8
1 (Hau: thang: ri nyangnu" gi nyang: tu: nya: yhoem: khyoo: yug khang" moo" lo" boem. Aseing Yesu gi zhainloin: boem khyoo: yhe: lo".
2 Hau: thang: nab kyoo ri Noku Yhoem: Moo" moo dalheung: dam ju" lo" da" uri byu myoo" sho' mo, gi Aseing jhang moo re" lheung khoem byid ago". Yesu gi: zhoung: jo, lho: houg: bang: ri jhau" byid: nyid.
3 Tarha" sara: yi yo' Pharishe bang: gi myiyi: dayug ri Yesu jhang moo khe: shu" re. Hau: yug gi soem" lid shoo: go" nyid jangmo shau" myheug da" myiyi: nghoid. Tarha" sara: yi yo' Pharishe gi- hau: myiyi: ri dangain" mo, da" shidkhoin" moo yab jo, nhang: lho:
4 Aseing Yesu ri Sara: we"- He: myiyi: gi soem" lid shoo: go" nyid jangmo myo, moo gyo, nyang: shau" myheug boem bye:.
5 Moshe tarha" moo sang: to" zigi hid: yhangti" myiyi: rigi- luggo, wigi du" said pyam ca"- ga: ngoonu" ri tarha" byid: to". Yesu ri nang khasu" tid noug: la"? ga: myid: boem.
6 Nyangnu" gi Yesu ri yooboo zhug lho: myheig wa shid re. Pyi: sho: nyid boem. Nghoid loug we' Aseing Yesu gi goeb' ci: lho: myidjang moo lo, nyhau" wigi thau" lhid" nyid.
7 Houg: bang: gi doem phoug myid myid koid nyid boem. Houg: lang" Yesu gi to' yu" kaid lho: Nanu" mo ce: yooboo adab su: gi nyang: ri luggo, yo" xangshid" du" ge' ga: amyeung" byid: kaid.
8 Hau: lho: myidjang moo doem goeb lho: thau" lhid" nyid.
9 Houg: bang: gi Hau da" amyeung" ri shoug" gyoo: lang" gi apyaid je gyi: mo, mo shi"- dayug thang: moo dayug- thu' lo" byug boem ago". Yesu yo" houg moo yab jo, da" myiyi: myhi za: date: nyid lo.
10 Yesu gi doem lheung: yu kaid lho: myiyi: myhi nang we"- houg: bang: gi khayoo: lo? Nang ri yooboo dam: byid wa mo, dayug we' anyid loo: rhe" ga: myid.
11 Houg: lang" hau: da" myiyi: gi Aseing we" dayug we' azheung: nyid khari" loo:- ga: phougtu.
?Yesu gi Ngoo we' nang ri yooboo dam abyid: loo" we' yooboo adoem koid loo: lhe" ga: tid kaid.?
12 Dalheung: ri Yesu gi hparishe yiri ?Ngoo gi mougmyid: bidbang nghoid. Nga" thang: moo cang loo su: gi apyaid ato: kangso bidbang ri yo" yu lho: mougcoid khoug: moo khanham we' asoo" loo: wa zi nghoid? ga: tid.
13 Pharishe yi gi Nang gi nanya: khyoo: nanyang: sagsi kham: nyid. Houg: yoomo re" da" sagsi dang: gi adeung ga: tid nyid boem.
14 Yesu phougtu" zigi ngoo nya: khyoo: ri ngoo sagsi kham: nghoid loug we' nga" sagsi dang: gi deingmain" nyid. Khasu" wim ga: ri ngoo gi khayo, re" lho: kha: khyoo: doem yhe: lo" nyid zi ngoo se' nyid. Nanu" gi ngoo khayo, re" ziri we' kha: joyoo khyoo: doem yhe: lo" nyid ziri we' ase' boem.
15 Nanu" gi byu da" akhyoo" khyo" dang: phyed boem- Ngoo gi hang" ri we' aca: joeb- dang: aphyed.
16 Nghoid loug ngoo gyeing" nyang: dato' dang: phyed nghoid rigi ngoo dayug kyeing dang: phyed zi anghoid. Ngoo ri nhang: kaid da" phoo Mangsoo gi ngoo yo' dage" nyid yoomo ngoo je: yang: dang: phyed khyoo: gi deingmain" nyid.
17 Nanu" da" tarha" moo lhid" to" jang" moo sagsi: eig yug joeb lang" gi deingmain" bye: ga: tid to".
18 Ngoo gi ngoo nya: khyoo: ri sagsi kham lho:. Ngoo ri nhang: kaid da" Pho we' nga" da" khyoo: ri sagsi kham: byid: nyid ga: tid.
19 Houg: bang: gi Re" Phoo khayoo: nyid ga: myid: boem.
?Nanu" gi ngoo ri we' nga" phoo ri we' ase' boem. Gyeing" nyang: nanu" ngoo ri se' nghoid rigi nga" phoo ri we' si' goo" zi nghoid? ga: doem sho' kyoo.?
20 Yesu gi He: da" Mungdang: ri- Noku Yhoem: Moo" khoug: Alu: kham: da" koidzei: to" yab moo kho" kyo" jhau" byid: uri tid da" mungdang: nghoid nyid. Nghoid sho' loug we' Yesu da" ayo, aju" shi" yoomo hang" we' Yesu ri amyheig atei" shi.
21 Dalheung: ri Yesu gi ngoo gi thu' loo" wim bye:. Nanu" gi ngoo ri shoo: boem wa. Nanu" gi nanu" nya: yooboo mo, shid: boem wa. Ngoo lo" da" joyoo moo nanu" ayo" cang loo wa" ga: tid.
22 Yuda zoug: myeing: ci: mo, gi ngoo lo" da" joyoo moo Nanu" ayo" loo" ga: nyang: tid bye:. Nyang: gi nya: gung nyang: said shid: wa ga la lha"? ga: tid go" nyid boem.
23 Yesu phougtid zigi ?Nanu" gi mougmyid mo byu yi nghoid. Nghoid loug we' ngoo gi mougkhung: khyo" ri" su: nghoid. Nanu" gi he: mougmyid mo byu nu" yi nghoid boem. Ngoo koem gi he: mougmyid mo byu anghoid.
24 Houg: yoomo nanu" gi nanu" da" yooboo moo shid: lo" boem wa ein: wigi ngoo tid bye:. ?Ngoo gi ngoo nghoid nyid ziyo' dakhyoo" ti" ngoo nghoid ziri nanu" aloem" boem rigi Nanu" gi nanu" nya: yooboo moo shid: lo" boem wam bye?? ga: tid.
25 Houg: bang: gi nang gi hang" nghoid ga: myid: boem. Yesu gi Ngoo hang" nghoid zi xangshid" mo nyang: ngoo tid kyoo" bye:.
26 Nanu" da" khyoo: yo" sen: lho: ngoo tid kyoo" ca" da" khyoo: soo" soo" bo. Nanu" ri yooboo foin: wa khyoo: we' myoo" sho' bo. Ngoo ri nhang: kaid da" Aseing gi dang main" da" Aseing danghoid. Hau: Aseing jhang mo ngoo shau" gyo: da" khyoo: ri za: he: mougmyid byu yi ri ngoo tid kyo".
27 Yesu gi nya: pho da" khyoo: tid nyid ziri houg: bang: gi ase' gyoo.
28 Houg: yoomo Yesu gi byu nya: zoo: ri myidjang moo tu: zhug lhang" too" lang" she- ngoo gi hang" nghoid nyid ziri nanu" yo" si' zi nghoid. Ngoo gi ngoo ngoonya: amyeung" akhang" khyo" ce: moo" we azei:- Nga" phoo nhang: kaid ziyo' dakhyoo" ti" za: ngoo dazei: ziri we' nanu" se' loo wa.
29 Hau: tho' moo gootu: Ngoo ri nhang: kaid su" gi ngoo yo' dage" nyid. Hau: yug vho: da" moozoo" ri ngoo gi ayo, bain sho' moo zei: nyid wigi hau: Aseing gi ngoo nyang: kyeing" ri ashe: lhei" too ga: tid kyo".
30 Hid: su" ga: tid da" dang: ri shau" gyo: da" byu myoo" sho' mo nyang:- Yesu ri loem" jeing" lo boem ago".
31 Aseing Yesu gi nyang ri loem" jeing" loo mo, ri Nanu" gi ngoo jhau" byid: khyo" cang zei: loo" lang" gi nga" da" cangzoo: agyeing" yi nghoid bye:.
32 Nanu" gi deingmain" da" zi ri we' ci: wa. Hau: deingmain" da" zi gi nanu" ri lhoid pyoin kaid wa zi nghoid ga: tid.
33 Hau: da" byu yi gi Ngoonu" gi Abraham da" nya: myid nya: zoo: yi nghoid. Khanham we' sube" join abue" yu" boem- Nanu" ri lhoid pyoin kaid wa ein: nang ci: koid tid ga: myid boem.
34 Aseing Yesu nyangnu" ri tid zigi Deing" deing nanu" ri ngoo tid ba- Yooboo shoid vhang: mo, dangain" gi yooboo da" join nghoid.
35 Join, gi hau: ekoin deungkhu: daloem: moo pyaid goin" nyid zi anghoid nghoid loug nya: zoo: nghoid su: gi hau: deungkhu: moo khanham we' danyid nyid wa nghoid.
36 Houg: su" nghoid yoomo nya: zoo: gi nanu" ri loid byoin nhang: nghoid rigi nanu" deing" deing loid byoin loo" wa.
37 Nanu" gi Abraham nya: myid: nya: zoo: nghoid zi ngoo se'- Houg: su" nghoid loug we' nanu" gi nga" da" jhoug" myeing" ri akham: yu noug: yoomo ngoo ri said wa ga: yoem: kaid nyid boem.
38 Ngoo gi nga" pho jhang mo, yo" se' yu gu: dangain"- nanu" ri tid kyoo" bye: houg: nghoid loug we' nanu" gi nanu" da" nya: phoo tid ziri za: da cang nyid ago".
39 Nyangnu" phougtu zigi ngoonu" dangain" mo, nya: phoo gi Abraham nghoid ga: tid boem.
Aseing Yesu gi Nanu" gi Abraham da" nya: myid nya: zoo: yi nghoid boem rigi Abraham yhangti" koid boem zi nghoid.
40 Mangso jhang mo shau" gyo: yu da" deingmain" da" moo" ri nanu" ri kho" kyoo" nghoid loug ngoo ri said wa shid re" nanu" yoem kaid nyid ago". Abraham gi houg su" alhoung' koid.
41 Nanu" gi nanu" da" nya: phoo nyang: yhangti" koid nyid boem ga: Yesu tid.
nyangnu" doem phoug tid zigi ngoonu" moo Mangsoo ga: da" phoo dayug kyeing" date: nyid lho. Ngoonu" we' nya: zoo: gyeing" yi nyang: nghoid bye: ga: tid.
42 Yesu nyangnu" ri ?Mangsoo gi nanu" da" nya: phoo gyeing" nghoid rigi nanu" ngoo ri jheddab goo" wa. Khasu" wim gari ngoo gi Mangso jhang mo gyoo" lo lho: akhid" hid: moo re" ju" nyid. Ngoo nyang: vho: khyo" re" zi anghoid. Phoo Mangsoo gi ngoo ri nhang: kaid.
43 Ngoo tid ziri nanu" ci: wim ase' gyoo: go". Nanu" moo nga" da" mungdang: ri gyo: yu wa nheigloem: nyang: aboo yoomo nghoid boem ago".
44 Nanu" gi nya: phoo yu satan da" nya: zoo: nghoid yoomo nanu" nya: phoo vho: da" khyoo: moo cang koid nyid boem. Satan gi xangshid" mo nyang: byu said da" sarhi' nyang: nghoid. Nyang: moo deingmain" zi ci" we' aboo nghoid yoomo deingmain" ziri asi- se' mhau' fain" su: nghoid. Nyang: gi mhoug mo, dangain" da" nya: phoo nghoid yoomo nya: void voo: yo' dakhyoo" ti" mhoug nyid.
45 Nghoid loug Ngoo gi deingmain" da" dang: ri za: tid ri ngoo ri ci: wim aloem" jeing" go"-
46 Ngoo gi yooboo yoo" su: nghoid ein: hang" sagsi yo" shoo go" ngoo gi deingmain" da" dang: ri za: da tid ri nanu" ci: wim- aloem" jeing" go".
47 Mangso jhangmo ju" ri" su: gi Mangso da" dang: ri tam" gyo: nyid nghoid loug nanu" gi Mangso jhang mo anghoid boem yoomo atam" gyo: zi nghoid ago".
48 Nyangnu" Yesu ri Nang gi Samari byumyu" dayug nghoid lho: yu vang ci: su: nghoid ga: wigi ngoonu" tid dang: shoid la"? ga: myid: boem.
49 Yesu phougtu" zigi ngoo gi yu vang ci: su: anghoid. Ngoo gi nga" phoo ri phau" myang: nghoid loug we' nanu" gi ngoo ri aphoug" amyang.
50 Ngoo gi ngoo nya: myonhoo: ri ngoo ashoo: nghoid loug dayug su: gi nga" da" myonhoo: ri shoo: byid: lho: nga" shoid khyoo: dang: phyed byid: nyid.
51 Deing" deing nanu" ri ngoo tid ba- Nga" da" jhoug" myeing" dang: ri tam" gyo: yu su: gi khanham we' shid: wa zi anghoid ga: tid.
52 Nyangnu" gi Nang gi yu vang ci: su: dayug nghoid da" khyoo: ri akhid" ngoonu" yo" si' bye:. Abraham gi shid: lid: loo" bye:- Lapi: yi we' shid: lid: loo" bye:. Houg: su" danghoid' ri nang gi nga" dang: tam" gyo: yu su: gi khanham we ashid: wa ga: tid.
53 Ngoonu" da" phoo Abraham gi shid: lid: loo" bye:. Abraham tho' moo nang gi je gyi: la". Abraham tho' je gyi: ein: atid Lapi: yi we' shid: lid: lo" boem bye:- Nang gi nanya: gung ri hang" nghoid ein: myid nyid la"? ga: zheing: myid: boem.
54 Yesu phougtu" zigi Ngoo gi ngoo nya: gung ri coung" nghei nyid rigi nga" myonhoo: ngeilang: gi akoem: za danghoid' wa. Ngoo ri coung" byid: su: gi nanu" lhoung: tid da" nanu" da" Mangsoo ga: su: nga" phoo danghoid.
55 Hau: da" Mangsoo ri nanu" ase' boem. Nghoid loug ngoo koem gi se- gyeing" nyang: ngoo asi ein: tid nghoid rigi ngoo gi nanu" yo' dakhyoo" ti" mhoug su: bue" loo" wa. Ngoo gi phoo ri gyeing" gyeing" si' yoomo nya: da" dang: ri tam" gyo: nyid.
56 Nanu" da" nya: phoo Abraham gi ngoo ju" ri" wa da" ayo, ri shau" myang wa ziri myed nyid. Hau: ziri nyang: shau" myang yoomo tid loo a ung: gau yi nyid bye:.
57 Nyangnu" gi nyang: ri Nang gi apyaid wim: xi: zain: lang" aboo shi"- khasu" koid wigi Abraham ri myang yu" wa lha" ga: tid boem.
58 Yesu doem phougtu" zigi Deing" deing nanu" ri ngoo tid ba- Abraham akhu: ri" shi" mo ngoo nyid nyid bye: ga: tid.
59 Houg: lang" nyangnu" gi Yesu ri du" wa ga: luggo, joem: ri koid: zei: ci: boem. Nghoid loug we' Yesu gi Noku Yhoem: Moo" khoug: mo gau" lheing thu' lo" byug.