5
1 Yoo" mo, di mo, we' nga" da" thui: ri tam" gyoo: ge'. Nanu" gi nanu" nyang: moo ju" lo nyid da" sho" jhen kyikhyeug wa khyoo: yoomo jha" yoid ngau nyid loo: ge
2 Nanu" da" ziyoo jonu" jo, nu" joem gi yoem: lo" nyid bye:- nanu" da" mi byi: joem ri we' nhau zo: shoin pyam byid bye:.
3 Nanu" da" ngei sheing: joem we' zo wigi zo: shoin pyam byid: bye:. Hau" zoo joem gi nanu" shoid khyo" sagsi joem nghoid nyid wigi nanu" da" gungshoo" ri we' myi: yhang: ti" nge" joem: loo" nhang: wa hid: lo" thang da" bidnyid ayo, joem shid re" nanu" gi jonu" ziyoo ri dazheung" to" nyid goonhung: lha".
4 Nanu" gi nanu" nya: da" tung' yoo yoothung" joem moo moo" zei: nyid da" byu yi gi ce" vhookung: phoug" we' ashang" kaid boem. Nyangnu" nheig yoo: nheig jhug nyho: nyid thui: ri tam" gyo: yu" ge. Nanu" da" shivoo: shiloem, shung: byid: nyid mo da" thui: gi athang agoin da" yoem: moo" bo da" Aseing Mangso nookhyab' moo khyang: vang loo" bye:.
5 He: mougmyid moo nanu" da" byunyid byuyab khyoo: gi yoo" zoo: yoo" shug nyid pyoo: yab, pyo: lho: pyo: khyoo: aja: ja: yo' byeung" jo. Nanu" gi said pyam wa da" bidnyid shid re" nyang: nya: da" gungdu: ri myhug, to" boem abye: go".
6 Nanu" gi deing byeung" su: ri dang: phyed lho: said pyam abye: go". Nyang: gi nanu" ri thug theung nyid su: anghoid.
7 Hougsu" nghoid yoomo mangnhung" yi we"- Nanu" gi Aseing gyoo" lo da" ayo, ju" sho' zeing: kham lho: nheig byu zoore dalang" nyid ge. Yoo thung" phug su: gi nya: yoo thung" mo phoug" dab da" amyoug: ashi" ri yo" yu sho- zain moug: vo shid" lo jangmo zi lid" jhin" yu: moo ju" sho' yoem: kaid zeing: shang" lho: lang" nyid.
8 Nanu" we" zeing: shang" lho: nheig byu lang" nyid ge' Aseing Yesu doem gyoo" loo wa da" ayo, gi jhang loo bye: yoomo nanu" geing: geing: teing teing dalang" nyid ge.
9 Mangnhung" yi we"- nanu" nyang: gung nyang:- Mangso dang: phyid zi ashoug" wa shid re" nanu" nyang: cang" nyang: dayug gi gootu: dayug ri yooboo afoin: go" nyid goo"- tarha" agyi phoo' gi khoem" moo" duang: moo yab, jo, bye:.
10 Mangnhung" yi we"- Mangso da" myeing yo' kho" kyo" da" lapi: yi da" khyoo ri myed boin myed so" nyid ge'. Nyang nu" gi shen" yhen zi shau" da" uri nheigloem: sheung: ziyo' yo" kham zeung: nyid boem da" khyoo: ri khoo" shid: yu" yu ge.
11 Nyang nu" gi yo" kham: zeing: mo, nghoid yoomo nyangnu" ri ngi: lhoo' mo, ein: ngoonu" tid boem bye:. Yoba khasu" kham zeung: khyoo: ri we' nanu" shau" gyo: yu" boem bye:. Lo" thang moo Aseing gi nyang: ri khasu" coung: goin, khyoo: ri nanu" si' bye:. Khasu" wim gari Aseing gi nheig khyeug wigi athang agoin myed yo' byeung" su: nghoid nyid.
12 Nga" mangnhung" yi we"- nanu" jham tang: go" khyoo: gi dajhi' we' akoid goo"- mougkhung: ri we' anghoid- myidjang myeing yu lho: we' anghoid- ce" noem myeing ri lang: lho: we' jham atang: goo". Nanu" da" dang: gi nghoid ga: lang" gi nghoid bye:- anghoid ga: lang" we' anghoid baja"- houg su: nghoid lang" gi nanu" ri Mangso dang: kho' zi ashau" boem wa.
13 Nanu" mo dayug yug noo phyoo" kyikhyeig phu" nyid go" la". Nyang gi akyu" mho' nyid baja"- dayug yug gi myid pyo: nyid go" la". Nyang: gi coung" nghei jikhoin" khoin" nyid baja".
14 Nanu" mo dayug yug gi noo phyoo" shau" nyid go" la". Nyang: gi phung sayen" yi ri khi: baja" Hau" phoug: sayen" yi gi nyangnu" shid re" akyu" mho' nyid: goo" baja". Nyang nu" gi Aseing da" myeing khyang" yo' nyangnu" ri mainkaid xu: joid byid: goo" baja".
15 Loem" jeing" da" nheigloem: yo' akyu" mho' nyid su: da" dang: gi noo, su: ri yo" ge loo nhang: lho: Aseing gi nyang: ri ge loo" nhang: lho: nyang: shoid vhang: da" yooboo joem ri we' khyoid pyam byid: zi shau" wa nghoid.
16 Hougsu" nghoid yoomo nanu" gi nyang: cang" nyang:- nyang: nya: da" yooboo ri tid thu mho' sang: go" lho: dayug shid re" dayug- akyu" mho' byid: go" nyid ge. Houg: su" koid lang" nanu" da" noo phyoo" kyikhyeig mo ge yang" zain: loo wa zi nghoid. Deingmain" su: da" akyu" mho' yoid thui: gi yo" bue" loo" nhang: da" yoem: myoo" sho' bo nyid.
17 Elia gi ngoonu" yo' dakhyoo" te" da" xangsu: byu za: date: nghoid loug we' nyang: gi moug: avoo loo: wa shid re" nheigloem: yoem: moo" khyo" akyu" gyi" sho' mho' kaid. Houg: su" akyu" mho' yoomo mougmyid tho' moo soem" zain lhammoo" khyug" khyab thang sho' moug: avoo khari" loo.
18 Hau: thang: ri Elia akyu" doem mho' kaid lang" gi mougkhung: mo moug: gi doem vo lo lho: myidjang gi amyoug: ashi" ri doem yug loo nhang.
19 Nga" mangnhung" yi we"- nanu" mo dayug yug gi deingmain" da" khyo: mo khyoo: vhang: vhang: lo" lho: gootu: dayug yug ge" doem shu" tau" ju" lo ri
20 Hougsu" yooboo shoid su: dayug yug ri khyoo: vhang: lo" jangmo doem yo" khe: shu" loo su: gi hau: yug da" kangso ri shid: loo" bye: jang" moo doem yo" khyoid yu lho: nya: yooboo dangain" khyoid pyam byid: zi shau" wa shid re" voin vu, zei: so' byid: su: nghoid ein: myid boin: nyid ge.