17
1 Aseing tid zigi ?Yuda byumyu" yi we"- nanu" da" yooboo gi joto' mhug youg: yo' lhid" to" abye:. Hau: zigi nanu" da" nheigloem: khoug: mo sen: lug coin: yo' kyung" lhid" tab to" wigi nanu" da" phoin: khyoug: moo kyung" tab to" abye: go".
2 Re" byu yigi phoin: joem ri we' seiggam khang" moo" yo' bouggung joem mo yu phara" myhi' Ashera da" shid re" tu: to' to" da" soolhoo: joem ri we' no' ago".
3 Siyoo mo boem joem ri no' byid: ago". Re" mungdain: goin" jang: sho' moo nang shoid da" yooboo dangain" gang mo re" da yoo" zoo: yoo" shug khyoo: yo' jonu" joem ri ngoo gi re" gyivoo joem ri ci: loo" nhang: wa nghoid da:.
4 Nang gi ngo wigi byid: to" da" mungdain: ri asoem" byid: pyam ca" loo wa. Ngoo gi nang ci: ase' da" mungdain: mo re" gyivoo yiri dei byid: nhang: wa. Ciwim gari nga" nheig yo: zigi myi: yhang: ti" nghoid wigi hau: zigi apyaid atoo: moo nge" nyid wa? ga: tid da:.
5 Aseing tid zigi
?Ngoo mo phug lo" byug wigi
Shid: se' da" byu joem yoem: vhoo" khoug: mo
Xangsu: byu yiri loem khau: da" su: ri
ngoo dang: phyed wa.
6 Nyang: gi moug: kyug myid kyug-
Ce: daja: we' age yug da" xoo" mougmyid-
dain" pyoid yoo moo yug da" mhain" pung yo' du da:.
Nya: shid re" khanham we' ge zi abui" nghoid da:.
7 ?Nghoid loug we' ngoo ri loem khau: da"
yug ri ngoo mainkaid byid: wa.
8 Nyang: gi gyid gyung: yam mo yug wigi
gyid moo ju" sho' agyi: cen' da" seiggam yo' du da:.
Hau: afu' joem nyau jo, yoomo lung yo, ju"
loo lang" agyug ca" nghoid da:.
Moug: avoo loug we' seing" akhoo" nghoid da:.
9 ?Xangsu: byu yi da" nheigloem: ri hang" yo" tho' si wa la"
Houg: yhi' mhoug fain" zigi gootu: ci: ajo, nghoid da:.
Byang" gi wa shid re" age bui" loo: sho' no zi sung xo: byug bye:.
10 Ngoo Aseing gi byu da" myid ri pei: shoo: su: yo' nheigloem: ri jham" yu" su: nghoid da:.
Ngoo gi yugkhang" moo" ri nya: kangso' dei ziyo'.
Nyang: koid da" moo" ri cang wigi koid byid: wa.
11 Adeing: main" da" khyo" ngei yoo" da" su: gi
ngho' gi u akhyoo' lho: ngho' u joem ri vhoeb da" ngho' yo' du da:.
Zooyam kung" kung" nghoid uri nya: jonu" soem" byug wa.
Lo" thang moo nyang: gi ci: ayoo" loo koo" su: bue" byug wa.
12 Ngoonu" da" Noku Yhoem: Moo" gi xang: shi" mo boem dang moo yab jo, da:.
Phung" yoeb bo da" zhungtang yo' du da:.
13 Aseing we"- nang gi Israela da" myid byu jang: nghoid da:.
Nang ri she: pyam boem da" bang: gi sho' phu" loo goo" wa.
Nyangnu" gi pheilhoug: boem" moo lhid" to" da" myeing joem yhang: ti" bei: byug wa.
Ciwim gari nyangnu" gi gyid sain' gyid bug nghoid da" nang Aseing ri she: pyam pyam yoomo nghoid.
14 Aseing we"- ngoo ri byang" byid: la- houg: lang" ngoo bain sho' ge byug wa. Ngoo ri khyoid yu la- houg: lang" bain sho' goem loem zi shoug" wa. Nang gi ngoo wigi coung" byid: su: nghoid.
15 Byumyu" yigi ngoo ri ?Aseing wigi ngoonu" ri thougtheung kyug nhain' da" dang: joem gi khayoo: la". Akhid" nyang: hau: ziri ci: shug baja"? ga: tid.
16 Nghoid loug we Aseing we"- nyangnu" jang" moo yau: khe" kyi" khyeug zi bui" nhang: wa ngoonu" ri khanham we' ajhoin". Nyangnu" kyi" khyeug shoug" wa ayo, ri ngoo amyed vho: loo. Aseing we" ngoo tid bye: ziri nang se' da:.
17 Ngoo ri agyug dain nhang:. Yau: khi" ju" uri nang gi nga" goem loem jo, yo nghoid da:.
18 Ngoo ri shen" yhen da" bang: ri ngi: yoem" nhang: la- nghoid loug we' ngoo ri teing too" byid: we'. Nyangnu" ri gyoug dain myid byeung" sho' kaid byid: we'. Nghoid loug we' ngoo ri agyug dain nhang:. Nyangnu" ri yau: khe" kyi" khyeug zi bui" nhang: lho: nyangnu" ri ajab amhoin" khyoeb mhoin' pyam we'.
19 Aseing gi ngoo ri ?Yeremia we"- Yuda khokham yi voomoo" khyoo: vang yhe: uri yo' voomoo" mo doem thu lo uri lid da" byumyu" yi vang khyam: khoem" moo nga" da" mungdang: yhe: tid fu" we'. Hau: thang: Yerusalem mo khoem" khang" moo" khyoo: we' yhi: we'.
20 Khokham yi yo' Yuda byu dangain" Yerusalem moo nyid lho: he: khoem" joem khyoo: vang re" da" bang: dangain" ri ngoo tid wa da" dang: ri re" tam" gyoo: wa shid re" tid kyoo" we'.
21 Nyangnu" kangso' ri nyangnu" jheddab boem rigi nyangnu" gi Dougno: Bidnyid moo yoovoin ce: ja: we' age voin- Yerusalem da" khoem" joem khyo" ciri we' age voin lid: wa.
22 Anghoid lang" Dougno: Bidnyid moo nyangnu" yhoem: mo ciwe' age ci: thu. Nyangnu" gi Dougno: Bidnyid moo moo" age zei:. Nyangnu" phoug" phyid" yiri ngo wigi amyeing" byid to" yhang: ti" hau: bidnyid ri gyeung" shang: bidnyid khyo" nyangnu" phoug" tab cang yhe: ca" da" khyoo: nyangnu" ri tid kyoo" we'.
23 Nyangnu" da" phoug" phyid" yigi nga" da" dang: ri atam" gyoo:. Ngoo ri cishu: anhang: nghoid da:. Hau: gungthid- nyangnu" nheigloem: thang: lo ago". Nyangnu" gi nga" tid dang: agyoo:. Ngoo mo we' ajhau" yu nghoid ago".
24 ?Nga" amyeing" dang: joem dangain" ziri nyangnu" phoug" tab cang yhe: boem ca" da" khyoo: ri he: byu yiri tid kyoo" we'. Nyangnu" gi Dougno: Bidnyid ri he: voomoo" moo khoem" joem khyo" yoovoin ce: ja: we' age voin lid:. Nyangnu" gi Dougno: Bidnyid ri gyeung" shang: bidnyid khyo" phoug" tab cang yhe: wigi moo" daja: ri we' nyangnu" age zei: ein: da" khyoo: tid kyoo" we'.
25 Houg: lang" nyangnu" khokham yi' yo' khokham nu" yigi Yerusalem da" khoem" joem moo vang yhe: wigi David shau" yu da" yoem: so' yhang: ti" ziri nyang: shau" yu ago". Nyangnu" gi gyimyang: rheing" dang moo yo' myang: joem dang moo zhung: loo goo" wa. Houg: lho: Yerusalem gi khanham we' mung" byu yi byeung" jo, boem wa.
26 Byu yigi Yuda mung" voogung joem mo yo' Yerusalem lheing khoem mo voogung joem mo ju" lo boem goo" wa. Nyangnu" gi Benyamin mung" mo bouggung khyid: joem mo boem joem mo Yuda mung" mougpyi: shoid mo ju" lo boem goo" wa. Nyangnu" gi nga" Noku Yhoem: Moo" khyoo: nghe' ngei" xoin" joem shivoo: xoin" joem shoem: nam pyo: ja: yo' jeju" boin: so" xoin" joem ri ci: lo boem goo" wa.
27 Nghoid loug we' nyangnu" gi ngoo ri tid dang: gyo: wigi Dougno: Bidnyid ri gyeung" shang: bidnyid khyo" phoug" tab cang yhe: ca" ago". Nyangnu" hau: bidnyid moo Yerusalem khoem" joem khyo" yoovoin ce: daja: we' age voin lid:. Nyangnu" voin lid: nghoid rigi Yerusalem voomoo" khoem" joem ri ngoo myi: nghe' pyam wa. Myi: gi Yerusalem khokham kho" joem ri we' nge" khyoeb pyam wigi hang" we' hau: ziri ayo" said pyam goo" wa.