Yerusalem mo byu yugkhang" moo" ri he: lu dang: tid fu" nhang: da:.
?Nang ngi shi" uri nang khayhi' jhug zug ziri ngoo se'.
Nang gi xang: shi" lo, xo' uri ngoo ri khayhi' jheddab ziri ngoo se' da:.
Nang gi dain" pyoid yoo khyo" nga" thang: cang lo da:.
Shivoo: asho" yu" da" mougmyid khyo" so" lid: lo" da:.
3 Israela we"- nang gi ngoo dayug wigi za: seing: zi nghoid da:.
Nang gi nga" da" gyeung" shang: jonu" nghoid da:.
Ngoo gi nang ri dam tab bang: yugkhang" moo" yau: khi" yo'
byo, yoin" da" khyoo: nhang: kaid byid: wa..
Ngoo Aseing tid too" bye:.
Israela Phoug" Phyid" yi Da" Yooboo
4 Yaku da" amyed ashen yi nanu" we"- Israela byumyu" kung: yi nanu" we"- Aseing mungdang: ri tam" gyoo: we'.
5 Aseing
?Nanu" da" phoug" phyid" yigi ngoo ri ce: yooboo zhug wigi thougtheung bye: go" la".
Ce: wigi nyangnu" ri ngoo mo lheing: phug loo" nhang: la".
Nyangnu" gi ce: phoug" adab da" soolhoo: joem ri no' wigi
Nyangnu" nyang: we' ce: phoug" adab bue" da:.
6 Ngoo gi nyangnu" ri Egutu mung" mo khyoid yu lho:
dain" pyoid yoo yo' midcoo: duang: joem jo, da" moug:-
Byu hang" anyid da" moug:- moug: kyug yo' gyoug pho" da" moug:-
Byu dayug we' gyung: aso" da" moug:
dain" pyoid yoo khyo" shu" lid: lo rilang"
nyangnu" ngoo ri cishu: anhang: nghoid da:.
7 Ngoo gi nyangnu" ri myidxu: ge da" moug: khyoo:- hau: moug: moo ngei pyoo: tung" shivoo: yhoem" wigi
hau: moug: mo ge da" ja: joem ri yo" kham: yu wa shid re" shu" vang loo bye:.
Nghoid loug we' hau: gungthid nyangnu" gi nga" mougmyid ri phyo' shoin' pyam ago".
nyangnu" gi nyangnu" ri ngoo byid: to" da" mungdain: ri ayung" alho' koid pyam ago".
8 Khainjung yigi ?Aseing khayoo: nghoid la"? ga: amyid: nghoid ago".
Nga" da" khainjung yi ngoo ri asi' nghoid ago".
Vhoeb khang" bang: gi ngoo ri thougtheung gyi koid ago".
Lapi: yigi Bala myeing khyo" dang: tid boem.
Houg: lho: akyu" abo da" soolhoo: joem ri no' ago".
Aseing gi Nya: Byumyu" yiri Thougtheung Khyoo:
9 ?Ngoo Aseing gi nga" byumyu" yi yo' phyen: goo" wa.
Ngoo gi nyangnu" da" amyed ashen yiri yooboo zhug wa.
10 Bidvang shoid Kupru gagyoo kang khyoo: yhe: loo" we'.
Houg: lho: dayug yug ri bidthu shoid Kedara moug: khyoo: nhang: kaid ga.
Hid yhang: te" zi shid pyang" khanham we' abue" yu" ziri nang shau" myang loo wa.
11 Gootu: kha: byumyu" yi we' Mangsoo gyeing" anghoid da"
Nyangnu" yu phara" joem ri athed pyam yu" nghoid da:.
Nghoid loug we' nga" byumyu" yigi
nyangnu" ri ngi: shab byid lo da" Mangsoo ngoo ri
Nyangnu" shid re" ci ayo" koid byid: da" yu phara" joem yo' thid go" pyam abye: go".
12 Houg: yoomo ngoo gi mougkhung: ri gyoug dain ja: yo' lhei' nhoin' kaid wigi
Yu" mau" ziyo' yu" dain wa khyoo: amyeing" byid: kaid wa.
13 Ciwim gari nga" byumyu" yigi yooboo eig ja: shoid abye: go".
Nyangnu" gi kangso' gyid bug gyid gyeing: nghoid da"
ngoo mo lheing: phug lo" da:.
Gyid ayo" deing jo, da" gyid teing thoem"- jo, gyam: byug da" gyid teing thoem" joem ri du: ago".
Israela Jhug Azug da" Akyu"
14 ?Israela gi join anghoid-
Nyang: gi join khyo" khu: re" zi anghoid.
Houg ri Ciwim yoomo nya: gyivoo yigi nyang: ri cang khaid myheig la".
15 Nyangnu" gi nyang: ri khangkhyi joem yhang: ti" myeing ago".
Nyangnu" gi nya: da" mougmyid ri dain" pyoid yoo koid pyam ago".
Houg: lho: nya: da" voogung joem gi jhoid she: pyam zi shoug" lho: byo, yoin" jo, da:.
16 Nghoid- Memphi yo' Tephan mo byumyu" yigi
nya: vhukhang" ri gyoeb nhang: abye:.
17 Israela we"- nang gi he: ziri nanya: gung moo ke" yu abye:.
Nang gi nang ri khyoo: khyo" wigi shu" lo uri
ngoo Aseing re" Mangsoo ri she: pyam kho' abye:.
18 Nang gi Nila gyid lang mo gyid shug wa shid re"
Egutu khyoo: yhe: ri ciyo" yu wa ein: myid la".
Nang gi Uphrad gyid lang mo gyid shug wa shid re"
Asuri khyoo: yhe: ri ciyo" yu wa ein: myid la".
19 Nanya: akhyeing" ashoeb zigi nang ri yooboo dam byid: loo wa.
Houg: lho: ngoo mo phug lo" zigi nang ri dang: phyed loo wa.
Nang gi ngoo re" Aseing Mangsoo ri she: pyam kho' ziyo'
ngoo moo jhug azug lo zigi
khayhi' kho" lho: shoid nhung: ga: ziri yo" se' loo wa.
Ngoo yoem: moo" bo myhang: thang Aseing tid bye:.
Aseing ri Noku wa Shid re" Israela Ngeug he: Pyam Khyoo:
20 Yoem: moo" bo Aseing tid
?Israela we"- Goonham' mo nga" amyeing" akhang" ri nang ngeug pyam da:.
Nang gi ngoo ri tam" gyo: cang yhi: wa yo' noku wa shid re" he: pyam da:.
Nang gi myhang: da" bouggung khang" moo" yo'
nyau young" da" seiggam yoeb khang" moo" moo
myo loug je: be: nhang: da" yu phara" joem ri no' da:.
21 Ngoo gi nang ri ge thang da" myoug: shi" mo
zabyid nei yhang: ti" sho" too" bye:.
Nghoid loug we' nang ci bue" lo ziri yu" yu" we'
nang gi ce: phoug" adab da" zabyid nei boeb yo' du da:.
22 Nang gi so' thain: thang da" sapya: yo' cid" pyam loug we'
re" yooboo dam khoo: ri ngoo akhid" shau" myang shi" wa.
23 Nang gi Bala ri khanham ano' lo yu" ga: nanya: gung ri
agyeing" ashang: akoid ein: yo" tid wa la".
Langkhung" moo nang yooboo shoid lo ziri yu" yu" we'
nang koid lo ziri yu" we'
Nang gi amyoug: mho' da" Gola-ug lam"
dain" pyoid yoo cang khaid yen" wigi tang" doin yen" ziyo' du da:.
24 Nyang: amyoug: mho' nyid uri hang" yo" zei: ci: wa la".
Nyang: ri vho: da" aloo: kha: du: we' gye" youg: sho' yoem: aphain" ca".
Nyang: gi amyoug: kaid da" ayo, moo
khanham we' khyang: za: yo" kaid da:.
25 Israela we"- yu phara" gootu: thang: cang wigi
Re" khyid: ri aso" kang pyam nhang:
Re" khyung" ri we' ahei' nhang:.
Nghoid loug we' nang tid zigi ?Anghoid wa ngoo ayo" doem tau" loo.
ngoo gi tungbau yu phara" joem ri jheddab byug bye: yoomo
nyangnu" thang: khyoo: cang yhi: wa? ga: tid da:.
Israela gi Yooboo Dam Byid: wa Moin: Yi" da" Khyoo:
26 Aseing tid zigi ?Khausu gi shoug" myheig lang" ngi: yoem" yhang: ti" Israela byumyu" nanu" dangain" nanu" khokham yi yo' gyizoug: yi nanu" khainjung yi yo' Lapi: yi ngi: yoem" loo goo" wa.
27 Seiggam ri nanu" nya: phoo ga: lug boem ri nanu" nya: myhi' ga: tid da" nanu" dangain" gi ngi: yoem" loo wa. He: ziri bue" loo wa. Ciwim ga: ri nanu" gi nga" jhang lheing: loo wa gungthid nga" jang" mo phug lo ago". Nghoid loug we' nanu" yau: khi" shau" uri nanu" jhang ngoo re" wigi nanu" ri khyoid yu wa shid re" ngoo ri mho' ago".
28 ?Nanu" nya: shid re" nanu" koid yu da" yu phara" joem gi khakhyoo: loo" bye: la" Nanu" yau: khi" shoug" nyid uri nanu" ri nyangnu" yo" khyoid yu boem nghoid ri khyoid yu boem baja". Yuda we" nang moo voomoo" joem jo, myhoo' yu phara" joem yo" da:.
29 Nanu" myeing" myo: zigi ci: nghoid la". Nanu" gi ciwim yoomo ngoo ri thougtheung gyi koid boem la".
30 Ngoo gi nanu" ri yooboo dam byid: loug ce: akyu" aboo nghoid da:. Nanu" gi ngoo wigi nanu" ri jhau" shed wa akhang" abyid: nghoid ago". Nanu" gi nheig joem: yo: da" khangkhyi yhang: ti" nanu" da" Lapi: yiri said pyam abye:.
31 Israela byumyu" yi we"- ngoo tid nyid ziri tam" gyoo: we'. Ngoo gi dain" pyoid yoo yhang: ti" moug coid yhang: ti" yo' gyoug ca" da" mougmyid yhang: ti" bue" lo" zi shau" yu" la". Hougsu" nghoid ri ciwim yoomo nanu" gi nga" jhang khanham we' atau" phang: loo" loo wa ga: nanu" nyang: vho: khyo" koid wa ein: tid boem go" la".
32 Zoomyi: nu" gi nya: da" shoung: yhoung wa phoug" dab lug ri myhi' seig gi nya: da" lo, xo' pui" byimi ri lhoung to" myhed yu" la". Nghoid loug we' nanu" gi bidnyid atho' nghab loo sho' ngoo ri to" myhed pyam ago".
33 Nanu" gi jheddab zooyam phoo yi thang: khyoo: khasu" cang khaid yhi: wa zi goo" lhoo' se' da:. Age thang da" myiyi: myhi' yi lang" nanu" mo yo" jhau" yu ago".
34 Nanu" da" byimi joem gi khoug" mo, byo, mo, da" suid" anghoid- myung shoo" mo, yo' yooboo ayoo" bang: da" suid" lhu: tab ci: da:.
Nghoid loug we' he: gu: dangain" tho' moo
35 nanu" gi ?Ngoo gi yooboo ayoo"- gyeing" nyang: Aseing gi ngoo ri nheig ayoo: loo: wa? ga: tid ago". Nghoid loug we' nanu" gi yooboo shoid bye: ga: ziri ngeug he: pyam yoomo ngoo Aseing gi nanu" ri yooboo dam byid: wa.
36 Nanu" gi gootu: byumyu" yi da" yu phara" joem jhang phug lo" boem da" khyo" nanu" nya: gung ri nanu" nyang: gu gyo" loo" nhang: pyam boem. Nanu" gi Asuri yi wigi nheig adeug bui" nhang: yhang: ti" Egutu yi wigi we' nheig adeug bui" nhang: zi shau" loo wa.
37 Nanu" gi sho' ziyo' vhuloem goeb zhug ci: lho: Egutu mo lheing: phang: loo" goo" wa. Nanu" loem nyid da" houg: bang: ri ngoo Aseing ngeug he: pyam bye:. Nanu" gi nyangnu" mo ci: we' shoug" yu wa anghoid? ga: tid.