13
Aseing gi ngoo ri zin: yung" pain" phyid" cu" yhe: qei cu" wa shid re" tid da:. Nghoid loug hau: ziri gyid moo ajoem wa shid re" ngoo ri pyeung: kaid da:. Houg: yoomo ngoo yhe: qei cu" bye:. Hau: thang: Aseing ngoo ri doem tid zigi ?Uphrad gyid lang khyoo: yhe: wigi lug khyung: mo duang: khuang" moo phyid" cu" ri yhe: shoung: to" we'? ga: tid da:. Houg: yoomo ngoo gi Uphrad gyid lang yham moo yhe: shoung: too" bye:.
Hau: thang: dayo, zoo: kyo: thang: ri Aseing gi ngoo ri Uphrad gyid lang khyoo: doem yhe: nhang: lho: hau: phyid" cu" ri yhe: yu nhang: da:. Houg: lang" ngoo doem tau" yhe: yu" ri hau: phyid" cu" shoung: to" da" joyoo ri yhe: myang- houg: ri hau: phyid" cu" gi yoem: byug wigi cu" agi loo: ziri yhe: myang.
Hau: thang: Aseing ngoo ri dang: doem tid. Nyang: tid zigi ?He: zigi Yuda da" nghoid boin: ziyo' Yerusalem da" gye" nghoid boin: khyoo: ri ngoo khasu" phyo' pyam wa ein: zi nghoid. 10 He: akhyeing" da" byumyu" gi ngoo ri phau" cang wa shid re" ngeug he: pyam ago". Nyangnu" gi goou" ri yhang: ti" nheigloem: thain: akhyeing" ashoeb boem ago". Houg: lho: yu phara" gootu: ri no' wigi dei byid: ago". Houg: yoomo nyangnu" gi he: cu" age da" phyid" cu" yo' dayhang: ti" bue" loo goo" wa. 11 Phyid" cu" gi phyid" doem: moo teing za: cu" ci: ziyo' dayhang: ti" Yuda mung" byu yi yo' Yerusalem voobyu yi we' ngoo ri teing za: gab vu, ci: goo" wa shid re" ngoo soin' too" bye: zi nghoid. Ngoo gi nyangnu" ri nga" byumyu" bui" nhang: wigi nyangnu" wigi ngoo ri coung" nghei ziyo' nga" myeing ri ngi: shab byid: baja" ein: he: ziri koid kaid zi nghoid. Nghoid loug we' nyangnu" gi ngoo ri aphoug" cang noug nghoid ago"? ga: tid.
12 Aseing Mangsoo ngoo ri - ?Yeremia we"- zabyid yhid: jhuang: khang" moo" zabyid yhid: kaid pyeing too" ca" ein:- Israela byumyu" yiri tid kyoo" we'. Nyangnu" gi zabyid yhid: jhuang khang" moo" gi zabyid yhid: yo' byeung" shoin: jo, ca" ziri nyangnu" se' ein: nyangnu" phug tid ri" goo" wa. 13 Hau: thang: ngoo Aseing gi nyangnu" ri shug yid boem baja" ein: he: mougmyid mo Israela byumyu" yi David da" amyed ashen yi mo khokham yi khainjung yi lapi: yi yo' Yerusalem voobyu dangain" bang: ri zabyid yhid: kaid pyeing byid: wa. 14 Hau: thang: ngoo gi jhuang: daloem: yo' daloem: ri ko' kho' pyam ziyo' dakhyoo" ti" nyangnu" ri mang: zoo:- zoo shang:- akhyen: loo: kho' mhoin' pyam wa. Nyangnu" ri ngoo said pyam wa ziri ce: nheig khyeug myid- seing" no myid anghoid lang" nheig myen: khyoo: yo' ayo" toem' pyam wa.
15 Israela byumyu" yi we"- Aseing gi tid too" bye:.
Nheigloem: nyhoem: khyo' lho: nya: dang: tam" gyoo: we'.
16 Moug: coid zi aci: ri" shi" ri
boem joem moo nanu" khyid: vhu" athung" shi" ri
Nyang: gi nanu" myid lang" nyid da" bidbang ri
no, seing" kyid: akoid pyam shi" uri
Nanu" da" Aseing Mangsoo ri ngi: shab byid: we'.
17 Nanu" atam" gyoo: nghoid rigi
nanu" da" nghoid boin: myid yoomo ngoo gi gau: da" joyoo moo ngoug wa.
Aseing da" byumyu" yi thung byu khyo" shu" loo" bye: yoomo
ngoo gi nheig khoo" sho' ngau wigi nga" ngoug byid joem yau loo" wa.
18 Aseing ngoo ri ?Khokham phoo yo' nya: myhi' ri nya: mitang: da" khokham zhung: thang mo gyoo" loo wa shid re" tid kyoo" we'. Ciwim gari nya: mitang: da" young" da" bidmug joem gi nya mitang: da" vhuloem mo gyoid gyo" loo" bye:. 19 Yuda mung" mougpyi: shoid voogung joem gi vang: to" zi shau" abye: go". Nyangnu" jhang hang" ayo" ju" vang yhi: nghoid da:. Yuda mung" byu dangain" bang: gi pyoung" she: lo" zi shau" abye:.
20 Yerusalem we" yu" we' re" gyivoo joem gi mougzhung: shoid khyo" gyoo" re" nyid abye: go". Nang ri loem wigi ab to" da" voobyu yi khakhyoo: lo" shang boem bye: la". Nang gye" lhung phau: da" re" voobyu yigi khayoo: la". 21 Re" bidnoem yi ein: nang myid loem nyid da" bang: wigi nang ri meing: zain: oung: pyam lho: re" adang moo vhoeb zo: boem ri nang khasu" ein: tid wa la". Nang gi zookhu: nyid da" myiyi: yo' dayhang: ti" noo wa zi nghoid. 22 He: gu: dangain" ciwim yoomo nang moo bue" lo la" ga: myid ri ciwim re" byimi joem ri lang: ceig pyam byid: lho: nang ri doin: zeig rue" zi shoug" rigi hau: zigi re" yooboo sung dam xoo: yoomo nghoid da:. 23 Etiopi byu dayug gi nya: shooyid avoid ri yo" thid pyam wa la". Anghoid lang" zooloo: gi nya: gung mo atug atuang ziri yo" byug nhang: wa la". Hau: ziri yo" koid nghoid rigi akhyeing" zi mo lid: wigi ci: ase' koid da" nanu" ri jo ziri koid wa shid re" yo" jhau" yu boem wa. 24 Aseing gi dain" pyoid yoo mo lid: wigi moid tang" pyam da" khoofoo: ri yhang: ti" nanu" ri khaid sain" pyam loo wa. 25 He: zigi nanu" da" vhu" pi: lo, kyo' nghoid loo wa ga: nyang: tid to" abye:. He: zigi nanu" ri nyang: koid wa ga: myid phyed too" bye: zi nghoid da:. Ciwim gari nanu" gi nyang: ri to" myhid pyam wigi yu phara" joem ri loem khau: abye: go". 26 Aseing nyang: nanu" ri byimi khyoid pyam byid: lho: nanu" ri sho' phu" nhang: loo wa. 27 Nyang: gi nyang: ngheing" da" moo" zoo" joem ri nanu" koid boem ziri shau" myang byid: bye:. Nanu" gi yhoem: kyoo" cang" da" yhoem: seing: myhi' ri yu" mhain: da" yuggi yhang: ti" anghoid lang" myang: myhi' thang: khyoo: cang mhain: yab yen" da" myang: loo: yhang: ti" bouggung joem moo yo' janggyoin: cang jo, da" tungbau yu phara" joem thang: khyoo: cang yhe: lo" ziri nyang: shau" myang byid: bye:. Yerusalem voo byu yi we"- nanu" gi joem: lo" abye:. Nanu" gi khanham she' gyeung" shang: loo goo" wa la".