12
1 Lhid: kaid da" pui" ju" wa khyug nyid" ca" shi" mo shid: bye: jangmo doem dei to'' lo da" Lazaru nyid da" Bethani voogung khyoo:- Yesu doem ju" yhe: lo".
2 Nyangnu" gi houg: moo Yesu ri myen" xoin: damyoo: lhoem: nyheung' zho" jangmoo- Martha gi dei bo dei nyid. Yesu yo' dage" zoobui" moo zhung: nyid mo, moo Lazaru we' bo nyid.
3 Hau: uri Mari gi gye phoug" dab da" shoem: nam pyo: da" Nardu xu:- agyeing" da parheing" yu lho: Yesu da" khyid: moo joid byid: wigi nya: xam: yo' doem soid' byid. He: nam pyo: da" xu: ngei" gi dayhoem: goin" moo nam pyo: lo.
4 Nya: cangzoo: dayug nghoid da" Yuda Iskarud gi
5 Hid: yhi' nam pyo: da" xu: ri Denari ngei soem" shoo: kyab yo" oung" pyam lho: sho" jhen: mo, ri ciwim agam byid: lha"? ga: tid.
6 Nyang: gi thang: phyang" Yesu ri gyivoo yi da" lo, moo ab pyam wa su: nghoid. Nyang: hid: su" tid da" zigi sho" jhen: mo, ri nheigkhyeig yoomo tid zi anghoid. Khoug" su: nghoid. Nyang: gi ngei thung: voin su: nghoid yoomo ngei ri lhoung gau" khau" yhung: nyid.
7 Yesu gi hau: myiyi: zoo: ri alhu: nhung byid. Nyang: gi ngoo ri myhoeb wa da" ayo, shid re" he: da" nam pyo: xu: ri shoung: to" zi nghoid..
8 Sho" jhen: mo, gi nanu" yo" dage" khanham we danyid nyid. Ngoo koem gi nanu" yo" dage" nyid wa zi anghoid ga: tid.
9 Bethani voo moo Yesu ju" nyid da" khyoo: ri shau" gyo: boem lang" mung" byu phung: moo" gi voo moo jure" boem. Nyangnu" gi Aseing Yesu yoomo za: jure" boem zi anghoid. Aseing wigi doem dei to'' loo nhang: da:- Lazaru ri myang noug yoomo re" zi nghoid boem.
10 Khainjung agyi yi gi Lazaru ri we' said wa ga: soin' nyid boem ago".
11 Khasu" wim gari Lazaru da" khyoo: yoomo mungbyu yi gi khainjung agyi yi ri aloem loo za: Yesu ri te: loem" jeing" lo" boem yoomo nghoid.
(Mat 21:1-11; Mar 11:1-11; Luk 10:28-40)
12 Thang: nyid" moo lhid: kaid da" pui" moo jure" da" mungbyu yi gi Yerusalem voo khyoo: Yesu jure" nyid ziri shau" gyo: boem yoomo
13 Zhainloin: seig kyang joem ri khyau" ci: wigi thu' lo" boem lho: Mangso da" myonhoo: phung" yoeb' ri coung" byid: ge' Mangso da" myeing yo" gyoo" ri" su: gi ngi: lho' nyid: baja"- Israela da" khokham ri Mangsoo: mainkaid byid: baja" o"- ga: yoid' nyho: da" thui: yo' Aseing Yesu ri lhoem: tau yu boem.
14 Yesu gi loozei: dadu: moo zhoung: lho: jure". Houg: gi Jhoem: mungdang: moo tid to" ziyo' dakhyoo ti.
15 Ziun voo we" agyug-
Yu" we' re" da" khokham zeing: gi
Loozei: nu" moo zhoung: lho: juri" bye:.
16 Nya: cangzoo: yi gi hau: yo, moo he: jhoem: dang: ri ase' gyo: boem. Nghoid loug we' Yesu gi phung yoeb myonhoo: yo' cung" nghei' tu: to shau" thang: ri she' he: jhoem: mungdang: gi nya: khyoo: ri tid to" zi yo; dakhyoo" ti" nyang: ri koid abye: go" ziri doem myid boin: so" lo boem.
17 Lazaru ri loeb' khoug: mo khe: thu' yu lho: shid: jang mo dei to'' loo nhang: da" uri bo myang bang: gi Yesu khasu" koid da" khyoo: ri khyang" lo" shid boem.
18 Hau khyoo: ri shoug" gyoo: boem yoomo shoug" gyoo: mo, dangain" gi Yesu ri tau yu wa ga: jure" boem da" zi nghoid.
19 Pharishe" yen, gi ngoonu" moo oung: lo" da" khyoo: dajhi' we' aboo. Yu" ge' mougmyid daloem: goin" nya: thang: moo cang lo" boem bye: ga: nyang: cang" nyang: tid go" nyid boem.
20 Hau: pue" uri noku yhe: da" byu yi akhoug: moo Greek byumyu" dayham" we' bo
21 Nyangnu" gi (Galile moug mo Besaida voo byu ) Philib jhang khyoo: yhe: lho: wigi Sara: we"- ngoonu" gi Aseing Yesu ri myang: nau- ga: yhe: tid boem.
22 Philib gi Andre jhang moo yhe: lho: hau: khyoo: ri tid kyo". Hau: thang: ri nya: eig yug gi Aseing Yesu jhang moo zheing: yhe: lho: hau: khyoo: ri tid kyo" to".
23 Yesu phougtu" da" zigi byu nya: zoo: da" myonhoo: phung" yoeb' bang: thu' loo wa da" ayo, ju" bye:.
24 Deing" deing nanu" ri ngoo tid ba- gug cab' gi myidjang moo agyo"- aboeb abyo, nghoid rigi dacab tho' moo myo: loo zi anghoid. Boeb yoin" lo" nghoid ri koem gi ashi" myoo" sho' ri yo" bue" loo nhang: zi nghoid.
25 Nyang: nya: kangso ri jheddab mo hang" nghoid loug kangso soem" wa nyang: nya: kangso ri ajheddab she: pyam su: hang" nghoid loug we' nya: da" kangso ri khanham we' yo" zoem: ci: su: nghoid wa.
26 Ngoo nyid da" jo, yoomo nga" deizoo: we' yo" nyid wa shid re" nga" moo" voin noug su: gi nga" thang: moo cang ca. Nga" moozoo" ri voin vu, su: hang" nghoid loug ri nga" phoo we' coung" byid: wa zi nghoid.
27 Ngoo gi nheigloem: gye seing" kho" nyid ngoo khasu" ein: tid loo: wa lha". Phoo we"- ngoo ri he: da" kyikhyeug yaukhi" yo, mo loid byoin loo" nhang: we' ein: wigi tid wa la". Nghoid loug we' ngoo gi he: da" kyikhyeig yaukhi" ri kham: yu wa shid re" gyoo" re" zi nghoid.
28 Phoo we"- re" da" myonhoo: phung" yoeb' ri dathu' ri" nhang: we' ga: tid nyid.
Houg: lang" mougkhung: mo thui: thu' lo zigi ngoo gi nya: myeing ri myonhoo: phung" yoeb' ri thu' ri" nhang: bye:. Thang: ri dalheung: we doem thu' ri" nhang: shi" wa" ga: tid.
29 Hau: joyoo moo yab jo, da" mungbyu yi gi hau: da" thui: ri shoug" gyoo: lho: dayham" gi moug doem doem: myheing ga: dayham" gi Aseing ri moug: lagyoo: yi dang: re" tid zi nghoid ga: tid nyid boem.
30 Yesu gi he: da" thui: thu' lo zigi nga" shid re" anghoid. Nanu" da" shid re" danghoid' ga: tid.
31 He: mougmyid gi akhid" lang" tarha" dang: phyed zi thoung" shau" nyid abye:. Mougmyid ri vhoeb khang" nyid da" su: we' akhid" nyang: keung" pyam zi shau" wim bye:.
32 Ngoo gi myidjang tho' moo tu: zhug lhang" to" zi shau" nyid uri byu dangain" ri nga" jhang khyoo: lang: yu wa zi nghoid ga: tid.
33 (Hid: su" ga: tid da" zigi nyang: khasu" koid shid: kham: wa da" khyoo: ri avoid ayoeb khyo" toin" shid nyid da" khyoo: nghoid.)
34 Byu yi gi Meshia khanham we' kangso dadei nyid ga: Moshe tarha" moo tid to". Houg: su" nghoid ri byu da" nya: zoo: gi khasu" wim wigi se' jen" lhang" too" wa lha?Hau: byu da" nya: zoo: gi kha: yug nghoid lha"? ga: myid: ago".
35 Yesu phougtu" da" zigi bid bang gi nanu" moo daso date: jo, loo- wa. Nanu" ri mougcoid alo nghoeb' pyam wa da" shid re" bidbang jo shi" da" uri so" yen" ge. Mougcoid khoug: moo so" yen" mo gi nyang: nyang: kha: khyoo: so" lo" zi asi nghoid ago".
36 Houg: su" nghoid yoomo bidbang jo, shi" da" uri hau: bidbang ri loem" jeing" ge. Houg: su" nghoid ri za: nanu" gi bidbang da" byu yi bui" wa nghoid? ga: tid.
Hid: su" ga: bain tid thang: ri Yesu gi nyangnu" jhang mo phang: gau" loo" bye:.
37 Nyangnu" da" shidkhoin" moo mau" pho" moozoo"- myoo" sho' zei: shug nghoid loug we' nyangnu" gi Yesu ri aloem" jeing" boem.
38 Hid: su" bue" da" khyoo: gi Lapi: Esaia tid to" khyoo: zung: loo wa yoomo bue" lo zi nghoid.
O" Aseing we"- kha: yug gi ngoonu" kho" kyo" da" khyoo: ri loem" jeing" boem lha".
kha: yug ri Mangso yoem: vhoo" phung" yoeb' toin" shid lha".
39 Houg: yoomo nyangnu" gi atho' oung: loem" jeing" zi nghoid. Khasu" wim gari Lapi: Esaia hid: su" tid to".
40 Nyangnu" abyang" yu yu gi nyangnu" da" myojid" joem gi ayo" myang wigi
Nyangnu" da" nheigloem: gi a oung: se' gyoo: wa ziyo'
nyangnu" nya: jhang khyoo: ayo" tau" loo wa shid' re"
Mangsoo gi- nyangnu" da" myo, ri jed nhang: lho:
nyangnu" nheigloem: khoem" ri myhid" too" bye: ga tid.
41 Esaia gi Aseing Yesu da" myonhoo: phung" yoeb' ri shau" myang yoomo Aseing da" khyoo: ri hid: su" ga: tid zi nghoid.
42 Yuda zoug: myeing" ci: mo, myoo" sho' nyang:- Yesu ri loem" jeing" lo boem. Houg: su: nghoid loug we' Pharishe" yi yoomo tarha" jung mo khaid thu' pyam wa zi gyug yoomo nyangnu" loem" jeing" da" khyoo: ri bang bang ayhen: yu boem nghoid da.
43 Nyangnu" gi byu yi coung" byid: wa ziri Mangso coung" byid: wa tho' moo je vho: ngei nyid ago".
44 Yesu phougtu" da" zigi ngoo ri loem" jeing" su: gi ngoo ri za: anghoid. Ngoo ri nhang: kaid da" yug ri we' bo loem" jeing" su: nghoid.
45 Ngoo ri myang su: gi ngoo ri za: anghoid. Ngoo ri nhang: kaid da" Aseing ri we' myang zi nghoid bye:.
46 Ngoo ri loem" mo dangain" gi mougcoid khoug: moo anyid loo: wa shid re" ngoo gi bidbang khyo" nyang: mougmyid moo ri" bye:.
47 Nga" Mungdang: ri alhoem: yu su: ri ngoo gi dang: aphyed'- Mougmyid: byu yi ri dang: phyed wa da" shid re" ngoo gyoo" re" zi anghoid. Mougmyid byu yi ri khyoid yu wa shid re" ngoo gyoo" re: lo zi danghoid.
48 Ngoo ri alhoem yu lho: nga" mungdang: akham: yu su: ri dang: phyed wa dayug nyid. Houg: nga" Mungdang: wigi nyang:- hau: yug ri lo" thang da" bidnyid moo tarha" agyi khyo" dang: phyed wa zi nghoid.
49 Khasu" wim gari Ngoo gi ngoo nya: amyeung" khyo" kho" kyo" da" khyoo: anghoid. Ngoo ri nhang: kaid da" phoo Mangso da" amyeung" yo' dakhyoo" ti" kho" kyo" khyoo: danghoid.
50 Phoo Mangso da" amyeung" zeing: gi apyaid' ato: da" kangso yo" byid: da" zi ngoo se. Houg: yoomo ngoo kho" kyo" da" khyoo: dangain" gi pho da" amyeung" yo' dakhyoo" ti" za: date: tid zi nghoid.