21
1 Hau: thang: ri Yesu gi Tiberi gyid nung" yam moo cangzoo: yi ri nya: gung dalheung: doem thu' shug. Thu' shug da" aved' gi hid: su" nghoid nyid.
2 Simun Petru- Thoma (Galile moug: Kana voobyu) Nathanela- Zebedi da" nya: zoo: yi yo" cangzoo: gootu: eig yug gi dage" nyid boem ago".
3 Simun Petru gi gootu: ri ngoo wimdo, kuang yhe: loo" wa ga: tid.
?Houg: bang: gi ngoonu" we' bo cang ri" wa ga: tid boem.? Houg: yoomo nyangnu" gi lhid yo' wimdo, kuang thu' yhe: lo" boem. Nghoid loug we' hau: myen goin" nyangnu" ci" we' ashau" boem.
4 Bidxain" lo da" uri Yesu gi gyid yam moo yab jo, nghoid loug we' cangzoo: yi gi Yesu nghoid ziri: ase' boem.
5 Hau thang: ri nyang:- nyangnu" ri zoo: lu: yi we"- nanu" ci: ayoo" shi" goo" rhe" ga myid:.
houg: bang: gi ?Ci: ayo" boem o"? ga: phoug tid.
6 Yesu gi nanu" lhid lo, yo shoid khyoo:- goin re" du" yu" ge' nanu" wimdo, shau" kuang boem ago" wa ga: tid. Aseing tid ziyo' dakhyo" ti" nyangnu" gi goin ri du" khyo' kaid lang" wimdo, myo: yoo" yoomo ayo" doem lang thoid yu boem ago" da.
7 Yesu jheddab da" cangzoo: phoo gi Aseing danghoid' nhung: o" ga: Petru ri tid kyo". Aseing nghoid ga: zi ri shoug" gyoo: lang" Petru gi nyang: khyoid to" da" byi: ri gung moo baid yeig lho: wigi gyid nung" khyoo: byam gyoo" loo" khare". Khasu" wim gari nyang gi byimi khyoid pyam lho: moo" zei: nyid yoomo nghoid.
8 Cangzoo: gooji gi lhid yo' gyid yam khyoo to" lho: wimdo, byeung" sho' bo da" goin ri lang she: yu" boem. Nyangnu" gi gyid yam mo wim: xi: lam' koo: ve: jangmoo zheing: nyid boem.
9 Nyangnu" gi lhid tho' mo gyo" lho: tung: gung moo ju" lo lang" zooyho' ri we' myi: gyu: moo kang: da" wimdo, ri we' lo" myang boem
10 Yesu gi nanu" akhid" yo" da" wimdo, dayham" ri ci: loo ge" ga tid.
11 Simun Petru gi lhid tho' moo do, lo" lho: wimdo, zeing: joem yo" byeung" jo, da" goin ri tung: gung ju" sho' she: yu da. Wimdo, dasho: wim: xe soem" du: bo da:- wimdo, houg: myhoo, myoo: nghoid loug we' goin gi ajeig loo.
12 Yesu gi lo zoo: ge'? ga: nyangnu" ri lhoung nyangnu" da" Aseing nghoid ziri se' boem yoomo cangzoo: yi kha: yug we' nang hang' nghoid lha"? ga: avoem" myid: boem nghoid da.
13 Yesu gi nyangnu" nyid da" jangmoo yhe: lho: zooyho' ri yu wigi nyangnu" ri byid. Wimdo, ri we' houg: su" yu lho: byid.
14 He zigi nyang: shid: jang mo doem dei to'' lo thang ri cangzoo: yiri gung thu' shed da" zigi he: lheung: yo" ri soem" lheung: nghoid bye:.
15 Cangzoo: yi bain zoo lang"Yesu gi Yohan nya: zoo: Simun we"- hid: bang: jheddab tho' moo nang ngoo ri je jheddab la"? ga: Simun Petru ri myid.
Simun gi nghoid Aseing we"- nang ri ngoo jheddab zi nang se' ga: tid.
16 Yesu dalheung: doem tid zigi Yohan nya: zoo: Simun we"- nang ngoo ri jheddab la"? ga: doem myid.
? Petru gi nghoid Aseing we"- nang ri ngoo jheddab zi nang si' gu nghoid ga: tid? Aseing Yesu gi nga" yang joem ri zung" nyid we' ga: tid.
17 Soem" lheung: ein: lheung: we' Yesu gi Yohan nya: zoo: Simun we"- nang ngoo ri jheddab la"? ga: doem myid. Hid: su" soem" lheung: ju" sho' myid: nyid yoomo
Petru gi nheig koug lo wigi Aseing we" nang gi ce: noem ri we' dangain" si' su: nghoid- nang ri ngoo jheddab zigi nang se' ga: doem tid. Yesu gi nga" yang joem ri zung" nyid' we' ga: doem tid.
18 Deing" deing nang ri ngoo tid zigi nang gi ngi shi" da" uri ri ri soin' ci: lho: loo" nau jangmoo loo" se' nyid. Mang loo" lang" gi nang gi eig lo, goin" tu: lho: subi" gi nang ri tei" wigi nang anau lo" da" joyoo khyoo: shu" lo" boem wa ga: tid.
19 (Hid: su" ga: tid jang" moo Petru gi ci: te" da" shidgyoin yo' Mangso da" myonhoo: phung" Yoeb thoin" pang byid: wa da" khyoo:- Yesu tid shed' zi nghoid.) Hid: su" ga: bain tid lang" Petru ri nga" thang: moo cang we' ga: Yesu tid.
20 Petru gi lheung: yu" kaid da" uri nya: thang: moo Yesu jheddab da" cangzoo: phoo ri myang. Hau: yug gi myen xoin: zoo: uri Yesu da" nam moo nghe: to" lho: Aseing we"- Aseing ri gyivoo yi da" lo, moo ab pyam wa su: gi kha: yug nghoid wa lha"? ga: myid su: nyang: nghoid nyid.
21 Petru gi hau: da" cangzoo: phoo ri myang lang" Aseing we" he: yug gi ci: te" su: nghoid lha"? ga: Yesu ri myid.
22 Yesu gi ngoo doem gyoo" re" da" bidnyid ju sho' nyang: ri dei nyid nhang: nau nghoid rigi houg: gi nang yo' ci: sen: lha". Nang gi nga" thang: cang we' ga: tid.
23 Houg: su" nghoid yoomo hau: cangzoo: phoo gi ashid: loo: wa ga: da" lu dang: gi cangzoo: yi da" akhoug: moo byo sain" loo" bye nghoid loug we' Yesu gi ?hau: cangzoo: phoo gi ashid: loo: wa? ga: tid nau zi anghoid. Ngoo doem gyoo" lo da" bidnyid ju" sho' nyang: ri dei nyid nhang: nau nghoid ri hau: zigi nang yo" ci: asen: la" ein: wigi date: tid zi nghoid.
24 He da" khyoo: ri lhid" too" su: gi hau: khyoo: ri tid da" cangzoo: phoo nyang: nghoid bye:. Nyang: tid da" khyoo: joem gi deingmain" nyid ziri ngoonu" se'.
25 Yesu zei: da" moozoo" goo tu:myoo" sho' jo, shi". Hau: zei: to" da" moozoo" dangain" ri daja: thang: moo daja: lhid" to" nghoid rigi mougmyid gyab, goin" jang" moo hau: mougsoug" pug joem too" wa da" joyoo lang" jo, loo: zi anghoid ein: ngoo myed o".