19
Hau: thang: ri Pilaid khokham gi Yesu ri khe: shu" loo" nhang: lho: gyoem thoung" wigi yug nhang. Gyizoo yi gi zu: mug ri koid yu lho: Yesu da" vhuloem moo zhung" byid. Byini sheing: ri we' nyang: ri foid byid: to". Nyangnu" gi Yesu jhang moo tain" re" boem lho: ?Yuda khokham phoo kang: sheing: nyid baja" o"? ga: tid zoore thoin: byid: boem ago".
Pilaid khokham gi nghi: khyoo: dalheung: thu' lo" lho: mung" byu yiri ?Yu" ge! He: yug ri said pyam wa shid re" ngoo ce: yooboo we' amyang khyoo: nanu" we' si' wa shid re" nanu" jhang khyoo: ngoo shu" thu' loo wa? ga: tid. Aseing Yesu we' zu: mug ri zhoung" ci: lho: byini sheing: ri void ci: wigi thu' re. Pilaid khokham gi ?Yu" ge' he: yug nyang: nghoid bye:? ga: tid.
Khainjung agyi yi yo' Noku Yhoem: Moo" zung" lhug da" gyizoo: yi gi Aseing Yesu ri myang lang" nyang: ri pyang" zeing: moo baid jen" said pyam ge' ga: nyho: phau kaid ago".
Pilaid khokham gi ?Nanu" nyang: nyang: ri khe: shu" lo" lho: pyang" zeing: moo baid jen" said pyam ge' nyang: ri shid: dam byid: wa zigi ngoo ce: yooboo we amyang? ga: tid.
Mung" byu phung: moo" gi ?He: yug gi nya: da" gung ri Mangso da" nya: zoo: nghoid ga: tid yoomo shid: dam kham: moin: da" khyoo: ngoonu" da" tarha" moo bo nyid? ga: tid nyid boem.
Houg: bang: da" dang: zheing: shoug" gyoo: lang" Pilaid khokham gi je gyo: gyoug lo. Houg: yoomo yhoem: khoug: khyoo: doem vang lo" lho: Aseing Yesu ri ?Nang gi kha: mo re" zi nghoid lha"? ga: doem myid.
Nghoid loug we' Aseing Yesu gi jed we" aga: loo: tam" to". 10 Pilaid khokham gi ?Nang ri ngoo gi yo" nhang: kaid da" akhang" we' pyang" zeing: moo yo" baid jen" said pyam wa da" amyeung" we' ci: zi nang asi rhe"? ga: myid.
11 Aseing Yesu phougtu" zigi ?Nang ri Mangsoo ab byid: yoomo za: hid: yhangti" yo" zi nghoid. Houg: yoomo ngoo ri we' re" da" lo, moo ab byid: su: gi yooboo je gyi wa nghoid? ga: tid.
12 Hid: su" ga: tid yoomo Pilaid khokham gi Yesu ri doem lhoid kaid wa da" khyoo: sho: nyid. Nghoid loug we' Mungbyu yi gi he: yug ri doem lhoid kaid nghoid rigi Aseing zoug moo" gi Ketha khokham da" bidnoem anghoid loo. Hang" nghoid loug we' nyang: nya: da" gungdu: ri khokham ga: tid su: gi Ketha khokham ri tu: lhei" su: nghoid- ga: je nyo: lo ago".
13 He: da" dang: ri shoug" gyoo: lang" gi Pilaid khokham gi Yesu ri nghe: shoid khyoo: shu" thu' lo" lho: Lug pyi" myhu" to" da" tarha" gabyam: tho' mo, zhungtang' tho' moo zhoung: jo, nhang. (Hau: lug pyi" myhu" to" da" gabyam: ri Hebre myeing" khyo" gi Gabatha ga: da" joyoo nghoid.) 14 Hau: da" ayo, gi lhid: kaid pui" xangshid" nyid"- bid gung zoo: tu: ri" yo, nghoid bye:. Pilaid khokham gi yu" ge' ?He: yug gi nanu" da" khokham nghoid? ga: Yuda byumyu" yi ri tid.
15 Houg: bang: gi ?Nyang: ri said pyam ge' said pyam ge' baid jen" said pyam ge'? ga: doem nyho: lo ago".
Pilaid khokham gi Nanu" da" khokham phoo ri pyang" zeing: tho' moo baid jen" said pyam noug go" la"? ga: doem myid.
khainjung agyi moo": yi gi ngoonu" moo Ketha khokham mo lid lho: gootu: khokham anyid ga: phougtu" boem.
16 Houg: lang" Pilaid khokham gi Yesu ri pyang" zeing: tho' moo baid jen" said pyam wa shid re"
nyangnu" da" lo, moo jha" ab kaid bye:.
(Mat 27:32-44; Mar 15:21-32; Luk 23:26-43)
Houg: su" nghoid yoomo nyangnu" gi Yesu ri khe: shu" lo" boem bye:. 17 Yesu gi vhugyab boug ga: da" joyoo khyoo:- nya: pyang" zeing: ri vu, lho: yhe: lo". (Hau: da" joyoo ri Hebre myeing" khyo" Golagotha ga: zi nghoid.) 18 Houg: moo Yesu ri pyang" zeing: moo baid jen" said boem bye:. Yesu yo" dage" gootu: byu eig yug ri we' Yesu da" lo, yo shoid moo dayug- lo, koung" shoid moo dayug- pyang" zeing: tho' moo bo baid jen" said boem. Yesu rigi gung" gung moo kaid to". 19 Pilaid khokham gi- xang: yoeb ladoo" mougsoug" lhid" lho: Aseing Yesu da" pyang" zeing: tho' moo tab too" nhang. Hau: da" mougsoug" gi (Yuda byu yi da" khokham Nazared voo byu Yesu ga: zi nghoid.) 20 Yesu ri pyang" zeing: tho' moo baid jen" said da" joyoo gi voogung yo" gye jhang yoomo byu myoo" sho' mo, gi hau: xang: yoeb ladoo" mougsoug" ri re" yo" nghab boem. Hau: mougsoug" ri Hebre myeing"- Latin myeing"- Greek myeing" khyo" lhid" tab to" boem. 21 Khainjung agyi yigi ?Yuda khokham ein: alhid" goo". He: yug gi ngoo gi Yuda khokham nghoid ga: tid su: ein: za: date: lhid" too" ge'? ga: Pilaid khokham ri re" kyo" to" boem.
22 Pilaid khokham gi ?Ngoo lhid" to" khyo" nghoid bye:? ga: doem tid.
23 Gyizoo: yi gi Aseing Yesu ri pyang" zeing: moo bain baid jen" to" thang: ri Yesu da: byisheung: ri myid: du khyo lho: dayug dadu zheing: yu lo" ago". ?Nyangnu" gi nya: thobyi: byisheung: ri nyangnu" me" lab, lho: yu lo" boem. Nghoid loug we' hau: da" byi: gi coeb' khyoo" aboo loo: yo, to" da" byi: nghoid yoomo 24 Gyizoo: yi gi he: byi: ri aceig goo"- me" lab lho: dayu shang ga: nyang: cang" nyang: sham: go" nyid. Gyizoo: yi hid: su" zheing: koid da" khyoo: gi jhoem mungdang: moo
Houg: bang: gi nya: da" byi: ri zheing: gam go".
Nga" da" byisheung ri me" lab, lho yu lo" boem: gyizoo yi gi hid yhang: ti" koid boem ago".
25 Hau: da" uri Yesu da" nya: myhi' yo' nya: myhi' da" nya: no gi Klopha da" yhoem: seing: myhi' Mari yo' Magadala voo mo Mari we' Aseing Yesu da" pyang" zeing: yang moo yab jo, ago". 26 Yesu gi nya: myhi' yo' nyang: jheddab da" cangzoo: phoo yab jo, ziri myang. Houg: yoomo Yesu gi nya: myhi' ri tid. ?He: yug gi re" zoo: nghoid? ga: tid.
27 Hau: thang: ri cangzoo: phoo ri ?He: yug gi re" myhi' nghoid? ga: doem tid. Hau: yo, mo wigi hau: cangzoo: phoo gi nyang: yo' dage" nyid wa nya: yhoem: moo shu" lo".
(Mat 27:45-56; Mar 15:33-41; Luk 23:44-49)
28 Hau: ayo, moo moo" dangain" bain bye: da" khyoo: ri Aseing Yesu gi si' yoomo Jhoem mougsoug" moo bo ziyo' dakhyoo" ti" bue" loo wa shid re" Yesu gi ngoo gyid shed' ga: tid.
29 Hau: joyoo moo gyid jhen: yo" kaid pyeing to" da" yam daloem: jo. Houg: bang: gi panglai: gyid nyoeb thei" moo gyid jhen nyhoin" yu wigi jam pheing" yang: moo tab' lho: Yesu da" nhoid moo yhoin" jhoug boem. 30 Aseing Yesu gi hau: gyid jhen ri dajhi' shug lho: moo" bain bye" ga: tid zoore
vhuloem ri nghue" khyo kaid wigi kang: gyo" loo" khari" bye:.
31 Yuda zoug: myeing ci: mo, gi pyang" zeing: moo baid jen" lhang" too" su: da" khyid ri yug khyau" lho: mang ri yu loo" wa da" amyeung" byid: wa da" shid re" Pilaid khokham ri mho' ago". Nyangnu" hid: su" mho' da" khyoo: gi hau: nyid gi bainthu wim: nyid" nghoid yoomo Yuda Dougno: Bidnyid ri shid: mang doem: ri pyang" zeing: moo alhang" too" nhang: noug yoomo we' nghoid da- hau: Dougno: Bidnyid gi gooki" lid da" gyeungshang: Dougno: Bidnyid nghoid. 32 Houg: yoomo gyizoo: yi gi re" lho: wigi Aseing Yesu yo" dage" pyang" zeing: moo bo jen" lhang" to" da" xangshid" dayug da" khyid ri yug khyau" lho: gootu: dayug da" khyid: ri we' yug khyoug" byid: pyam boem. 33 Nyangnu" Yesu jhang ju" yhe: uri nyang: shid: jo, bye: yoomo Yesu da" khyid: ri gi ayoug, khyoug" loo: nghoid ago". 34 Nghoid loug we' gyizoo: dayug gi Yesu da" namjoug moo lham: toin yo' thau" kaid da" uri dalheung: dam nyang: suid" yo" gyid yau thu' lo. 35 (He: khyoo: ri nanu" we' loem" jeing" loo wa shid re" myojid" myang da" sagsi dayug gi tid kyoo" bye:. Houg: su" tid kyo" da" khyoo: gi deingmain" da" khyoo: nghoid. Hau: yug nyang: nya: dang: main" da" khyoo:- ri nyang: se.) 36 Hid: su" bue" lo da" khyoo: gi nya: shooyoug: dakhaid ri we' gyoug wa anghoid wa ga: Jhoem: mungdang: moo bo ziyo' dakhyoo ti" bue" lo da" khyoo: nghoid. 37 Gootu: da" jhoem dang: moo we' byu yi gi nyangnu" thau" phoug too" su: ri nyangnu" yu" nyid boem wa? ga: boo lhid" to" ga: tid.
(Mat 27:57-61; Mar 15:42-47; Luk 23:50-56)
38 Hau: da" thang: ri Aramathi voo mo Yoseb gi Yesu da" nghain" doem ri yu shung: wa da" shid re" Pilaid khokham jhang moo akhang" yhe: mho'. Yoseb gi Yuda zoug myeing" ci: mo, ri gyug yoomo boin: abang" da" Yesu cangzoo: dayug nghoid nyid. Pilaid khokham amyeung" byid: yoomo Yoseb gi nghain" doem ri yhe: yu bye:. 39 Shid phyang" Aseing Yesu jhang moo myen gung ri re" shau" su: Nikodi we' moora: yo' nam pyo: xu: lhu: lheig to" da" nam pyo: xu: soem" xi: joid: koo: ci: lho: Yoseb jhang moo bo cang yhe: lo". 40 Nya: eig yug gi Aseing Yesu da" nghain" doem ri yu khyo lho: Yuda byumyu" yi da" mang myhoeb thung" jo ziyo' dakhyoo" ti" nam pyo: moora: yo" dage" pain" phyu: yo" thoeb boem. 41 Yesu ri pyang" zeing: moo baid jen" said da" joyoo nam moo khyam daloem jo. Hau: khyam: khoug: moo hang" ri we' amyhoeb' yu" shi" da" loeb seig daloem: jo. 42 Hau: nyid" gi Yuda Byu yi Dougno: Bidnyid ju" yid nghoid yoomo nghain" doem ri jhang moo jo, da" hau: loeb seig moo yhe: kaid to" boem.