14
Aseing gi ngoo ri moug: phang" bid lhab' hei' khyoo: yo' sen: wigi tid da:.
?Yuda mung" gi koug ngau nyid da:.
Nya: voomoo" joem gi yoem: neing: nyid ago".
Nya: da" mung" byu yigi myidgung moo kougshu: leung jo, ago".
Yerusalem gi pang" yu wa shid re" mho' yoid nyid da:.
Yoo" zoo: yoo" shug bang: gi nyangnu" da" dei zoo: yiri gyid yhe: yu nhang: ago".
Nyangnu" gi gyid teing thoem" khyoo: yhe: ago".
Nghoid loug we' gyid aboo nghoid da:.
Nyangnu" gi nyangnu" da" jhuang: akoem: ri doem ci: tau" lo da:.
Nyangnu" gi yoem: shoin: wigi nheig coid
lho: nyangnu" myonhoo: ri nghoeb ci: ago".
Moug: avoo yoomo myidgung kyug hei'
byug da" gang mo
Yoothung" koid zoo: bang: nheigloem: no ago".
Nyangnu" gi nyangnu" da" myonhoo: joem ri nghoeb ci: ago".
Jang: gyoin: moo vufu" ajo, loo: yoomo shoocid: myhi' gi
nya: zoo: shoocid: nu" ri khu: she: pyam too" kho' da:.
Loo zei: lam" joem gi bouggung cang yab jo, boem lho:
Khuidkoo" joem yhang: ti" so' kho' so' thang so' she: nyid da:.
Nyangnu" zoo: noem ajo, yoomo nyangnu" myo, amyang loo nghoid ago".
Nga" byumyu" yigi ngoo ri nyho: yoid ago".
?Ngoonu" da" yooboo joem gi ngoonu" ri yooboo zhug nghoid loug we'
Aseing we"- nang dangsoo" byid: too" byid: ziyo' dayhang: ti" ngoonu" ri pang" thoug yu la.
Ngoonu" gi nang mo vi: khyoo: myoo" sho' lheing: lheing: phug lo" boem bye:.
Ngoonu" gi nang ri thougtheung yooboo koid boem bye:.
Nang gi Israela da" dakhaid kyeing" da" myidbyu khyoo: nghoid da:.
Nang gi ngoonu" ri byo, yoin" lo" jang" mo khyoid yu su: nghoid da:.
Nang gi ciwim yoomo ngoonu" da" mougmyid mo being" voo yo" bui" wa la".
Ciwim yoomo damyen kyeing" yhoeb lid: lo" da" gyung: soo" su: yhang: ti" yo" bui" wa la".
Nang gi ciwim nyeigdain tung" shu" yu shoug" su: yhang: ti" pang" yu wa yoem: abo da" gyizoo: yhang: ti" bue" nyid la".
Aseing we" gyeing" nyang: nang gi ngoonu" yo' dage" nyid da:.
Ngoonu" gi re" byumyu" yi nghoid.
Ngoonu" ri ashe: pyam too" khoo'? ga: nyho: yoid da:.
 
10 Aseing gi he: byumyu" yi khyoo: ri tid da:. ?Nyangnu" gi ngoo mo phang: loo" wa gye" ngei boem ago". Houg: lho: nyangnu" gung ri avhoeb khang" nghoid ago". Houg: yoomo ngoo gi nyangnu" ri ayu" vhoo:. Ngoo gi nyangnu" koid shoid ziri myid boin: wigi nyangnu" da" yooboo joem gang mo nyangnu" ri yooboo dam byid: wa? ga: tid da:.
11 Aseing gi ngoo ri ?He: byumyu" yiri pang" yu nhang: wa shid re" nga" jhang amho'. 12 Nyangnu" zoo: noem jang" boem nghoid loug we' nyangnu" ri pang" yu wa mho' yoid thui: ri ngoo atam" gyoo: byid: wa. Nyangnu" gi ngoo ri nghe' ngei" xoin" yo' shivoo: xoin" ngei" byid: boem loug we' ngoo gi hau: joem ri alhoem: yu" ngei byid: wa. Hau: gungthid ngoo gi nyangnu" ri meing: zain: jang: moo said pyam lho: zooyoid shoug" ziyo' noophyoo" khyo" wigi said pyam wa? ga: tid da:.
13 Hau: thang: ngoo gi ?Gyi: sheung: thang Aseing we"- Lapi: yigi nang dangsoo" byid: too" bye: ziyo' dayhang: ti" meing: zain: khyoo: anghoid lang" zooyoid khyoo: ajo, wa ga: myid loem nyid boem yoomo ngoonu" da" mougmyid moo yug yo myenjham" zi za: dajo, wa ga: mung" byu yiri tid kyo" nyid ago" ein: tid bye:.
14 Nghoid loug we' Aseing doem tid zigi ?Lapi: yigi nga" da" myeing khyo" mhau' tid nyid boem ago". Nyangnu" ri ngoo anhang: kaid. Nyangnu" ri ngoo amyeing" daja: we' abyid:. Nyangnu" ri dang: dakhoin" lang" aji. Nyangnu" tid da" yoeb myang gi nga" jang" mo re" zi anghoid. Nyangnu" bue" loo wa ziri tag tid khyoo: joem gi ci: aphoug" adab da" nyangnu" se' ziza: danghoid da:. 15 Ngoo Aseing gi nang ri ngo wigi nhang: kaid zi anghoid da" bang:- nga" myeing khyo" dang: tid wigi he: mougmyid moo meing: zain: khyoo: yo' zooyoid khyoo: ajo, wa ga: tid da" hau: Lapi: yiri ngoo cikoid wa ein: ziri tid kyoo" wa. Ngoo gi nyangnu" ri meing: zain: jang: moo yo' zooyoid phang" khoug ziyo' said pyam wa. 16 Nyangnu" wigi he: joem ri tid kyo" too" bang: ri we' houg: yo' dayhang: ti" said pyam wa nyangnu" da" manggung joem ri Yerusalem fu" moo" khyoo: joem moo she: pyam sain" to" boem wa. Houg: lho: hau: joem ri koid: myhoeb pyam wa byu hang" anyid wa. He: zigi nyangnu" dangain" bang:- nyangnu" da" yhoem: seing: myhi' yi nyangnu" da" yuggi zoo:- myiyi: zoo: yi moo bue" lo boem wa. Ngoo gi nyangnu" da" akhyeing" da" moo" zoo" shid re" jhen: xab nhang: wa? ga: tid
17 Aseing gi mung" byu yiri nga" da" kougshu: khyoo: tid kyo" wigi he: ziri tid we' ga: ngoo ri amyeing" byid bye:.
?Nga" da" myojid" joem gi nyid" ri myen" ri ngoug byid byeung" jo, baja".
nyang: gi khanham we' ngoug zi athang baja" o".
Ciwim gari nga" byumyu" yigi dam xoo: sho' dam dab yu wigi gye" no byug abye: go".
18 Jang: gyoin: khyoo: ngoo thu yhe: lo" ri
meing: zain: jang: moo said pyam shau" da" byu yi da" manggung joem ri myang.
Voogung joem khyoo: ngoo vang yhe: ri
zooyoid shid: lo" nyid da" voobyu yiri ngoo myang.
Lapi: yi yo' khainjung yigi nyangnu" nya: moo" ri zei: nyid ago".
Nghoid loug we"- nyangnu" gi nyangnu" cikoid nyid ziri asi' goo" nghoid da? ga: tid nhang: da:.
19 Aseing we" nang gi Yuda ri bain sho' nyang: ngeug he: pyam bye: la".
Nang gi Ziun voobyu yiri ngheing" bye: la".
Nang gi ciwim yoomo ngoonu" noo agi loo sho' dam tab byid: la".
Ngoonu" gi yug yoo myenjham" khyoo: sho: nyid boem. Nghoid loug we' ge zi ci: daja: we' abue" loo nghoid da:.
Ngoonu" gi no byang" wa khyoo: ri myid lang" nyid nghoid loug we' hau: gungthid gyoug dain khyoo: za: bue" re" da:.
20 Aseing we"- ngoonu" gi nang ri yooboo shoid boem bye:.
Houg: lho: ngoonu" nya: da" yooboo joem yo' ngoonu" da" phoug" phyid" yi yooboo joem ri yhen: yu boem bye:.
21 Re" dangsoo" joem ri myid boin wigi ngoonu" ri ayu" ngi.
Re" da" ngi: shab khokham zhungtang jo, da"
Yerusalem dang moo ngi: yoem" khyoo: aci: loo byid.
Ngoonu" yo' koid to" da" dang: theing ri aphyo' pyam byid:.
22 Byumyu" yi da" yu phara" soolhoo: joem kha: zi we' moug: ri ayo" voo nhang: nghoid da:.
Mougkhung: gi nyang: nyang: kyeing" lid jhoem" moug: ri ayo" voo nhang: nghoid da:.
Ngoonu" gi nang moo myid byu nyid boem o" ngoonu" Aseing Mangsoo we"-
Ciwim ga: ri he: gu: ri nang koid da:.