20
(Mat 28:1-8; Mar 16:1-8; Luk 24:1-12)
1 Akhid" Labain nyid" myo, myang zoo" ri Magadala Mari gi loeb' moo re" yu" da" uri loeb' khoem" mo da" lugloem: tu: se: pyam to" ziri yhe: myang.
2 Nyang: gi Simun Petru yo' Yesu jheddab da" cangzoo: yi jhang khyoo: gei lo" lho: ?Aseing ri loeb mo wigi yu lo" byug boem bye:- khayoo: too" go" la'- asi? ga: lo" tid kyo".
3 Houg: thang" ri Petru yo" goo tu: cangzoo: phoo gi loeb' khyoo: yhe: lo" ago".
4 Hau: eig yug gi dage" gei yhe: loo" nghoid loug- goo tu: cangzoo: phoo gi Petru tho' moo je yo" gei yoomo loeb' moo xangshid" ju" yhe.
5 Nyang: gi yhe: goeb' yu" kaid ri loeb' khoug: moo pain" gyo" jo, ziri date: myang. Nghoid loug we' nyang: gi loeb khoug: moo avang loo" loo: za: nyid nyid.
6 Nya: thang: moo cang ju" re" da" Simun Petru gi ju" re" yo' loeb' khoug: khyoo: dain: vang lo" ri pain" khyoid: khyo to" ziri we'
7 Yesu da" vhuloem moo thoeb' da" vhuthoeb gi goo tu: joyoo moo gyo" jo, ziri we lo" myang.
8 Hau: thang: ri loeb' moo xangshid" ju" re" da" gootu: cangzoo: we' loeb' khoug: moo cang: vang lo" yu" da" uri houg: moo bue" lo da" khyoo: ri myang yoomo loem" jeing" loo bye:.
9 (Yesu gi shid: jangmo doem dei to'' loo" wa ga: da" jhoem: mungdang: ri houg: bang: akhid" ju" sho ase' gyo: boem shi.)
10 Hau: thang: ri cangzoo: eig yug gi doem tau" lo" ago".
(Mar 28:9-10; Mar 16:16-33)
11 Mari gi loeb nam moo yab lho: ngau nyid. Nyang: gi ngau zoore loeb khoug: moo goeb' yu" kaid da
12 Yesu da" gungdu: vhuloem yang: moo moug: lagyoo: dayug khyid: thang: khyoo: dayug- moug: lagyoo: eig yug- bang: bang: phyu: da" byimi void ci: lho: zhoung: jo, ziri myang.
13 Hau: moug: lagyoo: eig yug gi myiyi: zoo: we" ci: wim ngau nyid lha"? ga: myid.
Mari koem gi nyangnu" ?Nga" Aseing ri yu lo" byug bye:. Nyangnu nyang ri khayoo: to" zi ngoo asi ga: tid.
14 Houg: su" tid lho: thang: khyoo: lheung: yu" kaid ri Yesu yab jo, ziri myang. Nghoid loug we' Yesu nghoid zi asi.
15 Yesu gi ?Myiyi: zoo: nang we"- ci: koid ngau nyid. Nang hang" ri sho: yen? ga: myid.
Houg: lang" Mari gi Yesu ri khyam: zung" su: ga: jho: lho: ?Nheig boo phoo we" nang nyang ri yu lo" nghoid rigi nang kha joyoo moo to" zi ngoo ri tid kyoo" we' ngoo nyang ri yhe: yu ci: loo" wa.?
16 Aseing Yesu gi ?Mari we" ga: yoid.
Houg: lang" Mari gi lheung: yu" lho: Hebre myeing" khyo" Raboni? ga: tu". (Raboni ga: da" dangkang: gi sara: ga: da" dang: nghoid.)
17 Yesu gi ?Ngoo ri azei: ci:- ngoo gi nga" pho jhang khyoo: ashau" do, loo" shi"- nghoid loug we' nga" mangnhung" bang: jhang khyoo: yhe: lho: nga" phoo ga: da" Nanu" da" nya: phoo- nga" Mangsoo ga: da" nanu" da" Mangso jhang khyoo:- ngoo doem tau" loo" loo: wa da" khyoo: ri tid kyoo" ge'? ga: tid.
18 Houg: yoomo Magadala Mari gi cangzoo: yi jhang khyoo: lo" lho: nyang: Yesu ri nyang: myang khoo bye: da" khyoo: yo' nyang: nyang ri pyeing: kaid da khyoo: ri lo" tid kyo" Aseing khasu" ga: pyeing: kaid da" khyoo: ri lo" tid kyo".
(Mat 28:16-20; Mar 16:14-18; Luk 24:36-49)
19 Cangzoo: yi gi Yuda zoug: myeing" ci: mo, ri gyug yoomo Labain myen, gamgung yoo ri yhoem: khoem" myhid" pyam lho: zeung: foem: nyid boem. Hau: da" uri Yesu gi ju" lo lho: nyangnu" da" mo, phung: gung moo lo yab jo. Nanu" moo myenjham" ngei pyo: khyoo: dajo, nyid baja" ga: tid.
20 Houg: su" bain tid lang" gi Yesu da" lo, yo nam joug ri cangzoo: yi ri toin" shid. Cangzoo: yi gi Yesu ri shau" myang boem yoomo gau yi nyid boem.
21 Hau: thang: ri we' dalheung:- Yesu gi ?Nanu" moo myenjham" khyoo: dajo, jo, baja" ga: nga" phoo gi ngoo ri nhang: kaid ziyo' dakhyoo" ti" nanu" ri we' ngoo nhang: kaid? ga: tid.
22 Houg: su" bain tid thang: ri Yesu gi cangzoo: yi da" tho' moo so' moid kaid lho: ?Gyeungshang: da" Venyi: ri kham: yu ge'? ga: tid.
23 Nanu" gi sube" da" yooboo ri khyoid pyam byid: ri Nyangnu" gi yooboo gyoid loo" wa zi nghoid. Nanu" wigi akhyoid byid: nghoid rigi nyangnu" da" yooboo gi khyoid pyam shau" wa zi anghoid ga: tid.
24 Yesu jure" da" ayo, moo (Zoo: zoem" ga: myheing da") cangzoo: daxe: eig yug mo, dayug nghoid da" Thoma gi cangzoo: yi yo" dage" anyid eung:.
25 Houg: yoomo cangzoo: byencang" yi gi Yesu ri ngoonu" myang bye:- ga: lhoem tid kyo" boem.
Thoma gi lo, mo da" ten" zei: baid khoo: yo' nam joug mo da" dam, khoo: ri za: ashau" soeb' yu" rigi ngoo aloem" ga: tid.
26 Hau: thang: shed nyid" koo: myang" ri cangzoo: yi gi yhoem: khoug: moo doem zheing: foem: to" boem. Thoma we' dage" nyid. Khoem" dangain" ri myhid" too" nghoid loug we' Aseing Yesu gi vang lo wigi nyangnu" da" mo, phung: gung moo yab jo, lho: nanu" moo myenjham" khyoo: dajo, jo, baja" ga: tid.
27 Hau: thang: Thoma ri re" lo, nyoug" yo" hid: moo thau" yu" we' nga" lo, joem ri we yu" we' Re" da" lo, yhoin" kaid lho: nga" nam joug moo soeb yu" we' aloem" jeing" loo: loem shoid khyoo: akoid. Loem" jeing" nyid we' ga: tid.
28 Thoma gi Nga" Aseing- Nga" Mangsoo- nang nghoid bye: nhung: lha"? ga: phug tu".
29 Aseing Yesu gi Nang gi ngoo ri myang lho: daloem" la". Ngoo ri amyang loug loem" jeing" mo gi ngi: lho' boem wa" ga tid.
30 Yesu gi he: da" mougsoug" moo abo lhid" to" da" mau" pho" alhoo: again myoo" sho' ri nya: cangzoo: yi da" Shid khoin" moo toin" shid bye:.
31 Nghoid sho' loug we' Yesu gi Mangso da" nya: zoo: Meshia nghoid da" khyoo: ri nanu" loem" jeing" loo wa ziyo' nanu" nyang ri loem" jeing" lho: kangso' yoo" wa shid re" he khyoo: joem ri lhid" to" zi nghoid.