15
Yuda Byumyu" yi Shid re" Joem: Lo" Khyoo:
Hau: thang: Aseing gi ngoo ri ?Moshe yo' Samuela eig tang: nyang: he: joyoo moo: yab jo, wigi ngoo ri mho' nyid boem nghoid loug we'. Ngoo gi he: byumyu" ri nheig khyeug myid aci: shug byid: wa. Nyangnu" ri phang: loo" nhang: ge'. Nyangnu" ri nga" shidkhoin" mo khaid pyam we'.Ref 15:1: Thu 32:11-14; Gys 14:13-19; 1Sa 7:5-9 Nyangnu" wigi nang ri nyangnu: khakhyoo: yhi: ca" zi myid boem uri ngoo hid su" ein: tid ein: nyangnu" ri tid kyoo" we'Ref 15.2: Psh 13.10
Dayham" gi noo phyoo" shau" wigi shid: loo" goo" wa-
hau: zigi nyangnu" yhe: loo" wa khyoo: nghoid.
Gootu: dayham" gi meing: zain: jang: moo: shid: lo" boem wa-
hau: zigi nyangnu" yhe: loo" wa khyoo: nghoid.
Dayham" gi zooyoid wigi shid: lo" boem goo" wa-
hau: zigi nyangnu" yhe: loo" wa khyoo: nghoid.
Gootu: dayham" gi thung: byu khyo" shu" lo" zi: shau" wigi joem: lo" boem goo" wa.
Hau: zigi nyangnu" yhe: loo" wa khyoo: nghoid.
Nyangnu" moo: gyugdain pho" zi 4 ja: bui" loo wa ein: ngoo Aseing myid phyed too" bye:. Nyangnu" gi meing: zain: pa: moo: said pyam zi shau" loo goo" wa. Nyangnu" da" manggung joem gi lakhuid" joem wigi she: khyoid lo" zi shau" wa. Hau joem ri ngho' joem wigi zo: pyam byid: wa. Zo: teing to" gu: ri gougnyhoug lam" joem wigi coem' lhoid zo: pyam loo goo" wa. Hezekia da" yuggi: zoo: Manashe wigi nyang: Yuda khokham bue" nyid uri Yerusalem ri koid lid: lo da" moo" zoo" gang mo damungdain: goin" mo byumyu" yi wigi nyangnu" ri yu" gyoug yu" dain goo" wa khyo" ngoo koid kaid wa? Ref 15:4: 2Kh 21:1-16; 2 km 33:1-9
Aseing tid zigi
?Yerusalem voobyu yi nanu" ri hang" nheig khyeug wigi
Nanu" shid re" hang" koug ngoug wa la".
Nanu" ri u" wa shid re".
Hang" se' theing: nyid goo" wa la"
Byumyu" yi nanu" gi ngoo ri ngeug he: pyam ago".
Nanu" gi ngoo ri nungthang phug khare" boem abye: go".
Houg: yoomo ngoo gi nanu" jhang jhen" re" wigi nanu" ri khyoeb pyam bye:.
Ciwim gari: ngoo gi nga" da" nheig yo: ziri zeing: ngheing" bye:.
Hau: mougmyid mo voogung khang" moo" moo:
Ngoo gi nanu" ri khoofoo: yhang: ti" lid khoug: khyoo: she: pyam sain" kaid bye:.
Ngoo gi nga" da" byumyu" yi nanu" ri phyo' shoin' pyam bye:.
Ngoo gi nanu" da" zooshang: yiri said pyam byid: bye:.
Ciwim gari: nanu" gi nanu" da" akhyeing" da" khyoo: ri ato" pyam yoomo nghoid.
Panglai: mo midcoo: tho' nanu" da" mougmyid mo cougmoo" yi je myo: nyid boem wa.
Ngoo gi nanu" da" zoolu: yiri zooyam kung" kung" nghoid uri said pyam wa.
Houglho: nyangnu" da" nya: myhi' bi" ri
kyi" khyeug kham zoo: nhang: wa.
Ngoo gi nyangnu" ri kyi" khyeug yau: khi" yo' gyoug dain pho" ja: khyo"
nyeigdain tung" shen" yhen bye:.
Zooshang: nyhed yug shid: pyam da" myhi' zeing gi so' moo" she: wigi
so' kho' kho' wigi mo, leung loo" bye:.
Nya: da" nyid" gung bidbang gi myen" moug: coid bue" byug abye:.
Nyang: gi ngi: yoem" wigi nheigloem: no jo, abye:.
Ngoo gi nanu" mo dei nyid shi" bang: ri
nanu" da" gyivoo yi wigi said pyam zi shau" nhang: wa.
Ngoo Aseing tid too bye:.
Aseing Ri Yeremia Khyang" Shed Khyoo:
10 Hid yhi' apyo: da" ngoo we". Nga" myhi' gi ciwim yoomo ngoo ri mougmyid moo khu: kaid lug la". Ngoo gi he: mougmyid moo: nyid da" yugkhang" moo" yo' myeing" myo: wigi ngeig go" ca" da:. Ngoo gi ngei we' ajhid" byid: yu"- subi" mo we' ajhid" yu yu"- nghoid loug we' yugkhang" moo" gi ngoo ri nheing" ago". 11 Aseing we" nang ri nyeing" za: adei byid: nghoid rigi nga" da" gyizoo yi yau: khi" shau" wigi nheigloem: thang nyid boem da" uri nyangnu" da" gungthid khyo" ngoo akyu" amho' byid: nghoid rigi nyangnu" nheing" da" nheing" khoin" joem dangain" bue" loo baja". ( 12 Joto' ri hang" ayo" khyau" pyam- je wigi gyid: mid" yo' lheig to" da" mougzhung: shoid mo joto' ri ayo" khyau".)
13 Aseing ngoo ri ?Ngoo gi nga" byumyu" yi hau: mougmyid khyi khang" moo" goem: sho' moo: shoid boem da" yooboo joem gang mo nyangnu" ri yooboo dam byid: wa shid re" gyivoo joem ri nhang: kaid byid: wigi nga" byumyu" yi da" yoo" zoo: yoo" shug khyoo: yo' jonu" ziyoo joem ri de" pyam loo" nhang: wa. 14 Ngoo gi nyangnu" ri nyangnu" ci: we' ase' da" mougmyid moo: nyangnu" da" gyivoo yiri dei byid: nhang: da:. Ciwim gari: nga" da" nheig yo: zigi myi: yo' du wigi hau: zigi apyaid atoo: moo: dab nyid wa? ga: tid da:.
15 Hau: thang: ngoo tid zigi ?Aseing we"- nang se' gyo: da:. Ngoo ri myid boin: wigi pang" yu la. Ngoo ri said wa soin bang: ri latoo: cang phug nhang: la. Nyangnu" ngoo ri said wa zi oung: doid sho' nheigloem: sheing: sheing: azeing: ci. Ngoo rue" zi shau" kham zo: zigi re" gang mo nghoid ziri myid boin: byid: la. 16 Nang ngoo ri dang: tid wigi ngoo gi dang: khoin" khang" moo" ri tam" gyoo: bye:. Myhang: thang Aseing Mangsoo we"- ngoo gi nang wigi seing: su: nghoid. Houglho: re" dang: khoin" joem gi nga" nheigloem: khoug: moo: gau yi ngei pyo: ziyo' bo jo, da:. 17 Ngoo gi subi" gootu: yo' yhe: ei". Pyo: ei" wigi ayo, anyid thang pyam. Ngoo gi re" da" amyeing" dang: ri phau" cang khyo" ngoo nyang: kyeing" nyid nyid lho: nheig yo: nyid. 18 Ngoo ciwim kyi" khyeug xo' kham: nyid wa la". Nga" dam joem gi ciwim ayo" byang" ge la". Nyangnu" ciwim ayo" ge la". Nang gi ngoo ri xung" gung ri kyug hei lo" da" gyid zoo: gyung: ri yhang: ti" nheigloem: thang nhang: wa ein: myid soin' to" la"? ein: tid bye:.
19 He: ziri Aseing doem tid zigi ?Nang doem tau" lo nghoid rigi nang ri ngoo doem shu" yu lho: nang ri nga" da" dei zoo: doem bue" loo wa. Nang gi ce: dang: kang: abo da" dang: tid wa gungthid phoug" dab da" lu dang: ri tid fu" kyo" nghoid rigi nang gi nga" lapi: doem bui" wa. Byumyu" yigi re" jhang doem tau" lo wigi nang gi nyangnu" jhang ayhi: ca" wa. 20 Ngoo gi nang ri gyid: mid" vang khyam: yhang: ti" geing: teing nhang: wa. Nyangnu" gi nang ri khaid zain: nghoid loug we' nang ri nyangnu" oung: pyam wa zi anghoid. Ngoo gi nang ri goem loem byid: wigi nang goug: nyu: tung" za: yo" nyid sho' nang yo' dage" nyid wa. 21 Ngoo gi nang ri akhyeing" bang: yo' athoug" akhyoug: bang: da" yoem: so' mo khyoid yu wa. Ngoo Aseing tid too" bye:.