2
Nga: mangnhung" yi we"- nanu" gi ngoonu" da" myonhoo: phung" yoeb, da" Aseing Yesu Khristu ri loemkhau: loem" jeing" mo, nghoid ziyo' dakhyoo" ti" byu ri myonhoo: akhyen: goo". Gyeing" nyang: nanu" da" zoebphoung: moo vang lo da byu eig yug mo dayug gi sheing: lo, pain" pain" ci: lho: byi: gi void ci: wigi gootu: dayug gi sho" jhen su: nghoid yoomo byi joid, lhoo" joid te" void, ci: zi nghoid ein: shang. Nanu" gi byi: gi mi gi void ci: su: ri gi yhau: gyen: koid lho: hid: ge thang da" joyoo moo zhung: we' ga: tid lho: wigi sho" jhen su: rigi thei: joyoo moo yab, jo, shi" we' houg: su" anghoid lang" gi nga" khyid: yang: phyang" gung moo zhung: we' ga: tid nghoid rigi Nanu" da" akhoug: moo nyang: cang" nyang: myonhoo: khyen: go" lho: age khyo" zei: so' nyid zi anghoid goo" la".
Jheddab da" mangnhung" yi we"- tam" gyo: yu" ge'. Loem khau: khyoo: moo joeb byeung" mo, bui: wa shid re" Aseing ri jheddab mo, shid re" gi dang: theung to" mungdain moo yo" vang loo" wa shid mo Aseing gi mougmyid mo sho" jhen: mo, ri khyen: yu zi nghoid. Nghoid loug we' nanu" gi sho" jhen mo, ri aphoug" goo" nhung. Yoo" mo, di mo, gi nanu" ri zeig zo: lho: tarha" agyi yi da" shid moo she: khyoid yhe: boem anghoid goo" la". Nyang nu" yo" kham: yu bye: da" phoug" dab myeing khyang" ri juang" yi pyam bye: boem anghoid goo" la".
Nanu" gi nanya: yhoem: kyoo" cang" ri nanya: gung yo' dakhyoo" ti" jheddab goo" ge' ga: bo da" dang: ri cang lo" rigi ge zi nghoid. Nghoid sho loug we' myonhoo: dakhyen: nyid rigi yooboo yoo" mo, nghoid shi" lho: tarha" shoid mo, nghoid ga: dang: phyed zi shau" boem shi" nghoid nyid. 10 Tarha" daloem: ri shoid su: hang" nghoid loug we' Dang: Theung Khoin" ri shoid nyid su: nghoid. 11 Khasu" wim gari sube" myi: alhoid? ga: tid to" da" Aseing gi byu asaid' ga: we tid too". Nang gi sube" myi: alhoid nghoid rilang" byu said nghoid rigi tarha" shoid su: nghoid bye:. 12 Hougsu" nghoid yoomo lhoid pyoin kaid da" tarha" yo' dakhyoo" ti" dang: phyed zi shau" wa bang: yhang: ti" tid sang: voin vu, yhe: loo" ge. 13 Khasu" wim gari Mangsoo gi nheig ase' khyeig su: ri nheig akhyeig loo: za: dang: phyed byid: loo wa zi nghoid. Nghoid loug we' nheigkhyeig shoomyen: khyoo: gi tarha" dang: phyed khyo: tho' moo yoem: je bo.
14 Nga: mangnhung" yi we"- byu dayug yug gi loem" jeing" bye ga: tid nyid nghoid loug we' moozoo" abo nghoid ri gi ce: akyu" boo wa lha". Hau: yug loem" jeing" khyoo: gi nyang ri yo" khyoid yu wa la". 15 Dangtu tid ba ein: rigi nanu" da" mangnhung" yi void noem zo: noem ayoo"- sho" jhen: nyid ziri myang lho: 16 Nanu" gi nyangnu" ri Mangsoo nanu" ri mainkaid byid: baja"- loem loem nyid ge'- gyi: gyi: zoo: ge'? ga: tid lho: nyangnu" moo ca" nyid zi joem ri abyid: nghoid rigi ce" akyu" boo wa lha". 17 Loem jeing" khyoo: we' houg: yo' dakhyoo" ti" nghoid. Moo" zoo" abo da" loem" jeing" khyoo" gi shid: mang nghoid nyid.
18 Nghoid loug we' byu dayu yug gi loem" jeing" nheigloem: bo lho: gootu: dayug gi moozoo" bo ga: dang: gain' ze nghoid rigi moozoo" abo da" loem" jeing" khyoo: ngoo ri toin" shid we' ngoo koem gi moo" zoo" khyo" wigi nga" loem" jeing" khyoo: ri toin" shid ba- ein: ngoo tid ba. 19 Mangsoo gi dayug kyeing" danyid ziri nang aloem" jeing" la". Nghoid bye: yu joem lang" hau: ziri loem" jeing" gyoug nain" nyid boem. 20 Hau: tho' moo gootu: hang: su: we"- moozoo" abo da" loem" jeing" khyoo: gi akoem: za: danghoid ziri si' nau la". 21 Ngoonu" da" nya: phoug" Abraham gi Mangsoo vho ngei da" khyoo: ri khasu" kham: yu bye: lha". Nyang: gi nya: zoo: Isag ri Mangso da" phoin: tho' moo dang ke" lho: xoin" to" pyam da" moozoo" khyoo" yo" yu" myang bye:. 22 Nya: loem" jeing" khyoo: yo' moozoo" gi tei" xo' go" to" da" khyoo: ri nang asi amyang la". Moozoo" koid yoomo nya: da" loem" jeing" khyoo: gi joeb, byeung" loo bye:. 23 Houg: su" nghoid yoomo Abraham gi Mangsoo ri loem" jeing" khyoo: yoomo Mangsoo gi nyang ri deingbyeing" su: ga: soin: byid bye ga: da" jhoem: mungdang: gi deung loo bye:. Houg: yoomo Abraham gi Mangso da" bidnoem zeing ga: myheing byid: zi we shau" bye:. 24 Hougsu: nghoid yoomo byu gi loem" jeing" khyo" za: anghoid- moozoo" khyo" we' Mangsoo vho: da" khyoo: ri yo" kham: yu ziri nanu" se' bye:.
25 Shava myhi' Rahab da" khyoo: we' houg: yo' dakhyoo" ti" nghoid. Nyang: gi Israela byumyu" yi da" joo" yu" mo, ri loem: kham: yu pang: thoug yu lho: khyoo: goo" khaid khyo" doem yo" gau" nhang: kaid. Houg: su" koid yoomo moozoo" zei: yoomo deingmain" ga: Mangso soin: byid bye:. 26 Houg: yo' dakhyoo" ti" gungdu: moo kangso aboo lang" gi shid: mang nghoid nyid yhang: ti" moozoo" abo da" loem" jeing" khyoo: we' shid: mang nghoid nyid.